Ang Pagpuyo didto sa Kasadpan

Wala ako mangandoy nga ang mga tawo maghunahuna nga ako adunay kalabutan sa among pagbalhin dinhi [sa Salt Lake Valley], tungod kana sa kalooy sa Labawng Makagagahum; ang gahum sa Dios ang nagdala sa kaluwasan alang niini nga katawhan, dili gayud ako makahimo sa ingon nga plano (DBY, 480).

Dili ako ang naghimo sa mahinungdanong plano sa pag-abli sa Ginoo sa dalan sa pagpadala niini nga katawhan ngadto niining kabukiran. Si Joseph namalandong sa kalihokan sulod sa mga katuigan sa wala pa kini mahitabo, apan dili siya makaabut dinhi (DBY, 480).

Sa kapanahonan ni Joseph naglingkod kami og daghang mga oras sa matag higayon nga maghisgot kalabut niining maong nasud. Si Joseph kanunay nga mosulti, “Kon atua pa lamang unta ako sa Rocky Mountains kauban ang usa ka gatus ka matinud-anong kalalakin-an, magmalipayon unta ako, ug dili mohangyo og kalooy gikan sa mga manggugubot nga panon” (DBY, 480).

Nagpuyo kami sa Illinois gikan niadtong 1839 hangtud sa pagka 1844, diin sa mao nga panahon [ang mga kaaway sa Simbahan] milampus na usab sa pagsugnod sa espiritu sa pagpanggukod batok kang Joseph ug sa mga Santos sa Ulahing mga Adlaw. Mabudhion! Mabudhion! Mabudhion! sila misinggit, nagtawag kanamo nga mga mamamatay og tawo, mga kawatan, mga bakakon, mga mananapaw, ug ang pinakadautang katawhan dinhi sa yuta. … Ilang gidala sila si Joseph ug Hyrum, ug isip garantiya alang sa ilang kaluwasan, si Gobernador Thomas Ford misaad sa kasiguroan sa Estado sa Illinois. Gibilanggo sila [sa Carthage, Illinois], kunohay sa pagpabilin kanila nga luwas, tungod kay ang manggugubot nga panon hilabihan gayud ang kaligut-got ug kabangis. Ang Gobernador mibiya kanila diha sa mga kamot sa manggugubot nga panon, kinsa misulod sa bilanggoan ug mipusil kanila hangtud namatay. Si John Taylor, kinsa ania kanato karon, didto usab sa bilanggoan, ug gipusil usab, ug naghigda nga masakiton sulod sa pipila ka bulan human niana. Human ang manggugubot nga panon nakahimo niini nga mga pagpatay, mianhi sila kanato ug misunog sa atong mga balay ug mga lugas. Sa dihang ang mga kaigsoonan moadto aron sa pagpatay sa kalayo, ang manggugubot nga panon motago ubos sa mga koral, ug diha sa kangitngit sa kagabhion, ila silang pusilon (DBY, 473).

Sa tuig 1845 misulat ako ngadto sa tanang mga Gobernador sa mga estado ug mga teritoryo sa Union, mihangyo kanila alang sa luwas nga kadangpan, sulod sa ilang mga nasakupan, alang sa mga Santos sa Ulahing mga Adlaw. Gibalibaran kami sa maong kahigayunan, diha sa hilum nga pagtamay o diha-diha dayon nga pagbalibad. Nagkauyon silang tanan nga dili kami makaabut sulod sa mga kinutuban sa ilang teritoryo o estado (DBY, 474).

Tulo ka mga kongresista ang miadto [sa Nauvoo] sa tinglarag sa 1845, ug adunay komperensya uban sa Napulog Duha ug sa uban pa; matinguhaon sila nga kinahanglan kaming mobiya sa Estados Unidos. Amo silang gisultihan nga buhaton namo kana, dugay na kaming nagpuyo uban kanila; miuyon kami nga mobiya sa Estado sa Illinois agig sangputanan nianang relihiyosong pagbatok ngari kanamo nga dili na kami makapuyo nga malinawon. Kining mga tawhana miingon nga ang mga tawo mibatok kanamo. Si Stephen A. Douglas, usa sa tulo, nasinati na kanamo. Siya miingon, “Nakaila ako kaninyo, nakaila ako kang Joseph Smith; usa siya ka maayo nga tawo,” ug kini nga mga katawhan usa ka maayo nga mga katawhan; apan ang mga pagbatok sa … dili diosnon ingon niana nga, siya miingon, “Mga ginoo, dili kamo makapabilin dinhi ug magpuyo nga malinawon.” Miuyon kami nga mobiya. Mibiya kami sa Nauvoo sa pagka Pebrero, 1846 (DBY, 473).

