1 Yalishca jipa chai huatapillata cutin tiai callarirca macanajui Nefitacuna, Lamanitacunahuan. Masqui ñuca viñaj huambra cashpa, jatun viñai carcani; chaimanda Nefipaj llactapuracuna ajllahuarca ñuca paicunata pushaj cachun, nacashpa paicunapaj macanajuj runacunapaj pushaj.

2 Chaimanda yalishca jipa chunga sujta huatacunata charishpa ñuca rircani Nefitacunapaj macanajuj runacunapata ñaupashpa, Lamanitacunapaj contra; chaimanda quimsa patsaj ishcai chunga sujta huatacuna yalishca carca.

3 Yalishca jipa quimsa patsaj ishcai chunga canchis huatapi Lamanitacuna ñucanchipaman shamurca ninan jatun ushaihuan, shinashpa paicuna ñucapaj macanajuj runacunata manllachirca; chaimanda paicuna na macanajungapa munarca, huashaman ri callarirca vichai llactacunaman.

4 Yalishca jipa ñucanchi chayarcanchi Angola llactaman, llactata japircanchi, ima ruranacunata rurarcanchi ñucanchimanda huacaichiringapa Lamanitacunamanda. Yalishca jipa llactata shinlliyachircanchi ñucanchi ushaihuan; ashtahuangari masqui tucui ñucanchi shinlliyachishca cajpipash Lamanitacuna ñucanchipaman shamurca llactamanda calpachircapash.

5 Paicunapash Davidpaj llactamanda ñucanchita calpachirca.

6 Ñucanchi purishpa rircanchi chayarcanchipash Josuépaj llactaman, imami carca indi huashajuj lado manñacunapi, jatun mama cocha pata ladoman.

7 Yalishca jipa ñucanchi llactapuracunata tandachircanchi ñapash imashna usharishca, shujllapi tandachi ushangapa.

8 Ashtahuangari riqui, alpa jundashca carca shuhuacunahuan, Lamanitacunahuan; masqui jatun tucuchi tiajpipash ñuca llactapuracunapaj jahuapi, paicuna na arrepentirirca paicunapaj na ali ruraicunamanda; chaimanda tiarca yahuar huañuchishpa tucuchicunapash tucui alpa jahuallapi, ishcandicunapi Nefitacunapi, Lamanitacunapipash; cai carca revoluciónbacha tucui alpa jahuapi.

9 Cunan, Lamanitacuna shuj jatun mandajta charirca, paipaj shuti Aarón carca; ñucanchipaj contra shamurca chuscu chunga chuscu huaranga macanajuj runacunahuan. Riqui, ñuca paita chimbapurarcani chuscu chunga ishcai huarangacunahuan. Yalishca jipa ñuca paita misharcani ñucapaj macanajuj runacunahuan chaimanda ñuca ñaupamanda calparca. Riqui, tucui cai rurashca carca, quimsa patsaj quimsa chunga huatacuna yalishca carca.

10 yalishca jipa Nefitacuna paicunapaj na ali ruraicunamanda arrepentiri callarirca, huacai callarircapash imashna achil villachishca carca Samuel achil villachij; riqui ni maijan runa na alichi usharca imami paipaj propio carca, shuhuacunamanda, shujpata japijcunamanda, huañuchijcunamanda, hechiceríacunamanda, brujeríacunamanda imami tiarca alpapi.

11 Shina tiai callarirca quijaricuna, huacaicunapash tucui alpacunapi cai cuzascunamanda, ashtahuanbacha Nefipaj llactapuracunapi.

12 Yalishca jipa imaura ñuca, Mormón, ricurcani paicunapaj huacaicuna, quijaricuna, paicunapaj llaquiricunapash Apunchijpaj ñaupapi, ñuca shungu cushijui callarirca ñuca ucupi, yachashpa Apunchijpaj shungumanda llaquinacunata, longanimidadpash, chaimanda yashpa pai shungumanda llaquij canga paicunahuan paicuna cutin ali llactapuracunaman tigrachun.

13 Ashtahuangari riqui cai ñuca cushijui yanga carca, imashpa paicunapaj llaquiricuna na carca arrepentimientopa, Diospaj alicaimanda; ashtahuangari llaquichi tucushcacunapaj llaquirina carca, imashpa Apunchij na punllan punllan saquinga paicunata juchapi cushijuita charichun.

14 Paicuna Jesúspaman na shamurca faquirishca shungucunahuan, shuj cazuj amujlla espíritucunahuan, ashtahuangari Diosta llaquichirca, huañungapa munarcapash. Shina cashpapash macanajurca espadahuan paicunapaj causaicunamanda.

