Kapitulu 9
Ding Judio matipun la kareng karelang eganaganang pangakung labuad — Ing pamanatbus atbusan ne ing tau king Pamikasala — Ding katawan da ring mete lumual la manibatan king kutkutan, at ding karelang espiritu manibatan king infierno at manibatan king paraiso — Miatulan la — Ing Pamanatbus magligtas ya king kamatayan, infierno, king demonyu, at alang kapupusan a kasakitan — Ding mangayap miligtas la king kayarian ning Dios — Ding parusa karing kasalanan mitakda la — Ing Banal a Metung ning Israel ya ing magbante king pasbul.
1 At ngeni, kaluguran kung kapatad, binasa ko rening bage a reni bang abalu yu ing tungkul kareng pangaku na ning Guinu a mengaku ya karing eganagana king bale ning Israel —
2 A ya migsalita ya karing Judio, king asbuk da ring keang banal a propeta, anggiyang manibatan king minuna, ibat karing lahi angga karing lahi, angga king ing panaun datang a mibalik lang pasibayu king tutung pisamban at king kawan ning Dios; potang matipun na lang pauli karing karelang labuad a pekamana, at mitatag la karing eganagana dang pangakung labuad.
3 Lawan, kaluguran kung kapatad, sasabian ku kekayu deng bageng deni bang saya kayu, at itas yo reng buntuk yu kapilanman, uli da ring biyaya a ing Guinung Dios ipagkalub na kareng kekayung anak.
4 Uling balu ku menintun na kayung dakal, keraklan kekayu, bang makabalu kareng bage daratang; anya pin balu kung balu yu ing kekatamung laman dapat yang mina at mate; makanian man, kareng katawan tamu akit taya ing Dios.
5 Wa, balu kung balu yu a king katawan ipakit na ing sarili na karetang atiu king Jerusalem, nung nukarin tamu ibat; uling kailangan a dapat yang atiu karela; uling kailangan king dakilang Miglalang a paburian ne ing sarili nang mipalalam ya king tau king laman, at mate ya para karing eganaganang tau, bang ding eganaganang tau mipalalam la kea.
6 Uling kabang ing kamatayan dinatang ya kareng eganaganang tau, bang matupad ya ing mapaglunus nang planu ning dakilang Miglalang, kailangan ing mika upaya king pamanyubling mie, at ing pamanyubling mie dapat yang datang king tau uli ning pamikasala na; at ing pamikasala dinatang uli ning kasalanan; at uling ing tau mikasala ya, mikawani ya king arapan ning Guinu.
7 Anya pin, kailangan ing mika ating alang anggang pamanatbus — nung e king alang anggang pamanatbus ining kabulukan e malyaring mibili king e kabulukan. Anya pin, ing mumunang atul a dinatang king tau menatili ya sana king alang kapupusan a panaun. At nung makanian, iting katawan dapat mikutkut ya para muluk at malaso king keang indung labuad, bang ena talakad pa.
8 O ing kabiasnan ning Dios, ing keang lunus at grasya! Uling tutu, nung ing katawan ene dapat talakad ding espiritu tamu dapat lang milalam ketang anghel a menabu manibatan king arapan ning Alang Anggang Dios, at meging demonyu ya, bang ena talakad pasibayu.
9 At ding kekatamung espiritu dapat meging kalupa no sana, at meging demonyu tamu, anghel ning demonyu, bang misaran king arapan ning kekatamung Dios, at manatiling kayabe ning tata da ring kalaraman, king kasakitan, a kalupa na; wa, ketang tau a migloku kareng minuna tamung pengari, a menalili king sarili na bilang anghel ning sala, at gilu no ring anak da ring tau para king lihim a pamakisapakat king pamakamate at eganaganang paralan ning lihim dang dapat ning dalumdum.
10 O karagul ning kayapan na ning kekatamung Dios, a magsadia king dalan para king pamanakas tamu king sakmal na ning makapangilabut a maragul a animal; wa, itang maragul a animal, kamatayan at infierno, a ausan kung ing kamatayan na ning katawan, at ing kamatayan na mu naman ning espiritu.
