1 Tan agawa ed saman lamlamang a taon wala so ginmapo a sakey a bakal lamet ed baetan na saray Nephite tan saray Lamanite. Tan manwari a siak so malangwer ni, balet baleg so indeñgan ko; dia ed ontan, saray totoo nen Nephi siak so tinuro ra a mañgipañgulo ed sikara, odino pañgulo na saray ñgayew da.

2 Dia ed ontan agawa a dia ed komalabinanem a taon ko siak so linma ya añgipañgulo ed ñgayew na saray Nephite, sumpa ed saray Lamanite; dia ed ontan linmabas la so komatlo a lasus tan duamplo tan anem a taon.

3 Tan agawa a dia ed komatlo a lasus tan duamplo tan pito a taon saray Lamanite so linma a pinmegdat ed sikami ed ontan la a mapalalo a kinabaleg a pakayari, a dia ed saya ataktakot so saray ñgayew ko; dia ed ontan ag da labay so milaban, tan ginapoan da so onsener a mamaarap ed baybay a bansa.

4 Tan agawa ya akasabi kami ed ciudad na Angola, tan kinayarian mi so ciudad, tan nangawa kami na paraan a mañgiagel ed inkasikami sumpa ed saray Lamanite. Tan agawa a sinalimbeñgan mi so ciudad ed angaan na pakayari mi; balet manwari ya ontan la so saray salimbeng mi ed saray Lamanite sikara so akasabi tan sikami so sinunson da a pinmaway ed ciudad.

5 Tan sikami met so sinunson da a pinapaway ed dalin na David.

6 Tan sikami so nankurang tan akasabi kami ed dalin na Joshua, a saya so wala ed ketegan ya asinger ed dayat sagur.

7 Tan agawa a tinipon mi so saray totoo mi ed agay la a siglat ed angaan na nayarian mi, pian natipon mi ra ed saksakey ya olop.

8 Balet nia, say dalin napno na saray matatakew tan saray Lamanite; tan angaman ontan la so kabaleg na kadederal ya asingsinger la ed saray totook, sikara so ag nambabawi ed say mauges a kagagawa ra; dia ed ontan wala so dala tan panagpatey a nitayak ed amin a tapew na dalin, mandapag dia ed saray Nephite tan ontan met ed saray Lamanite; tan saya so sakey a nagnap a panagalsa so agawa ed amin a tapew na dalin.

9 Tan natan, saray Lamanite awalaan ira na ari, tan say ñgaran to Aaron; tan sikato so linma sumpa ed sikami a kaolop to so ñgayew to ya apataplo tan apat a libo. Tan nia, ag ak tinmulok ed sikato dia ed panamegley na apataplo tan dua a libo. Tan agawa a sikato so tinalok ed panamegley na ñgayew ko kanian sikato so binmatik manlapu ed arapan ko. Tan nia, saya ya amin so agawa, tan talora a lasus tan talomplo a taon so linmabas.

10 Tan agawa a saray Nephite ginapoan da so mambabawi ed saray karelmeñgan da, tan ginapoan da so mannañgis na angan siñga unong ed improfesiya nen Samuel a profeta; tan nia, angapo so too a nayarian to ya isinop so antokaman a kayarian to, makaseñgeg ed saray matatakew, tan saray managpatey, tan say majik, tan say silib na manananem a saraya so wala ed dalin.

11 Dia ed onia wala so ginmapo a kaermenan tan paniñgel ed amin a dalin lapu ed saraya a beñgatla, a nagkalalo la ed limog na saray totoo nen Nephi.

12 Tan agawa a sanen siak, Mormon, anengneng ko so paniñgel da tan saray panermen da, tan say dageyem da ed arap na Katawan, say pusok so ginmapo ya ongayaga ed inkasiak, lapu ed pikakabat ko ed panañgasi tan andukey a panañgitepel na Katawan, dia ed ontan no bilang sikato so mapañgasi ed sikara pian sikara lamet so manmaliw a matunong a totoo.

13 Balet nia saya a gayagak angapo so kakanaan to, lapu ed say paneermen da aliwa dia ed pambabawi, lapu ed kaabigan na Dios; balet saya so paneermen na saray naayew, lapu ed say Katawan aliwa a lawas itepel to a nagamoran da so liket ed kasalanan.

14 Tan ag ira dinmago ed si Jesus ya awalaan na puso a maermen tan mambabawi ya espiritu, balet inayew da so Dios, tan nampilalekan da so ompatey. Manwari ya ontan sikara so mibaliñgaan ed panamegley na espada lapu ed bilay da.

