1 Vakai, naʻe hoko ʻo pehē ʻi he lea ʻaki ʻe Nīfai ʻa e ngaahi lea ní, naʻe feleleʻi atu ha kau tangata ʻe niʻihi ʻa ia naʻe ʻiate kinautolu ki he fakamaauʻangá; ʻio, naʻe ʻi ai ʻa e toko nima ʻa ia naʻa nau ʻalú, ʻo nau fepehēʻaki ʻiate kinautolu, ʻi heʻenau ʻalú:

2 Vakai, te tau ʻilo pau heni pe ko ha palōfita ʻa e tangatá ni pea kuo fekauʻi ia ʻe he ʻOtuá ke ne kikite ʻaki ʻa e ngaahi meʻa fakaofo pehē kiate kitautolu. Vakai, ʻoku ʻikai te tau tui kuó ne fai ia; ʻio, ʻoku ʻikai te tau tui ko ha palōfita ia; ka neongo iá, kapau ʻoku moʻoni ʻa e meʻá ni ʻa ia kuó ne fakahā ʻo kau ki he fakamaau lahí, kuo mate ia, te tau tui leva ko e ngaahi lea kehe ʻa ia kuó ne leaʻakí ʻoku moʻoni.

3 Pea naʻe hoko ʻo pehē naʻa nau lele fakatoʻotoʻo ʻaki honau tūkuingatá, ʻo nau hū ki he fakamaauʻangá; pea vakai, kuo tō ʻa e fakamaau lahí ki he kelekelé, pea ʻokú ne ^atokoto ʻi hono totó.

4 Pea ko ʻeni vakai, ʻi heʻenau mamata ki aí naʻa nau fuʻu ʻohovale ʻaupito, ʻo nau tō ki he kelekelé; he naʻe ʻikai te nau tui ki he ngaahi lea kuo lea ʻaki ʻe Nīfai ʻo kau ki he fakamaau lahí.

5 Pea ko ʻeni, ʻi heʻenau mamatá naʻa nau tui, pea naʻe hoko kiate kinautolu ʻa e manavahē telia naʻa tō ʻa e ngaahi tautea kotoa kuo fakahā ʻe Nīfaí ki he kakaí; ko ia naʻa nau tetetete, pea kuo nau tō ki he kelekelé.

6 Ko ʻeni, ʻi he hili pē hono fakapoongi ʻo e fakamāú—he naʻe hokaʻi ia ʻe hono tokouá ʻi ha faʻufaʻu fakapulipuli, peá ne hola, pea naʻe feleleʻi ʻa e kau tamaioʻeikí ʻo fakahā ki he kakaí, ʻo kalanga ʻaki ʻa e ongoongo ʻo e fakapoó ʻiate kinautolu;

7 Pea vakai naʻe kātoa fakataha mai ʻa e kakaí ki he potu ʻo e fakamaauʻangá—pea vakai, naʻa nau fuʻu ofo lahi ʻi heʻenau mamata ki he kau tangata ʻe toko nima ʻa ia kuo nau tō ki he kelekelé.

8 Pea ko ʻeni vakai, naʻe ʻikai ʻilo ʻe he kakaí ʻo kau ki he fuʻu kakai tokolahi kuo nau fakataha ki he ^angoue ʻa Nīfaí; ko ia naʻa nau fepehēʻaki ʻiate kinautolu: Ko e kau tangata ʻeni kuo nau fakapoongi ʻa e fakamāú, pea kuo taaʻi ʻa kinautolu ʻe he ʻOtuá ke ʻoua te nau lava ʻo hola meiate kitautolu.

9 Pea naʻe hoko ʻo pehē naʻa nau puke ʻa kinautolu, ʻo haʻi ʻa kinautolu mo lī ʻa kinautolu ki he fale fakapōpulá. Pea naʻe fanongonongo holo ʻa e tala kuo fakapoongi ʻa e fakamāú, pea kuo puke ʻa e kau fakapoó ʻo lī ki he fale fakapōpulá.

