1 Na em i kamap we bihain Jisas autim ol dispela toktok, em i bin tok long wanwan long ol disaipel bilong em, na askim ol olsem: Yupela laikim wanem samting long mi, bihain long mi go antap long Papa?

2 Na olgeta i tok, tasol i no tripela, olsem: Mipela laikim olsem bihain long mipela i stap i go long krismas bilong mipela olsem ol man stret, na ministri bilong mipela, long em yu bin makim mipela bai pinis, inap mipela bai kam hariap tru long yu insait long kingdom bilong yu.

3 Na em i tokim ol: Bles yu, bikos yupela laikim ol dispela samting long mi, olsem na, bihain krismas bilong yupela i sevenpela ten tu, yupela bai kam long mi insait long kingdom bilong mi, na yupela bai painim malolo wantaim mi.

4 Na bihain em i toktok long ol, em tanim em yet long ol tripela, na askim ol: Yupela laikim wanem mi bai wokim long yupela, bihain mi go antap long Papa?

5 Na ol i sore insait long bel bilong ol, bikos ol poret long askim em long samting em ol i laikim.

6 Na em i tokim ol: Lukim, mi save tingting bilong yupela, na yupela laikim samting em Jon, mi lavim, em i bin wok wantaim mi long ministri bilong mi i laikim long mi, bipo long ol lain bilong Juda ol i bin apim mi.

7 Olsem na, bles yu moa yet, bikos yupela bai i no inap idai, tasol yupela bai i stap laip long lukim olgeta samting Papa bai wokim long ol lain pikinini bilong ol man, i go inap long olgeta samting bai kamap tru olsem long laik bilong Papa, na mi bai kam long glori bilong mi wantaim olgeta pawa bilong heven long dispela taim.

8 Na yupela bai i no inap kisim ol pen bilong idai, tasol yupela bai senis long laip bilong idai i go long laip oltaim wankain olsem ai save opopas, taim mi kam long glori bilong mi, na bihain long dispela, yupela bai kisim blesin insait long kingdom bilong Papa bilong mi.

9 Na gen, yupela bai i no inap kisim pen na sore taim yupela i stap long skin, tasol long ol sin bilong graun, na mi bai wokim olgeta long dispela bikos long dispela samting we yupela i bin laikim long mi, long wanem, yupela laikim olsem yu bai bringim sol bilong ol man long mi, taim graun bai i stap.

10 Na yupela bai amamas nogut tru bikos long dispela, na yupela bai sindaun insait long kingdom bilong Papa bilong mi, ye, yupela bai amamas nogut tru, wankain olsem Papa i bin givim mi bikpela amamas tru, na yupela bai kamap wankain olsem mi, na mi wankain olsem Papa, na Papa wantaim mi i wanpela,

11 Na Holi Spirit i witnes long Papa na mi, na Papa i givim Holi Spirit long ol lain pikinini bilong man, bikos long mi.

12 Na em i kamap we bihain Jisas autim ol dispela toktok, em tasim wanwan long ol wantaim pinga bilong em, tasol em i no tasim ol tripela ol bai weit, na em i bin go bihain long dispela.

13 Na lukim, ol heven i op, na ol tripela i bin go antap long heven, na ol i lukim na harim ol samting i no inap long toktok.

14 Na ol i bin tambu long toktok, na tu pawa i no bin givim long ol long autim ol samting em ol i bin lukim na harim,

15 Na ol i no inap tok sapos ol i bin i stap long bodi o go aut long bodi, long wanem, ol lukim olsem ol i bin senis, inap long ol i bin senis long dispela bodi bilong skin i go long bodi bilong oltaim, olsem na ol i bin lukim ol samting bilong God.

16 Tasol em i kamap we ol minista gen long pes bilong graun, tasol ol i no minista long ol samting em ol i bin harim na lukim, bikos long lo em i bin givim long ol long heven.

17 Na nau, sapos ol i bin i stap long bodi bilong skin, o long bodi bilong oltaim, long de ol i senis, mi no save,

18 Tasol, mipela save long rekot em i bin givim olsem—ol i bin go long pes bilong graun, na minista long olgeta pipol, bungim wantaim planti long sios ol bai bilip long toktok bilong ol, na baptaisim ol, na planti ol i bin baptais na bin kisim Holi Spirit.

19 Na ol lain ol i no memba long sios ol i bin tromoim ol i go insait long kalabus. Na ol haus kalabus i no inap long kipim ol, bikos ol i bin brukim long namel.

20 Na ol i bin tromoi ol i go insait long hul, tasol ol i bin paitim graun wantaim toktok bilong God, na pawa bilong God i bin rausim ol aninit long graun, olsem na ol i no inap dikim bikpela hul tru long kipim ol.

