Mahigugmaon, Matinud-anon nga Priesthood nga Pagserbisyo

Adunay duha ka mga konsepto nga sa mga tuig nga nanglabay gipahayag pinaagi sa pagpasabut sa kahulugan sa priesthood. Ang usa nga ang priesthood mao ang awtoridad nga gihatag sa atong Langitnong Amahan ngadto sa usa ka lalaki aron itugyan ang awtoridad sa pagpahigayon sa tanan nga mga butang kalabut sa kaluwasan sa katawhan diha sa yuta. Ang lain nga konsepto gipahayag pinaagi sa usa ka makahuluganong hunahuna nga ang priesthood mao ang gahum diin ang Dios molihok ngadto sa tawo.²

Ang priesthood sa Dios ania dinhi ug gitugyan sukad pa sa pagpahiuli sa Simbahan pinaagi sa mga mensahero kinsa gipadala aron sa pagpahiuli niana nga awtoridad nga ang mga ordinansa sa kaluwasan unta mapahigayon ngadto sa tanan nga matinudanon sa yuta. Ang priesthood sa Dios naghupot sa mga yawe sa kaluwasan.³

Ang Magtutudlo misulti ngadto ni Pedro ug sa uban nga mga apostoles kabahin sa usa ka gahum nga lapas sa tawo diin iyang gitawag og ang “mga yawe sa gingharian sa langit,” ug pinaagi niini nga gahum siya miingon, “Ug bisan unsay inyong pagabugkuson dinhi sa yuta didto sa langit pagailhon kini nga binugkos.” (Mat. 16:19.) Kana nga gahum ug awtoridad, diin ang sagrado nga mga ordinansa gipahigayon, nailhan isip ang balaan nga priesthood ug sa kanunay makit-an diha sa Simbahan ni Jesukristo sa matag dispensasyon sa ebanghelyo dinhi sa yuta.⁴

[Ang priesthood] mao ang awtoridad sa pagpahigayon sa mga ordinansa sumala sa sumbanan diin [ang Ginoo] mipadayag. Kini nga gahum … mao ang katungod nga gitugyan ngadto sa tawo gikan sa Ginoo sa pagbuhat diha sa Iyang ngalan alang sa kaluwasan sa mga kalag sa mga tawo. …

Usa sa mga katuyoan [sa] labaw nga priesthood mao ang pagpahigayon sa mga ordinansa, sa paghatag ngadto sa mga katawhan niana nga kahibalo kalabut sa Dios diin ang Magtutudlo mipadayag nga gikinahanglan ug diin si Apostol Pablo, sa pagsulti kalabut sa organisasyon sa Simbahan, miingon nga gikinahanglang moabutngadto “sa kahibalo kalabut sa Anak sa Dios, ngadto sa usa ka kahingpitan sa tawo.” [Mga Taga-Efeso 4:13.] Ug usab anaa kana nga gahum sa mas ubos nga priesthood sa pagpahigayon sa uban nga mga ordinansa sama niining batan-ong mga lalaki nga maayo kaayo nga nagpahigayon ug nagpaambit sa sakrament niini nga gabii. Ang Aaronic Priesthood, ang Ginoo miingon, mao ang priesthood “nga naghupot sa mga yawe sa pagpangalagad sa mga anghel, ug sa ebanghelyo sa paghinulsol, ug sa bunyag pinaagi sa pagpaunlod alang sa kapasayloan sa mga sala,” [D& P 13:1] ug ang balaod sa kalibutanon nga mga sugo. Ug busa … ang priesthood [gi] kinahanglan alang sa dayag nga katuyoan sa paghatag og gahum niadtong gitawag sa pag-pangalagad sa mga ordinansa nga gikinahanglan sa pag-angkon sa kaluwasan nga gidesinyo sa Ginoo alang sa Iyang katuyoan.⁵

Ang Ginoo naghari diha taliwala sa iyang mga Santos pinaagi sa iyang priesthood, nga iyang gitugyan ngadto sa tawo.⁶

