Wan Smol Toktok long saed blong Buk blong Momon

Buk blong Momon i wan tabu histri blong ol pipol long Amerika blong bifo, mo oli bin raetemdaon long ol buk we oli mekem wetem aean. Ol ples we oli karem ol histri ia long ol, mo putum tugeta oli kamaot long:

1. Ol Buk blong Nifae, we i bin gat tu defren kaen: ol smolfala buk mo ol bigfala buk. Faswan i tokbaot moa ol samting we oli bin kamaot long ol pipol ia long saed blong spirit, mo seves mo ol tijing blong ol profet, be laswan i tokbaot moa ol samting we i bin hapen long ol pipol ia long saed blong laef blong olgeta (Fas Nifae 9:2–4). Be stat long taem blong Mosaea, ol bigfala buk i bin holem tu ol samting we oli blong spirit we i impoten tumas.

2. Ol Buk blong Momon, we i wan sot histri nomo we Momon i bin tekemaot long ol bigfala buk blong Nifae, wetem plante sotfala toktok blong hem. Ol buk ia tu i bin holem histri we i gohed we Momon i bin raetem, mo sam narafala moa we boe blong hem, Moronae, i bin raetem.

3. Ol Buk blong Ita, we i givim wan histri blong Ol Man blong Jared. Moronae i bin raetemsot histri ia, mo hem i bin putum sam toktok blong hemwan mo i bin joenem histri ia wetem ol stamba histri anda long nem “Buk blong Ita.”

4. Ol Buk we oli mekem wetem Bras, ol pipol blong Lihae i bin karemaot long Jerusalem long 600 B.K.B. Olgeta ia i bin gat “ol faef Buk blong Moses, … mo tu, wan histri blong Ol Jiu stat long stat, … go kasem stat blong taem we Sedekaea i rul, king blong Juda; mo tu, ol profesi blong ol tabu profet” (1 Nifae 5:11–13). Plante toktok we i kamaot long ol buk ia, oli ol toktok blong Aesea mo sam narafala profet blong Baebol, mo tu, ol profet we i no blong Baebol, oli kamaot long Buk blong Momon.

Buk blong Momon i gat fiftin stamba pat, we oli singaotem, ol buk, be wan nomo i no olsem ia, mo ol buk ia oli tekem nem blong stret man ia we i raetem buk ia. Fas pat (ol fasfala sikis buk we i finis wetem Omnae) i wan translesen we i kamaot long ol smolfala buk blong Nifae. Bitwin buk blong Omnae mo Mosaea, i gat wan ples we oli singaotem Ol Toktok blong Momon. Buk ia i joenem stori blong Nifae olsem we i stap long ol smolfala buk blong Nifae wetem samfala pat we Momon i bin tekemaot long ol bigfala buk.

Longfala pat, stat long Mosaea go kasem en blong Momon, japta 7, hem i wan translesen blong sot histri we Momon i bin tekemaot long ol bigfala buk blong Nifae. Las pat, stat long Momon, japta 8, go kasem en blong buk, i bin kamaot tru long boe blong Momon, Moronae, we, afta we hem i bin finisim histri blong laef blong papa blong hem, i bin raetemsot histri blong Ol Man blong Jared (olsem Buk blong Ita), mo biaen i bin joenem ol pat we oli save olgeta olsem Buk blong Moronae.

Long, o kolosap long yia 421 A.K.B., Moronae, laswan long ol profet blong histri blong Ol Man blong Nifae, i bin silim tabu histri ia mo i bin haedem histri ia wetem Lod, blong hem i karem olgeta i kamaot long ol lata dei, olsem we voes blong God i bin talemaot tru long ol profet blong Hem blong bifo. Long yia 1823 A.K.B., semfala Moronae ia, long taem ia i bin wan man we i laef bakegen long ded, i visitim Profet Josef Smit mo afta hem i givim ol buk ia we oli bin raet long olgeta, long Josef.

Long saed blong edisen ia: Orijinol Taetol Pej we i kam jes bifo long pej blong ol samting we oli stap insaed, oli tekem aot long ol buk, mo i pat blong tabu toktok. Ol fas toktok we raeting blong olgeta i no long italik, olsem long 1 Nifae mo bifo long Mosaea, japta 9, oli pat tu blong tabu toktok. Ol fas toktok, long italik, olsem ol japta heding, oli no pat blong orijinol toktok be oli ol tul blong stadi we oli putum insaed blong mekem se i isi blong rid.

Samfala smol mistek long toktok i bin stastap long ol edisen we oli printim finis, hemia long Buk blong Momon we oli pablisim long Inglis lanwis. Edisen ia, oli stretem ol samting we oli luk se i stret blong stretem, blong i semmak long ol buk we oli bin pablisim, mo ol fas edisen we Profet Josef Smit i bin stretem.