Na iVakatakila: “Na ivakatagi Voqa Yawa, ka Vadugu ena Veisureti”

E dua e kaya ni da bula ena dua na gauna e digitaka kina na Kalou, kevaka e dua tiko na Kalou me galu, ia na Lotu i Jisu Karisito ni Yalododonu Edaidai e kacivaka tiko ki vuravura ni sega ni dua vei rau na Tamana se na Luvena e galu tiko. Erau vosa tiko ka veitaratara tiko ena kena gaunisala dodonu kei na kena gauna e gadrevi kina, ka dau vakaraitaka ena veigauna na gagadre, io na nanamaki, me veitaratara tikoga kei na tamata.⁸

E dua na vuku vakaivolatabu e kaya ni sega ni rawa vua na tamata me raica se kila na Kalou. E tautauvata oqo kei na kena tukuni: “Au se sega vakadua ni kabata na Ulunivanua ko Ararata—e sega ni rawa ni dua na tamata e kabati Ararata; se, au se bera vakadua ni sili ena wai makare ka katakata ni Adriatiki— e sega ni dua na wasawasa e yacana na Adriatiki; se, au se bera vakadua ni bau raica na manumanu kila era tu ena Vanua ni Gade na Kruger; se, au dau bulabula tu ga—o koya, na mosi era kaya na tamata, e tiki ga ni nodra vakanananu. Au se bera vakadua ni bau vakadidike e maliwa lala; o koya ena sega kina ni rawa ni dua me lako vakatotolo e maliwa lala.”

Sa dua na ka na kena duidui ena gauna ko ya me da kaya au se bera vakadua ni bau rogoca se raica na Kalou—o koya, e se sega ni dua na tamata me bau raica se rogoca na Kalou se lako vata kei Koya. Sa ivakarau talaidredre ka dokadoka me dua na tamata e kaya ni sega ni rawa ni da torova, sega ni rawa ni da kila, raica, ka rogoca na Kalou me baleta ni o koya na tamata oqori e se bera ni vakarautaki koya me sotava.⁹

E dodonu me nanumi tiko ni na sega ni rawa ni laurai na Kalou ena vakadidike duadua ga, ka na sega talega ni kilai na nona kosipeli ka marautaki ena kena vulici walega, ni na sega ni dua e kila rawa na Tamana kei na Luvena ia ko “koya [ga] sa vinakata na Luvena me vakatakilai koya.” (Luke 10:22.) O ira na vakatitiqa era na qai kila ena dua na siga ena gauna oqo se ena tawamudu ena yalorarawa ni sa butakoci na nona marau kei na nona tubu mai na nona dokadokai koya.¹⁰

Eda marau ena noda kila ni o koya na Kalou ni vuravura oqo e Kalou ni ivakatakila. Na noda Turaga e dau vakatakila na lomana kei na nona nanuma vei ira na luvena e vuravura. Kevaka eda na vakasaqara, ena qai vakatakilai koya vakalevu cake ka vakakina ena kena taucoko e cecere cake, ka da na kilai koya vakavinaka cake me vaka na kena ivakatagedegede e rawa vua na tamata vakayago me kila kina na Kalou. E sega ni rawa ni da sokalou ki na dua na ka eda bulia ga se e dua na ka eda vakanananutaka ga ena noda vakasama. Eda sokalou vua e dua na ka e bula, o koya e sa veibuli, o koya sa vakaraitaka tiko mai vei keda na kena ituvaki kei na itovo ni nona bula kei na kena cecere.¹¹

Erau na sega ni yalani rau mai vei ira na luve ni tamata na Tamana ko Iloimi se na Luvena ko Jiova. Sai ira ga, na tamata era sa tamusuki ira tani kevaka ena yaco na veibiu. Oi rau ruarua na Tamana kei na Luvena erau na dau veivosaki ka veimaliwai ena yalomarau vata kei ira na tamata.…

… E dina ni ra tu na veikalou e bulia ga na tamata vakataki koya kei na veilecayaki e salavata kaya, na Kalou Bula ka Dina e tikoga mai lomalagi ka soli koya tu vei ira na luvena.¹²

