1 Pea ko ʻeni naʻe hoko ʻo pehē ʻi he kamataʻanga ʻo hono uofulu mā nima taʻu ʻo e pule ʻa e kau fakamāú ki he kakai ʻo Nīfaí, kuo nau fokotuʻu ʻa e melinó ʻi he vahaʻa ʻo e kakai ʻo Līhaí mo e kakai ʻo Molianitoní ʻo kau ki honau ngaahi fonuá, pea kuo kamata hono uofulu mā nima ʻo e taʻú ʻi he melino;

2 Ka neongo iá, naʻe ʻikai fuoloa ʻenau tauhi maʻu ʻa e melino kakato ʻi he fonuá, he naʻe kamata ke ʻi ai ha fakakikihi ʻi he vahaʻa ʻo e kakaí ʻo kau ki he fakamaau lahi ko Peiholaní; he vakai, naʻe ʻi ai ha niʻihi ʻo e kakaí naʻe loto ke liliu ʻa e ngaahi kupu ʻe niʻihi ʻo e laó.

3 Kae vakai, naʻe ʻikai ke loto ʻa Peiholani ke liliu pe fakangofua hono liliu ʻo e laó; ko ia, naʻe ʻikai te ne tokanga kiate kinautolu naʻe ʻomi honau lotó ʻi heʻenau ngaahi tohi tangi ʻo kau ki he liliu ʻo e laó.

4 Ko ia, ko kinautolu naʻa nau fie liliu ʻa e laó naʻa nau ʻita kiate ia, ʻo nau loto ke ʻoua naʻá ne toe hoko atu ko e fakamaau lahi ki he fonuá; ko ia naʻe tupu ai ha fuʻu fakakikihi lahi ʻo fekauʻaki mo ia, ka naʻe ʻikai iku ia ki he lilingi ʻo e toto.

5 Pea naʻe hoko ʻo pehē ko e faʻahinga naʻe loto ke fakahifo ʻa Peiholani mei he nofoʻanga fakamāú naʻe ui kinautolu ko e kau tangata tuʻí, he naʻa nau loto ke liliu ʻa e laó ʻi ha founga ke veteki ai ʻa e puleʻanga tauʻatāiná pea fokotuʻu ha tuʻi ki he fonuá kotoa.

6 Pea ko e faʻahinga naʻe loto ke hoko atu ʻa Peiholani ʻi heʻene hoko ko e fakamaau lahi ki he fonuá naʻa nau ʻai kiate kinautolu ʻa e hingoa ko e kau tangata tauʻatāiná; pea naʻe pehē ʻa e mavahevahe ʻiate kinautolú, he kuo fakapapau pe fuakava ʻa e kau tangata tauʻatāiná ke tauhi ʻenau ngaahi totonu mo e ngaahi faingamālie ʻo ʻenau lotú ʻi ha puleʻanga tauʻatāina.

7 Pea naʻe hoko ʻo pehē naʻe fakapapauʻi ʻa e meʻa naʻa nau fakakikihi ki aí ʻi he leʻo ʻo e kakaí. Pea naʻe hoko ʻo pehē naʻe fakahā mai ʻa e leʻo ʻo e kakaí ʻo poupouʻi ʻa e kau tangata tauʻatāiná, pea naʻe tauhi ai ʻe Peiholani ʻa e nofoʻanga fakamāú, pea naʻe langaki ai ha fuʻu fiefia ʻi he kāinga ʻo Peiholaní mo e tokolahi foki ʻo e kakai ʻo e tauʻatāiná, ʻa ia naʻa nau ngaohi ʻa e kau tangata tuʻí ke fakalongolongo ʻo ʻikai te nau toʻa ke fakafepaki, ka naʻe pau ke nau poupouʻi ʻa e tuʻunga ʻo e tauʻatāiná.

8 Ko ʻeni ko e faʻahinga ko ia naʻa nau fie maʻu ha ngaahi tuʻí ko e faʻahinga ia naʻe tupu ʻi he haʻa ^amāʻolungá, pea naʻa nau feinga ke hoko ko e ngaahi tuʻí; pea naʻe poupouʻi kinautolu ʻe he faʻahinga ko ia naʻe kumi ki he mālohi mo e mafai ki he kakaí.

