1 Pea ko ʻeni naʻe kamata ke ʻi ai ha fuʻu ^amalaʻia lahi ʻi hono kotoa ʻo e fonuá koeʻuhi ko e fai hia ʻa e kakaí, ʻa ia kapau, ʻe tuku ʻe ha tangata haʻane meʻangāué pe ko ʻene heletaá ki heʻene tukuʻanga meʻá, pe ki he potu ʻokú ne faʻa tauhi ai iá, vakai, ʻi he pongipongí, he ʻikai te ne ʻilo ia, he naʻe hulu pehē ʻa e malaʻiá ʻi he fonuá.

2 Ko ia, naʻe pīkitai ʻa e tangata taki taha ki he meʻa ʻa ia naʻe ʻaʻaná, ʻaki hono nimá, pea naʻe ʻikai te ne fie kole pe ʻoatu ha meʻa; pea naʻe puke maʻu ʻe he tangata kotoa pē ʻa e kau ʻo ʻene heletaá ʻaki hono nima toʻomataʻú, ke maluʻi ʻene koloá mo ʻene moʻui ʻaʻaná mo hono malí mo e fānaú.

3 Pea ko ʻeni, hili ʻa e taʻu ʻe ua, pea hili ʻa e pekia ʻa Sēletí, vakai, naʻe hopo hake ʻa e tokoua ʻo Seiletí ʻo ne tauʻi ʻa Kolianitomuli, pea naʻe ikunaʻi ai ia ʻe Kolianitomuli, peá ne tuli ia ki he maomaonganoa ʻo ʻEikisí.

4 Pea naʻe hoko ʻo pehē naʻe toe tauʻi ʻe he tokoua ʻo Seiletí ia ʻi he maomaonganoa ʻo ʻEikisí; pea naʻe fakaʻau ʻo fuʻu fakamanavahē lahi ʻa e taú, pea naʻe tō ʻa e lau afe ʻi he heletaá.

5 Pea naʻe hoko ʻo pehē naʻe ʻākoloʻi ʻe Kolianitomuli ʻa e maomaonganoa; pea naʻe laka atu ʻa e tokoua ʻo Seiletí mei he maomaonganoá ʻi he poʻulí ʻo ne tāmateʻi ha konga ʻo e kau tau ʻa Kolianitomulí, lolotonga ʻenau konaá.

6 Pea naʻá ne ʻalu atu ki he fonua ko Moloní, ʻo ne fokotuʻu ia ʻi he nofoʻanga fakatuʻi ʻo Kolianitomulí.

7 Pea naʻe hoko ʻo pehē naʻe nofo ʻa Kolianitomuli mo ʻene kau taú ʻi he maomaonganoá ʻi he taʻu ʻe ua, pea naʻá ne maʻu ai ʻa e fuʻu ivi lahi ki heʻene kau taú.

8 Pea ko ʻeni ko e tokoua ʻo Seiletí, ʻa ia ko hono hingoá ko Kiliate, naʻá ne maʻu foki ʻa e fuʻu ivi lahi ki heʻene kau taú, koeʻuhi ko e ngaahi kautaha fufuú.

9 Pea naʻe hoko ʻo pehē naʻe hanga ʻe heʻene taulaʻeiki lahí ʻo fakapoongi ia lolotonga ʻene nofo ʻi hono nofoʻanga fakatuʻí.

10 Pea naʻe hoko ʻo pehē naʻe ʻi ai ha taha ʻo e ngaahi kautaha fufuú naʻá ne fakapoongi ia ʻi ha hala fufū, ʻo ne toʻo maʻana ʻa e puleʻangá; pea ko hono hingoá ko Lipi; pea ko Lipí ko ha tangata sino kaukaua lahi ia, ʻo lahi hake ʻi ha toe tangata kehe ʻi hono kotoa ʻo e kakaí.

11 Pea naʻe hoko ʻo pehē ʻi he ʻuluaki taʻu ʻo Lipí, naʻe ʻalu hake ʻa Kolianitomuli ki he fonua ko Moloní, ʻo ne tauʻi ʻa Lipi.

