1 Ndien idahaemi, sese, nditɔ eka mi, nte ŋketiŋde nnɔ mbufo nte ke nyetiŋ nte prophet, sese, emi edi prophecy mi—nte ke mme ŋkpɔ emi prophet Zenos eketiŋde, kabaŋa ufɔk Israel, ke emi enye okodomode mmɔ ye eto olive emi ebɔkde, ke akpanikɔ ana etibe.

2 Ndien usen emi enye editɔŋɔde ntak isin ubɔk ifak ikɔt esie, edi usen, iŋ, kpa nte akpatre ini, emi nditɔ ufɔk Etubom edikade ye odudu esie, ndibɔk nyuŋ nsep iŋwaŋ-vine esie; ndien ke oro ebede utit ɔsɔp edi.

3 Ndien didie ke edifɔn inɔ mmɔ emi esinde ifik enam utom ke iŋwaŋ-vine esie; ndien didie ke edidiɔk inɔ mmɔ emi edibinde isio ke ebiet mmɔ! Ndien eyefɔp ererimbot ye ikaŋ.

4 Ndien didie ke Abasi enyene mbɔm ɔnɔ nnyin, koro enye etide ufɔk Israel, mme oruŋ ye mme ŋkɔk mbiba; ndien enye anyan mme ubɔk esie ɔnɔ mmɔ ke ofuri usen; ndien mmɔ edi mbon nsɔŋ-ibuot ye eneni eneni; ndien ediwak emi midisɔŋke esit mmɔ ke edinyaŋa ke obio ubɔŋ Abasi.

5 Ke ntre, ndima nditɔ eka mi, ami mbeŋe mbufo ye mme ikɔ uteŋe nte mbufo ekabare esit, enyuŋ edi ye ɔyɔhɔ uduak ke esit, enyuŋ eyire Abasi nte enye eyirede mbufo. Ndien ke ini ubɔk mbɔm esie anyanare ɔnɔ mbufo ke uŋwana usen, ekusɔŋ esit mbufo.

6 Iŋ, mfin emi, edieke mbufo edikopde uyo esie, isɔŋke esit mbufo; ndien ntak emi mbufo edikpade?

7 Koro sese, ke ini ema ekebɔk mbufo ye eti ikɔ Abasi ke ofuri usen, ndi mbufo eyeŋwum idiɔk mfri, man ekpi enyuŋ emen mbufo esin ke ikaŋ?

8 Sese, ndi mbufo eyesin mme ikɔ emi? Ndi mbufo eyesin mme ikɔ mme prophet; ndien ndi mbufo eyesin kpukpru mme ikɔ emi etiŋde ebaŋa Christ, ke ini ata ediwak ema etiŋ ebaŋa enye; enyuŋ ekaŋ eti ikɔ Christ, ye odudu Abasi, ye enɔ Edisana Spirit, enyuŋ enime Edisana Spirit, enyuŋ esahi akwa uduak erifak, emi ekenimde enɔ mbufo?

9 Ndi mbufo ifiɔkke ite ke edieke mbufo edinamde mme ŋkpɔ emi, ke odudu erifak ye eriset ke mkpa, emi odude ke Christ, eyenam mbufo eda ye but ye akwa ndudue ke iso ebiet uda ikpe ke esop Abasi?

10 Ndien nte asaŋade ye odudu nnen nnen ido, koro owo ikemeke ndikaŋ nnen nnen ido, ana mbufo eka ekeduk mkpɔdiɔhɔ ikaŋ ye brimstone oro, emi mme edeme ikaŋ esie owo mikemeke ndinime, ye emi nsuŋikaŋ esie ɔdɔkde ke nsinsi ye ke nsinsi, mkpɔdiɔhɔ ikaŋ ye brimstone emi edide anana utit ndutuhɔ.

11 O ndien, ndima nditɔ eka mi, mbufo ekabare esit, enyuŋ eduk ke nnen nnen inua otop, enyuŋ eka iso ke usuŋ emi afahade, tutu mbufo enyene nsinsi uwem.

12 O enyene ifiɔk; ŋso ke ami nditiŋ ŋkan emi?

13 Ke akpatre, ami ŋkɔm mbufo unyɔŋ, tutu ami nsobo ye mbufo ke edinem ebiet uda ikpe ke esop Abasi, ebiet uda ikpe ke esop emi amiade idiɔk owo ye enyene ndik se ebakde ye ndik. Amen.