Ang mga Kasulatan

Inyo kining pribilehiyo ug katungdanan ang pagpakabuhi aron nga kamo makahimo sa pagsabut sa mga butang sa Dios. Anaa ang Daan ug Bag-ong mga Tugon, ang Basahon ni Mormon, ug ang basahon nga Doktrina ug mga Pakigsaad, nga gihatag ni Joseph kanato, ug hilabihan gayud ang kabililhon niini ngadto sa usa ka tawo nga naglatagaw diha sa kangitngit. Nahimo silang sama sa usa ka parola diha sa kadagatan, o usa ka ugsok nga igtutudlo nga nagtudlo sa dalan nga kinahanglan natong pagalaktan. Asa kini nagtudlo? Ngadto sa Tinubdan sa kahayag (DBY, 127).

Ako nagtuo sa mga pulong sa Biblia. … Nagtuo ako sa mga doktrina kalabut sa kaluwasan nga anaa niana nga basahon nga tinuod, ug nga ang pagsunod sumala niadtong mga butang makapauswag sa bisan unsa nga katawhan, nasud o pamilya nga nagpuyo dinhi sa yuta. Ang mga doktrina nga anaa diha sa Biblia mopabayaw ngadto sa usa ka kinatas-an nga kahimtang sa tanan kinsa mosunod niini; mohatag kini kanila og kahibalo, kaalam, gugmang putli, mopuno kanila sa kalooy ug mohimo kini kanila sa pag-atiman sa mga panginahanglan niadtong kinsa anaa sa kalisud, o diha sa sakit o sa kabus nga mga kahimtang. Sila kinsa nagsunod sa mga baruganan nga anaa diha sa mga Kasulatan mahimong makiangayon ug matinuoron ug mahiyason ug malinawon diha sa ilang lugar o sa laing dapit. Sunda ang mga doktrina sa Biblia, ug ang mga lalaki mahimong talagsaon nga mga bana, ang mga babaye mahimong sobra ka maayo nga mga asawa, ug ang mga anak mahimong masulundon; mohimo kini sa mga pamilya nga malipayon ug sa mga nasud nga adunahan ug malipayon ug ibayaw ibabaw sa mga butang niining kinabuhia (DBY, 125).

Ako moingon nga atong himoon kini nga basahon [ang Biblia] nga atong giya, alang sa atong lagda sa kalihokan; ato kining himoon isip pundasyon sa atong hugot nga pagtuo. Nagtudlo kini sa dalan ngadto sa kaluwasan sama sa usa ka tagdok sa pahibalo [fingerboard] nga nagtudlo ngadto sa usa ka siyudad, o usa ka mapa nga nagtudlo sa lungsod sa kabukiran, mga sapa, o sa kalugwayan ug katas-on sa bisan unsang dapita dinhi sa yuta nga atong gitinguha nga makit-an, ug kita walay mas maayo nga himoon kaysa tuohan kini; busa, ako moingon nga ang mga Santos sa Ulahing mga Adlaw aduna sa pinaka natural nga hugot nga pagtuo ug tinuohan sa bisan unsa nga katawhan dinhi sa yuta (DBY, 125).

Atong giisip ang Biblia … isip usa ka giya … nga nagtudlo ngadto sa usa ka pihong destinasyon. Usa kini ka tinuod nga doktrina, nga dayag natong isangyaw. Kon mosunod kamo sa mga doktrina, ug magiyahan sa mga lagda niana nga basahon, mogiya kini kaninyo kon asa kamo mahimong makita ingon nga kamo nakita, diin kamo mahimong makig-istorya kang Jesukristo, makabaton sa pagbisita sa mga anghel, makabaton og mga damgo, mga panan-awon, ug mga pinadayag, ug makasabut ug makaila sa Dios alang sa inyong mga kaugalingon. Dili ba kini usa ka tukod nganha kaninyo? Oo; mopakita kini kaninyo nga kamo nagsunod diha sa mga lakang sa mga tawo sa karaang panahon. Inyong makita kon unsay ilang nakita, masabtan kon unsay ilang natagamtaman (DBY, 126).

Walay panagbangi diha sa mga baruganan nga gipadayag diha sa Biblia, sa Basahon ni Mormon, ug sa Doktrina ug mga Pakigsaad [ang Perlas nga Labing Bililhon wala pay eklesiastikanhong pagtugot sa panahon niini nga pamahayag]; ug walay mahitabong panagbangi tali sa bisan unsa nga mga doktrina nga gitudlo ni Joseph ang Propeta ug sa mga kaigsoonan karon, kon ang tanan magpuyo sa paagi nga madumala sa Espiritu sa Ginoo. Ang tanan wala magpuyo aron makabaton sa Espiritu sa Ginoo uban kanila sa tanang higayon, ug ang resulta mao nga ang uban nahisalaag (DBY, 126).

