Upu Tomua

O se tusi lenei o pese ua faapitoa mo outou. E mafai ona outou usuina i soo se taimi, ma soo se mea. E mafai ona outou usuina nisi o nei pese e faaali atu ai lo outou agaga faafetai i le Tama Faalelagi, ae o nisi e usuina ona o le malie pe a usuina.

Pe a outou usuina, o le a outou maua ai se faalogona lelei i totonu. E tuuina atu e le Agaga Paia ia te outou ni lagona mafanafana e fesoasoani ai ia te outou ina ia outou malamalama o upu ma savali o loo i ai i pese e moni. E mafai ona outou aoao e uiga i le talalelei i le auala lenei, ma o le a tuputupu ae a outou molimau ao outou aoao. O le a faigofie atu ona outou manatuaina mea na outou aoaoina pe a outou usuina. O le fati o se pese e fesoasoani ia te outou ia manatua ia upu ma e aumaia ai foi ma le agaga o le pese i outou loto. O ata o le a fesoasoani foi ia te outou tou te iloa ai le mea o loo aoaoina atu e le pese. O le taimi lava tou te iloaina ai ia pese, e mafai ai foi ona tumau ai ia te outou (e pei o ni uo lelei) e fesoasoani ina ia outou faia ni filifiliga sao ma ia fiafia ai.

O le musika o se gagana e mafai e tagata uma ona malamalama i ai. O taimaiti uma i le lalolagi atoa latou te usuina pese lava nei e tasi. O le musika foi e mafai ona faafesootaiina le taimi ua tuanai i le lumanai. E i ai se aso atonu o le a outou usuina faatasi ai nei pese ma a outou lava fanau.

O loo i ai pese i lenei tusi e toetoe lava o mataupu taitasi o le talalelei e faatatau i ai. O loo faamatalaina mai i pese o tatou talitonuga e uiga i le olaga i le lagi; e uiga i le tatalo, faafetai, ma le faaaloalo; e uiga i le misiona a le Faaola; e uiga i mataupu o le talalelei; e uiga i le taua o le aiga, ma le tupuaga; e uiga i le matagofie o le natura ma ona vaitausaga; ma e uiga i le manaomia o le gaoioi ma le malie. O le vaega mulimuli, o le musika lea e mafai ona muai tataina pe tataina mulimuli pe a uma se sauniga po o se fonotaga—po o i totonu i lou aiga—e fatuina ai se siosiomaga faaaloalo.

E i ai se aso o le a avea ai outou ma taitai o le Ekalesia ma le lalolagi. O mea tou te aoaoina mai nei pese o le a fesoasoani lea ia te outou ina ia outou faamaoni ma auauna atu ma le amiotonu. O lagona lelei e aumaia e nei pese o le a tuuina atu ai ia te outou le fiafia ma le lototele ma o le a fesoasoani ia te outou ia outou manatua o outou o fanau a le Atua.