Malamalama i le Atuatuvale

Ata

Sister missionaries talking to a man on a city train.

O Le Atuatuvale o Se Vaega Masani o le Olaga

A o e amata i soo se aafiaga fou lava (e pei o le auai i le Ekalesia po o le auai i se aoga fou), e te lagonaina le fiafia e uiga i le avanoa—faapea ai ma le popole ona e te le iloa lelei po o le a le mea e faamoemoeina. I le aluga o taimi e te aoao ai e faafetaiaia nei luitau, ma e tuputupu ae ai i le faagasologa.

E leai lava se eseesega ma misiona. O nisi taimi e lagonaina ai o se misiona e pei o se malaga matagofie faaleagaga—po o se luitau foi e mafai ona e taulimaina. E mafai ona e agai i luma ma le toafimalie i le faatuatua, ma le iloaina o le tele o le atuatuvale po o le popole e te oo i ai e le tumau. E te maua le lototele i le iloaina o le a e fetuutuunai i le taimi, tuputupu ae faaleagaga, ma atiae le tele o ni tomai fou. O ni aafiaga na e fefe muamua i ai o le a mafai ona puleaina atili. E oo foi ina e faamemelo i vaaiga o le olaga faafaifeautalai ia sa e lagonaina muamua ai le lofituina. E te faalagolago i le Agaga, tuputupu ae i le talitonuga maumaututu, ma maua le olioli i lau auaunaga.

Peitai, i nisi taimi, atonu e te feagai ai ma ni faafitauli po o ni aafiaga e lei faamoemoeina ia e sili atu ona faigata pe le faafiafiaina foi nai lo le mea sa e mafaufauina. Atonu e te tau mafaufau pe mafai faapefea ona e manumalo ai. Atonu o punaoa sa e faalagolago muamua i ai e fesoasoani ia te oe ia gafataulimaina, ua le maua. Nai lo le lagonaina o le uunaiga e taumafai, atonu e te oo i le popolevale, maitaitagofie, lelava, po o le lotovaivai. Atonu e te mauaina ni faailoga faaletino e pei o le tiga, manava tata, le mafai ona moe, po o le mai. E mafai ona e maua i ni faafitauli o le aoaoina po o le fesootai atu i tagata. Atonu e te lagonaina le loto vaivai po o le manao e lafoai.

E pei o fua i luga o fuamaila o le taavale lea e faamanatu atu ai ia te oe e faalemu, utu le penisini, pe siaki le afi, o nei faailoga o ni faailo ia e faamanatu atu ai ia te oe e faalemu, faatumu lau “tane” faaleagaga, ma tagai mo ni vaifofo fou. O lenei tamaitusi o loo i ai ni fautuaga ma ni meafaigaluega e ono fesoasoani atu ai.

Tulaga e Fa o le Atuatuvale

O le atuatuvale e le leaga i taimi uma. O le mea moni, o le atuatuvale o se tali faaletino ma faalelagona i suiga ma luitau o le olaga e masani ai ma e manaomia mo le tuputupu ae. Ae o le lagona ai o le tele naua o le atuatuvale mo se taimi faaumiumi e aunoa ma se va e mafai ona oo atu ai i ni faafitauli.

A o e galue e pulea ma le mataalia lou atuatuvale, atonu e fesoasoani le mafaufau i tulaga e fa o le lagonaina o le atuatuvale.