10 Pea naʻe hoko ʻo pehē ʻi he pongipongi haké naʻe fakataha mai ʻa e kakaí ke tengihia mo ^aʻaukai, ʻi he telio ʻo e fakamaau lahi tuʻu-ki-muʻa ʻa ia kuo fakapōngí.

11 Pea ko ia ko e kau fakamaau kotoa foki naʻa nau ʻi he ngoue ʻa Nīfaí, pea nau fanongo ki heʻene ngaahi leá, naʻa nau fakataha kotoa mai foki ki he telió.

12 Pea naʻe hoko ʻo pehē naʻa nau ʻeke ki he kakaí, ʻo pehē: ʻOku ʻi fē ʻa e toko nima ʻa ia naʻe fekau ke nau ʻalu ke ʻeke ʻo kau ki he fakamaau lahí pe kuó ne pekiá? Pea naʻa nau tali ʻo pehē: Ko e toko nima ko ʻení ʻoku mou pehē kuo mou fekau atú, ʻoku ʻikai te mau ʻilo ki ai; ka ʻoku ʻi ai ʻa e toko nima ʻa ia ko e kau fakapoó, kuo mau lī ki he fale fakapōpulá.

13 Pea naʻe hoko ʻo pehē naʻe fie maʻu ʻe he kau fakamāú ke ʻomi ʻa kinautolu, pea naʻe ʻomi ʻa kinautolu, pea vakai ko kinautolu ʻa e toko nima naʻe fekaú; pea vakai naʻe ʻeke kiate kinautolu ʻe he kau fakamāú ke nau fakamatala ki he meʻa naʻe hokó, pea naʻa nau fakahā kiate kinautolu ʻa e meʻa kotoa pē ʻa ia kuo nau faí, ʻo pehē:

14 Naʻa mau lele ʻo mau aʻu atu ki he potu ʻo e fakamaauʻangá, pea ʻi heʻemau mamata ki he ngaahi meʻa kotoa ʻo hangē pē ko ia naʻe fakamoʻoniʻi ʻe Nīfaí, naʻa mau ofo lahi ʻo aʻu ki heʻemau tō ki he kelekelé; pea ʻi heʻemau ake hake mei heʻemau ofó, vakai naʻa nau lī ʻa kimautolu ki he fale fakapōpulá.

15 Ko ʻeni, ko e meʻa ki he fakapoongi ʻo e tangata ní, ʻoku ʻikai te mau ʻilo pe ko hai kuó ne fai iá; pea ko e meʻa pē ia ʻoku mau ʻiló, naʻa mau lele ʻo mau aʻu ki ai ʻo hangē ko hoʻomou fekaú, pea vakai kuo mate ia, ʻo hangē ko e ngaahi lea ʻa Nīfaí.

16 Pea ko ʻeni naʻe hoko ʻo pehē naʻe fakamatalaʻi ʻe he kau fakamāú ʻa e meʻá ki he kakaí, ʻo nau tukuakiʻi ʻa Nīfai, ʻo pehē: Vakai, ʻoku mau ʻiloʻi kuo pau ne alea ʻa e Nīfaí ni mo ha taha ke ne tāmateʻi ʻa e fakamāú, pea ke ne toki fakahā ia kiate kitautolu, koeʻuhi ke ne fakaului ʻa kitautolu ki heʻene lotú, koeʻuhi ke ne hakeakiʻi ia ke hoko ko e tangata lahi, kuo fili ʻe he ʻOtuá, pea ko ha palōfita.

17 Pea ko ʻeni vakai, te tau fakaʻilo ʻa e tangatá ni, pea te ne vete ʻene hiá, ʻo fakahā mai kiate kitautolu ʻa e tokotaha fakapō totonu ʻo e fakamaau ko ʻení.

