Kapitulu 3
Ding anak nang lalaking Lehi mibalik la Jerusalem bang kuanan ding laminang tansu — I Laban tinanggi yang ibiye la ding lamina — I Nephi inamuyut nala at pepasiknangan nala lub ding keang kapatad — I Laban panakawan nala ding karelang pibandian at pignasan nalang paten — Di Laman at Lemuel berug de i Nephi at i Sam at mikamuanan la king metung a anghel.
1 At milyari a aku, i Nephi, mibalik ku kaibat kung mekipagsalita king Guinu, king tolda na ning tata ku.
2 At milyari a migsalita ya kaku, a sasabing: Lawan meninap kung paninap, nung sanu ing Guinu inutus naku a ika at ding kekang kapatad magbalik la king Jerusalem.
3 Uling lawan, atiu ya kang Laban ing kasulatan da ring Judio, at makanian mu naman ing istorya ning lahi da ring kakung ninunu, at makasulat la karing laminang tansu.
4 Anya pin ing Guinu inutus nakung sabian keka at king kapatad mu a dapat kayung munta king bale nang Laban, at paintunan la ding kasulatan, at dalan lang mibalik keni king ilang.
5 At ngeni, lawan ding kekang kapatad bubulung la, a sasabing masakit yang bage ing inutus kung daptan da; dapot lawan iti eke inutus karela, dapot iti kautusan ne ning Guinu.
6 Nung makanian munta ka, anak ku, at antabayanan na ka ning Guinu, uling eka binulung.
7 At milyari a aku, i Nephi, sinabi ku king kakung tata: Mako ku at gawan ding bage a ing Guinu inutus na, uling balu ku a ing Guinu eya mamiye kautusan karing tau, maliban king magsadia yang paralan para karela bang malyari dang agawa ing bage a inutus na karela.
8 At milyari a anyang ing kakung tata dimdam nala ding amanung deti, metula yang lubus, uling balu na aku penuanan naku ning Guinu.
9 At aku, i Nephi at ding kakung kapatad, miglakbe kami king ilang, dadala mila ding kekaming tolda, bang munta king gabun ning Jerusalem.
10 At milyari a anyang miras na kami king gabun ning Jerusalem, aku at ding kakung kapatad misabisabi kami.
11 At mibagutan kami — nung ninu kekami ing dapat lungub king bale nang Laban. At milyari a ing bagutan mibiye ya kang Laman; at i Laman linub ya king bale nang Laban, at mekisabi ya kea kabang makalukluk ya king keang bale.
12 At inawad nala kang Laban ding kasulatan a makasulat karing laminang tansu, a maglaman king istorya ning lahi, nang tata ku.
13 At lawan, milyari a i Laban mimua ya, at tinulak neng palual king keang arapan; at eya bisang mibiye kea ding kasulatan. Anya pin sinabi na kea: Lawan ika metung kang mapanako, at paten daka.
14 Dapot i Laman mitakas ya king keang arapan, at sinabi nala ding bage gewa nang Laban, kekami. At megumpisa kaming meging masyadung malungkut at ding kakung kapatad makasadia na lang magbalik king kakung tata king ilang.
15 Dapot lawan sinabi ku karela: Kabang ing Guinu mabie ya, at kabang mabie tamu, e tamu magbalik king kekatamung tata king ilang anggang etamu agawa ing bage a ing Guinu inutus na kekatamu.
16 Anya pin, dapat tamung maging matapat king pamanupad karing kautusan na ning Guinu; nung makanian magbalik tamu king labuad a pekamana ning kekatamung tata, uling lawan likuan nala ding gintu at pilak, at ding anggang uri ning pibandian. At ing anggang iti agawa na uli na ning kautusan na ning Guinu.
17 Uling balu na ing Jerusalem dapat yang malasak, uli na ning karokan da ring tau.
18 Uling lawan, tinggian dala ding amanu da ring propeta. Anya pin, nung ing kakung tata manuknangan ya king balen kaibat nang miutusang mako king balen, lawan, mate ya mu naman. Anya pin, kailangan ing mako ya king balen.
19 At lawan, iti kabiasnan ning Dios a dapat talang kuanan dening kasulatan, bang apanatili karing kekatamung anak ding amanu da ring kekatamung ninunu;
20 At makanian mu naman bang apanatili tamu karela ding amanu a mesabi ibat karing asbuk da ring banal a propeta, a mibiye karela king kapamilatan na ning Espiritu at upaya ning Dios, manibat king umpisa ning yatu angga ngeni.
21 At milyari a agpang kanining paralan ning pamagsalita ku ayamuyut kula ding kakung kapatad, ba lang maging matapat king pamanupad karing kautusan ning Dios.
22 At milyari a tinipa kami king labuad a pekamana mi, at tinipun mila ding kekaming gintu, at ding kekaming pilak, at ding kekaming maulagang pibandian.
23 At kaibat milang atipun dening bage, minta kaming pasibayu king bale nang Laban.
24 At milyari a minta kami kang Laban at inawad kea a ibiye nala kekami ding kasulatan a makasulat karing laminang tansu, bang ibiye mila naman kea ding kekaming gintu at ding kekaming pilak, at ding anggang kekaming maulagang pibandian.
25 At milyari a anyang akit nalang Laban ding kekaming pibandian, at ita lubus maragul, pignasan nala deti, angga king panulak na kaming palual, at tinubud nala ding keang alipan bang paten da kami, ban akua nala ding kekaming pibandian.
26 At milyari a tinakas kami karing alipan nang Laban, at mepilit kaming lakuan mila ding kekaming pibandian, at digpa la king gamat nang Laban.
27 At milyari a tinakas kami papunta king ilang, at ding alipan nang Laban eda kami atagal, at sinalikut kami king kulkul ning metung a batu.
28 At milyari a i Laman mimua ya kaku, at makanian mu naman kang tata ku; at i Lemuel mu naman, uling makiramdam ya karing amanu nang Laman. Anya pin i Laman at i Lemuel migsalita lang dakal a mangasakit a amanu kekami, a karelang makawaling kapatad, at pemarug da kami anggiyang king metung a pamarug.
29 At milyari a pemarug da kami king pamarug, lawan, ing metung a anghel ning Guinu dinatang ya at tinalakad ya arapan da, at migsalita ya karela, a sasabing: Bakit pamarugan yula ding kekayung makawaling kapatad king metung a pamarug? Eyu wari balu a ya apili ne ning Guinu bang mamuntukan ya kekayu, at iti uli na ning kekayung karokan? Lawan munta kayu king Jerusalem pasibayu, at ibiye ne ning Guinu i Laban karing kekayung gamat.
30 At kaibat nang migsalita ning anghel kekami, meko ne.
31 At kaibat nang meko ning anghel, i Laman at i Lemuel megumpisa lang binulung pasibayu, a sasabing: Makananung ing Guinu ibiye ne i Laban karing kekatamung gamat? Lawan, masikan yang tau, at agiu nalang utusan ding limangpulu, wa, anggiyang ding limangpulu agiu nalang paten; itamu pa kaya ing ali?