Saolotoga

Ua tuuina atu e lo’u Tama Faalelagi ia te oe le saolotoga, o le mana e filifili ma faatino ai mo oe lava ia. E taua tele le saolotoga i le ata o le faaolataga. A aunoa ma le saolotoga, o le a le mafai ona e aoao pe alualu i luma pe mulimuli i le Faaola. O le i ai o le saolotoga, ua e “saoloto e filifili le saolotoga ma le ola faavavau talu le Puluvaga sili o tagata uma, pe filifili i le faatoilaloina ma le oti, e tusa ma le faatoilaloina ma le mana o le tiapolo” (2 Nifae 2:27).

Sa ia te oe le mana e filifili ai ae e te lei fanau mai. I le Fono i le Lagi i le muai olaga, sa faaali atu ai e le Tama Faalelagi Lana fuafuaga, lea e aofia ai ma le mataupu faavae o le saolotoga. Sa tetee Lusifelo ma “saili e faaumatia le saolotoga o le tagata” (Mose 4:3). O le taunuuga, sa teena le faamanuiaga o le mauaina o ni tino faitino o Lusifelo ma i latou uma sa filifili e mulimuli atu ia te ia. O lou i ai i luga o le fogaeleele o se faamaoniga lea sa e faaaogaina lou saolotoga e mulimuli ai i le fuafuaga a le Tama Faalelagi.

I le olaga faitino, e faaauau pea ona e maua le saolotoga [e filifili ai]. O lou faaaogaina o lenei meaalofa e faalagolago i ai lou fiafia po o le faanoanoa i lenei olaga ma le olaga a sau. Ua e saoloto e filifili ma faatino, ae e te le saoloto e filifili taunuuga o au faatinoga. O taunuuga atonu e le vave oo mai, ae e masani lava ona mulimuli mai. O filifiliga lelei ma amiotonu e taitai atu ai i le fiafia, filemu, ma le ola e faavavau, a o le filifilia o le agasala ma le tiapolo e le pine ae taitai atu ai i le loto tiga ma le faanoanoa.

O lau matafaioi le faia o au faaiuga. E le tatau ona e tuuaifuaina lou siosiomaga, o lou aiga, ma au uo pe a e filifili e le usitai i poloaiga a le Atua. O oe o se atalii/afafine o le Atua o i ai ni malosiaga sili. O loo ia te oe le mana e filifili ai le amiotonu ma le fiafia, e tusa lava po o a tulaga o siomia ai oe.

O loo ia te oe foi le matafaioi mo le atinaeina o tomai ma taleni ua tuuina atu e le Tama Faalelagi ia te oe. E te tali atu ia te Ia mo mea sa e faia i ou tomai ma le ala na e faaaogaina ai ou taimi. Aua le faamaimauina ou taimi. Ia naunau e galue malosi. Filifili e faia mea e tele i lou lava loto malie.