Mitabok ako sa Suba sa Mississippi, uban sa akong mga kaigsoonan, padulong niini nga dapit, nga wala masayud, nianang higayuna, kon asa kami padulong, apan hugtanong nagtuo nga ang Ginoo adunay giandam alang kanamo nga usa ka maayo nga dapit didto sa kabukiran, ug nga siya mogiya kanamo diretso ngadto niini (DBY, 482).

Gisamok kami sa matag bahin sa mapintas nga mga pagpanggukod sa among dugay na nga mga kaaway; gatusan ka mga pamilya, kinsa napugos sa pagbiya sa ilang mga panimalay, ug napugos sa pagbiya sa tanang anaa kanila, naglibudlibud isip mga pinalayas diha sa usa ka kahimtang sa labihan gayud ka kabus (DBY, 482).

Milalin kami, nga wala kami masayud kon asa, gawas lamang nga amo kadtong tuyo ang pagpalayo sa kamot sa among mga kaaway. Wala kami panimalay, gawas sa among mga karwahe ug mga tolda, ug walay mga pundo sa mga pagkaon ug sinina; apan kinahanglang makakuha sa among inadlaw-adlaw nga pagkaon pinaagi sa pagbiya sa among mga pamilya sa hilit nga mga dapit nga luwas, ug moadto taliwala sa among mga kaaway aron motrabaho (DBY, 478).

Mibiyahe kami padulong sa kasadpan, mihunong sa mga dapit, mitukod og mga puy-anan, diin kami [temporaryo] nga mibiya sa mga kabus kinsa dili makabiyahe og layo kuyog sa pundok (DBY, 474).

Sa dihang didto na kami sa taliwala sa mga Indian, kinsa giingon nga mga mapintas, lima ka gatus ka mga kalalakin-an ang gitawag ngadto sa Mexico aron makig-away [sa Gubat sa Mexico, 1846–48] (DBY, 476).

Ako mismo miadto, kauban ang pipila sa akong mga kaigsoonan, tali sa usa ug duha ka gatus ka mga milya diha sa pipila ka mga dalan sa pagbiyahe, mohunong sa matag gamay nga kampo, maggamit sa among impluwensya aron makabaton og mga moboluntaryo, ug sa adlaw nga gitakda alang sa panagkita [16 sa Hulyo 1846 sa Council Bluffs, Iowa] ang gikinahanglan nga gidaghanon nakab-ot; ug kini tanan natuman sulod sa mga baynte ka adlaw gikan sa panahon nga ang panginahanglan nahibaloan (DBY, 479).

Kana nga batalyon misugod sa pagmartsa gikan sa Fort Leavenworth agi sa Santa Fe, ug ngadto sa disyerto ug pait nga agianan, ug mipahiluna sa ilang mga kaugalingon sa mas ubos nga bahin sa California, nga nakahatag og kalipay sa tanang mga opisyal ug kalalakin-an kinsa matinud-anon. Sa ilang pag-abut, si Heneral [Stephen W.] Kearny diha sa usa ka [lisud] nga kahimtang, ug si Colonel P. St. George Cooke [ang bag-ong lider sa batalyon] daling mimando sa batalyon sa pagmartsa aron sa pag-abag kaniya, ug miingon ngadto kaniya, “Kita adunay mga kalalakin-an karon dinhi nga makapahimutang sa tanang mga butang sa husto.” Ang mga kalalakin-an niana nga batalyon matinud-anong mipahigayon sa ilang katungdanan. Wala ako maghunahuna nianang gamayng pundok sa kalalakin-an nga wala ang sunod nga hunahuna nga, “Panalanginan sila sa Dios hangtud sa hangtud.” Kining tanan among gibuhat aron sa pagpakita sa Gobyerno nga kami matinud-anon (DBY, 477).

