1 Tan natan agawa ya amin a totoo na Nephite so amawil ed saray dili a dalin da sanen komaduamplo tan anem a taon, balang sakey a laki, kaiba to so boleg to, saray manok tan saray ayayep to, saray kabayo tan baka to, tan amin a beñgatla a kayarian da.

2 Tan agawa ya ag da naupot ya amin so saray tagano ra; dia ed ontan inawit da so saray kera ya ag da naakan, amin a dawa ra ed nambabañgil a nengneng, tan saray balitok da, tan pilak da, tan amin a beñgatla a mabli ed sikara, tan sikara so amawil ed saray dili a dalin da tan saray kayarian da, mandapag dia ed baybay tan abalaten, mandapag dia ed dalin a mamabaybay tan dalin a mamaabalaten.

3 Tan initer da ed saray matatakew a linmoob ed paknaan a pansiansiaen da so kareenan ed dalin, saraman so nampilalek a mansiansia a Lamanite, na dalin, unong ed bilang da, pian nawalaan ira, dia ed sagpot da, na pambilay da; tan dia ed onia niletneg da so kareenan ed amin a dalin.

4 Tan ginmapo ra lamet ya onaliguas tan ondakel, tan say komaduamplo tan anem tan pito a taon so linmabas, tan wala so mapalalo ya uksoy ed dalin; tan nangawa ra na saray gangan da unong ed pampapara tan kaptekan.

5 Tan natan angapo so beñgatla ed lapag na dalin so akasebel ed saray totoo ed intuloy da ya inmaliguas, likud no sikara so napelag ed kasalanan.

6 Tan natan si Gidgiddoni, tan say okom, a si Lachoneus, tan saraman so aturo a pañgulo, so añgiletneg na saya a baleg a kareenan ed dalin.

7 Tan agawa dakel a ciudad so niletneg a balo, tan dakel so ciudad a daan so naapiger da.

8 Tan wala so dakel a maawang a karsada so niletneg da, tan dakel a karsada so ginawa ra, ya onarap ed sakey a ciudad ya anga ed sananey a ciudad, tan manlapu ed sakey a dalin paarap ed sananey a dalin, tan manlapu ed sakey a pasen ya onla ed sananey a pasen.

9 Tan dia ed onia linmabas so komaduamplo tan walo a taon, tan saray totoo awalaan ira na nampatuloy a kareenan.

10 Balet agawa ed komaduamplo tan siam a taon wala so ginmapo a baliñgaan ed limog na saray totoo; tan saray arum inmatagey ira ed kinon tan panagpasirayew lapu ed mapalalo a kayamanan da, on, angan nipaakar ed baleg a panagpasegsegang;

11 Lapu ed dakel so managtagilako ed saman a dalin, tan ontan met dakel so abogado, tan dakel so saray manañgipañgulo.

12 Tan saray totoo ginapoan da so olop ed panagbilay, unong ed kayamanan da tan say pankanawnawa ra a manaral; on, saray arum angapo so aral da lapu ed inkaduka ra, tan saray arum so akagamor ira na atagey ya aral makaseñgeg ed kayamanan da.

13 Saray arum so nipaatagey ed kinon, tan saray arum mapalalo a mapaabeba; saray arum ibales da so ampait a panagsalita, bangbalet saray arum awaten da so ampait a panagsalita tan panagpasegsegang tan amin a nengneng na panagpairap, tan ag ira ombales tan maninsulto lamet, balet sikara so mapaabeba tan peteg a nambabawi ed arap na Dios.

14 Tan dia ed onia wala so baleg a panduromaan na saray totoo ed dalin, dia ed onia say simbaan ginmapo a nasian; on, dia ed onia ed komatalumplo a taon say simbaan so nansisian ed amin a dalin likud ed limog na pigara a Lamanite ya apasimbalo ed matua a pananisia; tan sikara so ag onalis ed saya, lapu ed sikara so malet, tan ag-nagiing, tan ag-nagalaw, a siaabuloy ed amin a seet a manumpal ed saray gangan na Katawan.

15 Natan say señgegan na saya a karelmeñgan na saray totoo so saya—si Satanas awalaan na baleg a pakapanyari, ed pamagalaw to ed saray totoo a mangawa na amin a kanengneñgan na karelmeñgan, tan ed pamaatagey to ed sikara ed kinon, a sikara so tinukso to a mananap na pakapanyari, tan pakaoley, tan kayamanan, tan saray beñgatla ya andi-kakanaan ed mundo.

16 Tan dia ed onia si Satanas inwanwan to ya inarawi so saray puso na saray totoo a mangawa na amin a kanengneñgan na karelmeñgan; dia ed ontan sikara so nangayaga ed kareenan ed pigara labat a taon.