Ena noda gauna, me vaka na veigauna sa sivi, e vuqa na tamata era nanuma kevaka e yaco mai na ivakatakila ena yaco mai ena veivakauqeti veivakurabuitaki, ka na sakure na vuravura ena ka ena yaco. E vuqa e dredre ni ra ciqoma me ivakatakila na kena ka a yaco mai vakavuqa ena gauna i Mosese, ena gauna i Josefa, ka vakakina ena noda veigauna—na veivakatakila oqori ka yaco mai ki na nodra vakanananu kei na yalodra na parofita ena veivakauqeti titobu ka sega ni vorati rawa, me vaka na tegu mai lomalagi se me vaka na malawa ni mataka ni tiloma yani na butobuto.

Ni namaki na veika e veivakurabuitaki, ena sega beka kina ni kidava sara vakavinaka e dua na drodro tiko mai vakayauyau ni ivakatakila. Au kaya, ena yalomalumalumu sara, ia ena kaukauwa kei na igu ni dua na ivakadinadina caucaudre e yaloqu, ni tekivu mai vua na parofita ni Veivakalesui mai ki vua na parofita ni noda gauna, e sega ni se cavuka na wa ni veitaratara, e veisemasemati na kena soli na dodonu, sa cila tikoga e dua na rarama talei ka kaukauwa. Na domo ni Turaga e vaka na ivakatagi voqa yawa, ka vadugu ena veisureti.¹³

Na ivakatakila e sega ni dau kena ibalebale e veigauna na “lako vata kei na Kalou,” e sega talega ni “veisotari mata,” ka sega talega ni “gusu ki daliga.” E vuqa tu na veimataqali ivakatakila— eso e vakasakiti vakalevu cake ka so e sega.¹⁴

Eso na ivakatakila era yaco mai ena tadra. Eso na noda tadra e dau cagina wale tu ga ka sega na kena ibalebale, ia sa dau vakayagataka na Turaga na tadra me vakararamataki ira kina na nona tamata.… A tadra ko Nepukanesa. (Raica Taniela 2.) E dua na tadra kaukauwa, ia a qai guilecava, a qai lako mai ko Taniela ka taleva lesu vua na Tui na nona tadra ka vakaibalebaletaka. E a vakatakila vei Taniela na Turaga me baleta e dua na inaki bibi.

Na tadra nei Pita ka raica kina e dua na itutuvi levu ni sa tukuci sobu mai lomalagi ka sinai ena veimataqali manumanu yavai va kei na manumanu kila kecega, e dua na kena ibalebale bibi. (Raica Cakacaka 10:9–35.) …

Ena veika cecere e sotava ko Paula a raica talega e dua na mataqali ivakatakila vata vakaoqo ena dua na tadra. “A sa rairai vei Paula ena bogi na raivotu.” Ka ciqoma kina na idusidusi e ganiti koya kei na matanitu. (Cakacaka 16:9.) …

Era tukuni talega eso na ivakatakila vakasakiti. Na lako mai nei Moronai, e dua na tamata, e dua na ka bula sa vakaturi cake mai na mate, me kauta lesu mai na kedra itukutukuvolai na kai Amerika makawa kei na vakalesui mai ni kosipeli.…

Sa qai yaco mai ko Joni na Dauveipapitaisotaki o koya ka a tamusuki laivi na uluna mai vua na Tui ena dua na gauna ni malumalumu… [ni oti o ya] o Pita, Jemesa kei Joni.… Sa yaco mai kina, ena veitagede yadua, na kena vakalesui mai na veika kece, ka a yaco kece mai ena ivakatakila, ena raivotu, ena tadra, se ena veivakauqeti titobu.

Ia, na ivakatakila kece ena ivolanikalou tabu era a sega ni yaco mai ena veivakaraitaki vakasakiti. Ni o wilika na Veiyalayalati Makawa, o na kunea ni vosa kina na Turaga. E a vosa vei Aisea, vei Jeremaia, kei ira tale eso, ia oqori era sega ni rairai yadua. E viavia vaka na veika a sotava ko Inosi, me vaka ko na wilika ena ivola nei Inosi ena iVola i Momani, a masumasu ka lolo ka sasaga yani vakaukauwa, e kere ivakasala kei na veivosoti ena nona ivalavala ca ka vakabibi: “Ia niu sa masu tiko ena yaloqu taucoko sa rogo tale mai na domo ni Turaga ka kaya: …” (Inosi 1:10.) E vuqa vakavuqa na ivakatakila era yaco mai ena iwalewale oqori.