		O Faailo o Lou I Ai i Lenei Tulaga	O Le A le Mea e Fai
Ata Drawing of a missionary	LANU MEAMATA	To’a, fiafia Saunia e fetaiai ma luitau Vave ona toe faaleleia ni faaletonu Fealofani ma lau soa Lagona le Agaga	O le faataitaiga lenei. O i o loo e taulimaina ai mea ua e atuatuvale ai i aso uma o le galuega faafaifeautalai, aoaoina, ma le alualu i luma. Faaauau pea ona galue malosi ma faalagolago i le Alii.
Ata Drawing of a missionary	LANU SAMASAMA	Atuatuvale, popole, le mautonu, le toafimalie, le saunia Faafitauli o le fegalegaleai lelei ma isi Faigata ona lagonaina le Agaga	O se mea masani le faaalu o sina taimi i le tulaga samasama. O le agalelei ia te oe lava ia a o e taulimaina ia luitau ma aoaoina ni tomai fou o le a fesoasoani lea ia te oe ia malosi atili atu ma faateleina lou gafatia e auauna atu ai. Faaauau pea ona tatalo ma auauna atu i le faatuatua. Tagai i tusitusiga paia ma lauga o konafesi, au taitai itu ma taitai sone, atoa ai ma lenei tamaitusi mo se fesoasoaniga.
Ata Drawing of a scared looking missionary	LANU MOLI	Le Lavā (faaletino ma faalelagona) Ma’i (faataitaiga, manava tata) Maitaitagofie Matua lotovaivai lava Leai se gafatia e lagona ai le Agaga	E leai se tasi e fiafia pe a i ai i le tulaga lanu moli o le atuatuvale, ae e seasea tumau lenei mea. Tatalo mo le taitaiga a o e suesue i tusitusiga paia ma faaaoga ia fautuaga o loo i lenei tamaitusi. Ia faailoa i lou peresitene o le misiona pe afai o loo e tumau i le tulaga lanu moli mo le silia ma le tolu aso, ina ia mafai ona ia fesoasoani atu.
Ata Drawing of a scared looking missionary	LANU MUMU	Faanoanoa, popolevale, po o le atuatuvale faifai pea Leai se faamoemoe Faafitauli o le tausami po o le le moe (e mafai ona oo ai ina ma’i) Lofituina; le gafatia ona faaauau Lagona e pei ua tuulafoaiina oe e le Atua	Afai o loo e i ai i lenei tulaga, faafesootai lou peresitene o le misiona mo se fesoasoani. Talosaga atu i lau soa po o lou taitai itu mo se faamanuiaga faaleperisitua. Mafaufau e faaalu sina taimi e tusitusi ai i lau api talaaga, mafaufau loloto i fautuaga o loo i lenei tusi, tatalo, ma atonu e fai sina malologa mai mea e te iloa ua sili ona faigata o le galuega faafaifeautalai seia oo ina e maua se avanoa e talanoa ai ma lau peresitene o le misiona.

Manaoga o le Galuega Faafaifeautalai

O le auauna atu “ma o outou loto atoa, mafaufau atoa, manatu atoa, ma le malosi atoa” (MF&F 4:2) o le a faamanuiaina silisili ai outou. E le faigofie le galuega faafaifeautalai. O manaoga o le galuega faafaifeautalai e taoto i ni vaega eseese:

Ata

Drawing of scales with categories titled "Demands" and "Resources." Samoan language.

Manaoga

Aoaoina

Anomea o le Luitauina

Fegalegaleaiga ma Tagata

Tulafono

Mea ua Faamoemoeina

Alu ese mai le Tulaga Filemu

Punaoa

Agaga Paia

Lagolagosua mai Isi Tagata

Tomai Fou

Fai se Fuafuaga

Tatalo

Taumafa Paleni & Faamalositino

Sui le Auala Tatou te Mafaufau ai

Tusitusiga Paia

Galuega

O Le Togiola

Lautele (tagai itulau 17–22). E te oo i le tele o ni suiga ma ni fesuiaiga i le aluga o lau misiona. O ni auala masani o le taulimaina o ia mea e le maua i taimi uma, ma e tatau ai ona e aoaoina ni auala fou. O afiafi ma faaiuga o vaiaso ia na masani ai ona e malolo ua avea nei ma taimi e sili ona e pisi ai. Atonu e te lagonaina le faigata tele. E i ai taimi atonu e te tauivi ai. Atonu e te tau mafaufau pe faapefea ona fesoasoani i isi faifeautalai o loo tauivi foi.

Faaletino (tagai itulau 23–28). Atonu e te i luga o ou vae mo le 11–12 itula i le aso, savali, tietie uila, ā’e i faasitepu, ma tūtū foi. Atonu o le a le toe tele sau moe e pei ona e masani ai. Atonu foi o le a e le masani i meaai. O le a e i ai i ni tau le lelei ma aafia ai i ni siama fou. Ona o le fou o ia tulaga e mafai ai ona oo i le vaivai ma le lelava.

Faalelagona (tagai itulau 29–34). Atonu e te lagonaina le popole i mea uma e ao ona e faia, ma e ono faafaigata ai ona e mauaina le toafimalie. Atonu o le a e ma’i manatu, oo ina lotovaivai, lagona le `iva, po o le lagonaina o le tuuatoatasi. Atonu e te fetaiai ma le teenaina, le fiafia, po o le lamatiaina foi. Atonu e te popole i lou aiga ma uo ona ua e le i ai iina e fesoasoani ia i latou.

