1 Kilang ngehi, Moronai, kanekelahr ehn ei pahap, Mormon, eh nting. Kilang, mie ekei mehkot me I pahn ntingih, me ei pahpa ndahiongie I en wia.

2 Oh met kedekedeo mwurin mahwin lap oh kapwuriamwei me wiawi Komora, kilang, Mehn Nihpai kan me pitila oh kohla nan wehin palieir kan Mehn Leimen kan rapahkin irail, lao irail koaros kamwomwala.

3 Oh ei pahpa pil kamakamala rehrail, oh ngehi kelehpw me luwehdi pwe I en ntingih soi en kamwomwalahn nei aramas akan. Ahpw kilang, irail solahr mie, oh I pahn kanekehla kehkehlik en ei pahpao. Oh I sohte ese ma irail pahn kemeiehla.

4 Eri I pahn ntingih oh ekihla poadoapoad kan nan pwehl; oh e sohte katepe wasa I pahn kohla.

5 Kilang, ei pahpao wiahda poadoapoad wet, oh e ntingihdier kahrepehu. Oh kilang, ma mie dewe pohn pileit wet I pil pahn ntingihdi, ahpw solahr dewe; oh solahr met rehi, pwehki I kelehpwlahr. Ei pahpao kamakamala nan mahwin, oh ei peneinei koaros, oh solahr kempoakepahi de pil wasa I kak kohla; oh I sohte ese ia uwen werei me Kauno pahn mweidehng ien momour.

6 Kilang, sounparehr pahpwiki dauliher ketidohn atail Kaun oh Sounkomouro.

7 Oh kilang, Mehn Leimen akan pwakihdier oh kemehla nei aramas akan, Mehn Nihpai kan, sang nan ehu kahnihmw kohla nan ehu oh sang ehu wasa kohla nan ehu wasa, lao irail sohrala; oh arail pwupwidi me lap mehlel; ei, kamwomwalahn nei aramas en Mehn Nihpai kan me lap oh kapwuriamwei.

8 Oh kilang, ie limen Kauno me ketin wiahier met. Oh pil kilang, Mehn Leimen akan pil mahwinpenehr nan pwungarail; oh pohn sahpwo pwohn kin kapwkapwurehiong kamaramas oh mahwin; oh sohte me ese imwin mahwin.

9 Oh met, kilang, I solahr pahn kosoia duwen irail, pwe sohlahr ekei aramas ihte Mehn Leimen akan oh pwihn lipirap akan me mihmi pohn sahpwo.

10 Oh sohte me ese duwen Koht mehlelo ihte tohn padahk en Sises ko, me mihmi nan sahpwo lao wiewia suwed en aramas akan laudla me kahrehda Kauno sohte mweidehng irail en mihmi rehn aramas akan; oh sohte me ese ma irail mihmi pohn sahpwet.

11 Ahpw kilang, ei pahpao oh ngehi kilang irailehr, oh irail soweseikihtehr.

12 Oh mehmen me pahn alehdi nting pwukat, oh sohte pahn kauwe pwehki sohitar akan me mih loale, iei ih me pahn esehla soahng kan me lapasang mepwukat. Kilang, ngehi Moronai; ma e kak, I pahn kasalehiong kumwail soahng koaros.

13 Kilang, I kaimwsekalahr ei koskosoia duwen aramas pwukat. Ngehi nein Mormon pwutak, oh ei pahpao wia emen kadaudok en Nihpai.

14 Oh ngehite me ekihla poadoapoad pwukat ong Kauno; pileit ko sohte kesempwal, pwehki kosonned en Kauno. Pwe mehlel e ketin mahsanihier me sohte emen pahn alehda pileitko pwe en kepwehpwehkihla; ahpw nting kan kesempwal mehlel; oh mehmen me pahn kapwarahda, Kauno pahn ketin kapaiada ih.

15 Pwe sohte emen kak ahneki manaman en kapwarahda nan marain ihte ma Koht ketin ketikihong ih; pwe Koht ketin kupwuriki me e pahn wiawi sang ni loaloapwoat ong sapwellime klohri, de ong sawasepen sapwellimen Kauno aramas me wiahda inou mahs oh salongala ahnsou werei.

