“Vakavulica na veika baleti Jisu Karisito Se Cava Ga Na Ka O Vakavulica Tiko,” Veivakavulici ena iVakarau ni iVakabula: Me Baleti Ira Kece Era Veivakavulici ena Vuvale kei na Lotu (2022)
“Vakavulica na Veika Baleti Jisu Karisito Se Cava Ga Na Ka O Vakavulica Tiko,” Veivakavulici ena iVakarau ni iVakabula
Au Sa Laiva Vei Kemudou na Vakacegu, mai vei Walter Rane
Vakavulica na veika baleti Jisu Karisito Se Cava Ga Na Ka o Vakavulica Tiko
E vuqa na ka me vakavulici ena kosipeli vakalesui mai i Jisu Karisito—na ivakavuvuli, ivakaro, parofisai, kei na italanoa ni ivolanikalou. Ia na veika kece oqo sa taba ni vunikau vata ga, ni sa duabau ga na nodra inaki: me vukei ira na tamata kecega me ra lako mai vei Karisito ka vakataucokotaki Vua (raica na Jeromi 1:11; Moronai 10:32). Se cava ga na ka o vakavulica, nanuma tiko ni o sa vakavulica dina tiko na veika baleti Jisu Karisito kei na sala mo vakataki Koya kina. Ena rawa ni vukei iko na Yalo Tabu mo kila na dina eso me baleta na iVakabula kei na Nona kaukauwa veivueti ena ivakavuvuli yadua ni kosipeli, ivakaro, kei na veivakavulici vakaparofita (raica na Jekope 7:10–11).
O sa vakavulica tiko beka na solibula? Vakasamataka ka vakadikeva vata kei ira na vuli na ivakarau ni solibula eda cakava me dusia na yaloda ki na “ilutua ka iotioti ni isoro” ni iVakabula (Alama 34:10). O vakavulica tiko beka na duavata? Sa rawa mo veivosakitaka na duavata a rawata o Jisu Karisito vata kei na Tamana kei na Nona veisureti meda duavata kei Rau (raica na Joni 17). Raica na ulutaga kece sara ni kosipeli me dua na madigi ni veivakavulici ka vulici me baleti Jisu Karisito.
Na ivakaro kece e vakarautaka talega na madigi oqo. Kakua ni vakanamata ga ki na lawa ni kosipeli—vulica talega me baleti Koya na Daunilawa. Kevaka o ni veivosakitaka na Vosa ni Vuku ka muduka na ivakarau ni bula ka sega ni bulabula vinaka, o na calata na madigi mo ni vakasamataka na Nona kauwaitaki keda vakatitobu o Jisu Karisito—na noda tiko vinaka vakayalo ka vakayago—me solia vei keda na lawa oqo. Vakanamata ki na ivakarau ni nona lomasoli ka nanamaki na iVakabula me vakalougatataki keda ena Nona kaukauwa me vukei keda me da bulataka na Nona lawa. Na ivakaro kece e solia vei keda o Koya e vakatakila e dua na ka me baleta na Nona vakasama kei na lomana—kunea na reki ena kena kunei vata na ka oqo!
2. Vakamatatataka na iVakaraitaki i Jisu Karisito
E rawa ni da biuti Jisu Karisito me itakele ni veivakavulici kei na vuli ena noda kila ka vakabibitaka ni sai Koya na ivakaraitaki uasivi duadua ni ivakavuvuli kece sara ni kosipeli. Ni da tisaipeli, eda sega walega ni muria na ivakavuvuli—eda muri Jisu Karisito. Ni da vakanamata ki na nona ivakaraitaki uasivi sara na iVakabula, ena vakadinadinataki Koya na Yalo Tabu ka vakauqeti keda me da muri Koya.
Vakasamataka mada vakalailai ni o sa vakavulica tiko na ivakavuvuli ni vosota ki na ivakataotioti. Na veivosakitaki ni sala sa ivakaraitaki ni vosota ki na ivakataotioti na iVakabula e rawa ni kauta mai na yalo ni vakarokoroko kamica vei Koya. Na cava e rawa ni ra vulica ka vakila o ira o vakavulica mai na Nona ivakaraitaki?
Sa vakarautaka na iVakabula e dua na ivakaraitaki uasivi sara vei keda kece. Sa Vakabulai Ira Kece o Koya, mai vei Michael Malm
Vakavulica na iTutu, iTavi, kei na iTovo i Jisu Karisito
E levu tu na nona itutu ena ivolanikalou o Jisu Karisito. O ira yadua era nanuma ni dua na Nona itavi ena ituvatuva ni Kalou ka vakavulici keda me baleta na Nona ivakarau ni bula vakalou. E rawa ni o vakasamataka mo vakadikeva vata kei ira na vuli na itutu me vaka na Lami ni Kalou, Dautataro, iTinitini ni Noda Vakabauta, kei na Rarama kei Vuravura e vakavulica vei keda me baleti Jisu Karisito. Vakakina, ni o vukei ira na vuli me ra kila vakalevu cake na iVakabula, lako sivita na veika e tukuna ka cakava o Koya kei na itavi e gadreva o Koya me cakava ki na noda bula. Ni o ni vulica vata na itovonibula kei na itovo ni iVakabula, ena vakatitobutaka na Yalo Tabu na nomuni kila ka kei na nomuni lomani Koya.
Vakaraica na iVakatakilakila E Vakadinadinataki Jisu Karisito
“Na veika kecega,” e kaya na Turaga, “era sa buli ka caka me ra tukuni au” (Mosese 6:63; raica talega na 2 Nifai 11:4). Ni da nanuma tiko na dina o ya, sa rawa meda vulica meda raica e vuqa na ivakatakarakara ena ivolanikalou e vakadinadinataka na iVakabula. Na ivakatakarakara eso oqo e oka kina na veika me vaka na madrai, wai, kei na rarama. Ni da sa kila vakamatata na sala e semati kina na iyaya oqo vua na iVakabula, sa rawa ni ra vakavulica vei keda na Nona kaukauwa kei na itovo. E rawa sara mada ga ni o kunea na tautauvata ni nona bula na iVakabula ena nodra bula na parofita kei na so tale na turaga kei na marama yalodina ena ivolanikalou. Na vakasaqarai ni ivakatakarakara e vakatakila na dina me baleta na iVakabula ena vanua e rawa ni o raibaleta kina.