9 Kae vakai, ko e taimi fakatuʻutāmaki ʻeni ke ʻi ai ʻa e ngaahi fakakikihi pehē ʻi he kakai ʻo Nīfaí; he vakai, naʻe toe ueʻi hake ʻe ʻAmalekaia ʻa e loto ʻo e kakai ʻo e kau Leimaná ke ʻita ki he kakai ʻo e kau Nīfaí, pea naʻá ne lolotonga tānaki fakataha ha kau tau mei he potu kotoa pē ʻo hono fonuá, ʻo ne fakamahafu ʻa kinautolu, mo teuteu faivelenga lahi ki he tau; he kuó ne ^afuakava ke ne inu ʻa e toto ʻo Molonaí.

10 Kae vakai, te tau vakai naʻe taʻe-fakapotopoto ʻene palōmesi naʻá ne faí, ka neongo iá, naʻá ne teuteu ia mo ʻene kau taú ke ō mai ke tau mo e kau Nīfaí.

11 Ko ʻeni naʻe ʻikai ke tokolahi ʻene kau taú ʻo hangē ko honau tokolahi ʻi muʻá, koeʻuhi ko e ngaahi toko lau afe kuo tāmateʻi ʻi he nima ʻo e kau Nīfaí; pea neongo ʻa e mole lahi ʻiate kinautolú, ka kuo tānaki fakataha ʻe ʻAmalekaia ʻa e fuʻu kau tau tokolahi fakaʻulia, ʻo ʻikai ai te ne manavahē ke ō hifo ki he fonua ko Seilahemalá.

12 ʻIo, naʻa mo ʻAmalekaia naʻá ne ʻalu hifo mo ia, ʻo taki ʻa e kau Leimaná. Pea naʻe hoko ia ʻi hono uofulu mā nima ʻo e taʻu ʻo e pule ʻa e kau fakamāú; pea ko e taimi ia ʻa ia naʻa nau kamata ai ke fakamelino ʻa e ngaahi meʻa ʻo ʻenau ngaahi fakakikihi ʻa ia naʻe kau ki he fakamaau lahi, ko Peiholaní.

13 Pea naʻe hoko ʻo pehē ʻi he fanongo ʻa e kau tangata naʻe ui ko e kau tangata tuʻí ʻoku ō mai ʻa e kau Leimaná ke tauʻi ʻa kinautolú, naʻa nau fiefia ʻi honau lotó; pea naʻa nau fakafisi ke toʻo mahafu, he naʻe lahi fau ʻenau ʻita ki he fakamaau lahí, kae ʻumaʻā foki ki he ^akakai tauʻatāiná, ko ia naʻe ʻikai ai te nau loto ke toʻo mahafu ke tau ʻo maluʻi honau fonuá.

14 Pea naʻe hoko ʻo pehē ʻi he vakai ʻe Molonai ki he meʻa ní, peá ne vakai foki ki he haʻu ʻa e kau Leimaná ki he ngaahi ngataʻanga ʻo e fonuá, naʻá ne fuʻu ʻita ʻaupito koeʻuhi ko e loto-fefeka ʻa e kakai ʻa ia kuó ne ngāue mālohi fau ke maluʻí; ʻio, naʻá ne fuʻu ʻita lahi ʻaupito; naʻe fonu hono laumālié ʻi he ʻita kiate kinautolu.

15 Pea naʻe hoko ʻo pehē naʻá ne ʻoatu ha tohi tangi pea mo e leʻo ʻo e kakaí ki he kōvana ʻo e fonuá, ʻo kole ke ne lau ia, pea tuku mai kiate ia (ko Molonai) ʻa e mālohi ke fakamālohiʻi ʻa e kau angatuʻu ko iá ke nau maluʻi honau fonuá pe ʻe tāmateʻi ʻa kinautolu.

16 He ko e ʻuluaki meʻa naʻá ne tokanga ki aí ke taʻofi ʻa e ngaahi fekeʻikeʻi peheé mo e ngaahi fekeʻikeʻi ʻi he kakaí; he vakai, ko e tupuʻanga ʻeni ʻo honau fakaʻauha ʻi muʻá. Pea naʻe hoko ʻo pehē naʻe fakangofua ia ʻo fakatatau ki he leʻo ʻo e kakaí.

17 Pea naʻe hoko ʻo pehē naʻe fekau ʻe Molonai ke ʻalu atu ʻa ʻene kau taú ʻo tauʻi ʻa e kau tangata tuʻi ko iá, ke holoki hifo ʻenau laukaú mo ʻenau fie ʻeikí, mo tā hifo ʻa kinautolu ki he kelekelé, pea ko e pau ke nau toʻo mahafu ʻo poupouʻi ʻa e tuʻunga ʻo e tauʻatāiná.

