1 Na ɔbaa dɛ yɛboaboaa eduaba n’aba ahorow pii ano, nye nduadzewa ahorow pii so aba ano.

2 Na ɔbaa dɛ aber a m’egya rotweɔn wɔ sar no do no ɔkasaa kyerɛɛ hɛn dɛ: hwɛ maso daa, anaaso dɛ mehu enyido-adzehu bi.

3 Na hwɛ, osian dza mehu ntsi, ɔsɛ dɛ midzi dɛw wɔ Ewuradze mu osian Nephi na Sam so ntsi; na mowɔ saintsir a ɔma mutum susu dɛ hɔn na hɔn asefo pii so benya nkwagye.

4 Mbom hwɛ, Laman na Lemuel, mowɔ suro kɛse bi ma hom na hwɛ ɔyɛ dɛ m’adaaso mu no muhun sar kɛsɛɛ tumm bi.

5 Na ɔbaa dɛ muhun ɔbarimba bi a ɔhyɛ atar fitaa bi, na ɔbaa begyinaa m’enyim.

6 Na ɔbaa dɛ afei ɔkasaa kyerɛɛ me na ɔsee me dɛ menka no do.

7 Na ɔbaa dɛ, mekãa no do no, muhun dɛ mowɔ sar a no do yɛ hu na sum ahyɛ do mã mu.

8 Na menantseew ndɔnhwer pii wɔ sum mu no afei mehyɛɛ ase bɔɔ mpaa maa Ewuradze dɛ, osian n’ehumbɔbɔr pii no ntsi, onhu me mbɔbɔr.

9 Na ɔbaa dɛ mobɔɔ mpaa maa Ewuradze ekyir no, muhun kwã petee kɛse bi.

10 Na afei muhun dua bi a n’eduaba yɛ akɔndɔ na obotum so ama nyimpa enyigye.

11 Na ɔbaa dɛ mokɔr eduaba no ho kedzii bi: na muhun dɛ ɔyɛ dɛw papapanara sen nduaba a masɔ ahwɛ nyinara. Nyew na muhun dɛ eduaba no yɛ fitaa sen adze fitaa biara a mehu da.

12 Na midzii eduaba no, muhun dɛ enyigye kɛse bi ahyɛ me kra mã; dɛm ntsi mepɛɛ dɛ m’ebusua so dzi bi; na muhun dɛ ɔyɛ akɔndɔ sen eduaba biara.

13 Na aber a medze m’enyiwa kɔr aprɔw dɛ mubohu m’ebusua so no, muhun nsu esutsen; na ɔrepem wɔ dua no a miridzi n’eduaba no ho.

14 Na mohwɛɛ dɛ mubohu bea a ofi reba; na muhun ne tsir wɔ ekyir kakra; na ne tsir hɔ no muhun hom nã, Sariah na Sam na Nephi, na wogyinagyina hɔ dɛ gyama wonnyim bea a wɔrokɔ.

15 Na ɔbaa dɛ motoo hɔn nsa na medze ndze kɛse kãa kyerɛɛ hɔn dɛ wɔmbra me nkyɛn, na wombedzi eduaba no a ɔyɛ ahomka sen eduaba biara no bi.

16 Na ɔbaa dɛ wɔbaa me nkyɛn na hɔn so wobedzii bi.

17 Na ɔbaa dɛ afei mepɛɛ dɛ Laman na Lemuel so bɛba ebedzi eduaba no bi; dɛm ntsi motoo m’enyiwa hwɛɛ esutsen no ne tsir no ho dɛ gyangyanbiara mubohu hɔn.

18 Na ɔbaa dɛ muhun hɔn na mbom nna wɔmmpɛ dɛ wɔba me nkyɛn bedzi eduaba no bi.

19 Na muhun dadze poma, na wɔatsen mu afa esutsen no n’egya dze akɛpem dua a migyina ho no.

20 Na afei so muhun kwan tseaba a no mu yɛ nkekãnkekã bi dɛ ɔda dadze poma no ho, dze abɛpem dua a migyina ho no; dze kɛpem bea a nsunyiwa no no ne tsir wɔ dze kɔto kwã kɛse petee bi a ɔtse dɛ wiadze bi mu.

21 Na muhun dɔmpepe bi a worunntum nnkan hɔn a hɔn mu dodowara nna wɔreper ba kan dɛ wobotum esi kwan a ɔdze ba dua a migyina ho no mu.