11 At uli ning paralan ning pamagligtas na ning kekatamung Dios, ing Banal a Metung ning Israel, iting kamatayan, a sinabi ku, a ing makayatu, iligtas nala ding mete; a kamatayang yapin ing kutkutan.
12 At ing kamatayan a ining kakung sinabi, a yapin ing kamatayang espiritual, ibulus no ring keang mete; a ing kamatayang espiritual ya ing infierno; anya pin, ing kamatayan at infierno dapat nong ibulus ding karelang mete, at ing infierno kailangan nong ibulus ding alipan nang espiritu, at ing kutkutan kailangan nong ibulus ding keang alipan a katawan, at ding katawan at ding espiritu da ring tau misubli la king balang metung, at iti king upaya na ning pamanyubling mie na ning Banal a Metung ning Israel.
13 0 kadakila na ning planu na ning kekatamung Dios! Uling king sumangid na niti, ing paraiso ning Dios dapat nong ibulus ding espiritu da ring mangayap at ing kutkutan ibulus no ring katawan da ring mangayap; at ing espiritu at katawan misubli la king sarili nang pasibayu, at ding eganaganang tau maging ala lang kabulukan, at alang kamatayan, at ila mabie lang kaladua, a atin lang sakdal a beluan a anti itamu king katawan, maliban mu nung ing beluan maging sakdal ya.
14 Anya pin, mika sakdal tamung beluan kareng eganagana tamung kasalanan, at ing kekatamung karinatan, at ing kekatamung kalubasan; at ding mangayap mika sakdal lang beluan kareng karelang tula, at karelang kayapan, bilang makaimalan king kalinisan, wa, anggiyang king bata ning kayapan.
15 At milyari a potang ding eganaganang tau milabas la kening mumunang kamatayan angga king mie la, uling meging imortal la, dapat lang marap king piukuman ning Banal a Metung ning Israel; at kanita datang ing kayatulan, at kanita dapat lang mayatul agpang king banal a kayatulan ning Dios.
16 At lawan, kabang mabie ya ing Guinu, uling ing Guinung Dios sinabi na, at iti ing alang angga nang amanu, a e mawala, a ilang mangayap manatili la pa muring mayap, at ilang makasalanan manatili lang makasalanan; anya pin, ilang makasalanan ila ring demonyu at ding keang angheles; at mipunta la king alang kapupusan a api, a makasadia para karela; at ing karelang kasakitan mengari yang dayatdayatan malat ning api at asupri, a ing lablab na minukiat kapilanman, at alang kapupusan.
17 O ing kadakilan at ing justicia ning kekatamung Dios! Uling gewa na ngan ing eganaganang amanu na, at linual la ngan king asbuk na, at ing batas na dapat matupad.
18 Dapot, makiramdam, ding mangayap, ding santo ning Banal a Metung ning Israel, ila a meniwala king Banal a Metung ning Israel, ila a mekapibata karing pasakit ning labuad, at mimua king kamarinayan a iti, ila manan de ing kayarian ning Dios, a makasadia para karela manibat pa king pangatatag ning yatu, at ing karelang tula maging lubus kapilanman.
19 O ing kadakilan na ning lunus ning kekatamung Dios, ing Banal a Metung ning Israel! Uling linigtas no ring keang santo ketang makakilabut a maragul a animal ing demonyu, at kamatayan, at infierno, at ing dayatdayatan malat ning api at asupri, a alang anggang kaparusan.
20 O kadakila na ning kabanalan ning kekatamung Dios! Uling balu na ngan ing eganagana, at alang nanumang bage a ena balu.
21 At dinatang ya king yatu bang iligtas na la ring eganaganang tau nung makiramdam la king siwala na; uling tutu, denasan nala ding sakit da ring eganaganang tau, wa, ding sakit da ring balang mabie tau, pareung lalaki, babai, at anak, a makabilang karing pamilia nang Adan.
22 At pibata na iti bang ing pamanyubling mie datang ya karing eganaganang tau, bang ding eganagana talakad la king arapan na keng dakila at aldo ning kayatulan.
23 At inutusan no ring eganaganang tau a dapat lang sumisi, at pabiniag la king lagiu na, at mika sakdal lang kasalpantayanan king Banal a Metung ning Israel, o ela miligtas king kayarian ning Dios.
