1 He vakai, ko e ʻEikí, ʻa ia ko e ʻEiki ʻo e Ngaahi Kau Taú, ʻokú ne toʻo atu mei Selūsalema, pea mei Siuta, ʻa e poupoú mo e tokotokó, ʻa e tokoni kotoa pē ʻo e meʻakai, mo e tokoni kotoa pē ʻo e vaí—

2 ʻA e tangata mālohí, mo e tangata taú, ʻa e fakamāú, mo e palōfitá, mo e tangata potó, pea mo e mātuʻá;

3 ʻA e ʻeikitau ʻo e toko nimangofulú, pea mo e tangata anga-fakaʻeiʻeikí, mo e tangata faleʻí, mo e tangata fie mana kākaá, pea mo e tangata lea mālié.

4 Pea te u tuku ʻa e tamaikí kiate kinautolu ke hoko ko honau kau pilinisi, pea ʻe pule kiate kinautolu ʻa e fānau valevalé.

5 Pea ʻe fengaohikoviʻiʻaki ʻa e kakaí ʻiate kinautolu, pea mo e tangata taki taha ʻe hono kaungāʻapí; pea fai taʻe-fakaʻapaʻapa lahi ʻe he tamasiʻi ki he mātuʻá, mo e tangata taʻe-fakaʻapaʻapá ki he tangata anga-fakaʻeiʻeikí.

6 ʻO ka puke ʻe ha tangata ʻa hono tokouá ʻi he fale ʻo ʻene tamaí, ʻo ne pehē: ʻOkú ke maʻu ha kofu, ke ke hoko ko homau pule, pea ʻoua naʻa tuku he hoko ʻa e fakaʻauhá ni ʻi ho nimá—

7 ʻI he ʻaho ko iá te ne fuakava, ʻo pehē: ʻE ʻikai te u hoko ko e fai fakamoʻui; he ʻoku ʻikai ha mā pe ha kofu ʻi hoku falé; ʻoua naʻa fokotuʻu au ko e pule ʻo e kakaí.

8 He kuo maumau ʻa Selūsalema, pea kuo tō mo Siuta, he ko ʻenau ngaahi leá mo ʻenau ngaahi angafaí ʻoku fakafili ia ki he ʻEikí, ke fakatupu-houhau ki he fofonga ʻo hono nāunaú.

9 ʻOku hanga ʻe he anga ʻo honau fofongá ʻo talatalaakiʻi ʻa kinautolu, pea fakahā ai ʻoku tatau ʻa ʻenau angahalá mo Sōtoma, pea ʻoku ʻikai te nau lava ʻo fufuuʻi ia. Malaʻia ki honau laumālié; he kuo nau fakatupu ʻa e kovi kiate kinautolu pē.

10 Mou pehē ki he kau māʻoniʻoní te nau hao; he te nau kai ʻa e fua ʻo ʻenau ngaahi ngāué.

11 Malaʻia ki he kau fai angahalá, he te nau ʻauha; koeʻuhi ʻe tō kiate kinautolu ʻa e totongi ʻo ʻenau ngaahi ngāué!

12 Pea ko hoku kakaí, ko e fānaú ʻa honau kau pule fakamālohí, pea ʻoku pule kiate kinautolu ʻa e kau fefiné. ʻE hoku kakai, ʻoku fakahalaʻi koe ʻe kinautolu ʻoku tataki koé pea ʻoku nau maumauʻi ʻa e anga ho ngaahi halá.

13 ʻOku tuʻu hake ʻa e ʻEikí ke taukapoʻi, pea ʻoku tuʻu ia ke fakamāuʻi ʻa e kakaí.

14 ʻE fakamāuʻi fakataha koe ʻe he ʻEiki mo e mātuʻa ʻo hono kakaí pea mo honau kau pilinisí; he kuo mou kai ʻo ʻosi ʻa e ngoue vainé mo e ngaahi meʻa kuo mou kaihaʻasi mei he masivá ʻi homou ngaahi falé.

15 Ko e hā homou lotó? ʻOku mou fuʻu haha lahi ʻa hoku kakaí, ʻo laiki ʻa e mata ʻo e masivá, ʻoku folofola ʻe he ʻEiki ko e ʻOtua ʻo e Ngaahi Kau Taú.

16 Pea ʻikai ia ko ia pē, ka ʻoku folofola ʻe he ʻEikí: Koeʻuhi ʻoku fuʻu pōlepole ʻa e ngaahi ʻofefine ʻo Saioné, pea nau ʻaʻeva fakamāfutofuta mo e mata holi-kovi, ʻo ʻalu fakatekiteki mo fie hā, pea mo e ngaahi ukamea ʻi honau vaʻé ʻoku tatangi heʻenau ʻalú—

17 Ko ia, ʻe taaʻi ʻe he ʻEiki ʻa e tumuʻaki ʻo e ngaahi ʻofefine ʻo Saione ʻaki ʻa e pala, pea ʻe fakatelefuaʻi ʻa kinautolu ʻe he ʻEikí.

18 ʻI he ʻaho ko iá ʻe toʻo ʻe he ʻEikí meiate kinautolu ʻa e fakaʻofoʻofa lahi ʻo honau ngaahi teunga tatangí mo e meʻa-faʻu siueli ʻo e ʻulú, mo honau ngaahi kahoa fuopotopoto ʻoku hangē ko e māhiná;

19 ʻA e ngaahi kahoá mo e ngaahi vesá, pea mo e ngaahi pūloú;

20 ʻA e ngaahi tataá mo e ngaahi teuteu ki he vaʻé, pea mo e ngaahi meʻa-haʻi ʻulú, mo e ngaahi ʻaiʻanga kakalá pea mo e ngaahi hau ki honau telingá;

21 ʻA e ngaahi mamá mo e teuteu ki he ihú;

22 Mo honau ngaahi kofu ngingilá, pea mo e ngaahi kofu tuʻá, pea mo e ngaahi pulupulú, pea mo e ngaahi kato paʻangá;

23 ʻA e ngaahi teunga aatá, pea mo e līneni tuʻovalevalé, pea mo e ngaahi puloú, pea mo e ngaahi holoholo pūloú.

24 Pea ʻe hoko ʻo pehē, ʻe fetongi ʻa e namu kakalá ʻaki ʻa e namukū; pea ko e noʻó ʻaki ʻa e pulupulu noa pē; pea ko e ʻulu lau leleí ʻaki ʻa e tula; pea fetongi ʻa e ngaahi teunga fakaʻofoʻofá ʻaki ʻa e tauangaʻa; ko e hoihoifuá ʻaki ʻa e fohia.

25 ʻE tō ʻa ho kau tangatá ʻi he heletā mo hoʻo kau mālohí ʻi he tau.

26 Pea ʻe tangilāulau mo tangi ʻa hono ngaahi matapaá; pea te ne lala, pea nofo hifo ki he kelekelé.