Nagtuo kita sa Basahon ni Mormon, ug sa Doktrina ug mga Pakigsaad nga gihatag sa Ginoo ngadto kang Joseph Smith ug pinaagi kaniya ngadto sa Simbahan. Nagtuo usab kita nga kon wala kanato ang Espiritu sa Ginoo, ug ang atong mga mata gipiyung aron nga kita dili makakita ug makasabut sa mga butang ingon nga kini mao pinaagi sa espiritu sa pagpadayag, mahimo kitang manamilit ngadto sa tanan niining mga basahon, bisan unsa pa man ka daghan. Kon anaa kanato ang tanang pinadayag nga gihatag sukad pa sa panahon ni Adan ug wala ang espiritu sa pagpadayag nga mahimo ug magpabilin diha sa taliwala sa mga katawhan, kini imposible alang kanato nga maluwas diha sa celestial nga gingharian sa Dios (DBY, 128).

Ang basahon nga Doktrina ug mga Pakigsaad gihatag alang sa mga Santos sa Ulahing mga Adlaw sa piho nga paagi alang sa ilang inadlawadlaw nga pagpakabuhi ug mga kalihokan (DBY, 128).

Kini nga Basahon, nga mao ang Daan ug Bag-ong Tugon, nagsangyaw og usa lamang ka sermon gikan sa Genesis ngadto sa Pinadayag (DBY, 126).

Ang doktrina nga atong gisangyaw mao ang doktrina sa Biblia, kini mao ang doktrina nga gipadayag alang sa kaluwasan sa mga katawhan sa Dios, ug kon ang mga tawo, kinsa sa makausa nagsunod niini, naglimud niini, sila naglimud niini uban sa hingpit nga panabut ug nasayud nga sila naglinud sa kamatuoran ug mibaliwala sa mga tambag sa Labaw nga Makagagahum (DBY, 126).

Ang Biblia tinuod. Mahimong wala kini tanan mahubad sa hustong paagi, ug daghan sa bililhong mga butang ang tingali nabulag diha sa kahugpongan ug paghubad sa Biblia [tan-awa sa Nephi 13:24–27]; apan kita nakasabut, gikan sa mga gisulat sa usa sa mga Apostoles, nga kon ang tanang mga gisulti ug mga gibuhat sa Manluluwas gisulat pa, ang kalibutan dili makapaigo nga kasudlan niini [tan-awa sa Juan 21:25]. Ako moingon nga ang kalibutan dili makasabut niini. Wala sila makasabut sa unsay anaa kanato nga narekord, ni sa kinaiya sa Manluluwas, ingon nga gihulagway diha sa mga Kasulatan; ug gani usa kini sa labing yano nga mga basahon sa kalibutan, ug ang Biblia, kon kini masabtan, usa sa labing yano nga mga basahon sa kalibutan, kay, kutob nga kini tukma ang pagkahubad [tan-awa sa Mga Artikulo sa Hugot nga Pagtuo 1:8], kini walay lain kon dili kamatuoran, ug sa pagkatinuod walay misteryo gawas ngadto sa walay kahibalo. Ang mga pinadayag sa Ginoo ngadto sa iyang mga binuhat gipahiangay ngadto sa kinaubsan og kapasidad sa pagsabut, ug kini nagdala og kinabuhi ug kaluwasan ngadto sa tanan kinsa andam nga modawat niini (DBY, 124).

Nagtuo kita sa Bag-ong Tugon, ug isip sangputanan, aron mahimong mahiuyon, kinahanglan kitang motuo sa bag-ong pagpadayag, mga pananawon, mga anghel, sa tanang mga gasa sa Espiritu Santo, ug sa tanang mga saad nga anaa niini nga mga basahon, ug motuo niini ingon nga kini nahisulat (DBY, 124).

Kita adunay usa ka balaang pagtahud ug usa ka pagtuo diha sa Biblia (DBY, 124).

Pinaagi sa pagbasa sa Biblia atong makita nga ang Ebanghelyo anaa dili lamang diha sa Bag-ong Tugon, apan diha usab sa Daan. Sila si Moises ug ang mga Propeta nakakita ug nanagna sa apostasiya sa Simbahan. Ilang nakita nga ang Ginoo nanglimbasug sa pagtabang sa mga tawo matag karon ug unya, nga iyang mahatag kanila ang kamatuoran ug ang Priesthood; ila usab nga nakita nga tungod sa kadautan sa mga tawo ilang usbon ang iyang mga ordinansa, mosupak sa mga pakigsaad, ug molapas sa iyang mga balaod [tan-awa sa Isaias 24:5], hangtud nga ang Priesthood pagakuhaon gikan sa yuta, ug ang mga lumulupyo niini magpabilin diha sa apostasiya ug kangitngit (DBY, 124–25).

