1 Natan anak ko, wala ni so labay ko ya ibaga ed sika; lapu ed apatnagan ko a say kanunotan mo so nagugulo nipaakar ed kioli ed bilay na saray inaatey.

2 Nia, ikuan ko ed sika, ya angapo so kioli ed bilay—odino, say labay ko ya ibaga, dia ed sananey a salita, a saya ya ompatey a laman ag to isulong so ag-ompatey a laman, saya a nabulok a laman ag to isulong so ag-nabulok a laman—anga ed kayari na isabi nen Cristo.

3 Nia, awiten to so kagawa na kioli ed bilay na saray inaatey. Balet nia, anak ko, say kioli ed bilay so aliwa ni a natan. Natan, ipakabat ko ed sika so sakey a misterio; manwari ya ontan, dakel ni so saray misterio ya akaamot, ya angapo so angan sakey a makapikabat ed saraya likud ed Dios a dili labat. Balet ipanengneng ko ed sika so sakey a beñgatla a saya so nanseetan ko ya intepet ed Dios pian nakabatan ko—a saya say nipaakar ed kioli ed bilay.

4 Nia, wala so sakey a panaon a nigena pian amin so ompaway manlapu ed saray inaatey. Natan no kapigan onsabi so saya a panaon angapo so makapikabat; balet say Dios kabat to so panaon a nigena.

5 Natan, no bilang wala so sakey a panaon, odino komadua a panaon, odino komatlo a panaon, a saray totoo so ombañgon manlapu ed saray inaatey, andi bali la; lapu ed say Dios kabat to ya amin so saraya a beñgatla; tan magenap la ed siak so pikabat ko ya onia so kipapasen to—a wala so sakey a panaon a nigena pian amin so ombañgon manlapu ed saray inaatey.

6 Natan kaukolan wala so sakey a baetan na panaon na patey tan panaon na kioli ed bilay.

7 Tan natan siak so ontepet no anto so pansumpalan na saray kamarerua na totoo manlapu ed saya a panaon na patey ya anga ed panaon a nigena a kioli ed bilay?

8 Natan no wala bilang so dakel ni nen sakey a panaon a nigena ed saray totoo ya ombañgon ag la makana; lapu ed amin ag ompatey a mamimpinsan, tan saya ag la makana; tan amin siñga saksakey ya agew ed Dios, tan say panaon so susukaten labat dia ed saray totoo.

9 Dia ed ontan, wala so sakey a panaon a nigena ed saray totoo pian sikara so ombañgon manlapu ed saray inaatey; tan wala so sakey a baetan na panaon na patey tan say kioli ed bilay. Tan natan, nipaakar ed saya a baetan na panaon, no anto so pansumpalan na saray kamarerua na saray totoo saya so beñgatla ya intepet ko a siseseet ed Katawan a kabaten; tan saya so beñgatla ya akabatan ko.

10 Tan sano say panaon onsabi ya amin so ombañgon, dia ed ontan nakabatan da la a say Dios kabat to so amin a panaon a nigena ed too.

11 Natan, nipaakar ed kipapasen na kamarerua ed baetan na patey tan say kioli ed bilay—Nia, saya so impakabat ed siak na sakey ya angel, saray espiritu na amin a totoo, a tampol dia ed isian to ed saya ya ompatey a laman, on, saray espiritu na amin a totoo, balang la ed sikara so maong odino mauges, so niakar ed panaayaman na saya a Dios ya añgiter ed sikara na bilay.

12 Tan dia ed ontan nagawa, saray espiritu na matunong so naawat ed sakey a pasen na liket, a saya so tatawagen na paraiso, sakey a pasen na painawaan, sakey a pasen na kareenan, no iner sikara so mampainawa ed amin a gonigon tan amin a kapagaan, tan ermen.

13 Tan dia ed saya nagawa, saray espiritu na marelmeng, on, sikara a mauges—tan nia, angapo so biang da odino pibiang da ed Espiritu na Katawan; tan nia, pinili ra so mauges a kimey nen say maong; dia ed ontan say espiritu na demonyo so linmoob ed sikara, tan kinayarian to so laman da—tan saraya so ibantak ed paway a kabiluñgetan; diman wala so paniñgel, tan dageyem, tan panñgalateñget na ñgipen, tan saya lapu ed saray dili a karelmeñgan da, lapu ed sikara so adakep ed linawa na demonyo.

