Sureta na Vuli Gugumatua

Na tara ni waqa ena takoso vinaka ena wasawasa ena dua na itavi dredre vua e dua. Na taci Jereti a “dusimaki tikoga ena liga ni Turaga” (Ica 2:6), ka ciqoma na idusidusi me baleta na ibulibuli ni waqa kei na sala era na rawa ni curu mai kina na cagi Ia na cava o raica me baleta na nona sauma na Turaga ena gauna a taroga kina na tuakai Jereti me baleta na kena vakarautaki na rarama ena loma ni waqa? (raica na Ica 2:22–25). A vakalougatataki vakacava na tuakai Jereti ena veisureti me cakacakataka nona vakabauta ena sala oqo? (raica na Ica 3:1–16).

Ena rawarawa beka me da tukuna ga vei ira na vuli na veika kece o nanuma ni dodonu me ra kila. Ia, a vakasalataka o Elder David A. Bednar: “Na noda nanuma e sega ni dodonu me ‘Na cava meu tukuna vei ira?’ Ia, na taro eso meda tarogi keda kina “Cava au rawa ni sureti ira kina me ra cakava? Na taro veivakauqeti cava au rawa ni taroga, kevaka era sa tuvakarau me ra sauma, sa na tekivu me sureta na Yalo Tabu ki na nodra bula?’“ (yakavi kei na dua na Vakaitutu Raraba, 7 ni Fepe., 2020, broadcasts.ChurchofJesusChrist.org).

Vakasamataka na sala e rawa ni o sureti ira kina na vuli me ra vakaitavi ena nodra vuli. Me ivakaraitaki, e rawa ni o sureti ira me ra taroga na nodra taro, vakasaqara na isaunitaro, vakasamataka vakatitobu, ka wasea se vola na nodra nanuma kei na veika era vakila. Ni ra vakayacora vakakina, era na vaqaqacotaka na nodra vakabauta, kunea na dina ena vosa ni Kalou, ka ra sotava na veika era sotava ena dina eso oqo. Ni da vakaitavitaki keda ena noda vuli, e rawa ni da kaya, me vaka e cakava o Joseph Smith, “Au sa vulica vakataki au” (Josefa Simici—Ai Tukutuku1:20).

Taro me vakasamataki vakatitobu: Na cava na vuna e bibi kina vei ira na vuli tiko mera gugumatua ka sega ni vakarorogo ga ena nodra vuli? O na vukei ira vakacava na gone me nodra itavi vakataki ira na nodra saumaki mai? Era sa vukei iko vakacava na qasenivuli mo cakava oqo? Na ivakaraitaki cava mai na ivolanikalou o rawa ni vakasamataka na vanua era sureti kina na tamata mera vulica vakataki ira? E tara vakacava na nomu veivakavulici na ivakaraitaki eso oqo?

Mai na iVolanikalou: 1 Nifai 11; Vunau kei na Veiyalayalati 9:7–8; 58:26–28; 88:118–125; Josefa Simici—Ai Tukutuku 1:11-20

Ni sa yaco mai na gauna me tauyavutaka kina na Nona Lotu na iVakabula ena iotioti ni gauna, a kaya kina vei ira na Nona italai, “Vakararavi ki na veika sa volai tu” (Vunau kei na Veiyalayalati 18:3). Sa dina sara, na iVola i Momani, ka sa voleka ni oti na vakavakadewa, era sa umani tu kina na idusidusi veivukei me baleta na cakacaka, oka kina na ivakarau ni veipapitaisotaki, na ivakarau ni kena qaravi na sakaramede, kei na veika yaga tale eso. Ia a vinakata talega na iVakabula me ra raica na Nona italai na Nona ivakatakila me dua na madigi me ra rogoci Koya kina ka yaco me ra kilai Koya vakatitobu cake. Ena ivakatakila vata ga oya, a kaya kina vei iratou, “Sa domoqu o koya sa vosataka vei kemudou na vosa oqo; ia sa rawa mo vakadinadinataka ni ko sa rogoca na domoqu, ka kila na noqu vosa” (Vunau kei na Veiyalayalati18:35–36).

Vakasamataki ira o vakavulica. Era raica vakacava na vulici ni ivolanikalou? Ena vuku ni ka oqori, o raica vakacava? E levu cake beka mai na dua ga na icolacola e veisiga? Ni o vulica na ivolanikalou, o vakila beka ni vosa tiko vakadodonu vei iko na iVakabula? E vakavulica ko Peresitedi Russell M. Nelson: “ Evei na vanua meda lako kina meda rogoci Koya? Sa rawa meda gole ki na ivolanikalou. Na tabadromuci e veisiga ena vosa ni Kalou sa bibi sara baleta na vakabulai vakayalo, vakabibi ena iotioti ni gauna oqo sa voravora cake tikoga. Ni da sa kana magiti ena vosa i Karisito e veisiga, na vosa i Karisito ena tukuna vei keda na sala meda sabaya kina na veika dredre eda a sega ni namaka meda sotava” (“Hear Him,” Liaona, Me 2020, 89). Ni o veivakavulici, vakayaloqaqataki ira na vuli me ra vulica na ivolanikalou ena inaki ni kena kunei na iVakabula—sega walega ni kunei na veitikina se na veika dina me baleti Koya ia me kunei Koya. Na rogoci ni domo ni Turaga e veisiga ena ivolanikalou sa yavudei ki na dua na bula taucoko ni vuli kosipeli gugumatua vakaikoya.