18 Pea naʻe hoko ʻo pehē naʻe tukuange ʻa e toko nimá ʻi he ʻaho ʻo e telió. Ka neongo iá, naʻa nau valokiʻi ʻa e kau fakamāú ʻi he ngaahi lea kuo nau tukuakiʻi ʻaki ʻa Nīfaí, ʻo nau fakakikihi taha taha mo kinautolu, ʻo aʻu ki heʻenau taʻofi ʻo ngaohi ʻa kinautolu ke fakalongolongo.

19 Ka neongo iá, naʻa nau fekau ke puke ʻa Nīfai ʻo haʻi pea ʻomi ki he ʻao ʻo e kakaí, pea nau kamata ke fakafehuʻi ia ʻi he ngaahi founga kehekehe koeʻuhi ke nau tauheleʻi ia, ke nau lava ʻo fakahalaʻi mo tāmateʻi ia—

20 ʻO nau pehē ange kiate ia: ʻOkú ke kaungā fai mo ha taha; ko hai ʻa e tangata ʻa ia kuó ne fai ʻa e fakapō ko ʻení? Ko ʻeni fakahā mai kiate kimautolu, pea vete hoʻo hiá; ʻo nau pehē, Vakai ko e paʻanga ʻeni; pea te mau tuku foki ke ke moʻui ʻo kapau te ke tala mai kiate kimautolu, ʻo vete ʻa e alea kuó ke fai mo iá.

21 Ka naʻe pehē ange ʻe Nīfai kiate kinautolu: ʻOiauē ʻa kimoutolu ʻa e kau ^avale, ʻa kimoutolu ʻa e kau taʻekamu ʻi homou lotó, ʻa kimoutolu ʻa e kau kui, mo e kakai ^bkia-kekeva, ʻoku mou ʻilo koā hono fuoloa ʻo e kātakiʻi ʻe he ʻEiki ko homou ʻOtuá ke mou fai atu ʻi homou ngaahi hala ko ʻeni ʻo e angahalá?

22 ʻOiauē ʻoku taau ke mou kamata ke ngala mo ^atangi, koeʻuhi ko e fuʻu fakaʻauha lahi ʻa ia ʻoku tatali mai ʻi he taimí ni kiate kimoutolu, ʻo ka ʻikai te mou fakatomala.

23 Vakai ʻoku mou pehē kuó u alea mo ha tangata ke ne fakapoongi ʻa Sisolami, ko hotau fakamaau lahí. Kae vakai, ʻoku ou pehē kiate kimoutolu, kuo mou fai ʻeni koeʻuhi ko ʻeku fakamoʻoniʻi kiate kimoutolu ke mou ʻilo ki he meʻá ni; ʻio, ko ha fakamoʻoni kiate kimoutolu, naʻá ku ʻilo ki he fai angahala mo e ngaahi anga-fakalielia ʻoku ʻiate kimoutolú.

24 Pea ko e meʻa ʻi heʻeku fai ʻení, kuo mou pehē ai kuó u alea mo ha tangata ke ne fai ʻa e meʻá ni; ʻio, koeʻuhi ko ʻeku fakahā kiate kimoutolu ʻa e fakaʻilonga ní ʻoku mou ʻita ai kiate au, ʻo feinga ke fakaʻauha ʻeku moʻuí.

25 Pea ko ʻeni vakai, te u fakahā kiate kimoutolu mo ha fakaʻilonga ʻe taha, ʻo vakai pe te mou feinga ʻi he meʻá ni ke fakaʻauha au.

26 Vakai ʻoku ou pehē kiate kimoutolu: Mou ō ki he fale ʻo Seianitumi, ko e ^atokoua ʻo Sisolamí, pea pehē kiate ia—

27 Naʻá ke alea koā mo Nīfai, ko e palōfita loi, ʻa ia kuó ne kikite ʻaki ʻa e kovi lahi pehē ki he kakaí ni, ke ke fakapoongi ʻa Sisolami, ko ho tokouá?

