Upoko 25
Hei te Haerenga Tuaruatanga Mai, ka tahuna te hunga whakakake me te hunga kino anō nei he kakau wīti—Ka hoki mai a Irāia i mua i taua rā nui whakawehi—Whakatauritetia a Maraki 4. Takiwā T.A. 34.
1 Nana rā, e tata mai ana te rā e rite ai tōna ngiha ki tō te umu; ā, ko te hunga whakakake katoa, āe rā, ko te hunga katoa e mahi kino ana, ka rite ki te kakau wīti; ā, e tata mai ana te rā e tahuna ake ai rātou, e ai tā te Ariki o ngā Mano, nā, e kore noa iho he pakiaka, he manga rānei e mahue ai ki a rātou.
2 Engari ki a koutou te hunga e wehi nei i tōku ingoa, ka mairanga ake te Tama a te Tika, he whakaora mate anō i runga i ōna parirau; ā, ka haere ake koutou, ā, ka tupu ake anō nei he kūao kau i te tūranga kau.
3 Ā, ka takahia iho te hunga kino e koutou; nā te mea ka rite rātou ki ngā pungarehu i raro i ngā kapu o ō koutou waewae i te rā e mahi ai ahau i tēnei mea, e ai tā te Ariki o ngā Mano.
4 Kia mahara koutou ki te ture a Mohi, taku pononga, nāku noa ia i whakahau i Horepa mō Iharaira katoa, ki ngā tikanga, ki ngā whakawākanga hoki.
5 Nana, ka tono atu au i a Irāia te poropiti ki a koutou i mua i te rā nui whakawehi o te Ariki;
6 Ā, māna e whakatahuri te ngākau o ngā tūpuna ki ngā tamariki, me te ngākau o ngā tamariki ki ō rātou tūpuna, kei haere mai au me te patu i te whenua ki tētahi kanga.