Wase 10

Na iLesilesi Vakalou nei Parofita Josefa Simici

Sa noqu ivakadinadina tudei ni a rairai na Tamana kei na Luvena vua na Parofita o Josefa Simici ka vakatakila vua na kosipeli i Jisu Karisito, ka sa ikoya dina, “na kaukauwa ni Kalou me vakabulai kina ko ira yadua.” [Roma 1:16.]¹

iVakamacala Taumada

Ekaya o Peresitedi David O. McKay, “Mai na gauna au a se gonelailai kina e sa rawarawa tu ga mai vei au meu vakabauta na dina ni nona raivotu na Parofita o Josefa Simici.”² E kaya ni a vaqaqacotaka na nona ivakadinadina baleti Parofita Josefa ena gauna e a rogoca kina e dua na ka e a sotava o tamana ena nona a kaulotu tiko kina mai Sikoteladi:

“Ena gauna sa tekivuna kina [o tamaqu] me vunau ena nona vanua dina ka wasea na nona ivakadinadina baleta na kena sa vakalesui mai na kosipeli i Jisu Karisito, e raica o koya ni ra sa gole tani mai vua na tamata. Era besetaka vakalevu na veika [baleta na Lotu], e vaka me tuberi ira e dua na yalo ni veisaqasaqa ni ra rogoca na yaca i Josefa Simici. Ena dua na siga sa vakadeitaka sara o koya ni sa sala vinaka duadua me ra rawai o ira na tamata oqo o ya me vunautaki ga vei ira na veivakavuvuli rawarawa, o ya na veisorovaki ni Turaga o Jisu Karisito, na imatai ni ivakavuvuli ni kosipeli, ka kakua ni wasea na ivakadinadina ni kosipeli vakalesui. Ena loma ga ni dua na vula vakacaca sa tuburi koya e dua na yalo rarawa ka luluqa ka sega tale ni rawa vua me tomana na nona cakacaka. E sega sara ga ni kila o koya na cava e sa manati koya, ia sa vaka me vakataotaki na nona vakasama; sa lomaocaoca sara; sa lomabibi ka vakacauoca; sa toso tikoga na nona lomaocaoca ka vaka me sa tabaki koya sobu sara ka sa mani vosa kina vua na Kalou ka kaya, ‘Kevaka ena sega ni takali tani mai vei au na yalo vakaoqo, sa dodonu meu lesu tale ki vale. Ena sega ni rawa meu tomana tiko na noqu cakacaka ena yalo vakaoqo.’

“E a toso tikoga na veivakayalolailaitaki oqo, ia ena dua na mataka lailai ni se buto, ka a sega tu kina ni moce ena bogi, e a lomana sara me laki vakacegu ena dua na qara ka volekata na waitui, eke e kila kina o koya ni na tabogo tani mai vua na vuravura taucoko, ka me na laki tagi vua na Kalou ka taroga na cava e vuna e sa vakaleqai tiko kina ena yalo vakaoqo, na cava e cakava beka o koya, ka me na tagutuva laivi vakacava ka tomana na nona cakacaka. Sa tekivu sara me gole yani ki na qara vatu oqo. Ena nona maqusa me yacova yani sa tekivu me cici. Ena gauna e sa biubiu kina mai na tauni, e a tarovi koya sara e dua na ovisa ka a via kila na cava e leqa. E a sauma ga yani me rawa ia e a mani veirauti ka a vakatarai tale me tomana na nona ilakolako. Sa vaka me vakauqeti tikoga o koya; sa gadreva o koya me vakacegui. E a curu yani ki na qara vatu, ka kaya, “I Tamaqu, na cava meu cakava me takali tani mai kina vei au na yalo vakaoqo? Au sa gadreva me kau tani ke sega sa sega ni rawa meu tomana tale na cakacaka oqo: a qai rogoca e dua na domo, e matata me vaka na voqa ni noqu vosa tiko oqo, ka kaya mai, “Tukuna ni ko Josefa Simici e parofita ni Kalou! E a qai vakananuma lesu na veika e a vakatulewa kina ena ono na macawa se sivia sa oti, ka a vakauqeti sara ena vakasama o ya, ka sa lesu tale mai vua na veika taucoko ni sa vakasamataka rawa ka sa mai tu oqo o koya me baleta e dua na ilesilesi cecere ka a mai vakawaletaka na kena bibi. E a qai tagica na yalona, ‘Turaga sa rauti au, ’ ka gole tani mai na qara vatu.”