Taro me vakasamataki vakatitobu: Vakasamataka mada na nomu ivakarau ni vuli ivolanikalou. Sa vaqaqacotaka vakacava na nomu veiwekani kei Koya na nomu vulica na vosa ni Kalou? Na cava o rawa ni cakava mo vakavinakataka tiko kina na nomu Vuli? O na vakauqeti ira vakacava eso tale me ra vulica vagumatua ka vakawasoma na vosa ni Kalou? Na veivakalougatataki cava era na ciqoma ni ra cakava?

Mai na iVolanikalou: Josua 1:8; 2 Timoci 3:15–17; 2 Nifai 32:3; Jekope 2:8; 4:6; Vunau kei na Veiyalayalati 33:16

Na sorenikau vinaka duadua sara mada ga e sega ni rawa ni tubu ena qele kaukauwa, veivatu, se wa vakavotona. Sa vakakina, na ivunau talei ka laveti cake ena vakabauta e sega ni rawa ni veisautaka e dua na yalo ka se bera tu ni vakarau me ciqoma. Oqori e tiki ni nona vosa vakatautauvata na iVakabula me baleta e dua na daukakaburaki, sorenikau, kei na qele ni veimataqali ituvaki eso. Ena “vanua vinaka”—na yalo sa vakamalumalumutaki ka vakasavasavataki ena vatu vakayalo kei na wa vakavotona—ni vosa ni Kalou e vuataka na vua ni bula (raica na Maciu 13:1–9, 18–23).

Veika vakayalo ni vakavakarau—baleti iko kei ira o vakavulica. Ia eda na veivuke vakacava me vakarautaki na yaloda me rawa ni ra “qele vinaka” me baleta na vosa ni Kalou? Vakasamataka na ivakavuvuli eso oqo ni vakavakarau, ka rawa ni o vakayagataka ena nomu bula ka vakayaloqaqataka ena nodra bula o vakavulica. Masulaka mo kila na veika e vinakata na Turaga mo vulica. Bulataka ena dua na sala e sureta na Nona iserau ena nomu bula. Veivutuni e veisiga. Susuga na nomu gagadre mo vuli ena nomu taroga na taro yalodina. Vulica na vosa ni Kalou ena vakabauta ni na tuberi iko o Koya mo kunea na isau ni taro. Dolava na yalomu ki na veika cava ga ena vakavulici iko kina o Koya.

Ni ra vakavakarau na vuli me ra vuli ena sala oqo, ena tu vei ira na mata vakayalo me ra raica kei na daliga me ra rogoca na veika e vinakata na Turaga me ra kila (raica na Maciu 13:16).

Taro me vakasamataki vakatitobu: Na cava o na cakava mo vakarautaki iko mo vuli kina? E tara vakacava na ivakarau ni nomu rai, rogoca, ka kila na vosa ni Kalou na nomu vakavakarau? O na vakauqeti ira vakacava na tani me ra vakavakarau ni vuli? Na duidui cava e rawa ni yaco ena sala era ciqoma kina na dina ni kosipeli?

Mai na iVolanikalou: Inosi 1:1–8; Alama 16:16–17; 32:6, 27–43; 3 Nifai 17:3

iVakatakilakila

wili ivolanikalou na itabagone ena kalasi

“Au dau vosa malua,” e lelevaka o Inoke ni kacivi koya na Turaga me vunautaka na kosipeli. Ia na malanivosa e sega vakadua ni gadrevi vua e dua na italai ni Turaga. Ia, a yalataka na Turaga vei Inoke ni kevaka e veirauti na vakabauta me dolava kina na gusuna, ena yaco mai na vosa. “Au na cavuta vei iko,” e kaya o Koya (Mosese 6:31–32). A cakacakataka o Inoki na nona vakabauta, ka sa vosa dina mai vua na Turaga, ena kaukauwa ni vosa ka ra sa sautaninini kina na tamata (raica na Mosese 6:47). E dina sara, era sa vakavuna me sakure na vuravura. Era sa dro na veiulunivanua, veisautaka na uciwai na nodra ilakolako, ka ra rerevaka na tamata ni Kalou na veimatanitu, “sa kaukauwa sara na vosa i Inoki, ka sa kaukauwa talega vakalevu na vosa sa solia vua na Kalou” (Mosese 7:13).