14 Natan saya so kipapasen na saray kamarerua na marelmeng, on, dia ed kabiluñgetan, tan pasen a makapataktakot, makapataktakot a nengneñgen so manliob a maalipanes a sanok na Dios ed sikara; dia ed onia sikara so mansiansia ed saya a kipapasen, a siñga saray matunong dia ed paraiso, ya anga ed panaon na kioli ra ed bilay.

15 Natan, wala so arum ya akatalus ed saya a kipapasen na liket tan ed saya a kipapasen na ermen na kamarerua, sakbay na kioli ed bilay, so unaan a kioli ed bilay. On, birbiren ko a nayari a tawagen so saya a kioli ed bilay, say ibañgon na espiritu odino say kamarerua tan say kipasen da ed liket odino ermen, unong ed saray salita a saraya so nibalikas la.

16 Tan nia, lamet asalita la, a wala so unaan a kioli ed bilay, sakey a kioli ed bilay na amin ed sikara nen saman, odino sikara natan, odino sikara naani, a mampaleksab anga ed kioli ed bilay nen Cristo manlapu ed saray inaatey.

17 Natan, ag tayo ipapasen a saya ya unaan a kioli ed bilay, a saya so asalita ed saya a kanengneñgan, saya la so kioli ed bilay na saray kamarerua tan say kipasen da ed liket odino ermen. Ag yo nayarian ya ipasen a saya so kabaliksan to.

18 Nia, ikuan ko ed sika, Andi; balet say kabaliksan to so pantekep na kamarerua tan laman, na saraman so manlapu ed saray agew nen Adan ya anga ed kioli nen Cristo ed bilay.

19 Natan, no bilang saray kamarerua tan saray laman na saraman so asalita la so mantekep ya amin a mamimpinsan, saray marelmeng ontan met na saray matunong, ag ko ya nibaga; magenap la, ya ibagak a sikara so onsabi; odino dia ed sananey a salita, say kioli da ed bilay so onsabi a nagawa sakbay na kioli ed bilay na saraman so inatey kayari inkioli nen Cristo ed bilay.

20 Natan, anak ko, ag ko ibabaga a say kioli da ed bilay so onsabi no onoli si Cristo; balet nia, saya so iter ko a manlapu ed dili a katunoñgan ko, a saray kamarerua tan saray laman so mantekep, na saray matunong, dia ed kioli nen Cristo ed bilay, tan dia ed intokutok to ed tawen.

21 Balet no bilang saya so bekta a kioli to ed bilay odino kayari, ag ko nibaga; balet masarag la so pañgibagak, a wala so sakey a baetan na patey tan say kioli ed bilay na laman, tan say kipapasen na kamarerua ed liket odino dia ed ermen anga ed panaon ya ingetar na Dios a saray inaatey so ombañgon, tan mantekep lamet, mandapag a kamarerua tan laman, tan sikara so naawit ya ontalindeg ed arap na Dios, tan naokom unong ed saray kimey da.

22 On, saya so mañgawit ed kipawil na saraman so beñgatla a sinalita ed panamegley na sañgi na saray profeta.

23 Say kamarerua so nipawil ed laman, tan say laman ed kamarerua; on, tan balang sakey a taklay tan bikking tan nansuldoñgan so nipawil ed laman; on, angan sakey a buek na ulo so ag nabalang; balet amin a beñgatla so nipawil ed nepeg tan ayadyari ya indeñgan.

24 Tan natan, anak ko, saya so kipawil a sinalita ed panamegley na sañgi na saray profeta—

25 Tan dia ed ontan saray matunong so onsinag ed panarian na Dios.

26 Balet nia, makapataktakot a patey so onsabi ed saray marelmeng; tan sikara so ompatey unong ed saray beñgatla a nipaakar ed inkamatunong; lapu ed sikara so aliwa a malinis, tan angapo so aliwa a malinis a beñgatla so makatawir ed panarian na Dios; balet sikara so ibantak ed paway, tan nigetar a miapag ed saray buñga na saray sagpot da odino saray kimey da, a saraya so mauges; tan sikara so oninum na gaer na ampait a kupa.