12 Pea naʻe hoko ʻo pehē naʻá ne tau mo Lipi, pea naʻe taaʻi ʻe Lipi ʻa hono umá ʻo ne lavea ai; ka neongo iá, naʻe ʻoho atu ʻa e kau tau ʻa Kolianitomulí kia Lipi, ʻo ne hola ai ki he ngaahi ngataʻanga fonua ki he matātahí.

13 Pea naʻe hoko ʻo pehē naʻe tuli ia ʻe Kolianitomuli; pea naʻe tauʻi ia ʻe Lipi ʻi he matātahí.

14 Pea naʻe hoko ʻo pehē naʻe tā hifo ʻe Lipi ʻa e kau tau ʻa Kolianitomulí, pea naʻa nau toe hola ai ki he maomaonganoa ʻo ʻEikisí.

15 Pea naʻe hoko ʻo pehē naʻe tuli ia ʻe Lipi kae ʻoua kuó ne aʻu atu ki he ngaahi potu tokalelei ʻo ʻĀkisí. Pea kuo ʻave ʻe Kolianitomuli ʻa e kakai kotoa pē mo ia ʻi heʻene hola meia Lipí ki he potu ko ia ʻo e fonua ʻa ia naʻá ne hola ki aí.

16 Pea ʻi heʻene aʻu atu ki he ngaahi potu tokalelei ʻo ʻĀkisí naʻa ne tauʻi ai ʻa Lipi, pea naʻá ne taaʻi ia kae ʻoua kuó ne mate; ka neongo iá, naʻe ʻoho mai ʻa e tokoua ʻo Lipí kia Kolianitomuli ʻo fetongi ia, pea naʻe fakaʻau ʻo fuʻu fakamanavahē lahi ʻaupito ʻa e taú, pea naʻe toe hola ai ʻa Kolianitomuli mei he kau tau ʻa e tokoua ʻo Lipí.

17 Ko ʻeni ko e hingoa ʻo e tokoua ʻo Lipí ko Sise. Pea naʻe hoko ʻo pehē naʻe tuli ʻe Sise ʻa Kolianitomuli, pea naʻá ne ikunaʻi ʻa e ngaahi kolo lahi, pea naʻá ne tāmateʻi ʻa e kakai fefine pea mo e fānau fakatouʻosi, pea naʻá ne tutu ʻa e ngaahi koló.

18 Pea naʻe mafola ʻa e manavahē kia Sise ʻi he fonuá kotoa; ʻio, naʻe ongo atu ʻa e tangi ʻi hono kotoa ʻo e fonuá—Ko hai te ne faʻa tuʻu hake ki he kau tau ʻa Sisé? Vakai, ʻokú ne tafiʻi ʻa e fonuá ʻi hono ʻaó!

19 Pea naʻe hoko ʻo pehē naʻe kamata ke fakatahataha ʻa e kakaí ki ha ngaahi kau tau, ʻi hono kotoa ʻo e funga ʻo e fonuá.

20 Pea naʻa nau mavahevahe; pea naʻe ʻi ai hanau niʻihi naʻa nau hola ki he kau tau ʻa Sisé, ka ko honau niʻihi naʻa nau hola ki he kau tau ʻa Kolianitomulí.

21 Pea naʻe pehē fau hono lahi mo hono fuoloa ʻo e taú, pea pehē fau mo hono fuoloa ʻo e lilingi totó mo e fakaʻauhá, kuo ʻufiʻufi ai ʻa e funga kotoa ʻo e fonuá ʻe he ngaahi ^aʻangaʻanga ʻo e kakai maté.

22 Pea naʻe pehē fau hono vave mo e fakatoʻotoʻo ʻo e taú naʻe ʻikai ke toe ʻi ai ha taha ke tanu ʻa e maté, ka naʻa nau laka atu mei he lilingi ʻo e toto ki he lilingi ʻo e toto, kae tuku pē ʻa e ngaahi ʻangaʻanga fakatouʻosi ʻo e kakai tangatá, mo e kakai fefiné, pea mo e fānaú ke movetevete ʻi he funga ʻo e fonuá, ke keina ʻe he ^aʻuanga ʻo e kakanó.