E vakananuma lesu o Peresitedi McKay, “Niu a se cauravou lailai, au a dabe toka ka rogoca na ivakadinadina o ya mai vua e dua au dau taleitaka ka rokova me vaka o ni kila au sega ni taleitaka tale e dua na tamata ena vuravura oqo, ka sa mai vakatikori kina ki na yaloqu gone na veivakadeitaki o ya.”³

iVakavuvuli nei David O. McKay

Na iMatai ni Raivotu nei Josefa Simici e a vakatakilai mai kina na lagilagi ni dina baleta na Kalou na Tamana kei Jisu Karisito.

E kilai raraba ka yaga sara na veika cecere sa kilai rawa kei na veika vovou e rawati ena mua ni i ka tinikaciwa ni senijiuri ka ra ulabaleti keda. Ia e sega ni dua vei ira na ka oqo e se sauma rawa na gagadre cecere kei na veika e vinakata na tamata. E se bera ni dua me vakaraitaka mai na veika era vakasaqara tiko na tamata ena veitabagauna. Na yalo ni tamata, o ya na kila na Kalou, kei na nona veimaliwai vua. E dua walega na ka e a yaco ena i ka tinikaciwa ni senijiuri e rawa ni tukuni ni sa solia ki na tamata na isau ni veitaro oqo. Kevaka na ka sa yaco oqo e kunea kina na tamata na dina ka ra vakasaqara tiko na kawa tamata, sa qai koya dina oqo na iyau cecere ni cakacaka veivakurabuitaki o ya ni i ka tinikaciwa ni senijiuri.

Na veika e a yaco oqo sa ikoya na nodrau rairai e rua na ituvaki ni Tamata kivua na Parofita o Josefa Simici, ka vakaraitaki mai kina na kedrau ituvaki na Kalou na Tamada Tawamudu kei na Luvena o Jisu Karisito.⁴

Ni oti e dua na udolu walu na drau na yabaki mai na gauna e a mate kina o Jisu ena kauveilatai, e a vakaraitaka o Parofita Josefa Simici ni a rairai vua na Turaga ka a tucaketale. E kaya o koya, “Au sa qai raica e rua na Tamata, ia na kedrau iserau kei na iukuuku sa sega ni vakamacalatakai rawa; raica erau sa tucake tu ena maliwa lala donuya na mataqu. E a kacivi au e dua vei rau, dusi koya na kena ikarua ka kaya—Oqo na noqu Gone ni Toko. Mo rogoci Koya! [Josefa Simici—Ai Tukutuku 1:17.]⁵

E kilai rawarawa na nona itukutuku ia e dodonu; e a kurabui ni ra vakatitiqataka na tamata na dina oqo. Ia ki vei koya na ka sa tukuna oqo e dua ga na itukutuku dina; ki na lotu Vakarisito e vuravura na ka oqo sa dua na bukawaqa vuka ka sa vakamalumalumutaka na nodra yavu vakalotu mai cake ka kauta sobu.

Erua na yavu bibi ni imatai ni nona itukutuku, o ya: imatai, na Kalou sa ituvaki Vakatamata, ka vakaraitaka vei ira na tamata na nona lewa; ka ikarua, o ya ni sega ni dua na isoqosoqo Vakarisito e tiko vua na yavu ni veivakabulai dina.⁶

Na nodrau rairai na Tamana kei na Luvena vei Josefa Simici sa yavu ni Lotu oqo. Sa umani tu kina na dina ni kena kaukauwa kei na kena qaqa. Oqo na ka dina, kau sa vakadinadinataka. E dua ga na ivakatakila oqo sa mai sauma kece sara na taro ni veika ni vuravura oqo baleta na Kalou kei na kena ituvaki lagilagi. Ko sa kila beka na ibalebale ni ka oqo? Na veika e baleta na Kalou sa vakatakilai mai. Sa matata vinaka na kena isema vei ira na luvena. Sa kilai levu tu ni sa lesi ira na tamata ena vuku ni nona kauwaitaka na kawa tamata. Sa vakadeitaki tu na kena toso na cakacaka oqo. Sa vakamatatataki mai ena imatai ni raivotu lagilagi o ya na dina lagilagi oqo kei na so tale.⁷