Sa usa ka mahinungdanon nga pagpadayag nga atong nailhan isip ika-121 nga seksyon sa Doktrina ug mga Pakigsaad, gihatag pinaagi sa inspirasyon sa Ginoo ngadto ni Propeta Joseph Smith, ang Ginoo misulti og pipila ka makahuluganon kaayo nga mga butang. Siya miingon nga ang priesthood mahimo lamang nga madumala diha sa mga baruganan sa pagkamatarung, ug nga kon kita mogamit sa atong katungdanan sa priesthood sa dili matarung nga paagi “aron sa pagtabon sa atong mga sala, o sa pagtagbaw sa atong garbo, sa atong walay kapuslanan nga pangandoy, o sa paggamit og pagpugong o pagmando o pagpugos … Ang Espiritu sa Ginoo maguol.” (Tan-awa sa D& P 121:37.) …

Ang silot kon kita mogamit sa atong priesthood sa dili matarung nga paagi mao nga ang kalangitan sa ilang kaugalingon mobiya ug ang Espiritu sa Ginoo maguol. Kon kita mawad-an sa Espiritu, ang atong priesthood nga awtoridad kuhaon gikan kanato ug kita magpabilin sa atong mga kaugalingon “sa pagpatid batok sa mga tunokon,” kon kita masuko sa mga pagmaymay ug mga panudlo sa atong mga pangulo. Dayon kita magsugod sa pagpanggukod sa mga santos, nga buot ipasabut pagpanaway, ug sa katapusan sa pagpakig-away sa Dios, ug ang mga gahum sa kangitngit makaapas kanato kon kita dili maghinulsol ug magpalayo gikan niana nga dautan nga dalan. [Tan-awa sa D&P 121:37–38.]

Ang mga kinaiya sa madawat nga pagpangulo sa priesthood mabinantayon usab nga gipasabut dinhi niini nga pagpadayag. Usa mao ang pagdumala sa Simbahan uban sa pagkamapailubon ug pagkamainantuson, uban sa kalumo ug kaaghup ug uban sa tiunay nga paghigugma. “Kon ang usa kinahanglan gayud nga modisiplina ug mopanton uban ang kahigpit, kinahanglan gayud nga iya kining buhaton kon gidasig sa Espiritu Santo, ug dayon mopakita pagkahuman og dugang nga paghigugma, basin pa unya ang usa kinsa iyang gipanton moisip kaniya nga iyang kaaway;” [Tan-awa sa D& P 121:41–43.] Diha sa atong tanan nga mga calling sa priesthood kita kinahanglan gayud nga dili makalimot nga ang buhat sa simbahan ug sa gingharian sa Dios mao ang pagluwas sa mga kalag, ug nga ang tanan kinsa atong gidumala mga anak sa atong Amahan sa Langit, ug Siya motabang kanato sa atong mga paningkamot sa pagluwas sa tanan.

Adunay maayo kaayong ehemplo sa unsa nga paagi ang atong Ginoo buot kanato nga moalagad niadtong kinsa nagkinahanglan sa atong panabang. Sa diha nga si Pedro ug si Juan, ingon sa girekord diha sa basahon sa Mga Buhat sa mga Apostoles, miduol sa usa ka tawo kinsa sukad wala gayud makalakaw ug kinsa diha sa mga ganghaan sa templo nagpakilimos, kay sa hatagan siya og kwarta, ang apostol nga si Pedro, inyong mahinumduman, miingon ngadto kaniya, “Ako walay salapi ug bulawan; apan sa ania kanako hatagan ko ikaw: Sa ngalan ni Jesukristo nga Nazaretnon paglakaw.” (Mga Buhat 3:6.)

Dayon misunod ang usa ka makahuluganon nga pahayag nga gi-rekord kabahin niana nga hitabo. Gikuptan ni Pedro ang iyang tuo nga kamot ug gialsa siya. [Tan-awa sa Mga Buhat 3:7.] Hinumdumi nga kadto dili igo alang kang Pedro sa pagsugo kaniya sa paglakaw; Iya dayon siyang gikuptan ug gialsa.