Sa yaco mai na ivakatakila: ena so na gauna ena rairai sara ga vakatamata ni italai vakalomalagi.… Ia e vuqa ga na nona ivakatakila na Parofita ko Josefa Simici ena itukutukuvolai tabu oqo, na Vunau kei na Veiyalayalati, era a sega ni yaco mai ena iwalewale ko ya. Era a yaco ena veivakauqeti titobu.¹⁵

E vuqa na ivakatakila ka volai ena Vunau kei na Veiyalayalati ka vakakina ena iVolatabu era vakanananu titobu kei na vakilai ni veivakauqeti veidusimaki mai cake. Oqo na mataqali ivakatakila era dau sotava na tamata yadua me baleta na nodra gagadre.¹⁶

Ena so na gauna eda dau sega ni kila [na ivakatakila] ena gauna era yaco mai kina. Eda dau masu ka masuta na vuku kei na vakatulewa ka da vakila ni dodonu me da gole ki na vanua oqo. Oqori na ivakatakila. E sauma mai na Turaga na nomu vakatutu.¹⁷

Na vosa cava ena vakayagataka na Turaga? E a vakasalataki Oliver Cowdery na Turaga mai vua na Parofita ko Josefa Simici, a vakasalataka na Turaga, na tamata ka gadreva e dua na isau ni nona masu:

“E dina, e dina, au sa kaya vei iko, kevaka ko sa gadreva e dua tale na ivakadinadina, mo nanuma lesu ga na bogi ko a masu ka tagica kina vei au mo kila na dina ni veika oqo.

“Au a sega li ni vakaceguya kina na yalomu? Ai vakadinadina cava tale ko gadreva, me uasivia na ivakadinadina sa solia na Kalou?” (V&V 6:22–23.)¹⁸

Ena veika kece sara, e dodonu me da vakavinavinaka kina vakalevu ena gauna oqo sai koya ni sa dola vakaidina tu na lomalagi ka vakakina ni sa tauyavutaki na lotu i Jisu Karisito ena vatu ni ivakatakila. Na ivakatakila e vakaikuritaki sai koya na dra bula ni nona kosipeli na Turaga bula ka iVakabula ko Jisu Karisito.¹⁹

Na itukutukuvolai bibi ka vakamareqeti kei Amerika makawa, kei na ivakavuvuli kei Karisito, era lewena na iVola i Momani, sa dua tale na ivakadinadina ni kena vakalou, ka tukuna ni ivolanikalou tabu, e salavata ka veitokoni ki na iVolatabu.

Me tekivu mai na [iMatai ni Raivotu nei Josefa Simici] ena 1820, sa vakaikuritaki tiko mai na ivolanikalou, ka ra okati kina na ivakatakila bibi ka wasoma, e taladrodro tiko mai ena uciwai tawamudu mai vua na Kalou ki vei ira na parofita e vuravura. E vuqa vei ira na ivakatakila oqori era volai tu ena dua tale na ivolanikalou ka vakatokai na Vunau kei na Veiyalayalati. E vakacavara na ivolanikalou ni Yalododonu Edadai na Mataniciva Talei, e dua tale na itukutukuvolai ni ivakatakila kei na vakadewataki ni nodra volavola na parofita ni gauna makawa kei ira ena gauna oqo.

Era tu o ira era na nanuma ni kena sa mai tabaki ka vauci vata na itukutukuvolai tabu oqo, sai koya oqori na “kedra icavacava na parofita.” Ia eda sa vakadinadinataka tale kina ki vuravura ni ra tu ena rumu simede kaukauwa kei na faile ni Lotu na ivakatakila eso oqo ka dau yaco mai ena veivula kei na veisiga. Eda vakadinadinataka talega ni sa tu, me tekivu mai na 1830, ena gauna sa tauyavutaki kina na Lotu i Jisu Karisito ni Yalododonu Edaidai, ka na vaka tu kina, me yacova ga ni sa qai oti na gauna, e dua na parofita, ka na kila na Kalou kei ira na nona tamata, o koya ena tomana na kena vakadewataki tiko na nanuma kei na lomana na Turaga.²⁰

