Kabanata 49
Ang Unang Sacrament
Kailangan ni Jesus at ng Labindalawang Apostol ng lugar para makapaghapunan sa Paskua. Pinaghanap ng Tagapagligtas ng silid sina Pedro at Juan at pinatiyak na handa na ang lahat sa hapunan.
Nakakita sila ng silid at naghanda ng hapunan.
Nagpunta roon si Jesus at lahat ng Apostol. Pinagsaluhan nila ang hapunan ng Paskua.
Nagbigay ng sacrament si Jesus sa Kanyang mga Apostol sa unang pagkakataon. Dumampot Siya ng tinapay, binasbasan ito, at pinagpira-piraso. Sinabi Niya sa mga Apostol na kainin ang tinapay.
Sinabi sa kanila ni Jesus na alalahanin ang Kanyang katawan nang kainin nila ang tinapay. Hiniling Niya sa kanila na alalahanin na mamamatay Siya para sa kanila.
Nagbuhos ng alak sa saro si Jesus. Binasbasan Niya ang alak at sinabi sa mga Apostol na inumin ito.
Sinabi ni Jesus sa kanila na alahahanin ang Kanyang dugo nang inumin nila ang alak. Hiniling Niya sa kanila na alalahanin na magtitigis Siya ng dugo at magdurusa para sa mga kasalanan ng lahat ng tao.
Sinabi rin ni Jesus sa mga Apostol na malapit na Siyang patayin ng masasamang tao. Labing-isa sa mga Apostol ang labis na nalungkot. Mahal nila ang Tagapagligtas at ayaw nilang mamatay Siya. Alam ni Jesus na tutulungan ng isa sa mga Apostol ang masasamang tao. Ang pangalan niya ay Judas Iscariote.