1 Mo tu, i bin gat long ol dei blong Kom, plante profet, mo oli bin profesae se Lod bae i prapa spolem gud ol strong pipol ia sapos oli no sakem sin, mo tanem olgeta i go long Lod, mo lego ol fasin blong olgeta blong kilim man i ded mo ol fasin nogud.

2 Mo i bin hapen se ol pipol oli sakemaot ol profet, mo ol profet oli ronwe i go long Kom blong protektem olgeta, from ol pipol oli lukaotem blong kilimded olgeta.

3 Mo oli bin profesae long Kom plante samting; mo hem i kasem blesing long evri dei long laef blong hem we i stap.

4 Mo hem i bin stap laef kasem taem we hem i olfala gud; mo hem i gat Siblom; mo Siblom i bin rul long ples blong hem. Mo brata blong Siblom i bin go agensem hem, mo i stat blong gat wan bigfala faet tumas long ful graon.

5 Mo i bin hapen se brata blong Siblom i mekem se evri profet we i bin profesae long saed blong fasin blong prapa spolem gud ol pipol, oli mas kilimded olgeta;

6 Mo i bin gat wan bigfala trabol long ful graon, from oli testifae se wan bigfala strong nogud tok bae i kam long graon, mo tu, long ol pipol, mo se bae i gat wan bigfala taem we Lod bae i prapa spolem gud samting evriwan long medel blong olgeta, wan olsem we i neva bin gat long fes blong graon, mo ol bun blong olgeta bae oli kam olsem ol ^ahip blong graon antap long fes blong graon sapos oli no sakem fasin nogud blong olgeta.

7 Mo oli no bin lisin gud long voes blong Lod, from ol nogud grup blong olgeta; taswe, i stat blong gat ol wo mo ol rao long ful graon, mo tu, plante hadtaem blong kasem kaekae, mo ol defren kaen sik, inaf blong mekem se i gat wan bigfala taem we oli prapa spolem gud samting evriwan, olsem wan we oli neva bin save long fes blong graon; mo evri samting ia i hapen long ol dei blong Siblom.

8 Mo ol pipol oli stat blong sakem rabis fasin blong olgeta; mo folem hamas we oli mekem olsem, Lod i bin gat ^asore long olgeta.

9 Mo i bin hapen se oli kilimded Siblom, mo oli tekem Seth i kam olsem slef, mo hem i stap olsem slef long ful laef blong hem.

10 Mo i bin hapen se Aha, boe blong hem, i kasem kingdom; mo hem i rul ova long ol pipol long evri dei laef blong hem. Mo hem i mekem evri kaen rabis fasin long ol dei blong hem, we tru long samting ia, hem i bin mekem se plante blad i ron; mo ol dei blong hem i no bin plante.

11 Mo Itam, from hem i wan laen blong Aha, i bin kasem kingdom; mo hem tu i mekem samting we i nogud long ol dei blong hem.

12 Mo i bin hapen se long ol dei blong Itam plante profet oli bin kam, mo oli profesae bakegen long ol pipol; yes, oli profesae se Lod bae i prapa spolem gud olgeta evriwan oli aot long fes blong graon sapos oli no sakem ol rabis fasin blong olgeta.

13 Mo i bin hapen se ol pipol oli mekem hat blong olgeta i kam strong, mo oli no wantem mekem ^afolem ol toktok blong olgeta; mo ol profet oli krae sore mo oli aot long medel blong ol pipol.

14 Mo i bin hapen se Itam i mekem jajmen long fasin nogud long evri dei blong hem; mo hem i gat Moron. Mo i bin hapen se Moron i rul long ples blong hem; mo Moron i mekem samting we i nogud long fored blong Lod.

15 Mo i bin hapen se i gat wan ^afasin blong go agens we i girap long medel blong ol pipol, from sikret grup ia we oli bildimap blong kasem paoa mo kasem mane; mo i bin gat wan strong man we i girap long medel blong olgeta long rabis fasin, mo i faet agensem Moron; tru long samting ia hem i winim haf blong kingdom; mo hem i holemtaet haf blong kingdom ia blong plante yia.

16 Mo i bin hapen se Moron i winim hem, mo hem i kasem kingdom bakegen.

17 Mo i bin hapen se i gat wan narafala strong man we i girap; mo hem i kamaot long laen blong brata blong Jared.

18 Mo i bin hapen se hem i bin winim Moron mo i kasem kingdom; taswe, Moron i stap olsem slef long evri dei blong hem we i stap; mo hem i gat Koriantor.

19 Mo i bin hapen se Koriantor i stap olsem slef long evri dei blong hem.

20 Mo long ol dei blong Koriantor, i bin gat plante profet tu we oli kam, mo oli profesae long saed blong ol bigfala mo gudfala samting, mo oli bin talemaot fasin blong sakem sin long ol pipol, mo sapos nomo oli no sakem sin, Lod God bae i mekem ^ajajmen agensem olgeta blong prapa spolem gud olgeta evriwan;

21 Mo we Lod God bae i sendem o i karem i kam wan ^anarafala pipol blong stap long graon tru long paoa blong hem, folem fasin we hem i bin karem ol papa blong olgeta oli kam.

22 Mo oli bin sakemaot evri toktok blong ol profet, from sikret sosaeti blong olgeta mo ol nogud rabis sin blong olgeta.

23 Mo i bin hapen se Koriantor i bin gat ^aIta, mo hem i ded, afta we hem i stap olsem slef long ful laef blong hem.