Kita isip mga Santos sa Ulahing mga Adlaw mikumpisal atubangan sa Langit, atubangan sa langitnong mga panon, ug atubangan sa mga lumulupyo sa yuta, nga kita mituo gayud sa mga Kasulatan ingon nga kini gihatag ngari kanato, sumala sa labing maayo nga panabut ug kahibalo nga atong nabatunan kabahin sa paghubad, ug sa espiritu ug kahulugan sa Daan ug Bag-ong mga Tugon (DBY, 125–26).

Ang Basahon ni Mormon … mipahayag nga ang Biblia tinuod, ug kini mipamatuod niini; ug ang duha nagpamatuod sa usag usa nga tinuod. Ang Daan ug Bag-ong mga Tugon mao ang sungkod ni Juda [tan-awa sa Ezekiel 37:15–19]. Inyong mahinumduman nga ang tribu ni Juda nagpuyo sa Jerusalem ug ang Ginoo mipanalangin ni Juda, ug ang resulta mao ang mga sinulat sa Daan ug Bag-ong mga Tugon. Apan hain man ang sungkod ni Jose? Inyo bang masulti kon hain kini? Oo. Mga anak kadto ni Jose kinsa mitabok sa mga katubigan ngadto niini nga kontinente [ang Amerika], ug kini nga yuta napuno sa mga tawo, ug ang Basahon ni Mormon o ang sungkod ni Jose naglakip sa ilang mga sinulat, ug kini anaa sa mga kamot ni Ephraim. Hain man ang mga Ephraimite? Nasagul sila sa tanang mga nasud sa yuta. Ang Dios nagtawag kanila sa pagpundok, ug iya silang gihiusa, ug sila naghatag sa Ebanghelyo ngadto sa tibuok kalibutan (DBY, 127).

Wala kita sa samang kinaiya nga diha sa mga tawo pipila ka liboan ka tuig na ang milabay––nag-agad sila sa Propeta o sa mga Propeta, o sa pagbaton og dihadiha dayon nga pagpadayag alang sa ilang mga kaugalingon aron masayud sa kabubut-on sa Ginoo, nga wala ang rekord sa ilang mga katigulangan, samtang kita adunay mga rekord kabahin niadtong kinsa nagpuyo sa wala pa kita, usab sa pagpamatuod sa Balaang Espiritu; ug, sa katagbawan sa tanan kinsa nagtinguha og usa ka pagpamatuod, makadangup kita niini nga basahon ug mobasa nianang atong gituohan, magkat-on sa katuyoan nga atong gitinguha, ang tumong nga atong gipaningkamutan nga matuman––ang katapusan sa lumba––ug ang kahingpitan sa himaya nga lapas pa niining walog sa mga luha; isip sangputanan nakabintaha kita niadtong kinsa nagpuyo nga una kanato (DBY, 128).

Ang mga tawo bisan asa mangutana, “Unsa ang buot ipasabut niini nga kasulatan, ug unsaon nato sa pagkasabut niini o niana nga tudling?” Karon ako nangandoy, akong mga kaigsoonan, nga kita makasabut sa mga butang sa tukmang paagi ingon nga kini mao, ug dili sama sa pagpasabut niining kusog, mabalhinon nga imahinasyon sa hunahuna sa tawo nga mahimong nagmugna niini (DBY, 128).

Ako mangutana kanimo, brother B, unsaon nako sa pagtuo sa Biblia, ug unsaon sa matag sumusunod ni Ginoong Jesukristo sa pagtuo niini? … Ako nagtuo niini ingon nga kini mao. Dili ako motuo diha sa pagbutang sa bisan unsang interpretasyon niini sa bisan unsang paagi, gawas kon kini gimando sa Ginoo mismo sa ubang paagi. Dili ako motuo nga nagkinahanglan kita og mga tighubad ug mga tigpatin-aw sa mga Kasulatan, sa pagusab niini gikan sa tukma, yano, simple nga kahulugan niini (DBY, 126).

Ang Biblia ingon lamang ka yano ug kasayon nga sabton sama sa pagpadayag nga mao pa gayuy pagbasa nako kaninyo [tan-awa sa D&P 58], kon kamo nakasabut sa Espiritu sa Dios––ang Espiritu sa Pagpadayag, ug masayud kon sa unsang paagi nga ang Ebanghelyo sa kaluwasan gipahiangay ngadto sa kapasidad sa huyang nga tawo (DBY, 128).

Kalabut sa Biblia, ang kahan-ayan sa pulong mao kanang unsay naandan sa milabay nga mga siglo; apan bisan unsa pa man ang pinulongan, kana usa lamang ka kustombre. Apan ako moingon nga ang mga doktrina nga gitudlo diha sa Daan ug Bag-ong mga Tugon kalabut sa kabubut-on sa Dios ngadto sa iyang mga anak dinhi sa yuta; ang kasaysayan sa unsay iyang nabuhat alang sa ilang kaluwasan; ang mga ordinansa nga iyang gipasiugdahan alang sa ilang katubsanan; ang gasa sa iyang Anak ug sa iyang pag-ula––tanan niini tinuod, ug kita, ang mga Santos sa Ulahing mga Adlaw, mituo niini (DBY, 129).

