Faamasinoina o Isi

O nisi taimi e manatu ai nisi tagata e sese le faamasino atu i isi i soo se ala lava. E ui e moni e le tatau ona e ta’usalaina isi pe faamasinoina foi i latou ma le lē tonu, ae o le a manaomia lava lou faamasinoina o manatu, tulaga, ma tagata i le gasologa o lou olaga. Ua tuuina mai e le Alii le tele o poloaiga e faapea e le mafai ona e nofonofo e aunoa ma le faia o se faamasinoga. Mo se faataitaiga, Na Ia fetalai mai: “Ia outou ma perofeta pepelo… . Tou te iloa i latou i o latou fua” (Mataio 7:15–16) ma “Ia outou o ese mai tagata amioleaga” (MFF 38:42). E manaomia ona e faia ni faamasinoga o tagata i le tele o au filifiliga taua, e pei o le filifilia o uo, palota mo taitai faalemalo, ma le filifiliaina o se soa e faavavau.

O le faamasinoga o se faaaogaina taua lea o lou saolotoga, ma e manaomia ai le faaeteetega sili, aemaise lava pe a e faia faamasinoga e uiga i isi tagata. O au faamasinoga uma e tatau ona taitaia e tulaga faatonuina o le amiotonu. Ia manatua e na o le Atua, o lē silafia loto o tagata taitoatasi, e mafai ona faia faamasinoga mulimuli o tagata taitoatasi (tagai Faaaliga 20:12; 3 Nifae 27:14; MFF 137:9).

Na tuuina mai e le Alii se lapataiga e taitaiina ai i tatou i la tatou faamasinoga o isi: “Aua o le faamasinoga tou te faamasinoina atu ai, e faamasinoina ai outou; o le fua foi tou te fuaina atu ai, e toe fuaina mai ai ia te outou. Se a le mea e te vaai atu ai i si fasi laau i le mata o lou uso, a e le iloa e oe le utupoto i lou lava mata? Pe faapefea foi ona e fai atu i lou uso: Tuu mai ia, so’u eu ese le fasi laau i lou mata; faauta foi, o i lou lava mata le utupoto? O oe na le pepelo, ia e muai tiai le utupoto i lou lava mata; ona e iloa lelei ai lea e eueseina atu le fasi laau i le mata o lou uso.” (3 Nifae 14:2–5).

O lenei mau o loo aoao mai ai le Alii e faapea, o se sese tatou te vaai i ai i le isi, e masani lava o sina tamai mea itiiti i le mata o lena tagata, pe a faatusatusa i o tatou lava sese, lea ua pei o se utupoto tele i totonu o o tatou mata. O nisi taimi tatou te taulai atu ai i sese o isi ae sa tatau ona tatou galulue e faaleleia i tatou lava.

O au faamasinoga tonu e uiga i isi e mafai ona tuuina atu ai taitaiga manaomia mo i latou, o nisi foi tulaga, o se puipuiga mo oe ma lou aiga. Ia faia nei ituaiga faamasinoga ma le faaeteete ma le alofa. Ia e taumafai i le mea sili e te mafaia, e faamasino ai le tulaga ua i ai le tagata nai lo o le faamasinoina o tagata. I soo se taimi e mafai ai, ia aloese mai le faia o faamasinoga seia oo ina ua lava lelei lou malamalama i mea moni na tutupu. Ia faalogo i taimi uma i le Agaga Paia, o le e taialaina au faaiuga. Ia manatua le fautuaga a Alema i lona atalii o Korianetona: “Ia oe ia e loto alofa i ou uso, ia e fai mea tonu, ia faamasino ma le tonu, ma ia faia mea lelei e le aunoa” (Alema 41:14).