1 Oh met, kilang, I pahn koasoi ong kisehn luhwen aramas pwukat me pahn mourla, ma Koht pahn ketin ketikihong irail ei koasoi kan, pwe irail en kak ese soahng kan duwen arail pahpa kahlapoko; ei, I koasoi ong kumwail, kumwail kisehn luhwen peneinei en Israel; oh iet akan koasoi kan me I pahn koasoia:

2 I men kumwail en ese me kumwail iei kisehn peneinei en Israel.

3 I men kumwail en ese me kumwail anahne koluhla, ma soh, kumwail sohte kak komourla.

4 I men kumwail en ese me kumwail anahne pwilikihdi noumwail dipwisou en mahwin kan, oh dehr pereniki kamaramas, oh dehr pwurehng alehda, ihta ma Koht ketin mahsanihong kumwail.

5 I men kumwail en ese me kumwail anahne wehwehkihda duwen amwail pahpa kahlapoko, oh koluhkihla dipamwail oh amwail wiewia suwed koaros, oh kamehlele Sises Krais, me ih iei Sapwellimen Kohto, oh me e kamakamala rehn mehn Suhs akan, oh sang ni manaman en Sahmo e ketin iasadahr, me elehiong eh ketin powehdi mehla; oh pil sang ih en kasohrehla medek en mehla.

6 Oh e ahpw ketikihda iasadahn me mehla kan, me elehiong aramas pahn iasada oh kesihnen mwohn sapwellime mwoalen kopwungo.

7 Oh e ketin ketikihdo komourpen sampah, me elehiong mehmen me pahn dierek mwakelekel mwowe ni rahn en kopwungo pahn mweimweiong en iang kousoan mwohn silangin Koht nan sapwellime wehi, en iang pwihn en koul nanleng kokoulki kaping sohte uhdi ong Sahmo, oh ong Sapwellimehu, oh ong Ngehn Sarawi, me wia Kohtehmen, nan mour peren me sohte imwi.

8 Eri koluhla, oh papidaisla ni mwaren Sises, oh koledi rongamwahu en Krais, me pahn mih mwohmwail, kaidehnte sang nan pwuhk wet ahpw pil sang nan pwuhk me pahn kohdo rehn Mehn Liki kan sang rehn mehn Suhs kan, me wia pwuhk me pahn kohsang Mehn Liki kan kohdohng kumwail.

9 Pwe kilang, kahrepen met e wie ntintingdi pwe kumwail en kak kamehlele mwo; oh ma kumwail kamehlele mwo a kumwail pahn pil kamehlele met; oh ma kumwail kamehlele met kumwail pahn wehwehki duwen amwail pahpa kahlapoko, oh pil doadoahk kapwuriamwei kan me wiawi rehrail sang ni manaman en Koht.

10 Oh kumwail pahn pil ese me kumwail wia kisehn luhwen peneinei en Seikop; eri kumwail iang wadawadiong rehn aramas en tepin inouo; oh ma kumwail kamehlele Krais, oh papidaila, nan pihl mahs, mwuri a kisiniei oh iangahki Ngehn Sarawi, ideidawehn karasaras en atail Sounkomouro, nin duwen dahme e ketin mahsaniong kitail, e pahn mwahu ong kumwail ni rahn en kopwungo. Ahmen.