1 Ha koʼág̃a Jesús heʼi rire koʼã ñeʼẽ ojere jey pe atyguasu gotyo, ha oñeʼẽ jey chupekuéra, heʼívo: Añetehápe, añetehápe, che haʼe peẽme, ani pehusga, pejehusgaʼỹ hag̃ua peẽ.

2 Pe huísio peporohusgávape, pejehusgáta avei peẽ; ha medída peporomedívape, peñemedi jeýta peẽ.

3 Ha mbaʼére piko rehecha kapiʼi oĩva nde joykeʼy resápe, ha nderehechái pe víga oĩva nde resápe?

4 Térã mbaʼéicha piko eréta nde joykeʼýpe: Eheja taipeʼa kapiʼi nde reságui—ha péina ápe, oĩ peteĩ víga nde resápe?

5 Nde tovamokõi, eipeʼa raẽ pe víga nde reságui; ha upéi rehechaporãta renohẽ hag̃ua kapiʼi nde joykeʼy reságui.

6 Ani pemeʼẽ umi imarangatúva jaguápe, ni peity pende pérla kure renondépe, aníntemo opyrũmba hikuái hese ipýpe, ha ojere jey ha peneipehaʼã.

7 Pejerure, ha oñemeʼẽta peẽme; peheka ha pejuhúta; pehenói, ha ojepeʼáta peẽme.

8 Opavave ojerurévape, oñemeʼẽtagui; ha pe ohekáva, ojuhúta; ha pe ohenóivape, ojepeʼáta.

9 Térã máva yvypóra piko pende apytépe, itaʼýra ojeruréramo chupe mbujape, omeʼẽta chupe peteĩ ita?

10 Térã ojeruréramo peteĩ pira, omeʼẽta chupe peteĩ mbói?

11 Ha peẽ, peneñañáva, pemeʼẽkuaáramo mbaʼeporã pende raʼykuérape, mboyve piko pende Ru oĩva yvágape omeʼẽta mbaʼe porã ojerurévape chupe?

12 Upévare, opa mbaʼe peipotáva yvyporakuéra ojapo penderehe, jepe upéicha pejapo peẽ hesekuéra, haʼégui upéva léi ha profetakuéra.

13 Peike okẽ poʼi rupi; tuichágui okẽ, ha ipyrusu tape, oporogueraháva ñehundípe, ha heta oĩ oikéva upérupi;

14 Ipoʼígui okẽ, ha ipoʼi upe tape, oporogueraháva tekovépe, ha mbovy umi ojuhúva.

15 Peñeñangarekóke profetakuéra añeteguaʼỹvagui, oúva peẽme ovecha ao reheve, ha katu hyepýpe aguaraguasu ñarõ hína.

16 Hiʼáre peikuaáta. Oñemonoʼõ piko ñuatĩgui parral, térã ñanágui ígo?

17 Upéicha avei opa yvyramáta porã omeʼẽ yva porã; ha katu peteĩ yvyramáta vai omeʼẽ yva vai.

18 Peteĩ yvyramáta iporãva ndaikatúi omeʼẽ yva vai, ni peteĩ yvyramáta vai ndaikatúi omeʼẽ yva porã.

19 Opa yvyramáta omeʼẽʼỹva yva porã oñekytĩ, ha oñemombo tatápe.

20 Upéicha, hiʼáre peikuaáta.

21 Ndaʼopavavéi heʼíva chéve, Ñandejára, Ñandejára, oikéta yvága rréinope; ha katu pe ojapóva che Ru oĩva yvágape rembipota.

22 Upe árape oĩta heta heʼíva chéve: Ñandejára, Ñandejára, ndoroprofetisái piko raʼe nde rérape, ha nde rérape noromosẽirakaʼe aña, ha ndorojapói piko nde rérape heta tembiapo hechapyrãva?

23 Ha upéramo haʼéta chupekuéra: Che arakaʼeve ndapoikuaáiva; pejei chehegui, tembiapovai apohára.

24 Upévare, oimeraẽ ohendúva koʼã che ñeʼẽ ha ojapóva, che ambojojáta chupe peteĩ kuimbaʼe iñakãguapývare, omopuʼãvaʼekue hóga peteĩ ita ári—

25 Ha oguejy pe ama, ha ou heta y, ha oipeju yvytukuéra, ha oinupã atã upe ógare; ha ndoʼái, oñemopuʼãre peteĩ ita ári.

26 Ha opavave ohendúvape koʼã ñeʼẽ ha ndojapóiva oñembojojáta kuimbaʼe iñakãguapyʼỹvare, omopuʼãvaʼekue hóga yvykuʼi ári—

27 Ha oguejy pe ama, ha ou heta y, ha oipeju yvytukuéra, ha oinupã atã upe ógare; ha hoʼa, ha tuicha upe ijeʼa.