1 Yalishca jipa paicunaca Apunchijta adorarca, ñucahuanbash rirca; ñucanchica caspicunata trabajarcanchi ricuriashpa maquihuan rurarcanchi. Apunchijca huaquinbi huaquinbi ricuchihuarca ima laya trabajanata barcopaj caspicunata.

2 Cunan ñuca, Nefi, caspicunataca na trabajarcanichu runacuna yachajushca layaca, shinallata ñuca barcotaca na rurarcanichu runacunapaj layaca; ashtahuangari ñuca rurarcani imalaya Apunchij ricuchihuashcata; chaimanda, caica na runacunapaj layachu.

3 Ñuca, Nefi, urcuman catilla rircani, catilla Apunchijta achil mañarcani; chaimanda Apunchijca ricuchihuarca jatun cuzascunata.

4 Yalishca jipa ñuca barcota rurai tucuchishca jipaca, Apunchijpaj shimi nishca shina, ñuca huauquicuna ricurca caica ali cajta, maqui ruraipash caipaca ninanbacha fino carca; chaimanda, paicuna cutin shungu faquirirca Apunchijpaj ñaupapi.

5 Yalishca jipa Apunchijpaj shimi shamurca ñuca taitapaman, ñucanchi jatarishpa barcopi yaicuna carcanchi.

6 Yalishca jipa caya punlla, tucui cuzascunata alichishca jipa, ashtaca fucushcacunata jichushca pambamanda aichatapash, ashtacapacha mishquitapash, minishtirishcacunatapash Apunchij ñucanchita mandashca cashna, barcoman yaicurcanchi, ñucanchipaj tucuilla quipicunahuan muyucunahuanbash, ñucanchihuan tiashcata apamushcacunatapash, shujllangama paipura viñailla; chaimanda, ñucanchi huarmicunahuan ñucanchi huahuacunahuanbash barcoman yaicurcanchi.

7 Cunan, ñuca taita ishcai churicunata jichushca pambapi charishca carca; rucutaca Jacob shutichishca carca jipataca José.

8 Yalishca jipa barcopi tucuilla yaicushca jipa, ñucanchi minishtirishcacunata mandashca cuzascunatapash ñucanchihuan japishca, ñucanchi mama cochata rircanchi cushapacha nishca alpaman huairahuan tangai tucurcanchi.

9 Tauca punllacunata huairahuan apai tucushca jipa, riqui, ñuca huauquicuna Ismaelpaj churicunapash paicunapaj huarmicunapash yapata na cazui callarirca, cashna paicunaca callarirca tushushpa, cantashpa shinlli yangata parlashpapash, ari, chaica paicuna cungarca ima ushaihuan chaicaman apamui tucushcata; ari, paicuna shinlli yangata ninandapacha jariyarca.

10 Ñuca, Nefi, ninandapacha manllai callarircani Apunchijca ñucanchita fiñanata, llaquichitucuringapash ñucanchi na ali ruraicunamanda, ñucanchica ucu ucu mama cochaman langaitucuringa; chaimanda, ñuca, Nefi, paicunaman shungumanda parlai callarircani; ashtahuangari riqui paicuna fiñahuarca, nishpa: Ñucanchi na munanchichu ñucanchi jipa huauqui ñucanchipa mandaj cachun.

11 Yalishca jipa Lamán Lemuelpash japihuarca cabiacunahuan huatahuarca, shinllipacha llaquichihuarca; shina cajpipash, Apunchijca saquirca paipaj ushaita ricuchingapa, pactachingapa paipaj shimi imashna nishca cashcata na ali rurajcunamanda.

12 Yalishca paicuna cashna huatashca jipaca na cuyuri usharcani, Apunchij alichishca brújulaca saquirishpa na purijurca.

13 Chaimanda, paicuna maiman barcota ñaupachinata na yacharca, cashna jatun ninan tamia jatarirca, ari, shuj jatun manllanayai ninan huaira, ñucanchi huashaman tigrachi tucurcanchi yacu jahuata quimsa punllata; paicuna ninandapacha manllaita chari callarirca mama cochapi pambarishca canata; shina cajpipash paicuna na safahuarcachu.