23 Pea naʻe mafola atu ʻa hono nanamú ʻi he funga ʻo e fonuá, ʻio ʻa hono kotoa ʻo e funga ʻo e fonuá; ko ia naʻe faingataʻaʻia ʻa e kakaí ʻi he ʻaho mo e pō, koeʻuhi ko hono nanamú.

24 Ka neongo iá, naʻe ʻikai tuku ʻe Sise ʻa ʻene tuli ʻa Kolianitomulí; he kuó ne fuakava ke ne sāuni kia Kolianitomuli ʻa e toto ʻo hono tokoua, ʻa ia kuo maté, pea mo e folofola ʻa e ʻEikí ʻa ia kuo hoko mai kia ʻEta ʻe ʻikai ke tō ʻa Kolianitomuli ʻi he heletā.

25 Pea ko ia ʻoku tau vakai naʻe ʻaʻahi ʻa e ʻEikí kiate kinautolu ʻaki ʻa e kakato ʻa hono houhaú, pea kuo hanga ʻe heʻenau fai angahala mo e ngaahi anga-fakalieliá ʻo tofa ha hala ki honau fakaʻauha taʻengatá.

26 Pea naʻe hoko ʻo pehē naʻe tuli ʻe Sise ʻa Kolianitomuli ki he feituʻu fakahahaké, ʻo aʻu ki he ngaahi ngataʻanga ʻo e matātahí, pea naʻá ne tau ai mo Sise ʻi he ʻaho ʻe tolu.

27 Pea naʻe pehē fau hono fakamanavahē ʻo e fakaʻauha ʻi he kau tau ʻa Sisé naʻe kamata ke ʻa e kakaí ke manavahē, ʻo nau kamata ke hola mei he kau tau ʻa Kolianitomulí; pea naʻa nau hola ki he fonua ko Kolihoá, ʻo nau tafiʻi atu ʻa e kakaí ʻo e fonuá ʻi honau ʻaó, ʻa kinautolu kotoa pē naʻe ʻikai ke fie kau mo kinautolú.

28 Pea naʻa nau fokotuʻu honau ngaahi fale fehikitakí ʻi he teleʻa ʻo Kolihoá; pea naʻe fokotuʻu ʻe Kolianitomuli ʻa hono ngaahi fale fehikitakí ʻi he teleʻa ʻo Suá. Ko ʻeni naʻe ofi ʻa e teleʻa ʻo Suá ki he moʻunga ko Kaminoá, ko ia, naʻe tānaki fakataha ʻe Kolianitomuli ʻa ʻene kau taú ki he moʻunga ko Kaminoá, ʻo ne ifi ha talupite ki he kau tau ʻa Sisé ke ui kiate kinautolu ke nau ō mai ke tau.

29 Pea naʻe hoko ʻo pehē naʻa nau ō mai, ka naʻe toe tekeʻi ʻa kinautolu; pea naʻa nau toe ō mai ko hono tuʻo uá, ka naʻe toe tekeʻi ʻa kinautolu ko hono tuʻo ua. Pea naʻe hoko ʻo pehē naʻa nau toe ō mai ko hono tuʻo tolu, pea naʻe fakaʻau ʻa e taú ʻo fuʻu fakamanavahē lahi.

30 Pea naʻe hoko ʻo pehē naʻe taaʻi ʻe Sise ʻa Kolianitomuli ʻo ne hokaʻi ia ʻo tuʻo lahi ʻaki ʻa e ngaahi fuʻu lavea loloto; pea ko Kolianitomuli, koeʻuhi ko e mole lahi ʻo hono totó, naʻá ne pongia, pea naʻe fata atu ia ʻo hangē kuó ne maté.

31 Ko ʻeni naʻe lahi fau ʻa e tō ʻa e kakai tangatá mo e kakai fefiné mo e fānau ʻi he ongo faʻahí fakatouʻosi, naʻe fekau ai ʻe Sise ki hono kakaí ke ʻoua te nau tuli ʻa e kau tau ʻa Kolianitomulí; ko ia, naʻa nau foki ai ki honau ʻapitanga.