18 Pea naʻe hoko ʻo pehē naʻe laka atu ʻa e kau taú ke tauʻi ʻa kinautolu; pea nau fakangata ʻenau laukaú mo ʻenau fie ʻeikí, pea ʻo ka nau ka hiki hake ʻenau mahafu taú ke tau mo e kau tangata ʻa Molonaí, naʻe tā hifo ʻa kinautolu ʻo holoki ki he kelekelé.

19 Pea naʻe hoko ʻo pehē naʻe toko fā afe ʻa e kau ^aangatuʻu ko iá ʻa ia naʻe tā hifo ʻaki ʻa e heletā; pea naʻe ʻave ʻo lī ki he fale fakapōpulá ʻa kinautolu ʻo honau kau taki ko ia naʻe ʻikai ke tāmateʻi ʻi he taú, he naʻe ʻikai ke ʻi ai ha taimi ke fai hanau fakamāuʻi ʻi he vahaʻataimi ko iá.

20 Pea ko hono toe ʻo e kau angatuʻú, naʻe ʻikai te nau fie tuku ke tā hifo ʻa kinautolu ki he kelekelé ʻi he heletaá, ka naʻa nau tukulolo ki he fuka ʻo e tauʻatāiná, pea naʻe fakamālohiʻi ʻa kinautolu ke fusi ʻa e ^afuka ʻo e tauʻatāiná ʻi honau ngaahi tauá, pea ʻi honau ngaahi koló, pea ke nau toʻo mahafu ke maluʻi honau fonuá.

21 Pea ko ia naʻe ikunaʻi ʻe Molonai ʻa e kau tangata tuʻi ko iá, pea naʻe ʻikai ke toe ʻiloa ha toko taha ʻi he hingoa ko e kau tangata tuʻí; pea naʻá ne fakangata pehē ʻa e loto-fefeká mo e loto-hīkisia ʻa e kakai ko ia ʻa ia naʻe lau ko e hako ʻa kinautolu ʻo e houʻeikí; ka naʻe ʻo hifo ʻa kinautolu ke nau fakavaivaiʻi ʻa kinautolu ʻo tatau mo honau kāingá, pea ke nau tau loto-toʻa koeʻuhi ko ʻenau tauʻatāina mei he nofo pōpulá.

22 Vakai, naʻe hoko ʻo pehē ʻi he lolotonga taʻofi peheʻi ʻe ^aMolonai ʻa e ngaahi tau mo e ngaahi fakakikihi ʻi hono kakai ʻoʻoná, pea fakamālohiʻi ʻa kinautolu ke nau nofo ʻi he melino mo e sivilaisé, ʻo ne fokotuʻu ʻa e ngaahi tuʻutuʻuni ke teuteu ki he tau mo e kau Leimaná, vakai, kuo hū mai ʻa e kau Leimaná ki he fonua ko Molonaí, ʻa ia naʻe ʻi he ngaahi ngataʻanga fonua ofi ki he matātahí.

23 Pea naʻe hoko ʻo pehē naʻe ʻikai ke mālohi feʻunga ʻa e kau Nīfai ʻi he kolo ko Molonaí; ko ia naʻe tekeʻi ʻa kinautolu ʻe ʻAmalekaia, ʻo tāmateʻi ʻa e tokolahi. Pea naʻe hoko ʻo pehē naʻe maʻu ʻe ʻAmalekaia ʻa e koló, ʻio, ʻo maʻu honau kolotaú kotoa.

24 Pea ko kinautolu naʻa nau hola mei he kolo ko Molonaí naʻa nau haʻu ki he kolo ko Nīfaihaá; pea naʻe fakataha kotoa mai foki mo e kakai ʻo e kolo ko Līhaí, ʻo fai ʻa e ngaahi teuteu pea naʻa nau mateuteu ke tali ʻa e kau Leimaná ʻi he tau.

25 Ka naʻe hoko ʻo pehē naʻe ʻikai ke fie tuku ʻe ʻAmalekaia ʻa e kau Leimaná ke nau ō ki he kolo ko Nīfaihaá ke tau, ka naʻa ne taʻofi ʻi he veʻe matātahí, ʻo ne tuku ʻa e kau tangata ʻi he kolo kotoa pē ke tauhi mo maluʻi ia.

26 Pea ko ia naʻá ne hoko atu, ʻo maʻu ʻa e ngaahi kolo lahi, ʻa e kolo ko Nīfaihaá, mo e kolo ko Līhaí, mo e kolo ko Molianitoní, mo e kolo ko ʻOmineá, mo e kolo ko Kití, mo e kolo ko Mūlekí, ʻa ia naʻe tuʻu kotoa ʻi he ngaahi ngataʻanga fonua ʻi he hahaké ʻo ofi ki he matātahí.