Busa kita kinahanglan gayud, sa pagtagad sa atong nagduhaduha nga mga santos, dili lamang mga naghupot sa priesthood kinsa mosaway, mokasaba, ug mohukom. Kinahanglan gayud, sama ni apostol Pedro, gunitan sila sa bukton, awhagon sila, ug hatagan sila ug pagbati sa pagkawalay kabalaka ug pagtahud alang sa ilang mga kaugalingon hangtud sila makatindog labaw sa ilang mga kalisud ug makabarug sa ilang kaugalingon nga mga tiil.

Kana mao ang paagi nga ang priesthood sa Dios makadala og kaluwasan ug pagpakigdait niadtong kinsa mga huyang, nga sila unta mahimo nga lig-on.⁷

Ang atong kalampusan … masukod sa usa ka bahin pinaagi sa atong kapasidad sa paghigugma niadtong kinsa atong gitinguha nga giyahan ug alagaran. Kon atong higugmaon sa tinud-anay ang uban kini makapapahawa sa ngil-ad nga mga motibo nga kasagaran molutaw sa tawhanon nga pakigdait. Kon atong higugmaon sa tinud-anay ang uban kita nagtabang sa ilang mahangturon nga mga tinguha ug dili aron sa pagtagbaw sa atong kaugalingon nga mga garbo.⁸

Isip usa ka batan-on nga lalaki nga napulog duha ang panuigon, si Jesus, human makaplagi didto sa templo ni Jose ug ni Maria, agi og tubag sa ilang pangutana nangutana og makahuluganon nga pangutana: “Wala ba diay kamo mahibalo nga kinahanglan ako magbuhat sa buluhaton sa akong Amahan?” (Lucas 2:49.) Unsa ang iyang gipasabut sa buluhaton sa Iyang Amahan?

Sa lain nga pagpadayag ang Ginoo mihatag sa kahulugan niana nga pangutana sa gamay nga batang lalaki. Ngadto sa mga elder sa Simbahan nga nagpundok sa Kirtland, Ohio, Iyang gisilsil diha kanila ang ilang dako nga mga responsibilidad isip tighupot sa sagrado nga katungdanan sa priesthood nga elder. “Busa,” siya namulong, “ingon nga kamo mga tinugyanan, kamo anaa sa buluhaton sa Ginoo; ug bisan unsa ang inyong buhaton sumala sa kabubut-on sa Ginoo mao ang buluhaton sa Ginoo.” (D& P 64:29.)

Kon ang usa ka tawo mahimo nga tighupot sa priesthood, mahimo siya nga tinugyanan sa Ginoo. Kinahanglan siya maghunahuna sa iyang calling ingon og siya anaa sa pagkasinugo sa Ginoo. Kana mao ang gipasabut sa pagpalambo sa priesthood. Hunahunaa ang Magtutudlo mangutana sa matag usa kaninyo, sama sa gihimo niini nga batan-ong lalaki ngadto ni Jose ug Maria, Wala ba diay kamo mahibalo nga kinahanglan ako magbuhat sa buluhaton sa akong Amahan? Bisan unsa ang inyong buhaton sumala sa kabubut-on sa Ginoo mao ang buluhaton sa Ginoo.⁹

Kon kita mobuhat diha sa pangalan sa Ginoo, isip mga tighupot sa priesthood, kita nagbuhat niini diha sa pangalan ug alang sa atong Langitnong Amahan. Ang priesthood mao ang gahum diin ang atong Langitnong Amahan mobuhat pinaagi sa mga kalalakin-an. …

… Nahadlok ako nga pipila sa atong mga elder wala makasabut niini, nga kon sila nagbuhat isip mga elder sa Simbahan … o isip mga high priest, kini sama ra nga sa ilang pagpahigayon sa ordinansa, ang Ginoo pinaagi kanila naghimo niini diha sa mga ulo niadtong ilang mga gialagaran. Kasagaran ako naghunahuna nga usa sa mga katarungan nganong kita wala magpalambo sa atong priesthood mao tungod kay kita wala makasabut nga isip mga tighupot sa priesthood, Siya naglihok pinaagi kanato diha sa gahum sa balaan nga priesthood, ug ako nanghinaut nga kitang tanan makabaton niana nga pagbati, ug sa ingon niana motudlo sa atong batan-on nga mga tawo unsa ang gipasabut sa paghupot sa priesthood ug sa pagpalambo niini.¹⁰