16 Oh meid pai ih me pahn kapwarahda nan marain; pwe e pahn kohdohsang nan rotorot ong nan marain, nin duwen mahsen en Koht; ei, e pahn kohsang nan pwehl, oh e pahn marain sang nan rotorot, oh aramas akan pahn wehwehkihda; oh e pahn wiawi sang ni manaman en Koht.

17 Oh ma mie sohitar kan e wia sohitar en aramas. Ahpw kilang, se sohte ese wasa sohitar; eri Koht me ketin mwahngih soahng koaros; eri, mehmen me pahn kauwe, mweidehng en tehk mwahu pwe e de pahn mihmi nan keper en nan kisiniei en ehl.

18 Oh mehmen me pahn nda: Kasalehiong ie, ma soh, ke pahn kamakam—en ahpw kanaiehng pwe e de ruwese dahme Kauno sohte mweidada.

19 Pwe kilang, aramas me pahn kadeik ni sohte madamadau pahn pwurehng kadeiko; pwe nin duwen eh doadoahk kan e pahn ale pweipweiki; eri, mehmen me pahn kaloke emen pahn alehdi kalokepe sang Kauno.

20 Kilang dahme pwuhk sarawi mahsanih—aramas sohte pahn kaloke, de pahn kadeik; pwe Kauno mahsanih, ei pwukoa kadeik oh dupuk, oh I pahn kapwungala.

21 Oh mehmen me pahn akamaiong oh uhwong sapwellimen Kauno doadoahk, oh uhwong sapwellimen Kauno aramas en inou me wia peneinei en Israel, oh pahn nda: Se pahn kawehla sapwellimen Kauno doadoahk, oh Kauno sohte pahn tamataman sapwellime inou me e ketin wiahiong peneinei en Israel—aramaso mihmi nan keper en palidi oh lekidekla nan kisiniei;

22 Pwe sapwellimen Kauno koasondi poatoapoat kan pahn kohkohwei, lao sapwellime inou kan koaros pahn pweida.

23 Rapahki kokohp en Aiseia kan. Kilang, I sohte kak ntingihdi. Ei, kilang I ndaiong kumwail, me souleng kan me tihenglahr mwohi, me sapwasapw pohn sahpwet, pahn peki, iei pahn peki rehn Kauno sang nan pwehl; oh nin duwen Kauno eh ketin ieias e pahn ketin tamataman inou me e ketin wiahiong irailehr.

24 Oh e ketin mwahngih arail kapakap kan, me irail kapakapki riarail akan. Oh e ketin mwahngih arail pwoson, pwehki ni mware irail kak kamwakid nahna kan; oh ni mware irail kak wiada rer en sahpw; oh sang ni manaman en sapwellime mahsen irail kahrehiong imweteng kan rengkidi nan pwehl; iei, kisiniei mwehl kan sohte kak kaweirailla, de pil mahn lawalo kan de pil sineik poisin kan, pwehki manaman en sapwellime mahseno.

25 Oh kilang, arail kapakap kan pil ong ih me Kauno pahn ketin mweidehng en kapwarahda mepwukat.

26 Oh sohte me anahne nda soahng pwukat sohte pahn pweida, pwe e udahn pahn pweida, pwe Kauno me ketin mahsanih; pwe e pahn kohsang nan pwehl, sang nin limen Kauno, oh sohte me kak kauhdi; oh e pahn wiawi ni ahnsou me aramas pahn nda me doadoahk kapwuriamwei solahr wiawi; oh e pahn kohdo rasehng aramas men me koasoakoasoi sang rehn me mehlahr.

27 Oh e pahn kohdo ni ahnsou me ntahng souleng kan pahn pekipek rehn Kauno, pwehki pwihn suwed rir kan oh doadoahk en rotorot kan.

28 Ei, e pahn kohdo ahnsou me aramas pahn lahlahwe manaman en Koht, oh mwomwohdiso kan pahn saminla oh aklapalapkihla pohnmwahsohn nan mohngiongarail kan; iei, ahnsou me kaun en mwomwohdiso kan oh sounpadahk kan pahn kohkihda arail pohnmwahso nan mohngiongarail kan, me kahrehda arail noahroke irail akan me kin iang arail mwomwohdiso kan.