Kon kita mamalandong ug makasabut sa hustong paagi, atong makatunan kon unsa ka sayon ang pagsabut sa Ebanghelyo, unsa kini ka yano diha sa plano niini, sa matag bahin ug baruganan nga gipahaum sa hingpit nga paagi ngadto sa kapasidad sa katawhan, sa ingon nga paagi nga kon ipaila kini diha sa mga mahigugmaon sa kamatuoran makita kini nga sayon kaayo ug yano kaayo, ug unsa gayud kaandam ang matinuoron sa pagdawat niini (DBY, 129).

Kinahanglan kitang tanan nga magpakabuhi sa ingon nga ang Espiritu sa pagpadayag makaistorya ug makaimpluwensya sa atong kasingkasing ug mosulti kanato sa unsay atong kinahanglan nga buhaton…. Apan sa pagbuhat niini kinahanglan kitang mahimong sama sa gagmay nga mga bata; ug si Jesus miingon nga kon kita dili mahimo kita dili makasulod sa gingharian sa langit. Unsa kini ka yano! Pagpuyo nga gawasnon sa kasina, malisya, kasilag, panagbingkil, dili maayo nga mga pagbati, ug pagsulti og dautan diha sa atong mga pamilya ug kabahin sa atong mga silingan ug mga higala ug sa tanang mga lumulupyo sa yuta, bisan asa nato sila mahimamat. Pagpakabuhi sa ingon nga ang atong mga konsyensya gawasnon, limpyo ug tin-aw (DBY, 36).

• Sumala ni Presidente Young, nganong kinahanglan kita nga magtuon sa mga doktrina sa Ginoo nga anaa diha sa mga kasulatan? Unsa nga mga saad ang gihimo ni Presidente Young ngadto niadtong kinsa mosunod sa mga lagda sa Biblia ug sa uban pang mga kasulatan?

• Sa unsang paagi nga ang mga rekord nga gatusan ug liboan ka tuig na ang gidugayon makagiya sa atong mga kinabuhi karon? Giunsa sa mga kasulatan sa paggiya sa inyong kinabuhi?

• Ngano, sumala ni Presidente Young, nga ang Doktrina ug mga Pakigsaad gihatag? Sa unsang paagi nga ang Doktrina ug mga Pakigsaad nakatabang kaninyo diha sa inyong “inadlaw-adlaw nga pagpakabuhi ug mga kalihokan”? (Tan-awa usab sa D&P 4:3–4; 84:43–44; 86:11; 121:41–42, 45.)

• Si Presidente Young nagtudlo nga ang Biblia “nagsangyaw og usa lamang ka sermon gikan sa Genesis ngadto sa Pinadayag.” Unsa kana nga sermon?

• Sa unsang paagi nga ang mga kasulatan nakatabang kaninyo nga makasabut “sa kinaiya sa Manluluwas”?

• Unsa ang mga sungkod ni Juda ug Jose? Unsa ang kalabutan sa Biblia ug sa Basahon ni Mormon sa usag usa? Sumala ni Presidente Young, sa unsa nga katuyoan nga ang sungkod ni Jose gibutang man ngadto sa “mga kamot ni Ephraim”?

• Unsa ang tambag ni Presidente Young ngadto niadtong kinsa kanunay nga nagtinguha sa mga interpretasyon sa tawo kabahin sa mga kasulatan?

• Unsa ang mga kaayohan nga moabut kanato tungod kay kita adunay mga rekord sa mga propeta diha sa mga kasulatan?

• Si Presidente Young midapit kanato sa pagtan-aw lapas pa usahay sa lisud nga pinulongan sa mga kasulatan alang sa bililhong mga baruganan ug mga doktrina nga mogiya sa atong mga kinabuhi. Unsa nga mga doktrina ang piho niya nga gihisgutan? Ngano nga kining piho nga mga doktrina importante man kanato karon?

• Sumala ni Presidente Young, para kang kinsa ang mga kasulatan nga yano ug sayon man sabton?

• Si Presidente Young nagtudlo nga kinahanglan kitang “magpakabuhi sa ingon nga ang Espiritu sa pagpadayag makaistorya ug makaimpluwensya sa atong kasingkasing ug mosulti kanato sa unsay atong kinahanglan nga buhaton.” Unsaon nato sa pag-ugmad sa espiritu sa pagpadayag diha sa atong mga kinabuhi aron nga kita makasabut sa mas tataw nga paagi sa mga mensahe sa mga kasulatan?