1 Ita siak, ni Nephi, agsaoak maipanggep kadagiti balikas a naisuratkon, a naisao iti ngiwat ni Isaias. Agsipud ta kitaenyo, nagsao ni Isaias iti adu a balikas a narigat a maawatan ti adu kadagiti tattaok; ta saanda nga ammo ti maipanggep iti wagas iti panangipadto dagiti Hudio.

2 Agsipud ta siak, ni Nephi, diak insuro kadakuada ti adu a bambanag maipanggep iti wagas dagiti Hudio; gapu ta dagiti aramidda ket dagiti aramid iti kasipngetan, ken dagiti tignayda tignay a makarimon.

3 Gapuna, agsuratak kadagiti tattaok, kadagiti amin nga umawatto kalpasanna kadagitoy a banag nga isuratko, tapno maammuanda ti panangukom ti Dios, tapno agsaknap iti amin a pagilian, a mayannurot iti balikas nga insaona.

4 Gapuna, dumngegkayo, O tattaok, a kameng iti balay ti Israel, ket imdenganyo dagiti balikasko; ta gapu a saan a nalawag kadakayo dagiti balikas ni Isaias, nupay kasta nalawagda kadagiti napnuan iti espiritu ti pammadto. Ngem itdek kadakayo ti pammadto, a mayannurot iti espiritu nga adda kaniak; gapuna mamadtoak a mayannurot iti kinalawag nga adda kaniak manipud pay iti kanito a pimmanawak manipud iti Jerusalem a kaduak ti amak; ta kitaem, maragsakan ti kararuak iti kinalawag nga adda kadagiti tattaok, tapno makasursuroda.

5 Wen, ken maragsakan ti kararuak kadagiti balikas ni Isaias, agsipud ta naggapuak iti Jerusalem, ket naimatangak dagiti bambanag dagiti Hudio, ken ammok a maawatan dagiti Hudio dagiti bambanag dagiti propeta, ket awan ti sabali a tattao a makaawat kadagiti wagas dagiti bambanag a naibaga kadagiti Hudio a kas kadakuada, malaksid no naisuroda kadakuada a mayannurot kadagiti bambanag dagiti Hudio.

6 Ngem kitaenyo, siak, ni Nephi, saanko nga insuro kadagiti annakko a mayannurot ti wagas dagiti Hudio; ngem kitaen, siak, iti bagik, nagnaedak iti Jerusalem, gapuna ammok ti maipanggep iti aglawlawna; ket nadakamatko kadagiti annakko ti maipanggep iti panangukom ti Dios, a napasamak kadagiti Hudio, kadagiti annakko, a mayannurot iti amin a naisao ni Isaias, ket saanko nga isurat ida.

7 Ngem kitaeyo, ituloyko ti kabukbukodak a pammadto, a mayannurot iti pammalawagko; iti pannakaammok nga awan ti tao nga agbiddut; nupay kasta, inton dumteng dagiti aldaw a pannakapasamak dagiti padto ni Isaias ammonto dagiti tattao nga awan duadua, iti panawen a pannakapasamakda.

8 Gapuna, napategda kadagiti annak ti tattao, ket dagiti mangipagarup a saan, isudanto a mismo ti kasaritak, ket iturongko dagiti balikas kadagiti bukodko a tattao; ta ammok a kasapulandanto dagitoy kadagiti maudi nga aldaw; ta maawatandanto dagitoy iti dayta nga aldaw; gapuna, naisuratko dagitoy iti pagimbaganda.

9 Ket kas iti pannakadadael ti maysa a kaputotan kadagiti Hudio gapu iti kinadakes, kasta met ti pannakadadaelda manipud iti maysa a kaputotan agingga kadagiti sumarsaruno a mayannurot kadagiti kinadakesda; ket awan ti nadadael kadakuada a saan nga impakpakauna dagiti propeta ti Apo.

10 Gapuna, naibagan kadakuada ti maipanggep iti pannakadadael a mapasamakto kadakuada, kalpasan la unay ti ipapanaw ti amak iti Jerusalem; nupay kasta, pinatangkenda dagiti puspusoda; ket kas mayannurot iti pammadtok nadadaelda, malaksid kadagiti naipanaw a balud iti Babilonia.

