1 Pwe kilang, Kauno, Kaun Wasalapalap, pahn ketkihsang Serusalem, oh Suda, mehn komouro oh tungoal en komouro, iei pilawahn tungoalo pwon, oh pihl en komouro pwon—

2 Aramas kehlail kan, oh sounpei kan, arail sounkopwung kan, oh soukohp akan, oh me loalokong kan, oh neirail aramas mah kan;

3 Arail kaun en [sounpei kan], oh kaun en aramas akan, oh sounsawas akan, oh aramas semen nan doadoahk en peh, oh aramas kadek koasoai kan.

4 Oh I pahn kasapwilda serihkan en wiahla arail nanmwarki oh kaun irailda.

5 Oh aramas akan pahn lokolok, emen emente widiwinge emen; serio pahn aklapalapiong me mahu, oh aramas mwahl akan pahn uhwong arail kaun akan.

6 Ahnsou me ohl emen pahn pekihda rehn emen rie ohl sang nan peneinei en ah pahpa, oh ndaiong: Kowe me mie ahmw likou, wiahla aht kaun, oh dehr mweidehng kahpwal wet en lellohng kitail—

7 Ni rahno e pahn kahmahmki oh ndinda: I sohte kak wia sounkamwahuiala; pwe nan imweio sohte pilawa de likou; dehr piliehda I en kaunda aramas akan.

8 Pwe Serusalem olahr, oh Suda pwupwidier, pwehki lewarail kan oh arail wiewia kan kin uhwong Kauno, me pahn kahrehda silangi engiengda.

9 Pohn masarail akan pahn kadehdehda oh kasalehda diperail akan duwehte mehn Sodom, oh irail sohte kak ekihla. Meid suwed ong arail mour, pwehki irail me pein kahrehiong irail nan apwal wet.

10 Padahkihong aramas pwung kan me irail mwahu; pwe irail pahn iang tungoale wahn arail wiewiah kan.

11 Meid suwed ong me suwed akan, pwe irail pahn mehla; pwe wahn arail doadoahk pahn pwurehng irail!

12 Oh nei aramas akan, serihkan me kin kalokei kumwail, oh lih akan me kin kaun kumwailda. Kumwail nei aramas oko, amwail kaun akan me kin kaweid kumwail me kahrehda amwail sapwungala oh kawehla wasa me kumwail pahn weidie.

13 Kauno ketin kaunopadahr pwe en peki mahngki aramas akan oh tenekih irail.

14 Kauno pahn kadeik sapwellime aramas en mahs oko oh arail kaun akan; pwe irail kangalahr nan imwarail akan kenen me semwehmwe kan mwengeh kan oh wahn tuhkeh kan.

15 Kauno Koht Wasalapalap mahsanih, Ia wewehn amwail wia met? Kumwail kin kaloke nei aramas akan, oh widwidinge me semwehmweh kan.

16 Kauno pil ketin kapatahiong mahsanih: Pwehki serepein en Saion kan arail aklapalap, oh kin alu mas ile oh mesen wanded, kakahk tikitik kohwei, oh ngilen luhwou kin sekesek ni nehrail kan kohwwei—

17 Eri Kauno pahn ketin kalokehki medek ehu nan moangen serepein en Saion kan, oh Kauno pahn ketin kapwarahda wasa me rir ni paliwararail kan.

18 Ni rahno Kauno pahn ketkihsang arail kapwat me kin sekesek kan, oh kapwat en pohn moangerail kan, oh kapwat en tepinwarerail akan me duwehte maram pwul;

19 Kapwat sein kan oh luhwou kan, oh koaduhpwel kan;

20 Mehn kidim moangerail akan, oh kapwat en neirail akan, oh moangerail akan, oh lehnwai kan, oh tiatihn salengerail akan;

21 Rihng kan, oh kapwat en tumwerail akan;

22 Likou en wiliali kaselel kan, oh likouli kan, oh likou puhp kan, oh mehn kateng moang; kan;

23 Klahs en irongin kan, oh likoun liki kaselel kan, oh angkasi kan, oh koaduhpwel menipinip kan.

24 Oh ahnsouo pahn leledo, [re pahn] pwohsuwedla oh sohla kapwohtik; oh [arail] likou pahn tei oh sohte kateng; oh [irail] pahn moangamadala; oh likou deipin me re pahn perehki mwaremwarerail akan; [arail] lingan pahn wekidekiong mehkot kamedek.

25 Noumwail ohl akan me keieu kehlail pahn kamakamala nan mahwen.

26 Oh ewen kelen kahnihmwo pahn mwahiei oh sengiseng; oh e pahn sohla towe, oh duwehte lih emen mwomwohd pohn pwehl.