O Tusitusiga Paia, o le Faletusi Aupito Taua i le Lalolagi

O le Tusi Paia, Tusi a Mamona, Mataupu Faavae ma Feagaiga, ma le Penina Tau Tele, e le na o le poto o tagata o loo i ai, ae o le Atua. E ui ina e le o maua i aiga o le toatele o tagata, ae o loo i ai le afioga a le Alii. O le mea e taua, e ui ina tatou malamalama ia Homer ma Shakespeare ma Milton, ma atonu e mafai ona ou faamalau uma atu tusitala iloga uma o le lalolagi; ae afai tatou te le faitauina ia tusitusiga paia, ua tatou misia le vaega e sili atu o tusitusiga o lenei lalolagi.

O’u uso e ma tuafafine, o upumoni uma e … tatau ai mo lo tatou faaolataga, o loo maua i totonu o faavaa o tusi ua uma ona ou faamalauina atu. Atonu e le mafai ona tatou maua se faletusi e lua pe tolu afe ni tusi, ae e mafai ona tatou umia i sina tau itiiti se faletusi e le mafaatauina na faatauina i le toto e aupito sili ua i ai i lenei lalolagi.³

Ou te le o popole pe o i ai i o outou fale ia tusi o faletusi maoae i le lalolagi, pau lava le mea ia i ai tusi nei. Mafaufau i le fia miliona o tusi o loo i ai i le Faletusi o le Konekaresi i Uosigitone, le Faletusi i Peretania, ma faletusi a isi atunuu, e fia miliona o tusi—ae o mea uma lava ua faaalia mai e le Atua ma lolomiina mo le fanau a tagata e tatau ona saunia ai i latou mo se nofoaga i le malo selesitila, o loo maua lea i totonu o faavaa o nei tusi paia. E toafia i tatou ua iloa mea o loo i ai i na tusi e paia? E masani ona ou alu i fale o aiga ma ou vaai ai i mekasini aupito lata mai. Ou te maua ai tusi o loo faasalalauina faapea o tusi aupito sili, i luga o fatatusi. Afai tou te tia’ia uma na tusi ae tuu ai na o tusitusiga paia, o le a outou le misia mea sa finagalo le Alii e tusia ma ia maua e i tatou uma e olioli ai. O le mea lea, uso e ma tuafafine, faatasi ai ma isi o tatou faamanuiaga, aua nei galo ia i tatou na faia e le Alii ina ia mafai ona tatou maua, olioli, ma malamalama i tusitusiga paia ma i ai Lana upu lea ua faasolo mai i augatupulaga mo le faaolataga o Ana fanau.⁴

A ou faitauina ia tusitusiga paia, … ou te maofa i le agalelei o le Alii e faamanuiaina ai i latou o ē taliaina Ana aoaoga, aua e tele atu le mafanafana tatou te maua i nei faamaumauga paia nai lo filosofia uma o augatupulaga, e pei ona tuuina mai i le poto o tagata.⁵

Tatou te talanoa e uiga i filosofia o tagata ma tatou faananau i ai e pei o se ata manaia, ae a feteenai ma aoaoga a lo tatou Tama Faalelagi e pei ona i ai i Tusitusiga Paia, e leai se aoga. O le a le taitai atu ai lava se tasi i le fiafia e faavavau, e le fesoasoani foi e sue ai se nofoaga i le malo o lo tatou Tama Faalelagi.⁶

Ou te lagona i nisi taimi tatou te le faatauaina le Tusi Paia, ma mea o i ai, ma isi tusitusiga paia, le Tusi a Mamona, le Mataupu Faavae ma Feagaiga, ma le Penina Tau Tele lea e faasino i ai faapea … o tusi mai lo tatou Tama Faalelagi. E mafai ona taliaina faapena, o Ana fautuaga ma apoapoaiga i fanau uma a tagata ua tuuina atu ia i latou, ina ia latou iloa ai le auala e faaaoga ai o latou avanoa, ia le faamaimauina ai o latou ola.⁷ [Tagai fautuaga 2 i le itulau e 112.]