E se bera tikoga ni kila vakavinaka ko vuravura na kena ibalebale; ia sa dua na ivurevure ni nona vakavukui na tamata me baleta na nona semati vua na Kalou kei na nona itikotiko mai lomalagi; ka sa mata ni wai talega ni vakasucumi e dua na veimaliwai vakamata tamata kei na nodra veimatanitu; ka sa dua na ivakatakila e dusimaka na sala ki na nona marau ka vakacegu na tamata e vuravura ka vakakina ena bula tawamudu sa roro tiko mai, na nodrau rairai na Tamana kei na Luvena vei Josefa Simici kei na kena qai vakalesui mai na matabete ka tauyavutaki na Lotu i Jisu Karisito ena kena taucoko, ena sega walega me na qai kilai ni sa dua na cakacaka veivakurabuitaki levu duadua ni i ka tinikaciwa ni senijiuri, ia ki na veitabagauna kecega.⁸

Sa vakalesuya tale na Turaga vua na Parofita o Josefa Simici na dina ni kosipeli.

Au gadreva meu talanoataki Josefa Simici mada, sega ni baleta duadua ga ni o koya e dua na turaga qaqa, ia sa dua o koya e italai dina ni Turaga. Na bula qaqa nei Josefa Simici e umanaki tu kina na veivakauqeti vakalou. …

E sega ni rawa vua e dua na tamata me vulica vakaukauwa se vakavinaka na kosipeli vakalesui mai nei Jisu Karisito kevaka e sega ni tugana ka bula vata kei na ivakavuvuli e a solia na Turaga na iVakabula ena gauna e a bula kina e vuravura kei ira na Nona tisaipeli. Oqo e dua na kena ivakaraitaki, o ya na vakatakila nei koya na Parofita baleta na Dauniveibuli—ni Kalou sa ituvaki Vakatamata, ni sa ikoya me vaka e a vakavulica o Jisu, na “Tamai keimami mai lomalagi.” [Raica Maciu 6:9.] …

Na ivakavuvuli nei Josefa Simici ni ko Jisu Karisito sa Luvena Duabau na Tamana, na iVakabula kei vuravura, sa tautauvata kei na Nona ivakavuvuli sara ga o Jisu kei ira na Nona apositolo.

Sa vakakina na nona ivakavuvuli ni kena kakavaki yani na ituvaki vakayago ena taudaku ni mate. …

Na isema vata ga oqo e kunei ena ivakavuvuli tale e so ni kosipeli me vaka na vakabauta, veivutuni, papitaiso, na vakatikori ni isolisoli ni Yalo Tabu ena veitabaki ni liga, veitabaki ni matabete, na nona ivakavuvuli ena “vuku, ivalavala malua, daulotu, veilomani vakaveitacini, yalololoma, kei na so tale.” [Raica 2 Pita 1:5–7; V&V 4:6.] …

… O ira era tokona na nodra papitaisotaki na gone dramidrami era vakavulica baleti ira na lalai: “O ira na gone era se qai sucu mai ki vuravura era sega walega ni sega vei ira na vuku, ivalavala dodonu kei na bula vakalou, ia era na rawai talega ki na ka vakatani ka sega ni dua tale na ka.”

… Ena nona tamata qaqa ka sega ni rere ka vosa me vaka e dua sa vakadeitaka ni dina o koya, e a kaya kina o Parofita Josefa: “Era sa savasava ko ira na gone; io era sa vakasavasavataki ena isoro i Jisu Karisito.” [Raica V&V 74:7.]⁹

Sa kilai deivaki tu na veivakauqeti vakalou … ena nona itukutuku lagilagi [o Josefa Simici] me baleta na ituvatuva tawamudu ni veiyalayalati kei na kena veiqaravi kei na nona vakabulai yadua na tamata kecega. Na Lotu e sega ni baleti ira ga e so ia kivei ira kece sara na tamata yadua era na muria na kena ivakavuvuli. … Ena vakabulai na kawa tamata ena nona muria na lawa kei na cakacaka tabu ni kosipeli. Sa vakakina o ira era na mate ka sega ni kovuti ena lawa era na lewai vakakina. Sa mai vakatakilai talega na cakacaka tabu ni nodra vakabulai na mate.