22 Na ɔbaa dɛ wɔperee bae na wobesii kwan no a wɔdze ba dua no ho no mu.

23 Na ɔbaa dɛ sum ehubɔhubɔw bi hyɛe, nyew, sum ehubɔhubɔw kebii bi, ma dɛm ntsi hɔn a wobesii kwan no do no foom kwan no, wɔtɔɔ gon na wɔyewee.

24 Na ɔbaa dɛ muhun binom so a wɔreper ba kan, na wɔbaa kan bosuoo dadze poma no ano; na wɔperee faa sum kebii no mu dzedze dadze poma no mu ara kesii dɛ wɔbaa bedzii dua no n’eduaba no bi.

25 Na wodzii dua no n’eduaba no bi wiei no, wɔtotoo hɔn enyi dɛ mbrɛ fɛr akã hɔn.

26 Na mo so medze m’enyiwa kɔr aprɔw, na muhun wɔ nsu esutsen n’afã no ho dɛ dan kɛse pontonn bi, sensɛn wimu na ɔnnka asaase.

27 Na dɔm ahyɛ mu mã, mpanyimfo na mbofra, mbanyin na mbasiafo; na hɔn ntar yɛ fɛw dodow; na hɔn ndzeyɛɛ yɛ dɛ mbrɛ worisi atwetwe na wɔdze hɔn nsatseaba retsentsen hɔn a wɔaba na woridzi eduaba no bi no do.

28 Na wodzii eduaba no bi wiei no wɔfɛree, osian hɔn a worisi hɔn atwetwe no ntsi na wɔsaan hɔn ekyir kɛfaa akwan a wɔabra hɔn ho no do na wɔyewee.

29 Na afei, emi Nephi, merennka m’egya ne nsɛm no nyinara.

30 Mbom, murutwa no tsia, na hwɛ, ohun dɔmpepe bi so a wɔreper ba kan; na wɔbaa bosuoo dadze poma no ano; na wɔpeer dɛ wɔbɛba kan, wosuoo dadze poma no mu dzendzenndzen, kesii dɛ wɔbaa kan, na wobotwaa hwee famu na wodzii dua no eduaba no bi.

31 Na afei so ohun dɔmtutu bi so a nna wɔreper hwehwɛ kwan akɔ dɛm dan kɛse pontonn no ho.

32 Na ɔbaa dɛ nsunyiwa no bun no faa hɔn mu dodowara; na pii so na wɔyewee wɔ n’enyido koduaduaa akwan fofor mu.

33 Na pii kɛhɛɛn dɛm dan soronko no mu. Na afei wɔkɛhɛɛn dan no mu no, wɔtsentseen hɔn enyimtsia nsatseaba wɔ emi nye hɔn a woridzi eduaba no do; naaso yɛannkasa hɔn ho.

34 M’egya ne nsɛm a ɔkãa nye dɛ: Na dodow a wɔkasaa hɔnho no wɔhwee ase.

35 Na Laman na Lemuel enndzi eduaba no bi, dɛm na m’egya kãe.

36 Na ɔbaa dɛ aber a m’egya kãa n’adaaso anaaso n’enyido-adzehu no mu nsɛm nyina wiei no, ɔsee hɛn dɛ osian ndzɛmba yi a ohunii wɔ n’enyido-adzehu no mu no, nna ɔmaa suro kɛse kãa no wɔ Laman nye Lemuel ho no: nyew, osuroo dɛ bɛyɛ na woeyi hɔn tokyen wɔ Ewuradze enyim.

37 Na ɔdze abadaa biara a ɔbaatan biara wɔ no tuu hɔn fo, ɔsee hɔn dɛ wombetsie n’asɛm, kyerɛ dɛ Ewuradze bohu hɔn mbɔbɔr, na oenntwa hɔn annkyen; nyew, m’egya kãa nsɛmpa kyerɛɛ hɔn.

38 Na ɔkãa nsɛmpa kyerɛɛ hɔn na ɔhyɛɛ hɔn nkɔm so wɔ ndzɛmba pii ho wiei no, ɔhyɛɛ hɔn dɛ wondzi Ewuradze ne mbrasɛm do; na ogyaa dɛ ɔbɛkasa akyerɛ hɔn.