15 Tan agawa a say paneermen ko so pinmawil lamet ed siak, tan anengneng ko a say agew na gracia so linmabas la ed sikara, mandapag a dia ed inkalaman tan inkaespiritu; lapu ed anengneng ko so nilibo ed sikara so inaatey ed mapalaway a panagalsa sumpa ed Dios da, tan sikara so nibunton a siñga dutak ed tapew na dalin. Tan dia ed onia so inlabas na komatlo a lasus tan apataplo tan apat a taon.

16 Tan agawa a dia ed saman so komatlo a lasus tan apataplo tan lima a taon saray Nephite ginapoan da so ombatik ed arap na saray Lamanite; tan sikara so inosilan da ya anga ed akasabi ra ed dalin na Jashon, sakbay a nayari a patondaen da ra ed isesener da.

17 Tan natan, say ciudad na Jashon so asinger ed dalin ya añgisinopan nen Ammaron ed saray kasulatan nipaakar ed Katawan, pian saraya so ag naderal. Tan nia siak so linma unong ed salita nen Ammaron, tan inalak so saray piligo nen Nephi, tan ginawak so kasulatan unong ed saray salita nen Ammaron.

18 Tan dia ed piligo nen Nephi ginawak so nagnap a kasulatan na amin a karelmeñgan tan karumsisan; balet dia ed saraya a piligo intepel ko la so ag pangawa na nagnap a kasulatan ed saray karelmeñgan tan karumsisan da, tan nia, say intuloy na karelmeñgan tan karumsisan so wala ed imaton na dili a matak nanlapu a wala la ed siak so magenap a pakanengneng ed saray kiwas na too.

19 Tan abagey ak la lapu ed saray karelmeñgan da; lapu ed say pusok napno na kaermenan lapu ed saray karelmeñgan da, ed amin ya agew ko; manwari ya ontan, sikakabat ak a siak so nitanduro ed sampot ya agew.

20 Tan agawa a dia ed saya a taon saray totoo nen Nephi lamet so inerel da tan sinusunson da ra. Tan agawa a sikami so asunson anga ed akasabi kami ed mamabaybay a dalin ya atawag a Shem.

21 Tan agawa a sinalimbeñgan mi so ciudad na Shem, tan tinipon mi so saray totoo ed angaan na pakayari mi, ag la piga sikara so nilaban mi ed kadederal.

22 Tan agawa ed komatlo a lasus tan apataplo tan anem a taon ginapoan da lamet so ompegdat ed sikami.

23 Tan agawa a siak so akisalita ed saray totook, tan impurek ko ed sikara ed baleg a sagpot, ya ontalindeg ira a sitatalek ed arap na saray Lamanite tan milaban ira makaseñgeg ed saray bibii ya asawa ra, tan saray anak da, tan saray abong da, tan panagayaman da.

24 Tan saray salitak pinagalaw to ra a siñga kinmasil so liknaan da, a dia ed onia sikara so ag binmatik ed arap na saray Lamanite, balet sikara so tinmalindeg a sitatalek sumpa ed sikara.

25 Tan agawa a sikami so akilaban ed ñgayew mi a talomplo a libo sumpa ed limamplo a libo a ñgayew da. Tan agawa a tinmalindeg kami ed sikara ed ontan la a talek kanian sikara so binmatik manlapu ed arapan mi.

26 Tan agawa a sanen sikara so binmatik inosilan mi ra ed saray ñgayew mi, tan sikara so nabet mi lamet, tan sikara so tinalo mi; manwari ya ontan say biskeg na Katawan so angapo ed sikami; on, sikami so atilak ed inkasikami a dili, say Espiritu na Katawan ag nansiansia ed sikami; dia ed onia nanmaliw kami a makapoy a siñga saray kaagian mi.

27 Tan say pusok nanermen lapu ed saya a baleg a doknal ed saray totook, makaseñgeg ed karelmeñgan tan karumsisan da. Balet nia, sikami so linma sumpa ed saray Lamanite tan saray matatakew a Gadianton, anga ed abawi mi a kinayarian lamet so saray dalin a tawir mi.

28 Tan say komatlo a lasus tan apataplo tan siam a taon so linmabas. Tan dia ed komatlo a lasus tan limamplo a taon akigawaan kami na paknaan ed saray Lamanite tan saray matatakew a Gadianton, dia ed saya inapag mi so saraman a dalin a tawir mi.

29 Tan saray Lamanite initer da ed sikami so dalin a mamabaybay, on, angan saman so makisir a dalan a mamaarap ed abalaten. Tan initer mi ed saray Lamanite so amin a dalin a wala ed abalaten.