Sa dua na ivakatakila lagilagi na tawamudu ni vakamau, ka sa solia e dua na veivakadeitaki vei ira era dregati tu vakaukauwa ena loloma ka yaco me ra vauci vata ena kaukauwa ni Matabete tabu ka me na tawamudu na nodrau duabau.

Sa vakayacori tikoga na veiyalayalati e so vakatoroicaketaki me tawamudu ena veitabagauna tawamudu.

E a sega ni rawa vei Josefa Simici me vakayacora kece na veika oqo ena nona vuku ga, kila ka kei na veivakauqeti. E a sega ni rawa me vakayacora rawa.¹⁰

Sa vakatakila mai na Turaga edaidai na Yavu ni Veivakabulai, ka sa sega tale ni dua na ka, ia sa salatu ga ki na vuravura vakayalo ena kena buli vou na tamata me kilikili ni sa curuma yani na Nona matanitu. Na Yavu sa ikoya na kosipeli i Jisu Karisito ka a vakalesui vua na Parofita o Josefa Simici, ka sa veivakacegui ka veivakavukui.¹¹

Na Lotu i Jisu Karisito sa vakalesui mai sa ivakadinadina ni a vakauqeti vakalou na Parofita o Josefa.

Ena yabaki 1820, ena vuku ni veitubuyaki ni matalotu, e a vakavuna me vakasaqara o Josefa Simici na lotu dina, na ivakarau dina ni sokalou kei na ituvatuva dodonu ni bula. Na nona gagadre me kila sara e a saga sara na cauravou oqo me vakasaqara na Turaga ena masu mai na vu ni yalona. E dua na vua ni nona masu o ya na kena tauyavutaki na Lotu ena vale nei Peter Whitmer ena … i ka 6 ni Epereli, 1830. Ena loma ni veivakayavutaki o ya sa umani tu kina vakamatata sara na yavu taucoko ni nona vakabulai na tamata.

Au vinakata meu vakaraitaka eke ni veivakayavutaki o ya sa dua na ivakadinadina ni nona a vakauqeti dina. … [E] sa valuta oti mai na bula rarawa vakailavo, veitubuyaki vakaveiwekani, kei na veilecayaki vakalotu; ka sa yaco edaidai me ivurevure ni veigagadre levu ni kawa tamata. …

… “E a tauyavutaki na Lotu i Jisu Karisito ena kena vakamuri na lawa ni Lotu ka toqai tu ena veiyalayalati Vou, ” e kaya vakaoqori o Josefa Simici [raica History of the Church, 1:79]. Na cakacaka sa vakayacori tiko kei na yaga ni veivakayavutaki oqo sa vakadinadinataka tiko ni sa vakalou.¹²

Ena vuqa na yabaki sa oti ni a se dua ga na cauravou lailai yabaki tinikava vakacaca kina o Josefa Simici, e a vakaraitaka kina na ka oqo, ka isau ni nona masu ni a ciqoma kina e dua na ivakatakila mai vua na Kalou. … Na isau ni itukutuku oqo sa ikoya na nona a tagutuvi mai vei ira na matalotu ni vuravura oqo. Ena tu taudua ga o koya.

Tu taudua—ka sega ni kila na veika ni vuli kei na ivalavala ni gauna o ya!

Tu taudua—ka sega ni vakavulici ena veika vakatamata kei na vuravura oqo!

Tu taudua—ka sega ni dua na tamata vuku me vakasalataki koya, e sega ni dua na italatala me dusimaki koya. Ena ivalavala malua kei na yalovinaka e a vakaraitaka vei ira na itukutuku lagilagi oqo; ena veivakalialiai kei na yaloca era a vukitani mai vua ka kaya ni sa mai vua na tevoro; ni sa sega ni yaco rawa na raivotu kei na ivakatakila ena gauna oqo; ni sa mai tagutuvi vata kei ira na iApositolo; ka na sega ni rawa ni yaco tale [raica Josefa Simici—Ai Tukutuku 1:21].

