1 Ta kitaem, alaento ti Apo, ti Apo ti Pangen, ti taraon ken danumda manipud iti Jerusalem, ken ti amin a pagbiag a tinapay manipud iti Juda, ken ti amin a danumda—

2 Ti maingel a tao, ken ti tao ti gubat, ti ukom, ken ti propeta, ken ti masirib, ken ti nagkauna;

3 Ti kapitan ti limapulo, ken ti madaydayaw a tao, ken ti mamagbaga, ken ti nasikap a salamangkero, ken ti nalaing nga agbitla.

4 Ket ikkakto ida dagiti ubbing nga agbalin a prinsipeda, ket iturayanto ida dagiti maladaga.

5 Ket mairurumento dagiti tattao, ti tunggal maysa iti sabali, ken ti tunggal maysa iti kaarrubana; napannakkelto ti ubing a maibusor iti nataengan, ken ti nakas-ang a tao a maibusor iti madaydayaw.

6 Intono ti maysa a tao tengngelennanto ti tao ti kabsatna iti balay ti amana, ket kunaenna: Sika adda pagan-anaymo, sika koma ti agturay kadakami, ket saanmo koma nga ipalubos a mapasamak daytoy a ^apannakarba babaen iti imam—

7 Isapatananto iti dayta nga aldaw, a kunana: Saannakto a ^amangagas; agsipud ta awan iti balayko ti tinapay man wenno kawes; saannak nga aramiden nga agturay kadagiti tattao.

8 Ta ti Jerusalem ^anarebban, ken ti Juda ket ^bnadadaelen, agsipud ta maibusor iti Apo dagiti dila ken aramidda, tapno gargarien dagiti mata ti dayagna.

9 Ti panagparang dagiti rupada paneknekanna ti maibusor kadakuada, ket ipalawagda dagiti basolda a kas iti ^aSodoma, ket saanda a mailimed. Asi pay ti kararuada, ta dakes ti inggunggonada iti bagbagida!

10 Agsaokayo kadagiti nalinteg a ^anaimbag daytoy kadakuada; agsipud ta kanendanto ti bunga dagiti ar-aramidda.

11 Asi pay ti managdakdakes, ta maungawdanto; agsipud ta ti ar-aramid ti im-imada maaramidto kadakuada!

12 Ken dagiti tattaok, ubbing dagiti manangidadanes kadakuada, ket iturayan ida dagiti babbai. Dakayo a tattaok, dagiti ^amangidaulo kadakayo ti mangigapu kadakayo nga agbiddut ken mangdadael kadagiti dandanam.

13 Sitatakder ti Apo a ^amangikanawa, ken sitatakder a mangukom kadagiti tattao.

14 Sumrekto ti Apo iti panangukom kadagiti lallakay dagiti taona ken dagiti ^aprinsipeda; agsipud ta ^bnaalun-unyo ti ^ckaubasan ken ti ^dnasamsam dagiti ^enapanglaw adda kadagiti balbalayyo.

15 Ania ti kayatyo a sawen? Rumekenyo dagiti tattaok, ken mekmekenyo dagiti rupa ti marigrigat, kinuna ti Apo a Dios ti Pangen.

16 Maysa pay, kinuna ti Apo: Gapu ta naparammag dagiti babbai nga annak ti Sion, ken natangigda a magna ken makailap dagiti matada, magmagna ken ^aagkinnikinnida a mapan, ken pagkilingkilingda dagiti pulseras dagiti sakada—

17 Ngarud pagkuradento ti Apo ti ulo dagiti babbai nga annak ti Sion, ken ^aduktalanto ti Apo dagiti nalimed a parteda.

18 Ikkatento ti Apo iti dayta nga aldaw ti arkos dagiti agkilingkiling nga alahasda, ken ^adagiti arkos ti uloda, ken ^bnagbukel a pilid a kas iti bulan;

19 Dagiti kuentas ken pulseras, ken ^adagiti abungotda;

20 Dagiti kallugong, ken dagiti arkos kadagiti gurong, ken dagiti tapungor, ken dagiti lapida, ken dagiti aritos;

21 Dagiti singsing, ken al-alahas iti agong;

22 Dagiti ^amasukansukat a kawes, ken kagay, ken dagiti dalungdong, ken dagiti ipit a pagkulot;

23 Dagiti ^asarming, ken napino a lino, ken dagiti atiddog a belo iti uloda, ken dagiti belo.

24 Ket mapasamakto, imbes a nabanglo nga angot agadiwara iti buyok; ken imbes a barikes, ^anapigpigis a kawes; ken imbes a naurnos a buok, panagkalbo; ken imbes a ^broba, nakersang a lupot; ^ctanda a marka ti pannakaadipen imbes a kinapintas.

25 Idasayto ti espada ken dagiti maingel iti gubat dagiti tattaom.

26 Agdung-aw ken agladingitto dagiti ruanganna; ken awanto ti kapapayanna, ken agtugawto iti daga.