1 Bwa taraia, e a tia te Uea ae aia Uea Taanga ni Buaka n anaa te kai ao te oko ae okon te kariki ni kabane, ao kain te ran ni kabane, mai Ierutarem ao mai i Iuta—

2 Te aomata ae korakora, ao te tia buaka, te tia motikitaeka, ao te burabeti, ma ae wanawana, ao te unimwaane;

3 Ma te kaaben ibukiia aika nimangaun, ao te aomata ae kakannato, ao te tia ibuobuoki, ao te tia tiaka, ao te tia rabakau n taetae ni kawai.

4 Ao N na anganiia ataei bwa aia nati n uea aika mwaane, ao a na tautaeka merimeri iaoia.

5 Ao aomata a na karawawataki temanna iroun temanna ao n tatabemania irouia kain rarikiia; ao e na kamoamoa te ataei nakon te unimwaane, ao are i nano nakon te kakannato.

6 Ao e na roko te tai are e na anaa bain tarina te aomata ao e na kangai: Iai kunnikaim, ko na riki ngkoe bwa ara tia tautaeka, ao ke e na tai riki te kangaanga aio n tain am tautaeka—

7 N te bong arei ao e na tuea ni kangai: N na aki riki bwa te tia katoki aoraki; bwa i nanon mwengau akea te kariki ke te kunnikai; tai karikai bwa te tia tautaeka iaoia aomata.

8 Bwa Ierutarem e a uruaki, ao Iuta e a bwaka, ngkai a tia n taetae ma ni karaoi bwaai aika a kaaitara ma nanon te Uea, ni kauna matan mimitongina.

9 Ao a ootara bwaai aika a tia ni karaoi ma taraan mataia, ao n takarua aia bure bwa titebo ma are i Totom, ao a aki kona ni karaba. A na reke kain tamneia, bwa a tia n uota te buakaka nakoia.

10 Taekinna nakoia aika raoiroi bwa e na nakoraoi aroia; bwa a na kana uaan aia mwakuri.

11 A na reke kaia aika buakaka, bwa a na mate; bwa kanuangan baia e na roko nako aoia!

12 Ao au botanaomata, ataei bon taan karawawataia, ao aine a tautaeka iaoia. O au botanaomata, ake a kairingkami, a kairingkami nakon te bure ao ni kamaunai kawaimi nako.

13 Te Uea e na tei ni bubuti ibukimi, ao e na teirake naba bwa e na motiki taekaia aomata.

14 Te Uea e na motikitaeka ma unimwaanen ana botanaomata ma nati n uea mwaane akekei; bwa kam a tia ni kana te nne ni kurebe ao aia bwai kananoanga akana i nanon ami auti.

15 Teraa ae ko kananonaa? Kam tiriboia au botanaomata nakon mwakoro aika mwaiti, ao ni bwainikirinia aika kainnano, n aron are taekinna te Atua ae aia Uea Taanga ni Buaka.

16 I rarikin aei, e taku te Uea: ngkai a kamoamoa natin Tion aika aine, ao a nakonako ni kainikatonga, ma te mata ni kaitataan, ao n nakonako ni baka n ataeinaine n taabo ake a nako iai, ma ni kakekei katamaroan waeia—

17 Mangaia ae te Uea e na karekei kaiia bwa a na kanakana taubukin atuuia natin Tion aika aine, ao te Uea e na kamamaeia ni kanakoi karabaia.

18 N te bong arei te Uea e na anaa tamaroan bureniwaeia, ma katamaroan iraia, ao mwaeia ae titebo ma namwakaina;

19 Ma taian mwae ma aia burenibai, ao rabunan ubuia;

20 Ma rabunan atuuia, ma katamaroan rangaia, ma mwaen atuuia, ma nnen aia boiarara, ma aia taabia;

21 Mwamwa, ma kareken bwairiia;

22 Ma aia kunnikai aika kona ni kaaibibitaki, ma niniraia, ma rabunaia, ma aia bin ni kangeri;

23 Tirotaam, ma rinen aika raraoi, ma bwaraia aika tobwan ma rabunan mataia.

24 Ao e na koro bukina bwa ike e mena ngkoa iai te boiarara, e a mena iai ngkai te mwaung; ao e a onea mwiin kabaean te nuka, te raeuaki; ao n onea mwiin te irannatu ae taraaraoi, te mara; ao n onea mwiin kunnikain bwabaaia ae katamaroaki, kabaean te nuka ae raerobwa; ao te bue e na onea mwiin te tamaroa.

25 A na bwaka am mwaane n te kabaang ao aika korakora iroum n te buaka.

26 Ao mataroana e na tang ni wenei ma n tang n nanokawaki; ao e na riki n akea, ao e na tekateka i aontano.