O le taimi lenei e faamaonia ai i tatou lava, o se taimi o le tofotofoga. O se taimi e oti ai tagata i le matata’u. O le taimi e tuufesili ai le toatele i le lalolagi ia i latou lava po o le a le iuga o le lalolagi. E toaitiiti ni alii musuia ua silafia le iuga o le a i ai. Ua uma ona ta’u mai e le Alii mea o le a tutupu, i totonu [o tusitusiga paia], lenei faletusi matagofie o loo ou uuina. Ua uma ona Ia tuuina mai ia i tatou o faamatalaga tatou te manaomia e fetuunai ai o tatou olaga, ma sauniuni ai i tatou lava po o le a lava le mea e tupu o le a tatou saogalemu i le itu a le Alii.⁸

Se’i ou faitauina atu le fetalaiga a le Alii e faatatau i nei aso e gata ai, i le vaega muamua o le Mataupu Faavae ma Feagaiga: …

“O le mea lea, o a’u le Alii, ina ua iloa le malaia o le a oo mai i luga o tagata o le lalolagi, na ou valaauina la’u auauna o Iosefa Samita, le Itiiti, ma ua ou tautala atu ia te ia mai le lagi, ma tuuina atu ia te ia le poloaiga. …

“Ina saili nei poloaiga, aua ua moni ia ma faamaoni lava, ma o valoaga uma ma folafolaga o i ai o le a faataunuuina.

“O le mea lea ua fai atu ai au le Alii ua ou fai atu ai lava, ma ou te le faatoese ai lava au; ma e ui ina mavae atu le lagi ma le lalolagi, a e le mavae atu lava la’u upu, a o le a faataunuuina lava, pe fai atu i lo’u lava leo po o le leo o a’u auauna, ua tusa lava ia.

“Aua faauta mai ia o le Alii o le Atua lava ia, ma e molimau atu ai le Agaga, ma e moni lava le mau ma e tumau pea le upu moni e faavavau, faavavau lava. Amene.” [MFF 1:17, 37–39.]

O lenei uputomua e taua tele [mo] lou manatunatu faamaoni i ai. O le lapataiga a le Tama ia i tatou uma. O le fautuaga alofa a se matua agalelei o lē ua silafia mea tatou te manaomia, e pei ona ia fetalai mai ai i le mataupu faatoa faitauina e faapea, ona ua ia silafia mea o le a oo mai i ē o nonofo ai i le lalolagi o lea ua ia tuuina mai ai nei poloaiga.⁹

O nisi taimi e galo ai ia i tatou sa fetalai mai le Alii, ma tatou lē ta’uina ai ia i tatou lava Ana folafolaga. …

E tele fuaitau i tusitusiga paia e mafai ona sii mai e avea ma faamaoniga e faapea na fetalai mai lo tatou Tama Faalelagi i Lona alofa mutimutivale ma le agalelei i le fanau a tagata mai lea taimi i lea taimi, e le gata ina ta’u mai ai ia te i latou mea o le a tutupu, ae aioi mai foi ia i latou ina ia fulitua i le sese o o latou ala ne’i fano i latou i le faafanoga. …

Sa ta’u mai e lo tatou Tama Faalelagi, e ala i Ona sui faamaoni, mea taua e tatau ona tutupu ma e mafai ona tatou faitau i ai i Ana tusitusiga paia. Afai tatou te mananao moni ia faasaoina ma faaeaina i Lona malo selesitila, ua uma ona Ia ta’u mai ia i tatou le ala e ui ai.¹⁰

[O tusitusiga paia o] le faletusi aupito sili ona maoae ua maua i le lalolagi uma. O a mea o i ai? O loo i ai mea e silafia e lo tatou Tama e lava le taua e faasaoina ai ma tuu atu ai i le fanau a tagata ma faigofie ona maua i le tele o gagana i le Lalolagi. E taua uma nei tusitusiga paia, ma e tatau ona malamalama i ai le Au Paia o Aso e Gata Ai. O le a ou le fai atu e sii mai lima ina ia mautinoa ai pe toafia o i lenei potopotoga ua faitauina nei tusi, ae ou te manao ia outou gauai atu i le mea moni, o upumoni taua nei, ma o loo i ai le upu ua faaalia mai a le Alii ua tusia ma lolomiina i le lalolagi, mo le faamoemoe e saunia ai ana fanau mo se nofoaga i le malo selesitila. O le mafuaaga lena ou te fai atu ai e matua taua tele. … E tatau lava ona tatou matua faafetai ona ua tatou ola i se vaitaimi ua mafai ai ona tatou faitau i ana fautuaga ma apoapoaiga ma ua faamatala mai ai nei mea semanu e le iloa ma tatou le mautonu ai.¹¹ [Tagai fautuaga 3 i le itulau e 112.]