Faaleagafesootai (tagai itulau 35–39). O le a nofo i ni eria laiti faatasi ma se soa o lē atonu e i ai pe le i ai foi ni mea se tele e te lua tutusa ai. Ua faamoemoeina oe e talanoa i tagata e te le masani ai, fegalegaleai ma taitai o le Ekalesia, faamasani vave i tagata o le Ekalesia, ma aoao e alofa i tagata sailiili.

Faaleatamai (tagai itulau 41–43). Atonu o le a e aoaoina se gagana fou. O le a manaomia ona e taulotoina lesona ma mau, maua ni tomai faafaiaoga, ma foia ni popolega e tulai mai. O le a manaomia ona e faia se fuafuaga, puleaina ni sini, fetuunai i suiga, ma foia ituaiga uma o faafitauli patino.

Faaleagaga(tagai itulau 45–49). O le a e luitauina oe lava ia e faamalosia lau molimau, tetee atu i faaosoosoga, ma aoao e lagona ma iloa le Agaga. O le a manaomia ona e taliaina ni faitioga, salamo, taulima ou vaivaiga ma mea e te salamo ai ma le lotomaualalo, ma faalagolago atili i le Alii e sili atu i lo se isi lava taimi muamua.

E Mafai Ona Faamanuiaina Isi i Ou Aafiaga

A o e faitauina le upusii lenei mai se lauga na tuuina mai e Peresitene Gordon B. Hinckley, mafaufau e uiga i ou aafiaga i le atuatuvale o se faifeautalai (tagata fou, gagana fou, aganuu fou,) e mafai ona fesoasoani ia te oe e malamalama atili ai i le atuatuvale lea e toatele tagata fou liliu mai e lagonaina (uo fou, vaogagana fou, aganuu fou). Faatasi ai ma lenei malamalama fou, e mafai faapefea ona e faaaofia isi tagata ia fesoasoani i tagata faatoa liliu mai i lenei fesuiaiga? Faamaumau ou mafaufauga i lau api talaaga mo suesuega.

“Sa ou mauaina i le isi aso se tusi mataina lava. Sa tusia e se tamaitai na auai i le Ekalesia i se tausaga ua tea. Sa ia tusia:

“‘O lau malaga atu i totonu o le Ekalesia sa tulagaese ma sa fai lava si luitauina. O le tausaga lea ua tea o se tausaga sili lea ona faigata talu ona ou ola. Ae o se tausaga foi ua sili ona faamanuiaina. I le avea ai ma se tagata fou o le ekalesia, o loo faaauau pea ona luitauina au i aso uma.’

“Sa faaauau pea lana faamatalaga i lona faapea mai, ina ua ia auai i le Ekalesia, na te lei lagonaina se lagolagosua mai o taitai i lana uarota. Sa foliga mai na le popole atu le epikopo ia te ia o se tagata fou. Ona o lona lagona ua tuulafoaiina o ia, o lea na toe liliu atu ai i lona peresitene o le misiona o le na tatalaina avanoa mo ia.

“Na ia ta’ua e faapea ‘E le iloa e tagata o le Ekalesia le lagona e i ai i se tagata fou i le Ekalesia. O le mea lea, e toetoe lava ina latou le mafai ona iloa pe faapefea ona lagolagoina i matou.’

“Ou te luiina outou, ou uso e ma tuafafine, afai tou te le iloaina pe faape’i, ia outou taumafai e vaai i ai faalemafaufau pe faape’i. E mafai ona matua tuuatoatasi lava. E mafai ona oo ai i le le fiafia. E mafai ona tau faafefe. O i tatou o lenei Ekalesia e matua eseese mamao lava mai le lalolagi nai lo mea o tatou manatu i ai. Sa faaauau pea le tala a lenei tamaitai: ‘A oo ina avea i tatou o tagata sailiili ma tagata o le Ekalesia, tatou te ofo i lo tatou iloaina ua tatou ulufale atu i se lalolagi e matua ese lava, o se laloagi e i ai ona lava tu ma aga i fanua, aganuu, ma gagana. Tatou te iloaina ai e leai lava se tagata e toatasi po o se punavai o faamatalaga e mafai ona tatou liliu atu i ai mo le taitaiga i la tatou malaga i lenei lalolagi fou. O le taimi muamua e faafiafiaina le malaga, o a tatou mea sese e malie, ona oo ai lea ina faanoanoa ma iu ai ina liua le faanoanoa i le ita. Ma o iina i nei tulaga o le faanoanoa ma le ita tatou te o ese ai. Tatou te toe foi i le lalolagi na tatou o mai ai, i le mea na tatou iloa ai pe o ai i tatou, i le mea na tatou iloa ai la tatou matafaioi, i le mea na tuu atu i ai lo tatou sao, ma le mea e mafai ona tatou gagana ai’” (“Saili Tamai Mamoe, Fafaga Mamoe,” Liahona, Iulai 1999, 122, faaopoopo le faatusilima; tagai foi Talai La’u Talalelei [2004], 233 [Gaoioiga: Suesuega Faaletagata Lava Ia po o le Suesuega Faalesoa]).

