Tun-i kag Itudlo ang Ebanghelyo ni Jesucristo

Samtang nagahanda ka sa pagtudlo, rebyuha ang impormasyon parte sa tagsa ka tawo sa Iwali ang Akon Ebanghelyo nga app. Maghimo sang lesson plan base sa mga panginahanglan sang tawo. Pamensara kon ano ang dapat niya mahibal-an kag mabatyagan samtang nagatudlo kamo. Padakuon sang Espiritu ang imo mga pagpaninguha samtang ginahatagan mo sang tiyempo ang pagpreparar kag pagplano.

Ari ang pila ka mga pamangkot nga dapat mainampuon ninyo nga binagbinagon sang imo companion samtang nagahanda kamo sa pagtudlo.

• Ano nga imbitasyon ang aton ihatag para buligan ang tawo nga magpatubo sang pagtuo kay Cristo kag magprogreso? Ang mga imbitasyon amo ang paagi para mabuligan mo ang mga tawo nga maghinulsol kag maeksperiyensyahan ang “gahum sang Manunubos” (Helaman 5:11). Pamensara ang progreso, sitwasyon, kag panginahanglan sang tawo. Dayon lakipi sang isa ukon madamo pa nga imbitasyon ang imo lesson plan.

• Ano nga mga doktrina kag prinsipyo ang makabulig sa tawo nga tumanon ang pangako nga ginapahimo naton sa iya? Hibaloa sing mainampuon kon ano nga doktrina kag mga prinsipyo ang makabulig sa mga tawo nga maintiendihan kon ngaa importante sa ila kag sa Ginuo nga tumanon nila ang ila mga pangako.

• Paano naton buligan ang ina nga tawo nga matun-an ang doktrina? Sa paghanda sa pagtudlo sang doktrina, iplastar kag isulat ang kabilogan sang imo itudlo sa mga leksyon 1–4. Ihanda ang mga pamangkot, balaan nga mga kasulatan, mga halimbawa, kag nagakabagay nga media nga makabulig sa tawo nga maintiendihan ang imo ginatudlo. Tan-awa sa kapitulo 10 ang impormasyon kon paano mo panamion ang imo pagtudlo.

• Ano nga mga bugay ang ginpromisa sang Dios sa pagbaton kag pagtuman sang mga pangako? Samtang ginatun-an mo ang doktrina, pangitaa ang mga bugay nga ginpromisa sang Dios. Samtang nagatudlo ka, magpromisa sang mga bugay kag magpamatuod parte sa mga ini.

• Sin-o nga mga miyembro ang pwede magpartisipar? Sa semanal nga coordination meeting, hibaloa kon sin-o nga mga miyembro ang makabulig sa imo tudlo kag suporta sa sina nga tawo. Antes sang leksyon, hambali na ang ila partisipasyon. Tan-awa sa kapitulo 10.

• Ano ang pwede naton himuon para buligan ang mga tawo nga tumanon ang ila mga pangako paghalin naton? Bisitahi sila sing makadali adlaw-adlaw para mabuligan sila nga tumanon ang ila mga pangako. Magpangita sang pamaagi para paentrahon ang mga miyembro sa pagbulig sa mga ginatudloan ninyo nga tumanon ang ila mga pangako. Sa sining pagbisita, pwede ninyo basahon ang isa ka kapitulo sa Libro ni Mormon ukon iban pa nga balaan nga kasulatan. Kon wala ginatuman sang inyo ginabisitahan ang ginpangako niya sadto, mas maayo nga buligan ninyo anay sia sa sinang pangako antes maghatag sang bag-o nga imbitasyon. Tan-awa sa kapitulo 11.

• Paano naton sila mas mabuligan sa dason? Pagkatapos sang pagtudlo, timbanga ang eksperiyensya sang mga tawo nga inyo ginatudloan. Nagatubo bala ang ila pagtuo kay Cristo? Nabatyagan bala nila ang Espiritu? Nagahinulsol bala sila kag nagahimo kag nagatuman sang ila mga pangako? Nagapangamuyo bala sila, nagtuon sang Libro ni Mormon, kag nagasimba? Magplano para buligan sila.

Nga nagahambal sa tanan nga elder kag sister, ang Unang Pangulohan kag Korum sang Dose ka Apostoles nagsiling:

“Ang aton katuyuan amo ang pagtudlo sang mensahe sang ginpanumbalik nga ebanghelyo sa paagi nga magatugot sang Espiritu nga tuytuyan ang mga misyonero kag mga ginatudloan. Importante gid nga tun–an ang mga konsepto sang mga [leksyon], pero indi ini dapat nga itudlo paagi sa saulado nga presentasyon. Ang misyonero dapat magbatyag nga hilway sia sa paggamit sang iya kaugalingon nga mga pulong suno sa inspirasyon sang Espiritu. Indi sia dapat maghatag sang saulado nga pamulongpulong, kundi maghambal gikan sa iya tagipusuon sa iya kaugalingon nga mga tinaga. Pwede niya nga indi pagpasunuron ang mga leksyon, nga ihatag kon ano inang inspirado sia nga himuon, suno sa mga interes kag mga panginahanglan sang [tawo]. Nga nagahambal gikan sa iya kaugalingon nga pagtuo kag sa iya kaugalingon nga mga pulong, dapat sia magpamatuod sang kamatuoran sang iya mga pinanudlo.”

Litrato

mga misyonero nga nagaistorya sa tawo

Magtudlo kag Mag-imbitar suno sa mga Panginahanglan sang Indibidwal

May ligwa ka sa pagtudlo sang mga leksyon sa pamaagi nga makabulig sa mga tawo nga maghanda sing lubos para sa ila bunyag kag kompirmasyon. Kon ano nga leksyon ang imo itudlo, san-o mo ini itudlo, kag kon ano kalawig ang imo ihatag diri nagadepende sa panginahanglan sang tawo nga imo ginatudloan kag sa giya sang Espiritu. Halimbawa, kon magtudlo sa mga tawo nga wala sang Kristiyano nga ginhalinan, pwede ka magsugod paagi sa pagbulig sa ila nga magpatubo sang mas dako nga koneksyon sa Amay nga Langitnon kag sang pag-intiendi sang Iya plano (tan-awa sa “Teaching People Who Do Not Have a Christian Background” sa kapitulo 10).

Tugoti ang Espiritu nga maggiya sa imo kon ano nga mga imbitasyon ang ihatag kag kon san-o ini ihatag. Ang husto nga imbitasyon sa husto nga oras makatulod sa mga tawo sa paghimo sang mga butang nga makapatubo sang ila pagtuo. Ini nga mga aksyon magaresulta sa mabaskog nga pagbag-o sang tagipusuon (tan-awa sa Mosias 5:2; Alma 5:12–14).

Magtudlo sang mga leksyon nga simple, maathag, kag malip-ot lang. Sa kinaandan, ang pagbisita indi dapat maglapaw 30 minutos, kag pwede mo tudloan ang tawo sang bisan 5 lamang ka minutos.

Kasami kinahanglan mo sang pila ka pagbisita para itudlo ang mga prinsipyo sa isa ka leksyon. Mas maintiendihan sang mga tawo ang imo mensahe kon magtudlo ka sang malip-ot lang nga mga leksyon, magtudlo ka pirme, kag magtudlo sang ginagmay nga bahin sang tulun-an.