21 Na ol i bin tromoi ol i go insait long paia i tuhat tripela taim na ol i no bin kisim bagarap.

22 Na ol i bin tromoi ol i go insait long ples bilong ol wail animal, tupela taim na lukim, ol pilai wantaim ol animal wankain olsem wanpela liklik pikinini pilai wantaim wanpela pikinini sipsip em i save dring susu, na ol i no kisim bagarap.

23 Na em i kamap we ol i bin go namel long olgeta pipol bilong Nifai, na autim gutnius bilong Jisas Krais long olgeta pipol long pes bilong graun, na ol i bin tanim bel long Bikpela, na bung wantaim long sios bilong Krais, olsem na ol pipol long dispela jeneresen ol i bin kisim blesin, olsem Jisas i bin tok.

24 Na nau, mi, Momon, pinisim toktok long ol dispela samting long liklik taim.

25 Lukim, klostu mi raitim nem bilong ol lain ol bai i no inap idai, tasol Bikpela i tambuim, olsem na, mi no inap raitim nem bilong ol, long wanem, ol i bin hait long ol pipol bilong graun.

26 Tasol lukim, mi bin lukim ol, na ol minista long mi.

27 Na lukim, ol bai i stap namel long ol lain bilong Jentail, na ol lain bilong Jentail bai ol i no inap save long ol.

28 Na tu ol bai i stap namel long ol lain bilong Juda, na ol lain bilong Juda bai ol i no inap save long ol.

29 Na em bai kamap we, taim Bikpela i lukim i orait long Bikpela save bilong em olsem ol bai minista long olgeta hauslain bilong Israel ol i bin go nabaut, na long olgeta nesen, hauslain, tok ples na pipol, na bai bringim planti sol namel long Krais, inap long laik bilong ol bai kamap tru, na tu bikos long pawa long winim bel bilong God em i i stap wantaim ol.

30 Na ol wok wankain olsem ol ensel bilong God, na sapos ol beten long Papa long nem bilong Jisas, ol i ken soim ol yet long husat man ol i laikim.

31 Olsem na, ol bai wokim bikpela na gutpela ol wok tru, bipo long bikpela de tru bai kam, we olgeta pipol mas trutru sanap long pes bilong jasmen-sia bilong Krais,

32 Ye, tru tumas, ol bai wokim bikpela na gutpela wok tru namel long ol lain bilong Jentail, bipo long dispela jasmen de.

33 Na sapos yupela gat olgeta skripsa em i gat stori long olgeta gutpela wok tru bilong Krais, yu bai save olsem ol dispela samting mas kamap trutru, olsem Krais i bin tok.

34 Na wo long man em bai i no inap harim ol toktok bilong Jisas wantaim ol lain we em i bin makim na salim namel long ol, long wanem, man em i no kisim ol toktok bilong Jisas wantaim ol lain we em i salim, i no kisim em, olsem na em bai i no inap kisim ol long las de,

35 Na em bai moa beta long em, sapos em ol i no bin karim em. Bikos yu ting olsem yu ken rausim stretpela pasin bilong God em i no amamas, we ol man i bin kurungutim antap wantaim lek bilong ol, olsem selvesen bai kam long dispela we?

36 Na nau lukim, olsem mi bin tok long ol lain em Bikpela i bin makim, ye, tru tumas, ol tripela disaipel em ol i bin karim ol i go antap long heven, olsem mi no save sapos ol i bin kamap klin long skin bilong idai long kisim skin bilong oltaim—

37 Tasol lukim, mi bin askim Bikpela long taim mi rait, na em i soim long mi olsem senis mas kamap long bodi bilong ol, sapos nogat, ol i mas idai,

38 Olsem na, wanpela senis i bin kamap long bodi bilong ol, olsem ol bai i no inap idai, olsem ol bai i no inap kisim pen, o sore, tasol olsem ol bai sore long sin bilong ol pipol bilong graun.

39 Nau dispela senis i no wankain olsem senis em bai kamap long las de, tasol wanpela senis i bin kamap long ol, inap long Satan i nogat pawa long bosim ol, olsem em bai i no inap traim ol, na ol i bin mekim kamap holi long skin, olsem na ol i kamap holi, inap long ol pawa bilong graun i no inap, pasim ol.

40 Na ol bai i stap long dispela laip i go inap long jasmen de bilong Krais, na ol bai kisim bikpela senis moa long dispela de, na long go insait long kingdom bilong Papa na i no moa go aut, tasol long i stap wantaim God long oltaim antap long ol heven.