1 At ngeni, anak ku, anggiyang makananu mu atin ku pang mas dakal a sabian keka kesa keng nanumang sinabi ku keng kekang kapatad; uling lawan, emu wari apansin ing katatagan na ning kekang kapatad, ing keang katapatan, ing keang pamagsikap king pamamintu karing kautusan na ning Dios? Lawan, e ya wari miniye mayap a alimbawa keka?

2 Uling emo masyadung pekiamdaman deng kanakung amanu, anti ing gewa ning kekang kapatad, busal ding tau da ring Zoramite. Ngeni oini ing kaku laban keka; ika sindu mu ing pamagyabang keng sikanan mu at keng kekang kabiasnan.

3 At aliwa pa ngan ini, anak ku. Ika gewa mu itang makalungkut kanaku; uling likuan me ing tungkulan ning pamanaral, at minta ka king gabun na ning Siron karing angganan da ring Lamanite, king pamanuki king babaing marok a Isabel?

4 Wa, dakal ya ayamuyut a pusu karing keraklan; dapot iti eya sangkan para keka, anak ku. Dapat sana magsilbi ka king pamanibalang pigkatiwala da keka.

5 Emu wari balu, anak ku, a ding bage a reni makasumami la king panimanman na ning Guinu; wa, pekamakasumami kareng anggang kasalanan maliban mu keng pamagpatulu keng alang male daya o pamagtanggi keng Banal a Espiritu?

6 Uling lawan, nung tanggian me ing Banal a Espiritu a misan mika lugal ya keka at balu mu a tatanggian me, lawan, iti metung yang kasalanan a alang kapatawaran, wa, at ninuman ing makamate laban king sala at beluan king Dios, e mayan para kea ing manikuang kapatawaran; wa, sasabian ku keka, anak ku, a e mayan para kea ing manikuang metung a kapatawaran.

7 At ngeni, anak ku aduan ku king Dios a ika eka mikasalang makanian a karagul a kasalanan. Eku banggitan ing kekang kasalanan, para sugatan ing kekang kaladua, nung e iti para keng kekang kayapan.

8 Dapot lawan, emu asalikut ing kasalanan mu king Dios; at nung eka sumisi deti talakad la bilang patutu laban keka king tauling aldo.

9 Ngeni anak ku, buri ku sumisi ka at gulutan mo ring kekang kasalanan, at emu na tutukian ing marok a kapagnasan da ring kekang mata, dapot idayu me ing sarili mu kareng anggang bage a reni, uling nung emu gawan ini, king nanu mang paralan eme amana ing kayarian na ning Dios. O, ganakan, at ibili keng lub mu, at idayu me ing sarili mu kareng bage a reti.

10 At iutus ku keka ing ibili mu keng lub mu ing maniawad kang payu kareng kapatad mung makatua king nanumang gagawan mu; uling lawan, atiu ka keng kayanakan at kailangan kang masese kareng kekang kapatad. At makiramdam ka kareng karelang payu.

11 Emu paburen ing sarili mung mitake king nanumang alang ulaga o kalokuan a bage; emu paburen a ing demonyu itake neng pasibayu ing pusu mu tataluki karing mangarok a babai. Lawan, O anak ku, nung no anti karagul ing kasalanan a dela mu karing Zoramite; uling anyang akit da ing ugali mu eno meniwala karing amanu ku.

12 At ngeni ing Espiritu ning Guinu sasabian na kanaku: Utusan mo ring anak mung gawang mayap, nung ali atake do ring pusu da ring dakal a tau king kasiran; uli na nini utusan da ka, anak ku, king takut king Dios, ing tuknang ka keng kekang karokan.

13 A mibalik ka king Guinu king mabilug mung kaisipan, kagiwan, at sikanan; a emo tatake ding pusu da ring dakal a tau para gawang kasalanan; dapot mibalik ka karela at kilalanan mu ing kekang pamikasala at pamagkamaling kekang gewa.

14 Eka magnasa king pibandian o king alang kuwentang bage na nining tau king yatu; uling lawan, emo adala potang mate ka.

15 At ngeni, anak ku, atin kung sabian keka agpang king pamaniatang nang Cristo. Lawan, sasabian ku kekayu, a siguradung datang ya para ilako na ing kasalanan ning tau king yatu; wa, datang ya para sabian na ing masayang balita ning kaligtasan karing keang tau.

16 At ngeni, anak ku, iti yang pamanibala nung nukarin meyaus ka, para sabian la dening masayang balita karening tau, para isadia do reng karelang kaisipan; o bang ing kaligtasan datang ya karela, bang asadia do ring kaisipan da ring anak da para makiramdam king amanu king oras ning keang pamaniatang.

17 At ngeni, painawan ke ing isip mu anggiyang makananu mu keng paksang ini. Lawan, magtaka ka nung bakit deng bage a reni dapat lang mabalu keta pang minuna. Dapot lawan, sasabian ku keka, e wari ing metung a kaladua keng panaun a iti kasing ulaga ne keng Dios ning metung a kaladua king panaun ning keang pamaniatang?

18 E wari kasing kailangan ya a ing planu ning pamanatbus mipabalu ya karing tau antimu rin kareng karelang anak?

19 E wari mas mayan kening panaun a ini para keng Guinu ing tuburan ne ing keang anghel para sabian na ining masayang balita kekatamu anti kareng kekatamung anak, o anti kaibat ning keang pamaniatang?