11 Ket ibagak ita daytoy gapu iti espiritu nga adda kaniak. Ket uray pay no naipanawdan agsublidanto manen, ket tagikuaenda ti daga ti Jerusalem; gapuna, maisublidanto manen iti daga a tawidda.

12 Ngem, kitaenyo, aggugubatdanto, ken addanto damdamag iti gubgubat; ket inton dumteng ti aldaw a ti Bugbugtong ti Ama, wen, uray pay ti Ama ti langit ken ti daga, agpakitanto a nainlasagan kadakuada, kitaen, iwaksidanto, gapu iti kinamanagbasolda, ken ti kinatangken ti panagpuspusoda, ken ti kinasukirda.

13 Kitaenyo, ilansadanto iti krus isuna; ket kalpasan a maidasay iti sepulkro iti uneg ti tallo nga aldaw agungarto manipud iti patay, a mangyeg iti pannakapaimbag; ket maisalakanto amin a mamati iti naganna iti pagarian ti Dios. Gapuna, maragsakan ti kaunggak a mangipadto iti maipanggep kenkuana, ta nakitakon ti aldawna, ket itan-ok ti pusok ti nasantuan a naganna.

14 Ket kitaenyo a mapasamakto a kalpasan ti panagungar ti Mesias manipud iti patay, ken nakapagpakitan kadagiti taona, a kas iti kaadu dagiti mamati iti naganna, kitaen, madadaelto manen ti Jerusalem; ta ay-ayto pay dagiti bumusor iti Dios ken dagiti tattao ti simbaanna.

15 Gapuna, dagiti Hudio ket maiwaraswarasto iti amin a pagilian; wen, ken kasta met a ti Babilonia ket madadaelto; gapuna, mawaraswarasto dagiti Hudio kadagiti sabali a pagilian.

16 Ket kalpasan a naiwaraswarasda, ken nadusada ti Apo a Dios babaen dagiti dadduma a pagilian iti uneg ti adu a kaputotan, wen, uray pay manipud iti maysa a kaputotan agingga kadagiti sumarsaruno agingga a maallukoydanto a mamati ken ni Cristo, ti Anak ti Dios, ken ti pannakasubbot, nga awan patinggana iti sangkataw-an—ket inton dumteng dayta nga aldaw a mamatida ken ni Cristo, ket agdaydayawda iti Ama babaen ti naganna, nga addaan kadagiti natarnaw a puso ken nadalus nga ima, ken saandanto nga aguray pay iti sabali a Mesias, ket, iti dayta a kanito, dumteng ti aldaw a rumbeng unay a mamatida kadagitoy a naisurat.

17 Ket rugianto manen ti Apo a mangisubli iti maikadua a gundaway dagiti taona manipud iti pannakapukaw ken pannakatnag a kasasaadda. Gapuna, mangisayangkatto iti datdatlag ken pagsidsiddaawan nga aramid kadagiti annak ti tattao.

18 Gapuna, itdenna dagiti balikasna kadakuada, dagiti balikas a mangukom kadakuada iti maudi nga aldaw, agsipud ta maited kadakuada a panggutugot iti pudno a Mesias, nga inwaksida; ken panggutugot kadakuada a saanen a mangnamnama pay iti sabali a Mesias, agsipud ta awanen ti umay, malaksid no sinsinan a Mesias a mangallilaw kadagiti tattao; gapu ta maysa laeng ti Mesias a naisao dagiti propeta, ket dayta a Mesias ti iwaksi dagiti Hudio.

19 Ta maibatay kadagiti balikas dagiti propeta, dumtengto ti Mesias innem a gasut a tawen manipud iti kanito a pimmanaw ti amak iti Jerusalem; ken babaen dagiti balikas dagiti propeta, ken kasta met iti balikas ti anghel ti Dios, Jesucristo ti nagannanto, ti Anak ti Dios.

20 Ket ita, kakabsatko, nalawag nga imbagakon a saankayo mabalin nga agbiddut. Ket bayat ti kaadda ti Apo a Dios a mangiruar iti Israel iti daga ti Egipto, ken panangtedna ken ni Moises iti bileg a nasken a mangagasto kadagiti makipagili kalpasan ti panangkagat kadakuada dagiti nagita nga uleg, no kumitadanto iti uleg nga impakitana kadakuada, ken kasta met nga inikkanna iti bileg a mangbasnot iti bato ket pumsuakto ti danum; wen, kitaen kunak kadakayo, ta iti kinapudno dagitoy a banag, ken iti kaadda ti Apo a Dios, awan ti sabali a nagan a naited iti baba ti langit no saan a daytoy Jesucristo, a nasaokon, a pakaisalakanan ti tao.