27 Pea naʻe pehē hono maʻu ʻe he kau Leimaná, ʻi he olopoto ʻa ʻAmalekaiá, ʻa e ngaahi kolo lahi fau, koeʻuhi ko honau fuʻu tokolahi taʻefaʻalauá, ʻa ia kuo ngaohi kotoa pē ke mālohi ʻaupito ʻo hangē ko e anga ʻo e ngaahi ^akolotau ʻa Molonaí; ʻa ia naʻa nau hoko kotoa pē ko e ngaahi kolotau mālohi moʻó e kau Leimaná.

28 Pea naʻe hoko ʻo pehē naʻa nau laka atu ki he ngaahi ngataʻanga ʻo e fonua ko Mahú, ʻo tekeʻi ʻa e kau Nīfaí ki muʻa ʻiate kinautolu mo tāmateʻi ʻa e tokolahi.

29 Ka naʻe hoko ʻo pehē naʻe fakafetaulaki kiate kinautolu ʻa Teanikumi, ʻa ia naʻá ne ^atāmateʻi ʻa Molianitoní, mo taʻofi hono kakaí ʻi heʻenau holá.

30 Pea naʻe hoko ʻo pehē naʻá ne taʻofi foki mo ʻAmalekaia, ʻi heʻene laka atu mo ʻene kau tau tokolahí ke ne maʻu ʻa e fonua ko Mahú, kae ʻumaʻā foki mo e fonua fakatokelaú.

31 Kae vakai, naʻá ne fepaki mo ha loto-mamahi ʻi hono taʻofi ia ʻe Teanikumi mo ʻene kau tangatá, he ko e kau tangata tau mālohi ʻa kinautolu; he ko e tangata tau kotoa pē ʻa Teanikumí naʻa nau mālohi mo poto ange ʻi he taú ʻi he kau Leimaná, ʻo tupu ai ʻenau maʻu ha faingamālie lahi ange ʻi he kau Leimaná.

32 Pea naʻe hoko ʻo pehē naʻa nau toutou ʻohofi ʻa kinautolu, ʻo aʻu ki heʻenau tāmateʻi ʻa kinautolu ʻo aʻu ki he poʻulí. Pea naʻe hoko ʻo e pehē naʻe fokotuʻu ʻe Teanikumi mo ʻene kau tangatá ʻa honau ngaahi fale fehikitakí ʻi he ngaahi ngataʻanga ʻo e fonua ko Mahú; pea naʻe fokotuʻu ʻe ʻAmalekaia ʻa hono ngaahi fale fehikitakí ʻi he ngaahi ngataʻanga fonua ʻi he matātahí, pea naʻe pehē ʻa e anga ʻo honau tulí.

33 Pea naʻe hoko ʻo pehē ʻi heʻene poʻuli hifó, naʻe totolo fakafufū atu ʻa Teanikumi mo ʻene tamaioʻeiki ʻo na ō atu ʻi he poʻulí, pea na hū ki he nofoʻanga tau ʻo ʻAmalekaiá; pea vakai, kuo nau mohe maʻu koeʻuhi ko ʻenau fuʻu ongosia lahi ʻaupito, ʻa ia ko e tupu ʻi he ngaahi ngāué mo e vela ʻo e ʻahó.

34 Pea naʻe hoko ʻo pehē naʻe totolo fakafufū atu ʻa Teanikumi ki he fale fehikitaki ʻo e tuʻí, ʻo veloʻi ha tao ki hono mafú; pea naʻá ne fakatupu ai ʻa e pekia ʻa e tuʻí ʻi he taimi pē ko iá pea ʻikai te ne fakaʻaaki ʻene kau tamaioʻeikí.

35 Peá ne toe foki fakafufū mai ki hono ʻapitanga ʻoʻoná, pea vakai, kuo mohe ʻene kau tangatá, ʻo ne fafangu ʻa kinautolu ʻo fakahā ange kiate kinautolu ʻa e meʻa kotoa pē kuó ne faí.

36 Pea naʻá ne fekau ke tuʻu teuteu ʻene kau taú, naʻa ʻiloange kuo ʻā hake ʻa e kau Leimaná ʻo ʻoho mai kiate kinautolu.

37 Pea naʻe pehē ʻa e ʻosi ʻa hono uofulu mā nima taʻu ʻo e pule ʻa e kau fakamāú ki he kakai ʻo Nīfaí; pea naʻe pehē ʻa e ngata ʻa e ngaahi ʻaho ʻo ʻAmalekaiá.