24 At nung ela sumisi at maniwala king lagiu na, at pabiniag king lagiu na, at mibata angga king kapupusan, misumpa la; uling ing Guinung Dios, ing Banal a Metung ning Israel sinabi na.
25 Anya pin, miniye yang metung a batas; at nung alang batas a mibiye alang kaparusan; at nung alang kaparusan alang pamaniumpa, at nung alang pamaniumpa ding lunus ning Banal a Metung ning Israel bandian na la, uli ning pamanatbus; uling miligtas la king keang upaya.
26 Uling ing pamanatbus biniye na ing aduan ning justicia karetang eganaganang alang mibiye batas karela, bang miligtas la ketang makakilabut a maragul a animal, kamatayan at infierno, at ing demonyu, at ing dayatdayatan malat ning api at asupri, a alang kapupusan a kaparusan; at mibalik la ketang Dios a miniye karelang pangisnawa, yapin ing Banal a Metung ning Israel.
27 Dapot kalulu ya itang midinan batas, wa, a atiu la ngan kea ding kautusan ning Dios, anti kekatamu, at mikasala kareta, a maniayang kareng aldo ning keang kapagsubukan, uling makakilabut ya ing keang kabilian!
28 O itang mapamurait a planu ning metung a marok! O ding mapagmatas, at ding maina, at ing kamulangan da ring tau! Potang mekabalu la isipan da biasa la, at ela makiramdam karing payu na ning Dios, uling lelele dala mu, ipagpalageng balu do ring sarili da, anya pin, ing kabiasnan da kamulangan at ala lang pakinabang karela. At mangamate la.
29 Dapot ing maging biasa mayap nung makiramdam la kareng payu ning Dios.
30 Dapot kalulu la ring mabandi, a mabandi kareng bage makayatu. Uling mabandi la amakan do ring kalulu, at liligaligan do ring mababa lub, at ding karelang pusu atiu la kareng karelang pibandian, anya pin, ing karelang pibandian yapin ing karelang dios. At tutu, ding karelang pibandian kayabe da la namang mawala.
31 At kalulu la ding maklak a e makaramdam; uling mate la.
32 Kalulu la ring bulag a e manakit; uling mate la naman.
33 Kalulu la ding e tuling pusu, uling ing beluan kareng karelang kasalanan parusan nala king tauling aldo.
34 Kalulu ya ing malaram, uling miugse ya king infierno.
35 Kalulu ya ing makamate a saryang makamate, uling mate ya.
36 Kalulu la ring magpatutut, uling miugse la king infierno.
37 Wa, kalulu la detang sasamba kareng dios-diosan, uling ing demonyu da reng eganaganang demonyu matula ya karela.
38 At, king malaguang amanu, kalulu la retang mangamate kareng kasalanan da; uling mibalik la king Dios, at akit de ing lupa na, at manatili la king kasalanan.
39 O, kaluguran kung kapatad, ganakan yu ing kilabut ning pamikasala laban ketang Banal a Dios, at makanian mu naman ing kilabut ning pamamiye dalan karing pamanamuyut ning metung a mapamurait. Ganakan, ing maging makayatu pamanisip kamatayan, at ing makaespiritual a pamanisip bie yang alang angga.
40 O, kaluguran kung kapatad, makiramdam ko karing amanu ku. Ganakan ye ing kadakilan na ning Banal a Metung ning Israel. Eyu sasabian ing migsalita kung mangabayat a bage laban kekayu; uling nung gawan yu, linapastangan kayu laban king tutu; uling sinabi ko reng amanu ning kekayung Miglalang. Balu ku ring amanu ning katutuan mabayat la laban king eganaganang karinatan; dapot ding mangayap eda pitatakutan, uling kaluguran da ing katutuan at ela matitigatig.
41 O kanita, kaluguran kung kapatad, lumapit kayu king Guinu, ing Banal a Metung. Ganakan yu a ing dalan na mangayap la. Tutu, ing dalan para king tau makiput ya, dapot papunta ya king matulid a dalan arapan na, at ing bante king pasbul yapin ing Banal a Metung ning Israel; at eya manupang ipus karin; at alang aliwang dalan nung e king pasbul; uling eya malyaring puraitnan, uling ing Guinung Dios ya ing lagiu na.