21 Gapuna, agsipud iti daytoy a panggep a nagkari ti Apo a Dios kaniak a nasken a dagitoy a bambanag nga isuratko nasken a maidulin ken mataginayonto, ket mayallawat kadagiti putotko, manipud iti maysa a kaputotan agingga kadagiti sumarsaruno a kaputotan, tapno matungpal ti kari ken ni Jose, a saanto a pulos a maungaw ti kaputotanna agingga nga adda ti daga.

22 Gapuna, mayallawatto dagitoy a balikas manipud iti maysa a kaputotan agingga kadagiti sumarsaruno a kaputotan agingga nga adda ti lubong; ket mayallawatdanto a mayannurot iti pagayatan ken pakaragsakan ti Dios; ket ukomendanto dagiti pagilian a mangtagikua kadakuada a mayannurot kadagiti balikas a naisurat.

23 Ta sireregta a nagtuoktayo a nagsurat, tapno magutugot dagiti annaktayo, ken kasta met dagiti kakabsattayo, a mamati ken ni Cristo, ken makikappianto iti Dios; ta ammotayo a babaen ti parabur maisalakantayo, kalpasan ti amin a maaramidantayo.

24 Ket, iti laksid ti panamatitayo ken ni Cristo, tungpalentayo ti paglintegan ni Moises, ket padaanantayo nga addaan iti kinatibker ken ni Cristo, agingga a matungpal ti paglintegan.

25 Ta, naited daytoy a linteg gapu iti daytoy a panggep; gapuna saan a naipatungpal kadatayo ti paglintegan, ket nagtalinaedtayo a sibibiag ken ni Cristo gapu iti pammatitayo; ngem tungpalentayo latta ti paglintegan gapu kadagiti bilbilin.

26 Ket agsaotayo iti maipanggep ken ni Cristo, agrag-otayo ken ni Cristo, ikasabatayo ni Cristo, ipadtotayo ni Cristo, ket agsurattayo a mayannurot kadagiti padtotayo, tapno maammuan dagiti annaktayo ti pamuidanda a mangkita iti pakaugasan ti basbasolda.

27 Gapuna, agsaotayo maipanggep iti paglintegan tapno maammuan dagiti annaktayo ti kaawanen ti bileg ti paglintegan; ket isuda, iti pannakaammoda iti kaawanen ti bileg ti paglintegan, mabalinda a mangnamnama iti biag nga adda ken ni Cristo, ket maammuanda no ania ti naited a panggep ti paglintegan. Ket kalpasan ti pannakatungpal ti paglintegan ken ni Cristo, rumbeng a saanda patangkenen ti pusoda a maibusor kenkuana no naskenen a maiwaksi ti paglintegan.

28 Ket ita kitaenyo, tattaok, nasukirkayo a tattao; gapuna, nalawag nga imbagak kadakayo, a saanyo maawatan. Ket agbalinto a pammaneknek a maibusor kadakayo dagiti balikas nga imbagak; agsipud ta umdasdan a mangisuro iti asino man a tao iti umno a wagas; agsipud ta ti umno a wagas isu ti panamati ken ni Cristo ken saan a panangilibak kenkuana; agsipud ta no ilibakmo inlibakmo metten dagiti propeta ken ti paglintegan.

29 Ket ita kitaenyo, kunak kadakayo a ti umno a wagas isu ti panamati ken ni Cristo, ken saan a panangilibak kenkuana; ken ni Cristo ti Nasantuan ti Israel; gapuna nasken nga agtamedkayo kenkuana, ket agdaydayawkayo kenkuana iti amin a kabaelanyo, panunot, ken pigsa, ken ti pakabuklan ti kararuayo; ket no aramidenyo daytoy saan a bumurong a maisinakayo.

30 Ket, gapunta rumbeng unay, tungpalenyo dagiti aramid ken dagiti ordinansa ti Dios agingga a maipatungpal ti paglintegan a naited ken ni Moises.