Sopun 7
Jacob a soposopono ne annea seni Isaiah: Isaiah a kapas fan iten ewe Messiah—Ewe Messiah epwe ani ewe kapasen ekkewe mi tipachem—I epwe mutata Nukunupan ngeni ewe chon wichi—I esap assaw—Anonno ngeni Isaiah 50. Arap ngeni 559–545 Ier Mwen Kraist.
1 Ewer, pun iei anon ewe Samon: Ua fen eimukeno, ika ua fen oturokeno feinfeino chok? Pun iei anon ewe Samon: Ifan an inom we toropwen mufesen? Ngeni ion ua fen eimukeno, ika ngeni menni nein ekkewe ngang mi niwinimang ngeni ua amömökeno? Ewer, ngeni ion ua fen amömökeno? Nengeni, ren om kewe fofforungaw ka pwisin amömökeno, iwe ren om kewe atai annuk inom we a keimuno.
2 Ina minne, nupwen ua feito, ese wor aramas; nupwen ua kokko, ewer, ese wor emon a ponueni. O imwen Israel, met pei a mwochomwochuno pwe ese tongeni amanaua en, ika ese wor ai manaman ai upwe angasa en? Nengeni, pokiten ai kapung ua appwasata ewe sat, ua fori chonupupur repwe ew fonu pon me iker repwe pongaw pokiten ekkewe konik ra pwaseta, iwe ra mano pokiten kaka.
3 Ua aufoufa ekkewe nang non rochopwak, iwe ua fori mangakun netipeta pwe ponuponur.
4 Ewe Samon Kot a ngeniei ewe kapasen ekkewe mi tipachem, pwe upwe sinei ifa usun ne apasa ew kapas non ew pungun fansoun ngonuk, O imwen Israel. Nupwen ka apwangapwang i a annenoi seningei iteiten nesossor. I a annenoi seningei pwe epwe rongorong usun ekkewe mi tipachem.
5 Ewe Samon Kot a suki seningei, iwe use ungeni, ika kununo seni.
6 Ua mutata nukunupei ngeni ewe chon wichi, me sapei ngeni ir ekkewe ra utti ewe mokur. Use opano mesei seni turunufas me ottuf.
7 Pun ewe Samon Kot epwe anisiei, iei minne usap assaw. Iei minne ua fen amonnata mesei usun efou fau, iwe ua sinei pwe usap saw.
8 Iwe ewe Samon a arapeto, iwe a epichaeino. Ion epwe anini ngeniei? Mut ngenikich sipwe uta fengen. Ion ai chon koum? Mut ngeni epwe feito arap ngeniei, iwe upwe wichi i ren pochokunen awei.
9 Pun ewe Samon Kot epwe anisiei. Iwe meinisin ir ekkewe repwe etipisiei, nengeni, meinisin ir repwe chinnapeno usun echo mangaku, iwe ewe manchonap epwe anireno.
10 Ion neimi a nuokusiti ewe Samon, a aneasochisi mongungun noun chon kuno, a fetan non rochopwak me ese wor an saram?
11 Nengeni ami meinisin ekkewe oua aku ekkei, ekkewe oua rokopwanikemino ren merekuku, fetan non ewe saramen ami ekkei me non ekkewe merekuku minne oua fen aku. Ei oupwe ani seni pei—oupwe konetiw non netipengaw.