Ang among batalyon miadto sa dapit sa nahitaboan sa gubat, dili sa komportable nga mga higdaanan sa barko, ni sa pipila ka bulan nga pagpalta, apan naglakaw sobra sa duha ka libo ka mga milya tabok sa walay mga dalan nga mga disyerto ug walay mga tanum nga kapatagan, nakasinati sa tanang matang sa kakulang sa mga panginahanglan, kalisdanan, ug pagantus sulod sa mga duha ka tuig nga pagkawala una pa sila nahiusa pagusab sa ilang mga pamilya. Mao kadto ang among pagkaluwas pag-usab nga nahimo pinaagi sa tabang sa Maalamon sa Tanan nga Binuhat kinsa nasayud sa katapusan gikan sa sinugdanan (DBY, 479).

Ubos … sa lisud kaayo nga mga kahimtang gihangyo kami sa pagkuha gikan sa among nagbiyahe nga mga pundok og lima ka gatus sa among labing maayo nga kalalakin-an, mibilin sa mga tigulang, mga batan-on, sa kababayen-an diha sa mga kamot sa mga nahabilin, aron moatiman ug mosuporta (DBY, 478).

Kadtong uban kanamo kinsa nahabilin nagtrabaho ug nagtanum sa tanan nga among gikinahanglan aron among makaon diha sa kamingawan. Kinahanglan kaming mobayad alang sa among kaugalingong mga magtutudlo sa eskwelahan, mangita sa among kaugalingong pagkaon ug maninguha alang sa among kaugalingong sinina, o molakaw nga wala gayud, kay walay laing kapilian (DBY, 476).

Adunay nahabilin didto nga pipila ka mga kabus gayud kaayo, mga masakiton ug mga tigulang, kinsa nag-antus sa kabangis sa manggugubot nga panon; sila gibunalan ug gibun-og, ug gisunog ang ilang mga kabalayan (DBY, 473–74).

[Kini] nga mga kaigsoonan kinsa nagpabilin sa dapit [daplin sa suba ibabaw sa Montrose, Iowa] nanglimbasug diha sa kakabus ug kalisud. Sa usa ka higayon, ako gisultihan nga, mamatay na unta sila sa kagutom, kon wala pa gipadala sa Ginoo kanila ang mga buntog. Kini nga mga langgam nanglupad paingon sa ilang mga karwahe, ug nahimong namatay o nakuyapan, ug ang mga kaigsoonan mipundok niini, nga misangkap kanila og pagkaon sulod sa pipila ka mga adlaw, hangtud nga nakaabut sila ngadto sa kamingawan. [Si Brigham Young mipadala og mga pundok nga motabang sa pagdala niining mga Santos ngadto sa pagpundok uban sa ilang mga paryente ug mga higala diha sa mga pundok sa unahan subay sa agianan.] (DBY, 474).

Usahay mosunod kami sa agianan sa mga Indian, usahay mosunod kami sa kompas; sa among pagbiya sa suba sa Missouri among gisubay ang [Suba] sa Platte. Ug nakapatay kami og daghan kaayong mga bitin sa ubang dapit; ug mihimo og mga karsada ug mitukod og mga taytayan hangtud nga misakit ang among mga likod. Kon asa dili kami makatukod og mga taytayan tabok sa mga suba, among isakay sa sakayan ang among katawhan patabok (DBY, 480).

Sa dihang among nahimamat si Mr. Bridger [tag-iya sa Fort Bridger, Wyoming] didto sa Suba sa Big Sandy [28 sa Hunyo 1847], miingon siya, “Mr. Young, mohatag ako og usa ka libo ka dolyar kon mahibaloan nako nga usa ka mais mahimong motubo dinhi [niining kabukiran]. Miingon ako, “Hulat lang og dise otso ka bulan ug akong ipakita kanimo ang daghanniini.” Ako ba kining nasulti tungod sa kahibalo? Dili, mao kadto ang akong hugot nga pagtuo; apan wala kami nadawat nga bisan gamay lamang kaayo nga pagdasig––gikan sa natural nga pangatarungan ug sa tanan ngaamong nahibaloan kabahin niini nga nasud––kabahin sa pagkadili niini matuboan og tanum, ang katugnaw ug kabagtik niini, sa pagtuo nga makapatubo gayud kami og bisan unsa. … Kami adunay hugot nga pagtuo nga makahimo kami sa pagtanum og lugas; aduna bay makadaut niini? Wala gayud. Kon kami wala pay hugot nga pagtuo, unsa kaha ang mahitabo kanamo? Mous-os na unta kami diha sa pagkawalay pagtuo, mosira unta sa tanang kapanguhaan alang sa among pagpakabuhi ug dili na gayud unta makapatubo pa og bisan unsa (DBY, 481).