29 Ei, e pahn kohdo ahnsou me pahn mie rohng en kisiniei, oh kisinieng kehlail, oh edied en samin nan wehwe nan sahpw en liki kan;

30 Oh aramas pahn rong duwen mahwin kan, rohng en mahwin kan, oh rerrer en sahpw kan.

31 Ei, e pahn kohdo ahnsou me samin laud pahn mih pohn sampah; kamaramas pahn wiawi, oh pirap, oh likamw, oh mwekid en ketewehdi kan, oh nenek kan, oh soangsoangen wiewia suwed kan; ahnsou me aramas tohto pahn nda, E sohte wiada mehkot ma ke wia me, de wia mwo, pwe Kauno pahn utunguhkada ni imwin rahno. Ahpw meid suwediong soangen aramaso, pwe irail mihmier nan kahpwal en pahtou oh nan sahl en dihp kan.

32 Ei, e pahn kohdo ahnsou me mwomwohdiso kan me pahn wiawihda pahn nda: Kumwail kohdo rehi oh kumwail kak pwainkihda dipamwail kan noumwail mohni kan.

33 Oh kumwail aramas suwed oh apwal oh keptakai, dahme kumwail wiahkihda mwomwohdiso ong pein kumwail pwe kumwail en kepwehpwehkihla? Dahme kumwail wekidalahki mahsen sarawi en Koht, pwe kumwail en kihong palingenomwail kan kahpwal en lekidekla? Kilang, kumwail kilang kaudiahl kan en Koht; pwe kilang, ahnsou pahn kohdo ni rahn me mepwukat koaros pahn pweida.

34 Kilang, Kauno ketin kasalehiong ie soahng kesempwal oh kapwuriamwei kan me pid duwen dahme pahn kereniongehr kohdo, ni rahno me mepwukat pahn kohdo rehmwail.

35 Kilang, I koasoi ong kumwail duwehte me kumwail mihmi rehi, ahpw met soh. Ahpw kilang, Sises Krais ketin kasalehiong ie kumwail, oh I ese amwail wiewia kan.

36 Oh I ese me kumwail kekeid nan pohnmwahsohn mohngiongamwail kan; oh sohte ihte ekeite me sohte pohnmwahsohla nan mohngiongarail akan, ong ni likawih likou kaselel kan, ong noahrok, oh akamai, oh aklemei, oh kailok kan, oh soangsoangen wiewia suwed kan; oh amwail mwomwohdiso kan, iei, emen emen kumwail, saminlahr pwehki pohnmwahsohn nan mohngiongamwail kan.

37 Pwe kilang, kumwail poakehng mohni, oh amwail dipwisou kan, oh amwail likou kaselel kan, oh kalinganpen amwail mwomwohdiso kan, laud sang amwail poakehng me semwehmwe kan oh anahn akan, me soumwahu kan oh apwal akan.

38 Oh kumwail me saminlahr kan, kumwail me liksansalamwahu kan, kumwail sounpadahk kan, me kin netikinkumwailahng soang kan me pahn kaweikumwailla, dahme kumwail kasaminehkihla mwomwohdiso sarawi en Koht? Dahme kumwail namenengki alehda mwaren Krais? Dahme kumwail sohte kin medewehki kamwahupe lap en peren poatoapoat sang lokolok sohte imwi—pwehki kepingahkan en sampah?

39 Dahme kumwail kin perenki dahme sohte mourih, oh mweidala me mehn mwonge kan, oh me apwal kan, oh me sohte arail likou kan, oh me soumwahu oh me apwal akan en daulihuk, oh sohte pohnese irail?

40 Ei, dahme kumwail kin wiahkihda amwail pwihn suwed rir kan pwe kumwail en kepwepwehkihla, oh kahrehda lihodi kan pen mwahiei mwohn Kauno, oh pil seri sopwoupwou kan en mwahiei mwohn Kauno, oh pil ntahn arail pahpa kan oh arail pwoud kan en pekipek ong Kauno sang nan pwehl, pwe en dupukiong pohmwail?

41 Kilang, kedlahs en dupuk tentenek pohmwail; oh ahnsou kerendohr me e pahn dupukiong kumwail ntahn souleng kan, pwe e sohte pahn mweidehng arail pekipek en doudoulahte.