Ia sa ikoya duadua ga ena sokota yani na wasawasa ni veivakasama vakalotu, e a sega ni vodoka e dua tale na waqa me vodo kina se cakava e dua se raica na kena caka e dua. Ia kevaka me a tamata lasulasu, na waqa ena taya ena ka ca.

Ena dua tale na yasana, kevaka ena umani tu ena waqa e a taya o koya e dua na ka taleitaki ka cecere cake mai na veika era a solia na tamata vuku ki vuravura ena veitabagauna sa oti, era na vakayarayarataki na tamata, me ra na taroga ena kidroa, e rawata mai vei o koya oqo na vuku oqo!

Ena qai laurai eke, na dina ni sa vaka me tu taudua ga, ia e sa vakataki Mosese ena Ulunivanua o Saineai; ka vakataki Jisu ena Ulunivanua ni Veiolive. Ni sa yaco vakakina vua na iVakavuvuli, sa na vakakina vua na parofita, na nona ivakasala sa sega ni kau ena sala ni tamata ia sa solia sara ga mai na Kalou, na ivurevure ni vuku. E kaya kina o koya: “Oi au e dua na vatu yagoyagoca. E a sega ni bau rogo vei au na irorogo ni ituki kei na jesili me yacova na gauna sa tomiki au cake kina na Turaga. Au sa gadreva duadua ga na veivakavulici kei na vuku mai lomalagi.” (History of the Church, 5:423.]…

Na nona kerea na ivakatakila mai vua na Kalou, kevaka me tauyavutaki, e sega ni vakataratutu ni sa nona kaukauwa me tauyavutaka kina na Lotu i Jisu Karisito ena vuravura oqo, ka vakayacora ena lewa na ivakavuvuli kei na kena cakacaka vakalotu. Ia ena itekitekivu ni cakacaka cecere ni gauna oqo sa mai vakasoburi kina na vatunitutu ni Lotu i Karisito ena itabagauna oqo, o ya na dodonu me taurivaka na yaca i Jisu Karisito ena kena qaravi na nona Lotu.¹³

Ni da vakasamataka na veika sa vakayacora rawa o Josefa Simici ena loma ni tinikava walega na yabaki mai na gauna e a tauyavutaki kina na Lotu ki na gauna e a vakamatei kina; ni da vakasamataka na kena duavata sara na kosipeli e a vakalesui mai kei na kena mai na lotu ena gauna makawa ka tauyavutaka o Jisu kei ira na Nona apositolo; ni da raica na nona rai vakatitobu me baleta na ivakavuvuli kei na cakacaka tabu; kei na noda raica na yavu cecere kei na dodonu ni Lotu ka a tauyavutaki ena nona veivakauqeti na Karisito ka sa virikotori tu ena isau ni vakatataro, e rawata mai vei o koya oqo na vuku? ka sa toqai toka oqo ena kena sere vakaciriloloma:

Praise to the man who communed with Jehovah!
Jesus anointed “that Prophet and Seer”—
Blessed to open the last dispensation;
Kings shall extol him and nations revere.

[Raica Sere, naba 27]¹⁴

E a bula ka mate na Parofita o Josefa ena nona taqomaka na dina e a vakatakilai vua.

O ira na tamata vuku sa tu vei ira na kila me ra raica rawa na titobu ni veika e tu. Era kila na ka dina. Era vakasama ga vakataki ira. Era tamata vakaturaga. Era dau vakauqeti ira na tamata qaqa me muri ira. O ira na tamata tawa rogo era dau vakalialiai ira, vakacacani ira ia era na yali yani o ira na dauvakalelewa ka guilecavi vakadua, ka ra bula tikoga me tawamudu o ira na tamata cecere.

E so na itokani i Josefa Simici era dau raibaleti koya; e so era dau qoroi koya; ka ra dau dokai koya o ira na nona ivavakoso.