[Pagka 30 sa Hunyo 1847,] sa dihang ang pundok sa mga Pioneer miabut sa Green River [mga 80 ka milya sa silangan sa Great Salt Lake Valley], among nahimamat si Samuel Brannan ug pipila pa ka tawo gikan sa [San Francisco,] California, ug gusto nila nga moadto kami didto. Ako namahayag, “Moadto kita sa California, ug dili makapabilin didto sobra sa lima ka tuig; apan mamuyo kita sa kabukiran, ug makapatubo kita sa atong kaugalingong mga patatas, ug mokaon niini; ug ako nagtinguha nga mopuyo dinhi.” Anaa pa gihapon kita sa likod sa hayop, diin ang bukog ug ang ugat lig-on, ug nagtinguha kita nga magpuyo dinhi, ug dili makahilabut kanato ang impyerno (DBY, 475).

Ako mismo, kuyog ang uban, migawas sa unsay among gitawag og Emigration Canyon; among gitabok ang mga kabukirang Big ug Little, ug milugsong sa walog nga mga tulo ka bahin sa usa ka milya sa habagatan niini. [Sila si Orson Pratt ug Erastus Snow misulod sa Salt Lake Valley niadtong 21 sa Hulyo 1847; ang nag-una ug ang dakong mga pundok miabut pagka 22 sa Hulyo. Ang naulahi nga pundok uban ni Presidente Brigham Young, kinsa nag-antus sa mga epekto sa hilanat sa bukid, misulod sa walog pagka 24 sa Hulyo.] Mipahimutang kami, ug nagtan-aw kami sa palibut, ug sa katapusan kami miabut ug mihunong tali sa duha ka mga simangan sa City Creek, usa niini padulong sa habagatang kasadpan ug ang usa sa kasadpan. Dinhi among giugbok ang among bandila niining luna sa templo ug sa usa ibabaw niini; dinhi among gipahimutang ang among mga pundok ug determinado nga dinhi kami mopundo ug mohunong (DBY, 474).

Miabut kami dinhi, diin nakakita kami og pipila … ka mga Indian, pipila ka mga lobo ug mga kuneho, ug igong gidaghanon sa mga timus; apan kon usa ka berde nga kahoy o usa ka mamunga og prutas nga kahoy, o bisan unsa nga berde nga umahan, wala kami nakita sa maong matang, gawas sa pipila ka mga duldul ug mga willow nga kahoy diha sa daplin sa City Creek. Sa mga 1200 o 1300 ka mga milya among gidala ang matag lugas sa makaon nga anaa kanamo sa dihang miabut kami dinhi. Sa dihang among gibiyaan ang among mga panimalay among gidala ang kutob sa wala kawata sa mga manggugubot nga panon nga among mga kabayo, baka ug mga nati ug ang ubang mga kababayen-an midala sa ilang kaugalingong mga pundok sa mga hayop dinhi. Kay sa mga 365 ka libra sa mga lugas o harina sa dihang nagsugod sila gikan sa suba sa Missouri, wala gani katunga kanila ang nagdala og katunga sa gikinahanglan nga dad-ong mga makaon. Kinahanglan kaming modala sa among binhi nga lugas, among mga kagamitan sa panguma, mga kaban o parador, mga lamesa, mga kabinet nga kasudlan sa plato, mga sofa, mga piano, dagkong mga samin, maayo nga mga lingkuranan, mga alpombra, nindot nga mga pala ug mga kumpit ug uban pang maayo nga mga kasangkapan, uban sa tanang mga kagamitan, mga lutoanan, ubp., ug kinahanglan kaming modala niining mga butanga nga gipatungpatong uban sa pipila ka mga babaye ug mga bata, nga nagkayamukat lamang nga wala matarung og butang, gamit ang nagkalisud og maayo nga mga kabayo, … daot kaayo nga mga toro ug mga baka. Mao lamang kini ang among magamit sa transportasyon, ug kon wala pa namo dad-a ang among mga butang niining paagiha wala unta gayud kami niini, kay wala gayuy butang dinhi (DBY, 480).

Ang mga Santos mga kabus sa dihang mianhi sila niini nga walog (DBY, 475).

