Ang Pagpamatuod sa Walo ka Saksi

Angay nga mahibaloan sa tanang kanasoran, kaliwatan, mga pinulongan, ug katawhan, ngadto kang kinsa kini nga buhat moabot: Nga si Joseph Smith, Jun., ang tighubad niini nga buhat, mipakita ngari kanamo sa mga palid nga gipamulong, nga makita nga usa ka bulawan; ug ingon man sa daghan nga mga palid nga gihubad sa mao nga Smith kami nakakupot gayod niini; ug kami usab nakakita sa mga kinulit nga diha niini, ang tanan makita nga karaan ang pagkabuhat, ug katingalahan ang pagkahimo. Ug niini kami mopamatuod pinaagi sa mga pulong nga maligdong, nga ang mao nga Smith mipakita niini ngari kanamo, kay kami nakakita ug nakaalsa, ug nasayod sa kaseguroan nga ang mao nga Smith aduna sa mga palid nga among gipamulong. Ug kami mohatag sa among mga ngalan ngadto sa kalibotan, aron sa pagsaksi ngadto sa kalibotan sa among nakita. Ug kami wala magbakak, Dios ang saksi niini.