17 Tan dia ed onia, dia ed ingapo na komatalumplo a taon—saray totoo lapu ed sikara so nilaban ed loob na andukey a panaon a sikara so alibit ed panamegley na tukso na demonyo ed antokaman a pilalek to a pañgawitan ed sikara, tan mangawa na antokaman a karelmeñgan a pilalek to a gawaen da—tan dia ed onia dia ed ingapo na saya, a komatalumplo a taon, sikara so wala ed kipapasen na makapataktakot a karelmeñgan.

18 Natan sikara so ag nankasalanan ya angapo so kakabatan da, lapu ed sipor la a kabat da so linawa na Dios nipaakar ed sikara, lapu ed saya so nibañgat la ed sikara; dia ed ontan sikara so bulos-linawa ya inmalsa sumpa ed Dios.

19 Tan natan dia ed saray agew nen Lachoneus, say laki ya anak nen Lachoneus, lapu ed si Lachoneus so inmirong ed yuroñgan nen ama to tan sikato so nanoley ed saray totoo ed saman a taon.

20 Tan wala so saray totoo a ginmapo a mañgawat na puyan manlapu ed tawen tan nibaki, a tinmalindeg ed limog na saray totoo ed amin a dalin, a sikara so nampupulong tan nampapaneknek ya andi-takot nipaakar ed kasalanan tan karelmeñgan na saray totoo, tan papaneknekan da ed sikara so nipaakar ed pananundon a gawaen na Katawan ed saray totoo to, odino dia ed sananey a salita, say kioli nen Cristo ed bilay; tan sikara so nampaneknek ya andi-takot nipaakar ed ipatey tan saray panirap to.

21 Natan dakel ed saray totoo a mapalalo so pasnok da lapu ed saraman so nampaneknek ed saraya a beñgatla; tan saraman so maslak a nampasnok ed sikara so pañgulo ya okom, tan saraman so atagey a sacerdote tan saray abogado; on, amin ya abogado so nampasnok ed saraman so nampaneknek ed saraya a beñgatla.

22 Natan angapo so siopaman ya abogado odino okom odino atagey a sacerdote so walaan na pakapanyari a mañgiter na tutol ed siopaman ed patey likud no say tutol da so pinirmaan na gobernador na dalin.

23 Natan dakel ed saraman so nampaneknek ed saray beñgatla nipaakar ed si Cristo so nampaneknek ya andi-takot, so inerel da tan pinatey a maamot na saray okom, dia ed saya say kakabatan na impamatey ed sikara so ag sinmabi ed gobernador na dalin anga ed kayari na impatey da.

24 Natan nia, saya so sumlang ed gangan ed dalin, a siopaman a too so ag-nayari a pateyen likud no awalaan ira na pakapanyari a nanlapu ed gobernador na dalin—

25 Dia ed ontan sakey a dalem so sinmabi ed dalin na Zarahemla, dia ed gobernador na dalin, sumpa ed saraman so okom a nantutol ed saray profeta na Katawan ya impapatey da, ya aliwa ya unong ed gangan.

26 Natan agawa a sikara so inala ra tan inawit ed arap na okom, pian sikara so natutolan ed saray kasalanan a ginawa ra, unong ed gangan ya initer na saray totoo.

27 Natan agawa a saraman ya okom dakel so saray kakaaro ra tan kakanayon da; tan saray nakdaan, on, angan ñgalñgali ya amin ya abogado tan atagey a sacerdote, so nantitipon a nanoolop ed inkasikara a dili, tan akikasakey ira ed saray kakanayon na saraman so okom a salaysayen unong ed gangan.

28 Tan sikara so linmoob ed sakey a paknaan ed sakey tan sakey, on, angan ed saman a paknaan a niiter nen saman a panaon, a saya a paknaan so niiter tan tatalimaen na demonyo, a mikasakey sumpa ed amin ya inkamatunong.

29 Dia ed ontan sikara so nankakasakey sumpa ed saray totoo na Katawan, tan sikara so linmoob ed sakey a paknaan a deralen da ra, tan iligyas da so saraman so nankasalanan ed impamatey ed bemben na kaptekan, a ñgalñgali la ra natutolan unong ed gangan.

30 Tan ingetar da so ag-pañgitaltalek ed gangan tan pankatunoñgan na bansa ra; tan sikara so akipaknaan ed sakey tan sakey a deralen da so gobernador, tan ipatalindeg da so sakey ya ari ed saman a dalin, tan saman a dalin so naandian la na kawayañgan balet kaukolan oleyan na arari.