Ou te manao ia outou fesili ifo ia te outou lava, pe toafia outou ua faitauina se mea i o outou aiga mai nei tusi mai lea taimi i lea taimi, faapotopoto i latou e aoao atu i ai mea e tatau ona latou iloa. Ou te popole ona e toatele i tatou o le a faapea mai matou te pisi tele.¹²

Ua tatou faalogo i le tele o faamanuiaga ua tuuina mai e le Alii ia i tatou i faamaumauga paia sa teuina seia oo mai i o tatou taimi, ma o loo i ai fautuaga ma apoapoaiga a se Tama e i ai le poto uma. E foliga mai e tulaga ese, e toatele naua o tatou tagata, ua ofo atu i ai avanoa, ae le masani lelei i anotusi o nei faamaumauga paia.¹³

Pe o le a lē tausalaina ea i tatou e lo tatou Tama pe a tatou foi atu ia te Ia, pe afai tatou te le aoaoina a tatou fanau i le taua o nei faamaumauga paia? Ailoga. … Tou te manatu ea ina ua uma ona tuuina mai e le Alii … i o tatou lima ia aoaoga silisili o loo maua i nei faamaumauga paia, o le a Ia finagalo ai o tatou o ni tagata e talisapaiaina pe afai tatou te le aoaoina atu na mea i o tatou aiga, ma faamalamalama atu ia i latou ia tatou te fesootai?

Uso e ma tuafafine, ou te manao e toe faamamafa atu le aoaoga a le Matai: “sailiili i tusitusiga paia;” faitau i ai ma le lototatalo ma le faamaoni, aoao i latou i o outou aiga; valaau o outou aiga e faapotopoto mai ia te outou ma uunaia i latou ia faatuatua i le Atua soifua, e ala i le faitauina o mea ua faaalia mai. E sili atu ona taua tusitusiga paia nai lo faletusi uma i le lalolagi uma.¹⁴

Tuu lenei faletusi i le mea e mafai ona sue i ai ma maua, i le mea e mafai e a outou fanau ona sue i ai ma maua, ona fai lea ia lava le naunau i le faaolataga e faavavau mo na tama ma teine o loo i lo outou aiga, ma o le a e maua ni auala e faanaunau mai ai i latou i mea o i ai i nei tusi, ina ia latou iloa ai lo latou taua i le silafaga a lo latou Tama Faalelagi.¹⁵

Se mea ina a matagofie ia te au a’o ou laitiiti, le nonofo o tama ma tina i tafatafa o le magalafu ma faitau ai le Tusi Paia a’o saofafai i lalo i matou le fanau. …

O le taimi nei, ou te fia fai atu, o’u uso e ma tuafafine, o le fautuaga a Iesu Keriso, o loo faamalosia pea lava mo i tatou ina ua Ia fetalai, “Ia suesue outou i tusi, aua ua outou manatu tou te maua ai le ola e faavavau, o tusi foi ia o loo molimau ia te au.” [Ioane 5:39.] Aua ne’i faatuatuana’i i le Tusi Paia tuai a le aiga; aua le tuua i luga o le fata ma galo ai. Sue, pe afai tou te le’i iloa, pe fai mai e ā, ma afai sa e faitauina muamua, faitau soo i lau fanau ma fanau a au fanau. Faitau i ai e le gata i le Tusi Paia, ae o isi foi tusitusiga paia ua tuuina mai e le Alii mo lo tatou faaeaga, mo lo tatou mafanafana ma mo o tatou faamanuiaga.¹⁶

Ou te lapataia outou, Isaraelu e, sailiili i tusitusiga paia; faitau i ai i o outou aiga; aoao atu o outou aiga i mea ua fetalai mai ai le Alii, ma ia faaitiitia o tatou taimi e faitau ai tusitusiga o nei aso ia e le taua ma tele lava ina leaga, ae o i le punavai o le upumoni ma faitau i le afioga a le Alii.¹⁷ [Tagai fautuaga 4 i lalo.]