1 Ha koʼág̃a ojehu Jesús heʼipa rire koʼã mbaʼe omaʼẽ pe atyguasu jerére, ha heʼi chupekuéra: Péina ápe, peẽ pehendúkuri umi mbaʼe amboʼevaʼekue ajupi mboyve che Ru rendápe; upévare, oimeraẽva imanduʼáva koʼã che ñeʼẽre ha ojapóvape, amopuʼãta ára pahápe.

2 Ha ojehu Jesús heʼi rire koʼã ñeʼẽ ohechakuaa oĩha ijapytepekuéra ohecharamóva, ha omombaʼeguasúva mbaʼépa pe haʼe oipotáva Moisés léigui; noikũmbýigui hikuái ñeʼẽ heʼíva mbaʼe ymaguare ohasamaha, ha opa mbaʼe oñembopyahuha.

3 Ha heʼi chupekuéra: Ani pehecharamo haʼe haguére peẽme mbaʼe ymaguare ohasamaha, ha opa mbaʼe oñembopyahuha.

4 Péina ápe, che haʼe peẽme oñekumplímaha léi Moisés-pe oñemeʼẽvaʼekue.

5 Péina ápe, che haʼe upe ameʼẽvaʼekue upe léi, ha che haʼe ajapovaʼekue konvénio che tavayguakuéra Israel ndive; upévare, upe léi oñekumpli chepype, che ajúguikuri akumpli hag̃ua upe léi; upévare ohasáma.

6 Péina ápe, che ndahejareíri profetakuéra, ha opa mbaʼe che pype noñekumplirivaʼekue, añetehápe haʼe peẽme, oñekumplipataha.

7 Ha haʼe haguére peẽme mbaʼekuéra ymaguaréva ohasamahague, che ndahejareíri umi ojeʼevaʼekue mbaʼe ouvaʼerãre.

8 Péina ápe, konvénio ajapovaʼekue che tavayguakuéra ndive noñekumplipái gueteri; ha katu léi oñemeʼẽvaʼekue Moisés-pe oñembopaha chepype

9 Péina ápe, che haʼe upe léi ha tesape. Pemaʼẽ cherehe, ha peñehaʼãmbaite ipahaite peve, ha peikovéta; ha upe oñehaʼãmbaitévape ipahaite peve ameʼẽta tekove opaveʼỹva.

10 Péina ápe, che ameʼẽ peẽme tembiapoukapykuéra; upévare peneñeʼẽrendu che rembiapoukapykuérare. Ha upéva haʼe léi ha profetakuéra, haʼekuéra añetehápe otestifikágui chehegui.

11 Ha koʼág̃a, ojehu Jesús oñeʼẽmba rire koʼã ñeʼẽ, heʼi umi doce haʼe oiporavovaʼekuépe:

12 Peẽ haʼe che remimboʼekuéra; ha haʼe peteĩ tesape koʼã tavayguakuérape, haʼéva José ñemoñare rembyre.

13 Ha péina ápe, kóva haʼe pende yvy jehejapyre; ha Túva omeʼẽvaʼekue peẽme.

14 Ha Túva arakaʼeve nomeʼẽivaʼekue chéve tembiapoukapy amombeʼu hag̃ua upéva pende joykeʼykuérape Jerusalén-pe.

15 Ni arakaʼeve Túva nomeʼẽivaʼekue chéve tembiapoukapy añeʼẽ hag̃ua chupekuéra umi ambue trívu Israel rogaguáre, Túva oguerahavaʼekue hetãgui okápe.

16 Kóvante Túva heʼi chéve, haʼe hag̃ua chupekuéra:

17 Aguerekoha ambue ovecha ndahaʼéiva ko rredilpegua; umívape che agueruvaʼerã avei, ha ohendúta hikuái che ñeʼẽ; ha oĩta peteĩ ovechaʼaty ha peteĩ ovecharerekua.

18 Ha koʼág̃a, pyʼahatã ha jegueroviaʼỹ rupi noikũmbýi hikuái che ñeʼẽ; upévare heʼi chéve Túva anive hag̃ua añeʼẽ chupekuéra koʼã mbaʼére.

19 Ha katu, añetehápe, che haʼe peẽme Túva heʼihague chéve, ha che haʼe peẽme, peẽ pejeipeʼahague ijapytepekuéragui hembiapovaikuéra rupi; upévare hembiapovai rupi hikuái ndoikuaái mbaʼeve pendehegui.

20 Ha añetehápe, che haʼe peẽme avei Túva oipeʼahague chuguikuéra ambue trivukuéra; ha hembiapovai rupi ndoikuaái hikuái mbaʼeve chuguikuéra.

21 Ha añetehápe che haʼe peẽme, peẽ haʼeha umi che haʼe haguégui: Aguereko ambue ovecha ndahaʼéiva ko rredilpegua; umívape che agueruvaʼerã avei, ha ohendúta hikuái che ñeʼẽ; ha oĩta peteĩ ovechaʼaty, ha peteĩ ovecharerekua.

22 Ha nacheikũmbýikuri hikuái, oimoʼãgui haʼeha umi gentil; noikũmbýigui hikuái gentil-kuéra oñekonvertitaha iñehekomboʼekuéra rupi.

23 Ni nacheikũmbýi hikuái haʼérõ ohendutaha hikuái che ñeʼẽ; ha noikũmbýi hikuái gentil-kuéra arakaʼeve nohendumoʼãiha che ñeʼẽ—ha ndajehechaukamoʼãiha chupekuéra ndahaʼéiramo Espíritu Santo rupive.

24 Ha katu péina ápe, peẽ pehendu che ñeʼẽ, ha avei cherechákuri; ha haʼe che ovecha, ha pejeipapa umi Túva omeʼẽvaʼekue chéve apytépe.