Ena gauna … , sa oti kina na masu kei na lolo, sa na tau na vakatulewa bibi [mai vei ira na veiliutaki ni Lotu], era sa tauyavutaki na veitabana ni kaulotu vovou kei na iteki, e vakaduri na iwalewale kei na lawatu vovou, ena tauri vakamamada tu beka na kena itukutuku ka nanumi ni vakanananu ga vakatamata. Ia vei ira era dabe ena veilawalawa vakaoqori ka rogoca na nona masu na parofita kei na ivakadinadina ni tamata ni Kalou; ki vei ira era raica na dodonu vinaka ni nona vakasama kei na maqosa ni nona vakatulewa kei na veika e vakarota, ki vei ira oqori sa parofita vakaidina sara ko koya. Me da rogoca na nona tinia na veika vovou ka bibi ena veimalanivosa dokai me vaka na “sa marau na Turaga;” “sa dodonu na itosotoso oqori;” “sa vosa na Tamada Vakalomalagi,” sai koya me da kila vakavinaka sara.²¹

E sega ni sa mudu se ena mudu na ivakatakila. Na matanitu ni Kalou oqo sa mai vakatikori me baleta na vo ni gauna, ka na sega tale ni talaraki sobu se soli ki na dua tale na matatamata. Ena tomani tikoga na parokaramu oqo ka na tubu tikoga ka sega ni seyavu yani. Sa cokonaki vakavinaka na kena ivunau, ia ena vuku ni tubu kei na kena sa rabailevu tikoga, sa vakatakai mai kina eso na sala vinaka cake me vakatavuvulitaki kina na kosipeli ki vuravura raraba. Era kacivi eso tale na italai ki na cakacaka sa levu cake tikoga oqo ena dua na vuravura levu. Ena sega ni mudu na ivakatakila kei na veicakacaka mana tale eso vakavo ga kevaka sa mudu na vakabauta. Kevaka e veirauti na vakabauta e tiko, sa na toso tikoga na veika oqo.

E veivakasalataki kina na parofita ko Momani: “Io, ena ca ko koya sa cakitaka na veika sa vakatakila na Turaga, ka kaya ni sa oti ka sa sega na ivakatakilakila se parofisai, na isolisoli, na vosa tani eso, na veivakabulai kei na kaukauwa ni Yalo Tabu!” (3 Nif. 29:6.)²²

Au vakadinadinataka ni sa toso tikoga na Lotu mai na ivakatakila ni Kalou vei ira na kena iliuliu ka ra kacivi ena sala vakalou. Sa tiko vata kei ira oqo o Koya sa Cecere Sara.²³

E dodonu ki na tamata kecega me vakasaqara na veivakalougatataki ni ivakatakila. Era raica na turaga kei na marama bula dodonu ni tu vei ira na yalo ni ivakatakila me dusimaka na nodra matavuvale ka me vukei ira ena nodra itavi tale eso. Ia … sa dodonu me da segata me ganiti keda na ivakatakila vakaoqo ena noda vakadodonutaka na noda bula ka yaco me veikilai vata kei na Turaga ena noda veivosaki vakawasoma vata kei koya.²⁴

Ena sega ni dau suguraki koya yani na Turaga vei ira na tamata; ia kevaka era sega ni vakabauta, ena sega ni yaco yani vei ira na veivakauqeti. Kevaka era nanuma me ra sa vakararavi ga ki na nodra vakasama kei na nodra kila ka, sa na laivi ira na Turaga ki na leqa era sa digitaka me nodra.…

… Na ivakatakila, na raivotu, na veivakabulai, kei na duivosavosa era sa tu kece ena gauna oqo me vaka ena veigauna kecega, kevaka walega e tu na vakabauta e ganita.²⁵

Sa tiko vata kei ira na tamata oqo o Koya sa Cecere Sara. Eda na rawata na ivakatakila kece eda gadreva kevaka eda na qarava na noda itavi ka muria na ivakaro ni Kalou.…

Nanuma tiko:

Kevaka e tiko na mata me raica, ena tu na raivotu me veivakauqeti.