Unsa ang buot ipasabut sa pagpandong sa mga kamot diha sa inyong ulo? Tuguti nga dad-on ko kamo ngadto sa ikatreynta y sais nga seksyon sa Doktrina ug mga Pakigsaad ug mobasa nganha kaninyo sa usa ka bersikulo nga inyo tingali nga gilaktawan ug wala makakakita sa kahulugan niana. Kini usa ka pagpadayag nga gihatag pinaagi ni Joseph Smith ngadto ni Edward Partridge, ang unang Tigdumalang Bishop. Kini mao ang gipamulong sa Ginoo: “Ug Ako mopandong sa akong kamot diha kanimo [Edward Partridge] pinaagi sa kamot sa akong sulugoon nga si Sidney Rigdon, ug ikaw makadawat sa akong Espiritu, ang Espiritu Santo, gani ang Maghuhupay, nga magtudlo kanimo sa malinawon nga mga butang sa gingharian” (D& P 36:2).

Nakasabut ba kamo unsa ang Iyang gipamulong—nga bisan kanus-a kamo magbuhat og usa ka serbisyo pinaagi sa awtoridad sa inyong priesthood kini sama og ang Ginoo nagbutang sa Iyang kamot diha niana nga tawo pinaagi sa inyong kamot aron kamo makahatag sa mga panalangin sa kinabuhi, sa panglawas, sa priesthood, o bisan unsa tingali kini. Ug bisan kanus-a kita mogamit sa atong priesthood, kita naghimo niini sama og ang Ginoo anaa uban kanato ug pinaagi kanato, nagtabang kanato sa pagpahigayon niana nga ordinansa.¹¹

Karon, nganha kaninyo kinsa mga lalaki nga mga miyembro sa Simbahan: Kamo adunay katungod sa paghupot sa unsay gitawag og priesthood sa Dios. … Pipila adunay mga kamot nga gipandong diha sa ilang ulo aron sa pagdawat niini nga gahum ug niini nga awtoridad, apan wala gayud makadawat niini. Ug ngano nga dili sila makadawat niini? Ang Ginoo misulti kanato og duha ka mga butang: tungod kay ang ilang mga kasingkasing gipahimutang diha sa mga butang niini nga kalibutan, ug ikaduha, sila nani Karon, nganha kaninyo kinsa mga lalaki nga mga miyembro sa Simbahan: Kamo adunay katungod sa paghupot sa unsay gitawag og priesthood sa Dios. … Pipila adunay mga kamot nga gipan-dong diha sa ilang ulo aron sa pagdawat niini nga gahum ug niini nga awtoridad, apan wala gayud makadawat niini. Ug ngano nga dili sila makadawat niini? Ang Ginoo misulti kanato og duha ka mga butang: tungod kay ang ilang mga kasingkasing gipahimu-tang diha sa mga butang niini nga kalibutan, ug ikaduha, sila nani nguha sa mga pasidungog sa mga tawo (tan-awa D&P 121:35). Mahimo ba nga balikon ninyo sa paghinumdom kadtong inyong mga higala ug tan-awa ngano nga ang pipila nahulog sa daplin sa dalan kalabut sa mga butang nga espirituhanon, ug inyong mahibaloan ang tubag anaa sa usa niadto nga mga butang. Bisan hain sa duha ang ilang mga kasingkasing gipahiluna pag-ayo diha sa mga butang niini nga kalibutan—kwarta ba? posisyon ba sa katilingban? mga butang ba sa kalibutan sa edukasyon?—o sila nangandoy pag-ayo sa mga pasidungog sa mga tawo nga sila dili mahimo nga samukon sa mga butang sa Simbahan. Oo, kon kamo mahimo nga mga lider diha sa Simbahan ug naghupot niini nga … mga pribilihiyo, kinahanglan bayran ninyo ang presyo.¹²

Mga kaigsoonan, sa inyong mga kamot gihatag ang sagrado nga pagsalig dili lamang sa pagbaton sa awtoridad sa paglihok diha sa ngalan sa Ginoo, apan sa pag-andam sa inyong mga kaugalingon isip mga limpyo ug putli nga mga sudlanan aron ang gahum sa Makagagahum nga Dios mahimo nga maipakita pinaagi kaninyo samtang kamo nagpahigayon sa sagrado nga mga ordinansa sa priesthood. Ayaw gayud dad-a ang inyong priesthood ngadto sa mga dapit diin kamo maulaw nga ang Presidente sa Simbahan makakita kaninyo.¹³

