Mensahe sa Unang Kapangulohan

Kami mopahalipay kanimo sa maanindot nimo nga kahigayonan nga mamahimong usa ka misyonaryo alang sa Ang Simbahan ni Jesukristo sa mga Santos sa Ulahing mga Adlaw. Walay mas maagnihon o importante nga trabaho kay sa pagpundok sa Israel.

Ang Isangyaw ang Akong Ebanghelyo gituyo aron sa pagtabang kanimo nga mahimong mas andam, mas hingkod nga misyonaryo sa espirituhanong paagi. Kini gituyo usab aron sa pagtabang kanimo nga mahimong usa ka mas epektibo nga magtutudlo. Kami nag-awhag kanimo sa paggamit niini sa matag adlaw sa imong personal nga pagtuon ug pagtuon uban sa kompanyon. Kami nag-awhag usab kanimo sa paggamit niini diha sa inyong mga miting sa konseho sa district ug sa mga komperensiya sa zone. Tun-i ang gitudlo nga mga kasulatan ug pagkat-on sa doktrina ug mga baroganan.

Kami nag-imbitar kanimo sa pagkab-ot og bag-ong pagbati sa pasalig nga moabag sa atong Amahan sa Langit sa Iyang mahimayaon nga buhat. Ang matag misyonaryo adunay importante nga papel sa pagtabang “sa pagpahinabo sa pagka-imortal ug kinabuhi nga dayon sa tawo” (Moises 1:39).

Ang Ginoo mopanalangin kanimo samtang ikaw mapainubsanon nga mopahinungod sa imong kaugalingon sa pagserbisyo Kaniya. Hinaot nga imong makaplagan ang hingpit nga kalipay ug kamaya samtang ikaw maghago sa taliwala sa mga anak sa Langitnong Amahan.