Zotërimi Doktrinor: Lluka 22:19–20

Përfytyro sikur sjell një shoqe në kishë e cila nuk di asgjë për fenë e organizuar ose Jezu Krishtin. Pas mbledhjes së sakramentit, ajo pyet: “Cili ishte qëllimi i kalimit të bukës dhe ujit te të gjithë me radhë?”

1. Përgjigju për pyetjen vijuese në ditarin tënd të studimit:

• Si do t’ia shpjegoje shoqes sate ordinancën e sakramentit?

Kujto që gjatë Darkës së Fundit me dishepujt e Tij, Shpëtimtari themeloi ordinancën e sakramentit (shih te Mateu 26:26–30 ; Marku 14:22–25 ; Lluka 22:17–20). Lexoje fragmentin e shkrimeve të shenjta për zotërimin doktrinor te Lluka 22:19–20 .

Në ditarin tënd të studimit përdor një laps për të shkruar lehtë referencën vijuese të shkrimeve të shenjta dhe frazën kyç të shkrimeve të shenjta: “ Lluka 22:19–20 : Jezu Krishti urdhëroi: merrni sakramentin ‘në përkujtimin tim’.”

Përsërite me zë të lartë këtë referencë të shkrimeve të shenjta dhe frazën kyç të shkrimeve të shenjta. Më pas fshi dy fjalë ose numra dhe ushtrohu duke thënë përsëri referencën e shkrimeve të shenjta dhe frazën. Përsërite po këtë model, duke fshirë fjalë ose numra dhe duke thënë përmendsh referencën e shkrimeve të shenjta dhe frazën kyç derisa të gjitha fjalët dhe numrat të fshihen. Më pas shkruaj sa më shumë që arrin të mbash mend nga kjo referencë e shkrimeve të shenjta dhe frazë kyç.

Shqyrto shkurtimisht parimet e marrjes së njohurisë shpirtërore (shih Dokumenti Bazë i Zotërimit Doktrinor [2022], “Marrja e Njohurisë Shpirtërore”). Zgjidh njërin nga tri parimet e marrjes së njohurisë shpirtërore dhe skico një simbol apo figurë të thjeshtë që ti e ndien se e përfaqëson atë.

Tani ushtro përdorimin e parimeve të marrjes së njohurisë shpirtërore dhe të doktrinës të dhënë mësim te Lluka 22:19–20 duke lexuar skenarin vijues dhe duke u përgjigjur për pyetjet në vijim.

Elona është 15 vjeçe, ka qenë anëtare e Kishës gjithë jetën e saj dhe gjithmonë ka marrë pjesë rregullisht në mbledhjet e saja të Kishës. Ajo jeton me mamanë dhe gjyshen e saj, që janë një shembull i shkëlqyer për të. Këtë të diel që kaloi, Elona ishte veçanërisht e interesuar për temat e folësve në mbledhjen e sakramentit. Çdo folës tregoi përvoja vetjake të fuqishme dhe të sinqerta për marrjen e sakramentit dhe mënyrën se si ai ndihmon në rritjen e ndikimit të Shpëtimtarit në jetën e tyre. Kjo e ka bërë atë të mendojë se si ajo nuk ka pasur shumë përvoja të ngjashme vetjake. Ajo e pranon se gjatë sakramentit shpërqendrohet shpesh nga telefoni i saj ose nga ajo që të tjerët po bëjnë, ose mendon se sa shpejt mund të shkojë në shtëpi që të marrë një sy gjumë.

• A je ndier ti ndonjëherë kështu?

• Sipas teje, përse njerëzit ndihen ndonjëherë në këtë mënyrë?

Në ditarin tënd të studimit krijo një titull për secilin nga tri parimet e marrjes së njohurisë shpirtërore: 1) vepro me besim, 2) shqyrtoji konceptet dhe pyetjet me një këndvështrim të përjetshëm dhe 3) kërko kuptueshmëri të mëtejshme nëpërmjet burimeve të caktuara në mënyrë hyjnore.

Nën çdo titull shkruaj mënyra specifike se si parimi i marrjes së njohurisë shpirtërore mund ta ndihmojë Elonën në situatën e saj. Për shembull, ti mund të sugjerosh mënyra specifike se si ajo mund të veprojë me besim, të tregosh mënyrën se si mbajtja e një këndvështrimi të përjetshëm mund të jetë e dobishme në situatën e saj dhe të sugjerosh disa burime të caktuara në mënyrë hyjnore që ajo mund t’i përdorë për udhërrëfim dhe drejtim.

2. Përgjigju për pyetjet vijuese në ditarin tënd të studimit:

• Çfarë do t’i këshilloje Elonës të niste të bënte për t’i kaluar shqetësimet e saj?

• Si mund ta përdorësh secilin prej tri parimeve të marrjes së njohurisë shpirtërore për ta ndihmuar Elonën?

Nëse ke nevojë për ndihmë për t’i zbatuar këto parime të marrjes së njohurisë shpirtërore, merr parasysh pyetjet vijuese.

• Çfarë këshille do t’i jepje Elonës që mund ta ndihmojë atë të ketë një përvojë më të mirë të marrjes së sakramentit?

• Çfarë mund ta pengojë atë për t’i bërë këto ndryshime? Si mund t’i kapërcejë ajo këto pengesa?

• Çfarë pyetjesh mund t’i bëje Elonës për ta ndihmuar atë të shohë situatën e saj me një këndvështrim të përjetshëm? Përse do t’i zgjidhje ato pyetje?

• Çfarë jepet mësim te Lluka 22 dhe në shkrime të shenjta të tjera ose nga udhëheqësit e Kishës që mund ta ndihmonte Elonën?

• Ku tjetër mund të drejtohet Elona për ndihmë për të përmirësuar përvojën e saj të marrjes së sakramentit?