1 Ha avei: Pehendu, O Israel róga, maymáva peẽ pejepeʼavaʼekue ha peñeguenohẽvaʼekue okápe che tavayguakuéra pastor-kuéra rekoñaña rupi; heẽ, maymáva peẽ pejepeʼavaʼekue, ha peñemosarambivaʼekue okápe, peẽ haʼéva che tavayguakuéra, O Israel róga. Pejapysaka, O islas, cherehe, ha pehendu tavayguakuéra mombyryguáva; Ñandejára cherenói tyeryepy guivéma voi; che sy rye guive che rérare haʼe imanduʼa.

2 Ha omoĩ che juru kysepuku rãimbéicha; ha ipo ãme cheñomi, ha chemoĩ huʼy isỹivaramo; ha cheñomi ihuʼy ryrúpe;

3 Ha heʼi chéve: Nde haʼe che rembiguái, O Israel, nde rupi añemombaʼeguasúta.

4 Ha che katu haʼe, reínte añehaʼãraʼe, ha chekaneʼõrei mbaʼeverã; añetehápe che huísio oĩ Ñandejára renondépe, ha che rembiapo che Tupã ndive.

5 Ha koʼág̃a, heʼi Ñandejára—upe cheapohare tyeryepy guive hembiguairã, agueru jey hag̃ua chupe Jacob-pe—jepeve Israel noñembyatýiramo, jepeve upéicha che añemombaʼeguasúta Ñandejára resa renondépe, ha che Tupã haʼéta che mbarete.

6 Ha haʼe heʼi: michĩ mbaʼe nde che rembiguáiramo remopuʼã hag̃ua Jacob avaretãnguérape, ha remoĩ jey hag̃ua umi Israel-gua hembývape. Avei romoĩta gentil-kuéra tesapehárõ, haʼe hag̃ua che salvasiõ yvy opaha peve.

7 Péicha heʼi Ñandejára, Israel Rredentor, Imarangatu, pe yvypóra ojapoʼívape, ha tetãnguéra ohayhuʼỹvape, pe tendotakuéra rembiguáipe: Rreikuéra ohecháta ha oñemboʼýta, ha príncipe-kuéra avei otupaitũta chupe, Ñandejára ijeroviarekóva rupi.

8 Péicha heʼi Ñandejára: Ára porãme pohenduvaʼekue, O islas del mar, ha pe salvasiõ árape roipytyvõvaʼekue; ha che poñongatúta, ha ameʼẽta peẽme che rembiguáipe tavayguakuéra konvénioramo, amoĩ hag̃ua pe yvy, ameʼẽ hag̃ua jehejapyréicha umi tenda inandietéva;

9 Ere hag̃ua umi ojejokuávape: Pesẽ katu; ha pytũmbýpe oĩvape: Pejehechauka. Tapére oñemongarúta, ha opa yvy yvatépe oĩta kapiʼipe chupekuéra g̃uarã.

10 Naiñembyahýi ha ndaijyʼuheimoʼãi hikuái, arahaku ha kuarahy ndoipyʼajopymoʼãi chupekuéra; pe hesekuéra oguerekóva poriahuvereko oisãmbyhýta chupekuéra, ha ykua yvu rupi ogueraháta chupekuéra.

11 Ha ajapóta tape opa che yvytykuéragui, ha umi che rape porã oñemopuʼãvéta.

12 Ha upéi, O Israel róga, péina ápe, koʼãva oúta mombyrýgui; ha péina, koʼãva nórtegui ha kuarahyreikégui, ha koʼãva Sinim retãgui.

13 Pepurahéi, O yvagakuéra; ha evyʼa, O yvy; umi kuarahyresẽme oĩva py oñemohendátagui; ha pepurahéi atã, O yvytykuéra; haʼekuéra ndojeipyʼajopymoʼãvéimagui; Ñandejára omoangapyhýgui itavayguakuérape, ha oiporiahuverekóta umi ohasaʼasývape.

14 Ha katu, péina ápe, Sión heʼi: Ñandejára chereja, ha Ñandejára che mbaʼéva hesaráima chehegui—ha katu haʼe ohechaukáta nahaniriha.

15 Ha ikatu piko peteĩ kuña hesarái imemby kambúgui, ndoiporiahuvekói peve pe imemby hyepýgui osẽvaʼekuépe? Heẽ, haʼe hesaráiramo jepe, che ndacheresaraimoʼãi ndehegui, O Israel róga.

16 Péina ápe, che rohai che po pytépe; nde ogykekuéra oĩ tapiaite cherenondépe.

17 Ne membykuéra opuʼãta umi nerundiséva rehe; ha umi nderejareivaʼekue ojeíta ndehegui.

18 Ehupi nde resa nde jerére ha emaʼẽ; opavave koʼãva oñembyaty ha oúta ndéve. Ha aikoveháicha che, heʼi Ñandejára, añetehápe nde reñemondéta maymávagui, ao jeguapeguáicha, ha chuguikuéra reñembojeguáta kuñataĩ omendataramoguáicha.

19 Ha umi nerenda ojeikoʼỹha ha ojehejareivaʼekue, ha pe yvy reñehundihague, koʼág̃a ipoʼietereíta umi oikóvagui ipype rupi; ha umi nemokõvaʼekue oñemombóta mombyry.

20 Umi mitã reguerekótava, ojeipeʼa rire umi peteĩháva ndehegui, heʼi jeýta nde apysápe: Ipoʼieterei chéve g̃uarã ko tenda; emeʼẽ chéve tenda che aiko hag̃ua.

21 Upéicha eréta ne korasõme: Máva piko omoheñói chéve koʼãvape, che niko apytavaʼekue che membyʼỹre, ha aime cheañorei, ñeñapytĩmbýpe, ha aha rei ágotyo ha pégotyo? Ha máva piko omongakuaa chéve koʼãva? Péina ápe, ajeheja niko cheaño; moõpa oĩ hína koʼãvaraʼe?

22 Péicha heʼi Tupã Ñandejára: Péina ápe, amopuʼãta che po gentil-kuérape, ha ahupíta che aoveve tavayguakuérape; ha oguerúta nde raʼykuérape ijyva ári, ha nde rajykuérape ojegueraháta ijatiʼy ári.

23 Ha rreikuéra nemboherekuáta, ha irreinakuéra nemongakuaáta; ojayvýta yvy peve nerenondépe, ha oheréita pe yvytimbo nde py rehegua; ha reikuaáta che haʼeha Ñandejára; noñemotĩmoʼãigui umi cheraʼarõva.

24 Ojeipeʼáta piko hiʼupy pe ipuʼakapávagui, térã ojejoráta piko umi hendaitépe oñeñapytĩvaʼekue?

25 Ha katu péicha heʼi Ñandejára, jepeve umi oñeñapytĩva ojeipeʼáta umi ipuʼakapávagui, ha pe oporojopývagui ojeipeʼáta hiʼupy; ha che añorairõta umi nendive oñorairõva ndive, ha asalváta nde raʼykuérape.

26 Ha umi ndejopývape haʼukáta hoʼo tee; ha huguýpe oñemongaʼúta chupekuéra haʼeramoguáicha víno heʼẽvape; ha opavave tekove oikuaáta che, Ñandejára, haʼeha nde Salvador ha ne Rredentor, pe Jacob ndivegua Ipuʼakapáva.