O Punaoa e Fesoasoani ia te Oe ia Tumau ai i le Tulaga Paleni

A e mauaina ni punaoa e faafetaiaia ai manaoga o le galuega faafaifeautalai, o le a e tuputupu ae ma saofaga atu ma e tumau ai i le tulaga lanu meamata. O nisi taimi e mafai ona e ausia ai lenei tulaga paleni e ala i le faaitiitia o manaoga e le manaomia, e pei o mea e te faamoemoeina mai ia te oe lava ia ae le moni po o le popole i mea e manatu i ai isi tagata. Peitai, e le mafai ona faaitiitia le tele o manaoga o se misiona. O le a manaomia ona e aoaoina ni anomea fou, fegalegaleai ma isi tagata, usitaia o tulafono, aoao atu ma molimau atu, ma alu ese mai lou tulaga filemu.

E mafai lava ona e tumau i le paleni e ala i le faateleina o au punaoa e faafetaiaia ai nei manaoga. O nisi o punaoa sili ona taua mo le faafetaiaiaina o nei manaoga o le galuega faafaifeautalai o le tatalo, suesueina o tusitusiga paia, o le taitaiga a le Agaga Paia, ma le auauna atu i isi. O isi punaoa faaopoopo e aofia ai le Talai La’u Talalelei, fesoasoaniga mai taitai misiona, ma le tele o isi mea o loo maua i totonu o lenei tamaitusi.

O le faaaogaina o nei punaoa o le a mafai ai ona e faalagolago i le Faaola o Iesu Keriso ma Lana Togiola. O Ia o le punavai silisili o fesoasoaniga i le taulimaina o manaoga ma atugaluga o le olaga faafaifeautalai.

Vaai mai ia te Au

Ata

Jesus Christ portrayed as the Good Shepherd. Christ is portrayed standing and holding a shepherd's staff. There are sheep grazing in a field behind Him.

Ia manatua, e alofa lo tatou Tama Faalelagi ia te oe. Faalagolago ia te Ia atoa ai ma le mana o le Togiola a Iesu Keriso e faamalolo ai ma togiola ai oe. O loo i ai se fuafuaga atoatoa a le Atua mo Lana fanau le atoatoa; o le tala lelei lenei e te avatua i le lalolagi. Ia manatua nei folafolaga: “E moni, e moni, Ou te fai atu ia te oulua, e pei ona ou fai atu i oʼu soo, o le mea e potopoto faatasi ai le toalua po o le toatolu i loʼu igoa, e faatatau i se mea e tasi, faauta, o iina o le a Ou i ai i le lotolotoi o i latou—e faapei lava ona Ou i ai ia te oulua.

“Aua le fefefe e fai mea lelei, … auā o soo se mea e te lua lulu, o lena foi o le a oulua seleseleina; o lea, afai lua te luluina le lelei o le a oulua selesele foi le lelei mo o oulua taui.

“O lea, aua le matatau, le lafu itiiti e; fai mea lelei; ia tuu le lalolagi ma seoli e aufaatasi faasaga mai ia te oulua, auā afai ua lua atiaʼe i luga o laʼu papa, e lē mafai ona latou manumalo.

“Faauta, ou te lē tausalaina oulua; o i o oulua ala ma ia lē toe agasala; fai ma le mamalu le galuega ua Ou poloaiina ai oulua.

“Vaai mai ia te aʼu i mafaufauga uma; aua le masalosalo, aua le fefefe.

“Matau i manuʼa ua tuia ai loʼu itu, ma tulaga fao foi i oʼu lima ma oʼu vae; ia faamaoni, tausi i aʼu poloaiga, ma o le a oulua mautofi ai i le malo o le lagi” (MF&F 6:32–37 ).