Kinahanglan gayud kitang moingon, “Tungod kay ako tighupot sa priesthood sa buhing Dios, ako usa ka tinugyanan sa atong Langitnong Amahan ug naghupot sa priesthood nga diin Siya makalihok pinaagi kanako; dili ako magpakaulaw sa paghimo og pipila ka mga butang nga akong himoon unta sa lain nga paagi tungod sa akong pagpakigdait sa priesthood sa Dios.” …

Mga kaigsoonan, kami nagpaabut kaninyo sa pagdala sa bandila sa balaang priesthood sa Dios. … Himoon nato ang atong mga mata nga mapunting sa mahangturon nga bili sa mga butang, uban sa bug-os nga tinguha ngadto sa himaya sa Dios, ug moingon ang matag usa ngadto sa iyang kaugalingon, nga “sukad karon, ang Dios ingon nga mao ang akong tigtabang, ako dili moapil sa bisan unsa nga kalihokan gawas kon kini nagtabang kanako sa pagpauswag sa akong kaugalingon ngadto niana nga tumong sa kinabuhing dayon, sa katapusan aron mobalik ngadto sa presensya sa akong Langitnong Amahan.

Mga kaigsoonan sa priesthood, kon kamo tawgon ngadto sa usa ka katungdanan, kamo nga mga amahan diha sa panimalay, kamo adunay katungod sa pagbaton sa mga panalangin sa priesthood, ug kamo adunay katungod sa pagbaton sa mga pagpadayag sa Espiritu aron sa paggiya ug pagtudlo kaninyo kon kamo nagpuyo aron ang Ginoo makaabli sa mga bintana sa langit nganha kaninyo ug maghatag kaninyo og direksyon sa piho nga mga calling diin kamo gitawag. Mga kaigsoonan, aron makadawat niana, kamo kinahanglan magpuyo alang niini. Kamo kinahanglan nga magpakasarang.¹⁵

Hinumdumi kadtong nindot kaayo nga mga saad sa Ginoo nganha kaninyo kon kamo mapuno sa gugma nga putli ngadto sa tanan nga mga tawo ug “mohimo sa hiyas nga modayan-dayan sa inyong mga hunahuna sa walay paghunong; unya ang inyong pagsalig mosamot pagkalig-on diha sa atubangan sa Dios; ug ang doktrina sa priesthood motuhop diha sa inyong kalag ingon sa mga yamog nga gikan sa langit.

“Ang Espiritu Santo mao ang inyong kauban sa kanunay, ug ang inyong pagmando usa ka dili mausabon nga pagmando sa pagkamatarung ug kamatuoran; ug ang inyong kamandoan mao ang usa ka walay katapusan nga kamandoan, ug sa walay pagpugos nga paagi kini mokanap nganha kaninyo hangtud sa kahangturan”. (D& P 121:45–46.)

Kadto nga dinasig nga mga pulong gikan sa Ginoo, ug akong usbon kini isip usa ka pahinumdom ngadto sa matag usa kaninyo sa inyong mga responsibilidad isip tighupot sa priesthood ug ang dako nga mga panalangin diin mainyo kon kamo mopalambo sa inyong mga calling isip mga sulugoon sa Labing Halangdong Dios.¹⁶