15 Yalishca jipa ñuca llaquirina ñucapaman cutin tigramurca, ñuca ricurcani ninan juyai punlla paicunapa yalishca carca, ishcandi temporalpash, espiritualpash; ñuca ricurcani huaranga urmanajujta tucui yachajta paicunapaj Diosta na cazuipi, lomalla tandachishca mapa layapash alpa jahuallapi. Shina quimsa patsaj chuscu chunga chuscu huatacuna yalishca carca.

16 Yalishca jipa quimsa patsaj chuscu chunga picha huatapi Nefitacuna Lamanitacunapaj ñaupamanda calpai callarirca; cati tucushca carca imaura paicuna Jasónpaj alpaman chayangacaman, nara jarcai ushashca cajllapita paicunapaj caruyaipi.

17 Cunan, Jasónpaj llacta ladolla carca pamba maipi Ammarón Apunchijman tandachishpa quilcashcacunata saquishca carca, ama tucuchishca cachun. Riqui ñuca rishca carcani Ammarónpaj shimimanda, japircani Nefipaj jirru fangacunata, tandachishpa quilcashcata rurarcanipash Ammarónpaj shimicunamanda.

18 Nefipaj jirru fangacunapi shuj tucui tandachishpa quilcashcata rurarcani tucui na ali ruraicunamanda, millanayaicunamandapash; ashtahuangari cai jirru fangacunapi saquircani rurashpa tucui tandachishpa quilcashcata paicunapaj na ali ruraicunamanda, millanayaicunamandapash, riqui, shuj catilla ricuchita na alita ruraicunamanda, millanayaicunamandapash ñuca ñavicunapi cashca ricui ushashcamanda runapaj ñangunata.

19 Ay ñucamanda paicunapaj na ali ruraicunamanda; ñuca shungu jundashca can llaquirihuan paicunapaj na ali ruraicunamanda, tucui ñuca punllacuna; shina cashpapash, ñuca yachani ñuca vichai alsashca casha chai tucuri punllapi.

20 Yalishca jipa cai huata Nefipaj llactapuracuna cutin calpachi tucurca. Yalishca jipa ñucanchi calpachi tucurcanchi imaura vichai alpaman chayangacaman imata shutichircanchi Shem.

21 Yalishca jipa ñucanchi Shempaj llactata shinlliyachircanchi, tandachircanchi ñucanchi llactapuracunapi usharishcata, imashpapash tucuchinamanda paicunata quishpichita uhaipapash canchi.

22 Yalishca jipa quimsa patsaj chuscu chunga sujta huatapi cutin ñucanchipaman shamui callarirca.

23 Yalishca jipa ñuca llactapuracunaman parlarcani, cutin nircani jatun ushaihuan, na manllaihuan shayari ushachun Lamanitacunapaj ñaupapi macanajuchunbash paicunapaj huarmicunamanda, paicunapaj huahuacunamanda, paicunapaj huasicunamanda, paicunapaj causana ucucunamandapash.

24 Ñuca shimicuna jatarichirca asha shinllicaita, shinashpa paicuna na calparca Lamanitacunapaj ñaupamanda, ashtahuangari manllai illa shayarirca paicunapaj contra.

25 Yalishca jipa ñucanchi macanajurcanchi quimsa chunga huaranga macanajuj runacunahuan picha chunga huaranga macanajuj runacunapaj contra. Yalishca jipa ñucanchi shayarircanchi shinllipacha chaimanda ñucanchi ñaupamanda calparca.

26 Yalishca jipa imaura paicuna calpajpi catircanchi ñucanchi macanajuj runacunahuan, cutin macanajurcanchi paicunata misharcanchipash; shina cashpapash Apunchijpaj ushai na ñucanchihuan carca; ari, jichui tucushca carcanchi, Apunchijpaj Espíritu na ñucanchipi carca; chaimanda irquiyarcanchi ñucanchi huauquicunashna.

27 Ñuca shungu llaquirirca ñuca llactapuracunapaj cai jatun llaquimanda, paicunapaj na ali ruraicunamanda, paicunapaj millanayaicunamandapash. Ashtahuangari riqui, rircanchi Lamanitacunapaj contra, Gadiantónpaj shuhuacunapaj contra, imaura ñucanchi cutin japingacaman ñucanchi chasquina alpacunata.

28 Quimsa patsaj chuscu chunga iscun huata yalirca. Quimsa patsaj pichachunga huatapi Lamanitacunahuan, Gadiantónpaj shuhuacunahuanbash tratadota rurarcanchi, imapi ñucanchi chasquina alpacunata chaupishca saquirirca.

29 Lamanitacuna ñucanchiman vichai alpata curca, ari, quichiji ñan imata urai alpaman apajcaman. Ñucanchi Lamanitacunaman curcanchi tucuilla urai alpata.