E vinakata na Turaga vei keda kece—sega ni o ira walega na Nona parofita—me tu vei keda na kaukauwa me da vosataka na Nona vosa. E vinakata o Koya vei keda kece, oka kina o ira o vakavulica (raica na Vunau kei na Veiyalayalati 1:20–21). Na noda vosa ena sega ni tosoya na ulunivanua se vagolea tani na uciwai, ia sa rawa ni ra veivuke ena kena veisautaki na yalo. Oqori na vuna sa rui bibi kina me soli vei ira na vuli tiko na madigi me ra veiwaseitaka vakai ira na veika era sa vulica tiko me baleta na iVakabula kei na Nona kosipeli. Ni ra vakayacora oqo ena vukei ira me ra tuvalaka na dina era sa vakavulici kina ka vakamacalataka. Ena vukei ira talega me ra yalodei ena nodra rawata me ra wasea na dina ena veituvaki tale eso.

Taro me vakasamataki vakatitobu: Vakasamataka mada e dua na gauna o a tukuna kina e dua na dina ni kosipeli vua e dua. Na cava o sa vulica mai na veika sa sotavi oqo? Ena gauna cava beka o a vakavinavinaka kina ni dua e tu vua na yaloqaqa me wasea na nona nanuma kei na vakabauta? Ena yaga vakacava vei ira na tamata o vakavulica na madigi me ra veitalanoataka na veika era sa vulica? Na madigi cava soti o rawa ni cakava me baleti ira?

Mai na iVolanikalou: Alama 17:2–3; Moronai 6:4–6; Vunau kei na Veiyalayalati 84:85; 88:122; 100:5–8

“Me caucau vakakina na nomudou rarama e matadra na tamata.” “Lomani Ira na Nomu Meca.” “Dou kerekere ka na soli vei kemudou.” “Mo ni curu ki na matamata ni koro qiqo.” (Maciu 5:16, 44; 7:7, 13.) Eso na veisureti makare sara, ka guilecavi dredre ena nona cakacaka na iVakabula e vuravura a tukuni ni a vakavulici iratou nona tisaipeli ena ulunivanua ka raibaleta na Wasawasa o Kalili. Na inaki ni iVakabula sai koya me veisautaka na bula, me vaka e vakamatatataka na Nona itinitini ni veisureti: “Ia ko koya yadua sa rogoca na noqu vosa oqo, ka cakava, kau na vakatautauvatataka kei na tamata vuku, sa tara na nona vale ena dela ni vatu” (Maciu 7:24; vakamatatataki).

E tau mai na uca kei na waluvu ka liwa na cagi ena bula kece ni tamata. Na vulici ni kosipeli e sega ni veirauti kevaka me ra vorata rawa na gonevuli na veivakatovolei kece era na sotava. Oqo na vuna meda kakua ni lomalomaruataka nodra sureti na vuli mera vakasamataka na sala mera bulataka kina na veika era sa vulica tiko. Ena vuku ni nodra galala ni digidigi na tani, ena vakararaba e vuqa na noda veisureti: “Na cava o vakauqeti mo cakava?” Ena so na gauna ena gadrevi me matata cake na noda veisureti: “O na digitaka beka e dua na ivakarau ni iVakabula o na vinakata mo cakacakataka?” Ni ko vakarautaka na madigi vei ira na vuli mera rogoca, kila, ka wasea na veivakauqeti ni Yalo Tabu, ena vakavulici ira o Koya ena veika cava era gadreva mera cakava. Vukei ira na vuli me ra vakasamataka na veivakalougatataki ena muria mai ni ra cakacakataka na veika era sa vulica, ka vakayaloqaqataki ira me ra gugumatua tikoga ena gauna mada ga e dredre kina. Na bulataki ni dina sa sala totolo duadua ki na vakabauta cecere, ivakadinadina, kei na saumaki. Me vaka e tukuna na iVakabula, ni bulataki na ivunau nei Tamada sai koya na sala vei keda kece meda kila vakaidina na ivunau e dina (raica na Joni 7:17).

Taro me vakasamataki vakatitobu: Na gauna cava o sa bau vakauqeti kina mo cakava ena vuku ni nona veisureti e dua? A veisau vakacava na nomu bula? Raica na veisureti sa soli mai ena ivolanikalou kei ira na iliuliu ni Lotu. Na cava o sa vulica ena rawa ni vukei iko mo dau loloma veivueti vakalevu cake vei ira na tani? Ena sala cava soti o rawa ni vakamuria kina na nomu veisureti?

Mai na iVolanikalou: Luke 10:36–37; Joni 7:17; Jemesa 1:22; Mosaia 4:9–10; Vunau kei na Veiyalayalati 43:8–10; 82:10