Li
Tzol’leb’ ut Sumwank

1 Chex’ab’inq, ex tenamit re lin iglees, chan lix yaab’ xkux li nawan chaq taqe’q, ut li wan xnaq’ ru sa’ xb’eeneb’ chixjunil li winq; relik chi yaal, ninye chi yaal: Chex’ab’inq chaq chi najt, ex tenamit, ut laa’ex li wankex sa’eb’ li ch’och’ sa’ xyi li palaw, ab’ihomaq sa’ komonil.

2 Xb’aan naq chi yaal lix yaab’ xkux li Qaawa’ wan chiruheb’ chixjunil li winq, ut maajun wan li tixkol rib’; ut maajun xnaq’ uhej wan li ink’a’ taa’iloq, chi moko xikej li ink’a’ taa’ab’inq, chi moko ch’oolej li ink’a’ taa’ok chi sa’.

3 Ut eb’ laj po’resihom ch’oolej te’k’ob’e’q rik’in xnimal li rahil ch’oolejil; xb’aan naq lix maa’usilaleb’ taayeemanq chaq sa’ xb’eeneb’ li kab’l, ut lix muqmuukil b’aanuhomeb’ taak’utb’esimanq.

4 Ut lix yaab’ kuxej re tije’k taawanq chiruheb’ chixjunil li tenamit, rik’in lix tz’uumaleb’ re lin tzolom, li keb’insik’ ru sa’eb’ li roso’jik kutan a’in.

5 Ut eb’ a’an te’elq chaq ut maajun taaramoq ruheb’, xb’aan naq laa’in li Qaawa’ keb’intaqla.

6 K’ehomaq reetal, a’in li wankilal nink’e, ut li wankilal k’eeb’il reheb’ lin moos, ut li waatin re xtikib’ankil lix huhil lin taqlahom, li kink’e reheb’ re xpuktesinkil eere, laa’ex li wankex sa’ li ruchich’och’.

7 Jo’kan ut, chexxuwaq ut chexsiksotq, ex tenamit, xb’aan naq li k’a’ru kintaqla xyeeb’al laa’in li Qaawa’ chi sa’, a’an taatz’aqloq ru.

8 Ut chi yaal ninye eere, naq eb’ li neke’el chaq re xk’amb’al li esilal a’in reheb’ li wankeb’ sa’ li ruchich’och’, reheb’ a’an k’eeb’il wankilal re tz’apok chaq jo’ sa’ ruchich’och’ jo’ ajwi’ sa’ choxa, eb’ li ink’a’ neke’paab’an ut li neke’xpo’resi xch’ool;

9 Relik ut chi yaal, re xtz’apb’aleb’ chaq choq’ re li kutan naq taahoymanq chaq lix josq’il li Dios sa’ xb’eeneb’ laj maak chi maak’a’ xb’isb’al—

10 Choq’ re li kutan naq li Qaawa’ taachalq re xq’ajkamunkil li junjunq chi winq a’ yaal jo’ chanru xk’anjel, ut re b’isok re li junjunq chi winq jo’ chanru li b’isleb’ li xb’isok wi’ re li rech winqilal.

11 Jo’kan naq lix yaab’ xkux li Qaawa’ wan toj sa’ xmaril li ruchich’och’, re naq chixjunil li te’ajoq re ab’ink te’ruuq chi ab’ink:

12 Kawresihomaq eerib’, kawresihomaq eerib’ choq’ re li k’a’ru toj chalel, xb’aan naq ak taahaye’q chaq li Qaawa’;

13 Ut lix josq’il li Qaawa’ wan chi lochlo, ut lix yok’leb’ ch’iich’ atisinb’il chaq sa’ choxa, ut taat’ane’q sa’ xb’eeneb’ li wankeb’ sa’ li ruchich’och’.