E sega ni dua na tamata e dau vakatulewa vakadodonu me vulica rawa na nona bula na iliuliu vakalotu oqo ka qai sega ni taleitaka na dina ni sa umani tu vua e dua na ivakatagedegede uasivi ni cecere dina, ka kena ivurevure e kune ga mai ena kena gadrevi me kilai na lewa ni Kalou, ka kakavakitaki me kunei ka qai bulataki.¹⁵

Ena veitabagauna taucoko era sa dau raica taumada mai na veika dina o ira na iliuliu qaqa e so, ka ra mai mate kina e so ena nodra taqomaka. Na vakatoroicaketaki ni kawa tamata sa dau vakatekivutaki mai na nodra rai yawa kei na qaqa o ira na iliuliu qaqa. Ena so na gauna, sa dau yaco me ra digitaka me ra sa na cakitaka, moica vakalailai, se tutaka na dina o ya—sa idigidigi baleta na nona bula kei na ituvatuva taumada, se tagutuvi mai vei ira na tamata, totogitaki, se mate. E a yaco na digidigi vakaoqo vei Pita kei Joni ni rau sa tucake tu vakavesu e matai Anasa na bete levu. E taura e dua na yaloqaqa dina me rau cavuta na nodrau vakadinadinataki Karisito e matadra na tamata era sa vakatulewa me na vakamatei. [Raica Cakacaka 4.]

E a yaloqaqa o Paula ni a tucake tu vakavesu e matai Akaripa na tui kei ira na nona tamata me vakadinadinataka ni a vakararawataki na Karisito, ni sa dodonu me isevu ni tucaketale mai na mate o koya, ka na vakatakila na rarama vei ira na tamata, kei ira na veimatanitu tani. [Raica Cakacaka 26.]

E a yaloqaqa o Josefa Simici me vakadinadinataka ki na vuravura tawa vakabauta ka veivakararawataki oqo, na ka dina ni a rairai vua na Kalou kei na Luvena Daulomani.¹⁶

O ira kece na tamata era sa vakavinakataka na vuravura era dau tutaka ga na nodra dina, me vakataki Pita, Jemesa, kei Paula kei ira na nodratou itokani apositolo ena gauna makawa, ka vakakina e so tale. Ena gauna era a vakacacana kina na cauravou o Josefa Simici o ira na iliuliu ni veimatalotu mai Palmyra, New York ena vuku ni ka e a raica ka rogoca mai na Veikau Tabu, e a kaya ena nona vakadinadinataka na Turaga o Jisu e lomana: “Au a raica dina e dua na raivotu; au sa kila na ka oqori, kau kila ni sa kila talega na Kalou, ka sa dredre sara meu cakitaka, au sega mada ga ni doudou meu kitaka vakakina. …” [Josefa Simici—Ai Tukutuku 1:25.]

E a dinata tu ga o Josefa Simici na nona ivakadinadina ki na ivakataotioti.¹⁷

Na vua ni nona a dusimaki vakalou o Josefa Simici sa ikoya na ivakadei ni ivalavala dodonu ni veika e a vakavulica ka sega ni rerevaka me vunautaka. Ena gauna e vakavulica kina o Josefa Simici e dua na ivunau, e vakayacora ena qaqa. E sega ni nona itavi me taroga kevaka e sa salavata kei na vakasama ni tamata se sega, kevaka e sa tautauvata kei na ivakavuvuli ni lotu orthodox se sa veisaqasaqa tiko. Na veika ga e a soli vua sa solia vakakina ki vuravura veitalia ga ke duavata kina se sega, na kena tautauvata se veicalati kei na vakabuta ni veilotu e so, se na rawa ka ni kawa tamata; kei na siga nikua, ni da raica na veika sa yaco ena dua na drau na yabaki sa oti, sa ikoya oqo e dua na gauna vinaka me da vakaraica kina vakavinaka na dodonu ni nona ivakavuvuli, ka ivakadei ki na nona ivurevure ni nona ivakasala. …

E sega walega ni a dusimaki ka vakasalataki mai vua na Kalou, ia, ena gauna ga e a ciqoma kina e a tutaka sara ena dua na yaloqaqa me vakayacora.¹⁸

