1 Pea ʻe tupu hake ha tokotoko mei he tefito ʻo Sesé, pea ʻe tupu ha vaʻa mei hono ngaahi aká.

2 Pea ʻe nofo ʻiate ia ʻa e Laumālie ʻo e ʻEikí, ʻa e laumālie ʻo e ʻiló mo e faʻa ʻiló, ʻa e laumālie ʻo e akonakí mo e mālohí, ʻa e laumālie ʻo e potó pea mo e manavahē ki he ʻEikí;

3 Pea te ne ngaohi ia ke ne ʻiloʻilo ʻi he manavahē ki he ʻEikí; pea ʻe ʻikai te ne fakamaau ʻo fakatatau ki he meʻa ʻokú ne vakai ki aí, pe valoki ʻo fakatatau ki heʻene fanongó.

4 Kā ʻi he māʻoniʻoni te ne fakamāuʻi ʻa e masivá, pea fakamaau taʻe-filifilimānako maʻá e kau angamalū ʻo e māmaní; pea te ne taaʻi ʻa māmani ʻaki ʻa e meʻa tā ʻo hono fofongá, pea te ne tāmateʻi ʻa e kau fai angahalá ʻaki ʻa e mānava ʻo hono loungutú.

5 Pea ʻe hoko ʻa e māʻoniʻoní ko e noʻo ʻo hono kongalotó, pea mo e tui faivelengá ko e nonoʻo ʻo hono noʻotanga-valá.

6 Pea ʻe toki nofo fakataha ʻa e ulofí mo e lamí; pea ʻe tokoto fakataha ʻa e lēpatí mo e ʻuhikiʻi kosí, pea ko e ʻuhikiʻi pulú, mo e laione muí, mo e pulu sisinó, fakataha; pea ʻe tataki ʻa kinautolu ʻe ha tamasiʻi siʻi.

7 Pea ʻe kai fakataha ʻa e pulu fefiné mo e peá; pea tākoto fakataha ʻa hona ʻuhikí; pea ʻe kai ʻe he laioné ʻa e kauʻi mohuku mōmoá ʻo hangē ko e pulú.

8 Pea ko e tamasiʻi ʻoku kei huhú te ne vaʻinga ʻi he luo ʻo e ngata koná, pea ko e tamasiʻi kuo mavaé te ne ʻai ʻa hono nimá ki he ʻana ʻo e ngata huhu koná.

9 ʻE ʻikai te nau fakamamahiʻi pe fakaʻauha ʻi hono kotoa ʻo hoku moʻunga toputapú; he ʻe fonu ʻa māmani ʻi he ʻilo ʻo e ʻEikí ʻo hangē ko hono fakafonu ʻe he ngaahi vaí ʻa e tahí.

10 Pea ʻi he ʻaho ko iá ʻe ʻi ai ha aka ʻo Sese, ʻa ia ʻe tuʻu ko e fuka ʻo e kakaí; ʻe kumi ki ai ʻe he kau Senitailé; pea ʻe nāunauʻia ʻa hono mālōlōʻangá.

11 Pea ʻe hoko ʻo pehē ʻi he ʻaho ko iá ʻe toe ʻai ʻe he ʻEikí ʻa hono toʻukupú ko hono tuʻo ua ke toe fakahaofi ʻa e toenga ʻo hono kakai, ʻa ia ʻe fakatoe, mei ʻAsiliá, pea mei ʻIsipité, pea mei Pātolosí, pea mei Kusá, pea mei ʻIlamí, pea mei Sainá, pea mei Hamaté, pe mei he ngaahi motu ʻo e tahí.

12 Pea te ne fokotuʻu ha fuka maʻá e ngaahi puleʻangá, pea fakatahaʻi mai ʻa e kau liʻekina ʻo ʻIsilelí; pea te ne tānaki ʻa e kakai kuo fakamoveteveteʻi ʻo Siuta mei he ngaahi tuliki ʻe fā ʻo e māmaní.

13 ʻE mole atu foki ʻa e meheka ʻa ʻIfalemí, pea ko e ngaahi fili ʻo Siutá ʻe motuhi atu ia; ʻe ʻikai meheka ʻa ʻIfalemi kia Siutá, pea ʻe ʻikai fakamamahiʻi ʻe Siuta ʻa ʻIfalemi.

14 Kā te na puna atu ki he ngaahi uma ʻo e kau Filisitia ki he hihifó; pea te na vete fakataha ʻa kinautolu ʻo e hahaké; pea te na hili hona nimá ki ʻĪtomi mo Mōape; pea ʻe talangofua ʻa e fānau ʻa ʻĀmoní kiate kinaua.

15 Pea ʻe fakaʻauha ʻo ʻosi ʻe he ʻEikí ʻa e vaʻa ʻo e tahi ʻIsipité; pea ʻi heʻene fuʻu matangi mālohí te ne luluʻi ʻa hono toʻukupú ki ʻolunga ʻi he vaitafé, pea taaʻi ia ʻi he ngaahi vaitafe iiki ʻe fitú, pea tuku ʻa e tangatá ke fononga ai kae ʻikai viviku hono vaʻé.

16 Pea ʻe ʻi ai ha hala lalahi moʻó e toenga ʻo hono kakaí ʻa ia ʻe fakatoe, mei ʻAsiliá, ʻo hangē ko ia naʻe hoko ki ʻIsileli ʻi he ʻaho naʻá ne ʻalu atu ai mei he fonua ʻo ʻIsipité.