1 Tan natan agawa a kayari a saray totoo nen Ammon so niletneg ed dalin na Jershon, tan sakey a simbaan so inletneg met ed dalin na Jershon, tan saray ñgayew na Nephite so nilira ed kaliber-liber na Jershon, on, dia ed amin a ketegan ed kaliber-liber na dalin na Zarahemla; nia saray ñgayew na Lamanite tinumbok da so saray kaagian da ed kalawakan.

2 Tan dia ed onia wala so agawa a makapataktakot a bakal; on, angan angapo ni so mipara a kabat na saray totoo nanlapu ed saman so panaon ya intaynan nen Lehi ed Jerusalem; on, tan asamplora a nilibo so inaatey ed saray Lamanite tan sikara so ataytayak ed dakel a pasen.

3 On, tan wala met so dakerakel ya inaatey ed limog na saray totoo nen Nephi; angaman ontan, saray Lamanite so asunson tan nitaytayak, tan saray totoo nen Nephi so amawil lamet ed dalin da.

4 Tan natan saya so panaon ya inkiwala na baleg ya ermen tan pannañgis ya areñgel ed amin a pasen na dalin, ed limog na amin a totoo nen Nephi—

5 On, say akis na saray balo a bibii ed ermen da ed saray asawa ra a laki, tan ontan met ed kaamaan ed ermen da ed saray lalaki ya anak da, tan say bii ya anak ed agi to a laki, on, say laki ya agi ed ama to; tan dia ed saya say akis na ermen so nadñgel ed amin a limog da, ed ermen da ed saray kakanayon da ya inatey.

6 Tan natan peteg a saya so sakey a maermen ya agew; on, sakey a panaon a masimuon, tan sakey a panaon na dakel a panagayuno tan pikakasi.

7 Tan dia ed onia so impansampot na komalabinlima a taon ya oley na saray okom ed saray totoo nen Nephi;

8 Tan saya so kasulatan nen Ammon tan saray kaagian to, saray impambaroy da ed dalin na Nephi, saray impanirap da ed saman a dalin, saray ermen da, tan saray kairapan da, tan say ag-natebek a gayaga ra, tan say impañgawat tan ag nasigen a kipapasen na saray kaagian da ed dalin na Jershon. Tan natan komon say Katawan, a Mananundon na amin a totoo, binendicionan to so saray kamarerua ra ed ando la ya ando.

9 Tan saya so kasulatan na saray bakal tan baliñgaan ed limog na saray Nephite, tan ontan met ed saray bakal ed baetan na saray Nephite tan Lamanite; tan say komalabinlima a taon ya oley na saray okom so nansampot.

10 Tan nanlapu ed unaan a taon ya anga ed komalabinlima apalabas so inkaderal na dakel a nilibo a bilay; on, saya so añgawit na makapataktakot a nengneng na impamaterter na dala.

11 Tan saray bangkay na dakel a nilibo so akarukol ed dalin, legan a saray bangkay na dakel a nilibo so natetemek ya akalusbo ed tapew na dalin; on, tan dakel a nilibo so maneermen ed inkabalang na saray kakanayon da, say makaseñgeg wala so rason da ya ontakot, unong ed saray sipan na Katawan, lapu ed sikara so nigena ed kipapasen na andi-angaan ya kaermenan.

12 Legan a dakel a nilibo so peteg a maneermen ed inkabalang na saray kakanayon da, iñgen sikara so nangayaga tan nipatagey ed ilalo, tan iñgen sikakabat ira, unong ed saray sipan na Katawan, a sikara so ombañgon a manayam ed nikawanan a lima na Dios, ed kipapasen na angapo so kasampotan a liket.

13 Tan dia ed onia anengneng tayo no panon so ag-pampapara na too lapu ed kasalanan tan kasosumpa, tan say pakapanyari na demonyo, a manlalapu ed saray plano na kasiliban a ginawa to pian nakalotan to so saray puso na totoo.

14 Tan dia ed onia anengneng tayo so malaglaem a kerew na seet ed saray totoo a mansagpot ed saray kaolivaan na Katawan; tan dia ed onia anengneng tayo so baleg a rason na panermen, tan ontan met na pangayaga—ermen lapu ed patey tan kaderal ed limog na saray totoo, tan gayaga lapu ed liwawa nen Cristo onkana ed bilay.