14 Chuscu punllapi, ñucanchi huashaman tigrachi tucushca cashpa, ninan huairaca ninandapacha millai callarirca.

15 Yalishca jipa ñucanchi ña ucu ucu mama cochaman langaitucugrinajurcanchi. Chuscu punllacunata huashaman tigrachi tucushca carcanchi, ñuca huauquicuna ricui callarirca Diospaj ricushpa chasquichinacunaca paicuna jahuapi cajta, paicuna huañuchishca canata paicunapaj na ali ruraicunata imashpapash arrepentirishpaca na huañuchi tucunga; chaimanda, paicuna ñucapaman shamurca, ñuca maqui mucucunata huatashcacunata safarca, riqui ninandapacha punguishcacuna carca; ñuca chaqui mucucunapash ninanda punguishcacuna carca, nanaipash jatun carca.

16 Shina cajpipash, Diostalla ricuriarcani, paita tucui punlla alicachircani; Apunchijtaca ñuca llaquicunamanda na huasharimarcanichu.

17 Cunan ñuca taita, Lehi, paicunaman tauca cuzascunata nishca carca, Ismaelpaj churicunamanbash; ashtahuangari, riqui, pipash ñucamanda parlajcunata yariashpa ricungui nishpa manllachinajurca; ñuca taitacuna huatacunalla yalishcacuna carca, paicunapaj huahuacunamanda nanaita ashtaca llaquita charirca, paicuna urmarirca, ari, ungushpa camapi shitarirca.

18 Paicunapaj nanaicunamanda ashtaca llaquirinamanda, ñuca huauquicunapaj na ali ruraicunamanda, paicunapaj Diospaman yaicungapa ñalla cai causaimanda apai tucurca; ari, paicunapaj yura ajchacuna carca ña ñutu alpapi pambai tucunalla; ari, paicuna ñalla yacucunapi llaquirinahuan pambai tucushca carca.

19 Jacob Josépash, chaira viñajcuna cashpa, micunatapash ashtahuan minishtircara, paicunapaj mamapaj llaquicunamanda llaquilla carca; ñuca huarmipash paipaj viquicuna achil mañaicunapash, ñuca huahuacunapapash, ñuca huauquicunapaj shungucunata na amujyachircachu paicuna safahuachun.

20 Imapash na tiarcachu Diospaj ushailla, paicunata tucuchingapa manllachijuilla, paicunapaj shungucunata amujyachi ushan; chaimanda, paicuna ricushpa ñalla ucu ucu mama cochaman langai tucugrinajushpami paicuna arrepentirirca imacunata paicuna rurashcamanda, cashna paicuna safahuarca.

21 Yalishpa jipa paicuna safashca jipa, riqui ñuca japircani brújulata, caica puri callarirca ñuca munashcashna. Yalishca jipa Apunchijta achil mañarcani; ñuca achil mañashca jipa huairacunapash saquirirca, ninan tamiapash saquirirca, shuj jatun casilla cai tiarca.

22 Yalishca jipa ñuca, Nefi, barcota purichircani, cushapacha nishca alpaman cutin yacuta rircanchi.

23 Yalishca jipa ñucanchi tauca punllacunata yacuta rishca jipa cushapacha nishca alpaman chayarcanchi; alpaman rircanchi, facha huasicunata shayachircanchi; caica cushapacha nishca alpata shutichircanchi.

24 Yalishca jipa ñucanchi alpata alichi callarircanchi, muyucunata tarpui callarircanchi; ari, tucui muyucunata alpapi tarpurcanchi, caicunata Jerusalénpaj alpamanda apamurcanchi. Yalishca jipa chaicunaca ninandapacha viñarca; chaimanda, ashtacapacha achilyachishcacuna carcanchi.

25 Yalishca jipa cushapacha nishca alpapica tarircanchi, jichushca pambata purinajushpaca, tucui laya animalcuna sachapi tiarca, ishcandi huarmi huagra bueypash, burropash, caballopash, chivopash, sacha chivopash, sacha tucui laya animalcunapash, maijangunami runacunapaj minishtirishca. Ñucanchi tarircanchi tucui laya mineralcunata. Ishcandi curita, culquita cobretapash.