28 Pea vakai, te ne fakahā atu e kimoutolu, ʻIkai.

29 Pea ke mou pehē kiate ia: Naʻá ke fakapoongi koā ʻa ho tokouá?

30 Pea te ne tuʻu ʻi he ilifia ʻo ʻikai ʻilo pē ko e hā haʻane lea ʻe faí. Pea vakai, te ne fakaʻikaiʻi kiate kimoutolu; pea te ne fai ʻo hangē ʻokú ne ʻohovalé; ka neongo iá, te ne fakahā kiate kimoutolu ʻokú ne taʻehalaia.

31 Kae vakai, ke mou siviʻi ia, pea te mou ʻiloʻi ʻa e toto ʻi he kapa ʻo hono kofu tuʻá.

32 Pea ʻi hoʻomou mamata ki aí, ke mou pehē ange: Naʻe haʻu mei fē ʻa e toto ko ʻení? ʻIkai koā ʻoku mau ʻiloʻi ko e toto ia ʻo ho tokouá?

33 Pea te ne tetetete leva, pea ʻe tea, ʻo hangē kuó ne maté.

34 Pea ke mou pehē ange leva: Ko e meʻa ʻi he ilifiá ni mo e lanu teá ni, ʻa ia kuo hoko ki ho matá, vakai, ʻoku mau ʻiloʻi ai ʻokú ke halaia.

35 Pea ʻe hoko leva kiate ia ʻa e manavahē lahi ange; pea te ne toki vete leva kiate kimoutolu, pea ʻikai toe fakaʻikaiʻi kuó ne fai ʻa e fakapoó ni.

36 Pea te ne toki pehē leva kiate kimoutolu, ko au, Nīfai, ʻoku ʻikai te u teitei ʻilo ʻo kau ki he meʻá ni ka ʻi hono fakahā ia kiate au ʻi he māfimafi ʻo e ʻOtuá. Pea te mou toki ʻiloʻi ai tā ko e tangata faitotonu au, pea ko e fekauʻi mai au kiate kimoutolu mei he ʻOtuá.

37 Pea naʻe hoko ʻo pehē naʻa nau ʻalu ʻo fai, ʻo hangē ko ia kuo tala kiate kinautolu ʻe Nīfaí. Pea vakai, naʻe moʻoni ʻa e ngaahi lea kuó ne leaʻakí; he naʻá ne fakaʻikaʻi ʻo hangē ko e ngaahi leá; peá ne vete ʻo hangē ko e ngaahi leá.

38 Pea naʻe ngaohi ia ke ne fakahā ko ia ʻa e tokotaha fakapō moʻoní, ʻo tupu ai hono tukuange ʻo e toko nimá, pea mo Nīfai foki.

39 Pea naʻe ʻi ai ʻa e kau Nīfai ʻe niʻihi naʻa nau tui ki he ngaahi lea ʻa Nīfaí; pea naʻe ʻi ai mo e niʻihi foki, naʻa nau tui koeʻuhi ko e fakamoʻoni ʻa e toko nimá, he kuo nau ului lolotonga ʻenau ʻi he fale fakapōpulá.

40 Pea ko ʻeni naʻe ʻi ai ʻa e niʻihi ʻi he kakaí, naʻa nau pehē ko ha palōfita ʻa Nīfai.

41 Pea naʻe toe ʻi ai mo e niʻihi naʻa nau pehē: Vakai, ko ha ʻotua ia, he ka ne ʻikai ko ha ʻotua ia, pehē he ʻikai te ne faʻa ʻiloʻi ʻa e meʻa kotoa pē. He vakai, kuó ne fakahā mai kiate kitautolu ʻa e ngaahi fakakaukau ʻa hotau lotó, pea kuó ne fakahā mai foki kiate kitautolu ʻa e ngaahi meʻa; pea kuó ne fakahā foki kiate kitautolu ʻa e ʻilo ki he tokotaha fakapō totonu ʻo hotau fakamaau lahí.