Sila mikuha og pipila ka mga panit sa laki nga kanding, mga panit sa usa, mga panit sa karnero, mga panit sa kabaw, ug mihimo niini og mga karsones ug mga sandalyas, ug mikupo kanila sa kupo nga hinimo gikan sa bupalo. Ang uban adunay mga habul ug ang uban wala; ang uban adunay mga sinina, ug sa akong pangagpas ang uban wala. Usa ka tawo misulti kanako nga wala siya’y sinina alang sa iyang kaugalingon o sa pamilya (DBY, 475–76).

Mangahas ako sa pag-ingon nga walay usa sa upat ka sakop sa akong pamilya ang adunay sapatos sa ilang tiil sa dihang mianhi sila niini nga walog (DBY, 476).

Kami adunay hugot nga pagtuo, nagpuyo kami pinaagi sa hugot nga pagtuo; mianhi kami niini nga mga kabukiran pinaagi sa hugot nga pagtuo. Mianhi kami dinhi, kanunay akong moingon, nga tingali ngadto sa mga dunggan sa uban ang pamahayag tingali walay pamatasan, hubo ug nagtiniil, ug adunay pagka tinuod kini (DBY, 481).

Among gi-ampo ang dapit, ug mipahinungod niini ug ang tubig, hangin ug ang tanan nga may kalabutan niini ngadto sa Ginoo, ug ang mga pahiyum sa langit midangat ngadto sa dapit ug nahimo kining mabungahon, ug karon naghatag kini kanamo og labing maayo nga lugas, prutas ug mga utanon (DBY, 483).

Hangtud nga ang mga Santos sa Ulahing mga Adlaw miabut dinhi, walay usa ka tawo diha sa tanang mga mahiligon sa bukid ug niadtong kinsa mibiyahe dinhi, sa among nahibaloan, ang mituo nga usa ka bunga sa mais motubo niini nga mga walog. Nasayud kami nga ang mais ug trigo abundang motubo dinhi, ug kami nasayud nga aduna kami talagsaong rehiyon diin makabuhi og mga baka, mga kabayo, ug sa tanang matang sa mga hayop sa lugar nga among gikinahanglan (DBY, 485).

Wala gayuy usa ka dapit, gikan sa kapanahonan ni Adan hangtud karon, nga gipanalanginan og maayo sa atong Amahan sa Langit kaysa niini nga dapit; ug sa gihapon kini pagapanalanginan pa gayud og maayo, kon kami matinud-anon ug mapainubsanon, ug mapasalamaton sa Dios alang sa trigo ug sa mais, sa mga abena [oat], sa prutas, sa mga utanon, sa baka ug sa tanan nga iyang gihatag kanamo, ug maninguha sa paggamit niini alang sa pagtukod sa iyang Gingharian dinhi sa yuta (DBY, 483).

Kami ang mga pioneer niini nga nasud (DBY, 474).

Kami miimprinta sa unang mga papel, gawas sa tingali duha, mihimo sa unang mga prutasan, mipatubo sa unang trigo, mipahimutang hapit sa unang mga eskwelahan, ug mihimo sa unang mga pagpalambo sa among pagka-pioneer, sa daghang paagi, gikan sa suba sa Mississippi ngadto na sa Kadagatang Pasipiko; ug ania sa katapusan miabut ra gayud kami dinhi, aron mapalayo gikan sa tanan, kon mahimo. Naghunahuna kami nga mopalayo gayud kami kutob sa among mahimo gikan sa mga tawo; buot kaming moadto sa laing yuta, sama ni Abraham, aron kami maadto sa dapit diin mahilayo kami sa panagbangi sa usa ka tawo o sa lain (DBY, 476).

Buot namong masabtan kami sa mga langyaw nga wala kami mianhi dinhi tungod sa pagpili, apan tungod kay kami napugos nga moadto sa laing dapit, mao kini ang labing maayo nga lugar nga among nakita. Imposible alang ni bisan kinsa sa pagpuyo dinhi gawas kon siya maningkamot gayud og maayo ug makigbisog ug mobarug batok sa mga elemento, apan usa kini ka pinakamaayo nga lugar sa pagpasanay sa mga Santos sa Ulahing mga Adlaw, ug kami pagapanalanginan sa pagpuyo dinhi, ug mohimo pa niini nga sama sa Tanaman sa Eden; ug ang Ginoo nga Labawng Makagagahum moamping sa iyang mga Santos ug mopanalipod ug mopatunhay kanila kon sila mobuhat sa iyang kabubut-on. Ang bugtong kahadlok nga anaa kanako mao nga kami dili mobuhat og matarung; kon kami mobuhat og [matarung] mahimo kaming sama sa usa ka siyudad nga gibutang ibabaw sa bungtod, ang among kahayag dili matago (DBY, 474).