Mai na nona sotava na cudruvi, vakalialiai, buturaki, vesuki, bala ki valeniveivesu, vakacacani ka yacova sara me vakamatei o Josefa Simici me vakataki rau o Pita kei Paula, sa dau gumatuataka tikoga me salavata kei na rarama ka a vakavuna me “rawata kina na ka sa vakalou.” [Raica 2 Pita 1:4.]¹⁹

Na dra vinaka duadua ena vanua levu oqo o ya na kena e a vakadavei ena tawa cala. [Na Parofita o Josefa Simici] e a kila vinaka tu ni a sega na nona cala. E kila na nona dodonu vakatamata. Sa vakakina vei iratou o Hyrum na tuakana, o John Taylor kei Willard Richards ka ratou a vesu vata tu. Ia ena vuku ga ni veilasutaki butobuto ka veivakarusai, erau a vakamatei kina o Parofita Josefa kei na tuakana o Hyrum.

… Ena gauna e vakayacori tiko kina na veika oqo e a vakacava tu beka na ivakarau ni bula nei koya na Parofita? E maravu, yalo va-Karisito. E a kaya vakaoqo o koya, ni sa gole tiko ki Carthage ena yakavi o ya:

“Au sa lako me vaka na lami sa laki vakamatei; ia au sa sega ni taqaya se yalolailai kina: raica au sa kila ena vu ni yaloqu, niu a sa sega ni cala vua na Kalou se vei ira na tamata. Kevaka era na vakamatei au, au sa mate ena noqu dodonu, ia ena qai tukuni vakaoqo ena vukuqu, e a laulaba bulabula ko koya.” [Raica V&V 135:4.]²⁰

Na nodra bula na Parofita, na tuakana o Hyrum, na peteriaki, kei na drau na udolu na tamata era sa ciqoma na dina ni [iMatai ni Raivotu], sa ivakdinadina ni yavu ni veivakabulai ena kena ituvaki ka a vakatakila mai o Jisu Karisito, ka sa na veimuataki ki na itovo ni bula Vakarisito. Ena kena sa dina sara na ivakatakila vua na Parofita kei na tuakana o Hyrum erau a vauca kina na nodrau ivakadinadina ena nodrau dra.²¹

Vakatutu ni Vuli kei na Veivosaki

E a talanoataka o Peresitedi McKay baleta e dua na ka e a sotava o tamana ena gauna ni nona kaulotu ka baleta na gadrevi ni kena vakadinadinataki o Josefa Simici (raica tabana 105–06.) Na cava e yaga kina vei keda edaidai na isau ni taro e a ciqoma o tamana?
Na cava e yaga kina me kaciva na Turaga e dua na parofita ena gauna oqo? (Raica tabana 106–08.) Na cava e tiki bibi kina ni ivakadinadina ni kosipeli na ivakadinadina i Josefa Simici? Ena sala cava sa “yavu ni Lotu oqo” na nodrau rairai na Tamana kei na Luvena vei Josefa Simici?
Na cava e so na dina e a vakatakilai mai ena iMatai ni raivotu? (Raica tabana 106–08.) Ena sala cava sa vakauqeta kina na nomu ivakadinadina ni Tamada Vakalomalagi kei Jisu Karisito na nomu kila na iMatai ni Raivotu?
Na cava e so tale na vunau sa vakatakila na Turaga vua na parofita o Josefa Simici? (Raica tabana 108–09.) Ko sa vakalougatataki vakacava ena nomu sa vulica ka bulataka na ivunau oqo?
Ena sala cava erau sa itukutuku volai kina na Lotu kei na kena ivakavuvuli ni sa parofita ni Kalou o Josefa Simici? (Raica tabana 109–12.)
Na cava eso na itovo Vakarisito e dau vakaraitaka na Parofita o Josefa Simici? (Raica tabana 112–14.) Na cava o rawa ni cakava mo vakataki koya kina?
Na cava e so na noda ilesilesi ena gauna eda sa vakadinadinataki Josefa Simici kina kei na vakalesui mai ni kosipeli?

iVolanikalou e Veisemati: Emosi 3:7; 2 Nifai 3:6–15; V&V 135; Josefa Simici—Ai Tukutuku 1:1–75.