Kevaka ena tiko na daliga me rogoca, ena tu na ivakatakila me sotavi.

Kevaka era na tu na yalo me kila, me da kila oqo: ena sega tale ni vunitaki se tawakilai na dina veivueti ni kosipeli i Karisito, ka ra na kila na Kalou kei na nona parokaramu ko ira kece era sa vakasaqara vagumatua.²⁶

Ni sa soli oti vei ira na nodra galala ni digidigi, sa vakayarayarataki ira ka tuberi ira na luvena na Tamada Vakalomalagi, ia sa waraka me ra sasaga yani, na nodra masu, kei na nodra torovi koya yani ena yalodina.…

Sa nanamaki tu na Turaga me raica na imatai ni nodra gagadre veivakayadrati kei na nodra itekitekivu ni sasaga me ra sikabotea na butobuto. Me vaka ni sa solia na galala ni vakatulewa, sa dodonu me vakatara vua na tamata me vakayamoca voli na nona sala me yacova ni sa basika yani ki na rarama. Ia ni sa tekivu me viakana na tamata, ni sa tekivu me dodo yani na ligana, ka sa tekivu me lolou na duruna ka sa yaco me matata mai na domona, ena gauna oqori ka sega ni rawa ni se bera na gauna oqori, e sa na qai biliga kina ki muri na vunilagi na Turaga, laveta na ilati, ka solia na galala ki na tamata me basika mai na kataremoremo ni veilecayaki ki na yalodei, ni rarama vakalomalagi.²⁷

Kevaka sa tucake mai e dua mai na nona tekiduru ka se bera ni cavuta e dua na vosa, sa dodonu me tekiduru tale me yacova ni sa veitaratara rawa kei na Turaga, o koya sa nanamaki tu me veivakalougatataki, ia me vaka ni sa solia vua na tamata na nona galala ni digidigi, ena sega ni vakasaurarataki koya yani ki vua na tamata oqori.²⁸

O vinakata beka mo tuberi? O sa bau masuta beka na Turaga me baleta na veivakauqeti? O vinakata beka mo cakava na ka e dodonu se o vinakata mo cakava ga na veika o vinakata veitalia e dodonu se sega? O vinakata beka mo cakava na ka ena vinaka vei iko ena ilakolako balavu oqo se na ka ga e vinakata na lomamu ena gauna oqo? O sa masu li? E vakacava beka na levu ni nomu masu? O a masu vakacava? O a masu beka me vaka na iVakabula ni vuravura mai Kecisemani se o a kerea beka ga na veika o vinakata veitalia kevaka e dodonu se sega? O dau kaya beka ena nomu masu na: “Me caka na lomamuni”? O a kaya beka, “Tamaqu Vakalomalagi, kevaka o na vakauqeti au ena veika dodonu, au na cakava na ka dodonu oqori”? Se, o a masu li, “Solia mai na ka au vinakata se au na taura ga”? O a kaya beka: “Tamaqu mai Lomalagi, Au lomani kemuni, au vakabauti kemuni, au kila ni ko ni kila na ka kecega. Au tamata dina. Au dau gadreva vakaidina sara meu cakava na ka e dodonu. Au kila ni rawa ni ko ni raica na icavacava mai na itekitekivu. Ko ni rawa ni raica na veigauna sa bera mai. Ni rawa ni ko ni kila kevaka ko ni sa tiko ena mataqali gauna me vaka au vakaraitaka oqo, au na rawata na sautu se na leqa, na marau se na rarawa, na qaqa se na druka. Ni yalovinaka ka tukuna vei au, Tamaqu lomani mai Lomalagi, au sa yalataka niu na vakayacora na veika ko ni tukuna vei au meu cakava.” O dau masu beka me vaka o ya? O ni vakabauta beka ni na vinaka? E tu beka vei kemuni na yaloqaqa mo ni masu me vaka ko ya?²⁹

Ena solia vei kemuni na Turaga na isau ni nomuni taro kei na nomuni masu kevaka ko ni vakarorogo. E sega ni gadrevi me lako kece mai vua na parofita.… Ia na tamata kecega, kevaka era sa kilikili ka voleka yani vua na Turaga era na rawata na ivakatakila.³⁰