Apan pito ka tuig pa lamang sukad kami mibiya sa Nauvoo, ug andam na kami karon sa pagtukod og lain nga templo. Akong gilingi og balik ang among mga paningkamot uban sa kahimuot. Ania dinhi ang gatusan ug liboan ka mga tawo nga walay mga kahigayunan nga ang uban kanamo aduna. Mangutana kamo, unsa man nga mga kahigayunan? Ngano, nga miagi kami og grabe kaayo nga mga pagsulay. Wala sila sa kahigayunan nga makawatan ug makuhaan sa ilang kabtangan, nga maanaa taliwala sa mga manggugubot nga panon ug kamatayon, sama sa naangkon sa kadaghanan kanamo (DBY, 482).

Mangutana kamo kon magpabilin ba kami dinhi niining mga kabukiran. Ako motubag og oo, hangtud nga kami mahimuot sa pagbuhat sa kabubuton sa Dios ang atong Amahan sa Langit. Kon kami nahimuot sa pagpalayo gikan sa balaang mga sugo ni Ginoong Jesukristo, sama sa gibuhat sa karaang Israel, ang matag tawo mihimo sa iyang kaugalingong pamaagi, kami pagatibulaagon ug pagalangkaton, pagaabugon ngadto sa among mga kaaway ug pagagukuron, hangtud nga kami makakat-on sa paghinumdom sa Ginoo nga among Dios ug andam sa paglakaw diha sa iyang mga dalan (DBY, 483).

Daghan ang mahimong mangutana, “Unsa ka dugay kita nga magpabilin dinhi?” Magpabilin kita dinhi hangtud kanus-a nato kinahanglang magpabilin. “Mobiya ba kita, kon kita papahawaon?” Kon kita magpakabuhi sa ingon nga kita matagbaw sa atong mga kaugalingon, ug dili mopapahawa sa atong mga kaugalingon gikan sa atong mga panimalay dili gayud kita mapapahawa gikan niini. Tinguhaa ang pinakamaayo nga kaalam nga inyong mahimong maangkon, pagkat-on kon unsaon sa paggamit sa inyong paningkamot, pagtukod og maayong mga balay, paghimo og maanindot nga mga umahan, pagtanum og mansanas, peras, ug uban pang mamunga og prutas nga mga kahoy nga motubo dinhi, usab ang lomboy sa bukid [currant] ug mga gagmayng kahoy nga raspberry, pagtanum og mga similyahan sa strawberry, ug pagtukod ug pagdayan-dayan og usa ka matahum nga siyudad (DBY, 483–84).

Himoi og timailhan ang atong mga pamuy-anan sa unom ka gatus ka mga milya dinhi niini nga mga kabukiran ug dayon himoi og timailhan ang agianan nga atong gihimo sa pag-anhi dinhi, pagtukod og mga taytayan ug paghimo og mga dalan tabok sa mga kasagbutan, mga kabukiran ug lawom nga mga pangpang! Mianhi kita dinhi nga walay kwarta diha sa karaang mga karwahe, ang atong mga higala … misulti kanato sa “pagdala sa tanang mga gikinahanglan kutob sa atong mahimo; kay kamo wala nay makuha pa! Dada ang tanang binhi sa lugas kutob sa inyong madala, kay kamo wala gayuy makuha didto!” Ato kining gihimo, ug agig dugang sa tanan niini atong gipundok ang tanang mga kabus kutob sa atong mahimo, ug ang Ginoo mipahimutang kanato dinhi niining mga walog, nga nagsaad nga iya kitang tagoon sa mubo nga panahon hangtud nga ang iyang kasuko ug kaligutgut molabay sa mga kanasuran. Mosalig ba kita sa Ginoo? Oo (DBY, 475).

Pinaagi sa kalooy sa langit, nakahimo kita sa pagbuntog sa tanan niini nga mga kalisdanan, ug makahimo sa pagpundok dinhi karon niini nga mga kabukiran, diin walay makapanghadlok kanato, layo sa atong mga tigpanggukod, layo sa kagubot ug kalibug sa gibiyaan nga gipuy-an (DBY, 482).