42 At ninumang katuk kea ibuklat ne; at ding biasa, at ding maki beluan, at ilang mabandi, a mapagmatas uli ning karelang pegaralan, at karelang kabiasnan, at karelang pibandian — wa, ila ring kamuan na; at maliban mu nung iugse do reng bage a reni, at isipan da ing mangmang la arapan ning Dios, at tipa la king lalam ning kababan, ene ibuklat karela.
43 Dapot ding bage da ring biasa at ding mayap matul misalikut karela kapilanman — wa, itang kaligayan a makasadia para kareng santo.
44 O, kaluguran kung kapatad, ganakan yula ding amanu ku. Lawan, ilukas ko ring malan ku at ipagpag ko king arapan yu; panalangin ku ing Dios ning kakung kaligtasan a lawan naku ning keang matang mapanintun; anya pin, abalu yu king tauling aldo, potang ding eganaganang tau mayatul la kareng karelang gewa, a ikit na ning Dios ning Israel a leko ku ing kasalanan yu king kaladua ku, at aku tatalakad kung masala king arapan na, at melaya naku king daya yu.
45 O, kaluguran kung kapatad, gumulut ko kareng kasalanan yu; ugunan yo ring tanikalang tatali kekayung matalik; lumapit ko ketang Dios a batu na ning kekayung kaligtasan.
46 Isadia yo reng kaladua yu para ketang maligayang aldo potang ing justicia mibiye ya kareng mangayap, anggiyang ing aldo ning kayatulan, bang ekayu lumbug king sobrang takut; bang eyu la aganaka ding makatakut yung kasalanan king kasakdalan, at mapilit kong gulisak: Banal, Banal la ring kekang kayatulan, O Guinung Dios a Mayupaya — dapot balu ku ing kasalanan ku; mikasala ku king kekang batas, at ding kakung kasalanan kaku la; at ing demonyu ikua naku, a metung kung biktima ning keang makakilabut a kasakitan.
47 Dapot, makiramdam, kapatad ku, kailangan wari ing gisingan da kayu king makatakut a katutuan a bage a reti? Panasakitan ko wari ding kaladua yu nung ding kaisipan yu malinis la? Maging tapat ku wari kekayu agpang keng kamalinawan na ning katutuan nung ikayu mibulus ko ibat king kasalanan?
48 Lawan, nung banal kayu, magsalita ku kekayu king kabanalan; dapot uling ekayu banal, at lalawan yu ku bilang talaturu, kailangan ing ituru ku kekayu ing resulta ning kasalanan.
49 Lawan, ing kaladua ku mua ya king kasalanan, at ing pusu ku matula ya king kayapan, at purian ke ing banal nang lagiu ning kakung Dios.
50 Ume ko keni, kakung kapatad, ing balang metung a kumawa, lumapit la karing danuman; at yang alang pera, lumapit sali at mangan; wa lumapit saling alak at gatas a alang pera at alang alaga.
51 Anya pin, eko gagastus pera para king alang ulaga, o magobra king e makaligaya. Makiramdam kayung masalese kaku, at ganakan yo ding amanung sinabi ku; at lumapit king Banal a Metung ning Israel, at magpakabsi karing e masisira, o mabubuluk, at paburen ing kaladua yung matula king kataban.
52 Makiramdam, kaluguran kung kapatad, ganakan yo ring amanu na ning kekayung Dios; manalangin kong alang tuknang neng aldo, at miye pasalamat king banal nang lagiu neng bengi. Paburen yung magsaya la ring pusu yu.
53 At lawan, kadakila da ring pangaku na ning Guinu, at kadakila na ning keang pamanipa karing anak da ring tau; at uli ning keang kadakilan, at ning keang grasya at lunus, pengaku na kekatamu a ding bini tamu ela ngan masira, agpang king laman, dapot sesen nala; at king daratang a salinlahi maging mayap lang sanga king bale ning Israel.
54 At ngeni, kapatad ku, bisa ku pang magsalitang dakal kekayu, dapot bukas sabian ko kekayu ding mitagan karing amanu ku. Amen.