Ang mga tighupot sa priesthood sa pagkatinuod mao ang mga tigbantay sa mga tore sa Zion. Kamo mao sila kinsa giandam aron sa pagdumala sa bisan hain nga branch sa Simbahan ug sa pagbantay sa mga kakuyaw nga naglibut sa kalibutan, sa makita ug dili makita. Kamo ang diyutay sa mga tighupot sa priesthood isip mga magbalantay sa mga panon sa karnero, mga panon sa mga miyembro sa Simbahan bisan asa. Ang inyong mga responsibilidad daghan. Kinahanglan gayud nga kamo makigdait sa mga bagong miyembro sa ilang pagduol sa Simbahan; mangita sa matinuoron nga nagtinguha sa kamatuoran ug modala kanila sa pakigkita sa mga misyonaryo; mapadayunon nga maghunahuna sa mga panginahanglan sa walay amahan ug sa mga biyuda. Ilabi na, sa pagbuhat niana ug sa paghupot sa inyong mga kaugalingon nga walay lama gikan sa kalibutan, sumala sa gisulti ni apostol Pedro, usa ka “relihiyon nga putli ug dili bulingon.” (Santiago 1:27) Magbantay kamo nga ang kasal-anan wala modagsang ug magbantay nga ang tanan nga mga miyembro maawhag nga mahimong aktibo sa Simbahan. Magtudlo kamo sa husto nga mga baruganan aron nga ang mga miyembro, mga lider, ug mga magtutudlo makahibalo unsaon sa pagdumala sa ilang mga kaugalingon. …

Kamo kinsa mga tigdumalang mga awtoridad gihatagan sa responsibilidad ngadto sa panon, o sa mga branch, mga district, mga ward, o mga stake diin kamo nangulo. Kinahanglan kamo ingon nga mga amahan, mainampingon ug makanunayon nga nagtudlo sa mga amahan sa responsibilidad sa pag-atiman diha sa ilang kaugalingon nga mga pamilya ug magpadayon sa ilang mga kaugalingon sumala sa pagtawag ngadto sa nagkalain-lain nga mga responsibilidad diha sa Simbahan, mahimong tigpanalipod sa tinuohan.¹⁷

Ang tinuod nga kalig-on niini nga simbahan anaa sa gahum ug awtoridad sa balaang priesthood nga ang atong Langitnong Amahan naghatag kanato niini nga panahon. Kon kita mogamit sa husto niana nga gahum ug mopalambo sa atong mga calling diha sa priesthood, kita magbantay nga ang misyonaryo nga buhat mouswag, nga ang ikapulo mabayaran, nga ang plano sa welfare molambo, nga ang atong mga panimalay walay kadaut, ug nga ang moralidad sa mga kabatan-onan sa Israel mapanalipdan.¹⁸

Pipila ka mga tuig ang milabay ako miadto og komperensya sa stake diin ang Templo sa Manti nahimutang padulong sa habagatan sa Utah. Kini usa ka ngiub, unuson nga gabii ug nag-snow. Samtang kami mibiya sa among mga miting ug miadto sa panimalay sa presidente sa stake, mihunong kami didto sa sakyanan ug mihangad ngadto sa templo nga nahimutang ibabaw sa usa ka bungtod. Samtang kami naglingkod nga nadani sa talan-awon nianang maanindot nga pagkasuga nga templo nga naghayag ngadto sa may snow ug ngiub nga gabii, ang presidente sa stake misulti og usa ka butang ngari kanako nga makahuluganon kaayo. Miingon siya, “Kana nga templo, gihayagan og ingon niana, dili gayud sama kanindot kay sa panahon sa unos o diin adunay baga nga gabon.” Aron sa pagsabut sa kamahinungdanon niana, mahimo ba nga mosulti ako kaninyo nga wala pa gayud sukad ang ebanghelyo ni Jesukristo labaw ka importante nganha kaninyo kay sa panahon sa unos o kon kamo adunay dakong kalisdanan. Wala pa sukad ang gahum sa priesthood, nga inyong gihuptan, labaw pa ka maanindot kay sa panahon sa usa ka krisis diha sa inyong panimalay, sa usa ka grabe nga sakit, o sa pipila ka dagkong desisyon nga kinahanglan nga pagahimoon, o adunay usa ka dako nga hulga sa lunop, o sunog, o kagutom sa ingon nga matang. Lakip sa gahum sa priesthood, nga mao ang gahum sa Langitnong Dios, mao ang gahum sa paghimo og mga milagro kon ang Ginoo magbuot niini, apan aron kita makagamit niana nga priesthood, kita kinahanglan nga takus sa paggamit niini. Ang pagkapakyas sa pagsabut niini nga baruganan mao ang pagkapakyas sa pagdawat sa mga panalangin sa paghupot nianang gamhanan nga priesthood.¹⁹