• Kang kinsa gihatag ni Presidente Young ang pasidungog alang sa pagplano sa pagbalhin sa mga Santos ngadto sa Rocky Mountains ug sa Salt Lake Valley?

• Unsa nga mga kahimtang ang nakaaghat sa paghingilin sa mga Santos gikan sa Illinois? Giunsa man ni Presidente Young sa pagkahibalo kon asa dad-on ang mga Santos?

• Ngano nga ang mga lider sa Simbahan miawhag man sa 500 ka mga boluntaryo sa pag-apil sa Mormon Batalyon ug sa pagbiya sa ilang mgapamilya sa ingon nga labihang kalisud nga panahon sa ilang pagbalhin ngadto sa kasadpan?

• Ang Mormon Batalyon wala gayud makaaway sa gubat tungod kay ang gubat nahuman na sa dihang miabut sila sa ilang destinasyon. Unsa ang giantus sa mga Santos tungod sa panawagan sa gobyerno alang sa usa ka batalyon? Sa inyong hunahuna ngano kaha nga importante alang kanila nga mohimo niana nga sakripisyo? Unsa nga mga kaayohan ang miresulta gikan niini nga kasinatian?

• Giunsa sa Ginoo paghupay ang kagutom sa mga Santos sa makadiyot? Giunsa man sa Ginoo pagtabang kaninyo sa mga panahon sa panginahanglan?

• Ang Doktrina ug mga Pakigsaad 136 naglangkob “sa Pulong ug Kabubuton sa Ginoo kalabut sa Kampo sa Israel diha sa ilang mga pagpanaw ngadto sa Kasadpan” (bersikulo 1). Kini nga pagpadayag gihatag ngadto kang Presidente Young didto sa Winter Quarters niadtong 14 sa Enero 1847. Agig dugang sa organisasyon nga gihulagway niini nga seksyon, unsa pay lain nga tambag ang gihatag ngadto sa mga Santos nga nagbihaye padulong sa kasadpan?

• Unsa nga kabalaka ang gipadayag ni Jim Bridger ngadto kang Presidente Young? Unsa man ang gibasihan sa bug-at nga tubag ni Presidente Young ngadto kang Mr. Bridger? Sa unsa nga paagi nga kamo nakasinati og kalampusan nga miresulta gumikan gayud sa usa ka pagpakita og hugot nga pagtuo?

• Ngano nga si Presidente Young mipili man sa pagpabilin sa Rocky Mountains kay sa mopadayon ngadto sa California?

• Sa unsa nga mga paagi nga ang mga Santos nagtinguha nga makakita ogmga solusyon sa ilang kakabus?

• Si Presidente Young miingon, “Wala gayuy usa ka dapit, gikan sa kapanahonan ni Adan hangtud karon, nga gipanalanginan og maayo sa atong Amahan sa Langit kaysa niini nga dapit.” Unsa ang gikinahanglan gikan sa mga Santos bisan asa pa nagpuyo aron sa pagsiguro sa pagpadayon niadto nga mga panalangin? Unsa ang buot ipasabut sa pagpuyo pinaagi sa hugot nga pagtuo? Unsa ang atong mahimo aron mas hingpit nga magpuyo pinaagi sa hugot nga pagtuo diha kang Jesukristo?

• Unsa ang nahimo sa mga Santos isip mga pioneer sa Rocky Mountains?Unsa ang inyong mahimo sa pagtukod sa Simbahan diin kamo nagpuyo?

• Si Presidente Young mihimo sa dili kasarangan nga pamahayag, “Ania dinhi mao ang gatusan ug liboan ka mga tawo nga walay mga kahigayunan nga ang uban kanamo aduna. … Wala sila sa kahigayunan nga makawatan ug makuhaan sa ilang kabtangan, nga maanaa taliwala sa mga manggugubot nga panon ug kamatayon, sama sa naangkon sa kadaghanan kanamo.” Sa inyong hunahuna unsa ang iyang buot ipasabut? Ngano nga ang Salt Lake Valley “usa kadto ka pinakamaayo nga lugar sa pagpasanay sa mga Santos sa Ulahing mga Adlaw”? Sa unsang paagi nga ang mga kalisdanan nakapanalangin sa inyong kinabuhi? Unsa ang atong mabuhat sa paghimo sa bisan sa pinakamahagitong pagsulay ngadto sa usa ka kahigayunan nga molambo?