1 Tan natan agawa dia ed gapo na komaduamplo tan siam a taon na saray okom, si Ammoron nampabaki ed si Moroni a pilalek to so misalatan na saray adakep.

2 Tan agawa a si Moroni so nangayaga a mapalalo ed saya a kerew, lapu ed pilalek to a say tagano ya iiter to a pambilay na saray Lamanite a wala ed pañgawan saya ni so onkana ed saray totoo to a dili; tan pilalek to met so saray dili a totoo to ya onkana ed pamabiskeg na ñgayew to.

3 Natan saray Lamanite dakel so bibii tan ugogaw ya inala ra, tan angapo so angan sakey a bii odino ogaw ed limog na saray adakep nen Moroni, odino ni saray adakep ya inala nen Moroni; dia ed ontan si Moroni ninunot to so sakey a masilib a plano pian naala to so dakel ed saray adakep a Nephite manlapu ed saray Lamanite no nayari.

4 Dia ed ontan sikato so nansulat na sakey a sulat, tan saya so initer to ed panamegley na igagangan nen Ammoron, saman lamlamang so añgawit na sulat ed si Moroni. Natan saraya so salita ya insulat to ed si Ammoron, a nankuan:

5 Nia, Ammoron, nansulat ak ed sika nipaakar ed saya a bakal a sumpa ed saray totook, odino nen agim sumpa ed sikara, tan anga ed natan saya ni so mabiskeg ya itotuloy mo kayari na impatey to.

6 Nia, ibagak ed sika so nipaakar ed kaptekan na Dios, tan say espada na makapanyari a sanok to, a saya so akasabit ed petek mo likud no sika so mambabawi tan ekalen mo so saray ñgayew mo ya ompawil ed dili a dalin yo, odino dia ed dalin a kayarian yo, a saya so dalin na Nephi.

7 On, ibagak ed sika so saraya a beñgatla no nayarian mo so ondeñgel ed saraya; on, ibagak ed sika so nipaakar ed makapataktakot ya infierno a saya so manaalagar a mañgawat ed saray managpatey a siñga sika tan say agim, likud no sika so mambabawi tan babawien mo so saray gagalam a mampatey, tan ompawil ka kaibam so saray ñgayew mo ed saray dili a dalin yo.

8 Balet lapu nen saman ag mo inawat so saraya a beñgatla, tan akilaban ka sumpa ed saray totoo na Katawan, iñgen anga ed natan iilaloan ko a saya so gawaen mo lamet.

9 Tan natan nia, sikami so akaparaan a mañgawat ed sika; on, tan likud no babawien mo so saray gagalam, nia, naguyor mo so sanok na Dios a sikato so ag mo inawat, angan dia ed sigpot a kaderal mo.

10 Balet, unong a mabilay so Katawan, saray ñgayew mi so onla ed sika likud no sika so onekal, tan ag mabayag sika so dalawen na patey, lapu ed pagnayonen mi so saray ciudad tan saray dalin mi; on, tan pagnayonen mi so relihion mi tan say pamaakaran na Dios mi.

11 Balet nia, ipasen ko ya andi-kana so pisalitak ed sika nipaakar ed saraya a beñgatla; odino ipasen ko a sika so anak na infierno; dia ed ontan kapotan ko la so sulat ko ed pañgibagak ed sika ya ag ak misalatan na saray adakep, likud no iawat mo so sakey a laki tan say asawa to tan saray anak to, a kasalat na sakey ya adakep a toom; no onia so gawaen mo, misalatan ak.

12 Tan nia, no ag mo gawaen so saya, siak so onla sumpa ed sika a kaibak so saray ñgayew ko; on, angan ayuraan ko so saray bibii tan saray anak ko, tan siak so onla sumpa ed sika, tan sika so tumboken ko anga ed dili a dalin mo, a saya so dalin na unaan a tawir mi; on, tan manmaliw a dala ed dala, on, bilay ed bilay; tan sika so labanan ko anga ed sika so naderal ed tapew na saya a dalin.

13 Nia, siak so wala ed pasnok ko, tan ontan met na saray totook; nampilalekan mo kami a pateyen, tan nampilalekan mi labat so mañgiagel ed inkasikami. Balet nia, no anapen mo a deralen kami pilalek mi met a sikayo so deralen mi; on, tan anapen mi so saray dalin mi, say dalin na unaan a tawir mi.

14 Natan sampotan ko la so sulat ko. Siak si Moroni; siak so pañgulo na saray totoo na Nephite.

15 Natan agawa a si Ammoron, sanen naawat to so saya a sulat, sikato so mamapasnok; tan sikato so nansulat a sananey a sulat ed si Moroni, tan saraya so salita ya insulat to, a nankuan:

16 Siak si Ammoron, ya ari na saray Lamanite; siak so agi nen Amalickiah a pinatey mo. Nia, ibales ko so dala to ed sika, on, siak so onla ed sika a kaibak so saray ñgayew ko lapu ed ag ak antakot ed saray panagtaktakot mo.

17 Tan nia, saray ama yo nangawa ra na aliwa ed saray agagi ra, a makaseñgeg ed saya tinakew da ed sikara so saray pankatunoñgan da a mañgoley sanen saya so makatunoñgan a sikara so makankayarian.

18 Tan natan nia, no igaton yo so saray ayura yo, tan paoleyan yo so inkasikayo ed saraman so manepeg a mañgoley, dia ed saya igangan ko ed saray totook ya igaton da so saray ayura ra tan ag itayo la mambabakal.

19 Nia, imbesñgaw mo so dakerakel a panagtaktakot sumpa ed siak tan saray totook; balet nia, ag kami antakot ed saray panagtaktakot mo.

20 Manwari ya ontan, onabuloy ak a misalatan na saray adakep unong ed kerew mo, a sigagayaga, pian pagnayonen ko so kakanen na saray totook ya onkana ed bakal; tan sikami so mañgigapo na sakey a bakal ya andi-angaan, balang la ed saray Nephite so onla ed silong na pakaoley mi odino andi-angaan a kaupot da.

21 Tan no nipaakar ed saman a Dios ya ibabagam ya ag mi inawat, nia, angapo so kabat mi a sakey a siñga ontan, ni say sikayo; balet no wala so ontan, ag mi kabat balet sikato so nangawa ed sikami tan ontan met ed sikayo.

22 Tan no peteg a wala so demonyo tan infierno, nia ag sikayo kasi so ibaki to diman a manayam a kaibam so agik a pinatey mo, a sikato so impasiñgayew yo a linma ed saman a pasen? Balet nia, saraya a beñgatla angapo so kakanaan da.

23 Siak si Ammaron, tan kapolian nen Zoram, a sikato so pinasuot na saray ama yo tan inawit da a pinmaway ed Jerusalem.

24 Tan nia natan, siak so sakey a masebeg a Lamanite; nia, saya a bakal so nigapo a pañgibales mi ed saray aliwa a kagagawa, tan pagnayonen tan gamoran mi so pankatunoñgan da a mañgoley; tan sampotan ko la so sulat ko ed si Moroni.