14 Ut lix tel li Qaawa’ taak’utb’esimanq; ut taachalq xkutankil naq eb’ li ink’a’ te’ab’inq re lix yaab’ xkux li Qaawa’, chi moko xyaab’ xkuxeb’ lix moos, chi moko te’xk’e xxik rik’in li raatineb’ li profeet ut eb’ li apostol, te’isiiq chaq sa’ xyanq li tenamit;

15 Xb’aan naq eb’ a’an ke’el chaq rik’ineb’ lin k’ojob’anb’il k’anjel, ut ke’xq’et lin sumwank li junelik nakana;

16 Ink’a’ neke’xsik’ li Qaawa’ re xxaqab’ankil lix tiikilal; li junjunq b’an chi winq nab’eek chiru tz’aqal lix b’e, ut chirix xjalam-uuch tz’aqal lix dios, li wan xjalam-uuch chanchan li ruchich’och’, ut lix winqul a’an chanchan re jun pak’b’il dios, li naq’eelo’ ut taa’oso’q aran Babilonia, sa’ ajwi’ Babilonia li xnimal ru, li taat’ane’q.

17 Jo’kan ut, laa’in li Qaawa’, xb’aan naq kinnaw li nimla rahilal li taachalq sa’ xb’eeneb’ li wankeb’ sa’ li ruchich’och’, kinb’oq chaq inmoos aj Jose Smith, alalb’ej, ut kiwaatina chalen chaq sa’ choxa, ut kink’e taqlahom re;

18 Ut kink’e ajwi’ taqlahom re jalaneb’ chik, re te’xch’olob’ li k’a’aq re ru a’in chiru li ruchich’och’; ut chixjunil a’in re naq taaruuq chi tz’aqlok ru li b’arwan tz’iib’anb’il chaq xb’aaneb’ li profeet—

19 Li k’a’ru q’un xmetz’ew re li ruchich’och’ taachalq ut tixt’an chaq li k’a’ru nim xwankil ut kaw xmetz’ew, re naq li winq ink’a’ tixk’e xna’leb’ li rech winqilal, chi moko tixkanab’ rib’ chiru xtel li tz’ejwalej—

20 Re b’an naq li junjunq chi winq taa’aatinaq sa’ lix k’ab’a’ li Dios li Qaawa’, a’an ajwi’ laj Kolol re li ruchich’och’;

21 Re naq li paab’aal taanimanq ajwi’ sa’ li ruchich’och’;

22 Re naq lin sumwank li junelik nakana taaxaqab’amanq;

23 Re naq lix tz’aqalil lin evangelio taaruuq taajultikaaq xb’aaneb’ li q’uneb’ xmetz’ew ut li moko nim ta xna’leb’eb’ toj sa’ xmaril li ruchich’och’, ut chiruheb’ li rey ut eb’ laj taqlanel.

24 K’ehomaq reetal, laa’in li Dios, ut kinyehok re; we laa’in eb’ li taqlahom a’in, ut k’eeb’il chaq reheb’ lin moos sa’ xq’unaleb’ xmetz’ew, jo’ chanru li raatinob’aaleb’, re taaruuq te’k’ame’q chixtawb’al ru.

25 Ut a’ yaal jo’ ke’sach xna’leb’ taaruuq taak’ehe’q chi nawmank;

26 Ut a’ yaal jo’ ke’xsik’ xna’leb’ taaruuq te’tzole’q;

27 Ut a’ yaal jo’ ke’maakob’ taaruuq te’q’use’q, re taaruuq te’xjal xk’a’uxleb’;

28 Ut a’ yaal jo’ ke’wan chi tuulaneb’ xch’ool taaruuq te’k’ehe’q xnimaleb’ xmetz’ew, ut te’osob’tesiiq chalen chaq taqe’q, ut te’xk’ul xnawomeb’ chi jo’q’ehaq.

29 Ut chirix xk’ulb’al lix tz’iib’anb’il esileb’ laj Nefita, relik chi yaal, re naq lin moos aj Jose Smith, alalb’ej, taaruuq taawanq ajwi’ xwankil chixjaltesinkil ru sa’ xk’ab’a’ li ruxtaan li Dios, xb’aan lix wankilal li Dios, lix Hu laj Mormon.

30 Ut jo’kan ajwi’ eb’ li ke’k’ehe’ re li taqlahom a’in, taaruuq te’wanq xwankil chixk’eeb’al xk’ojob’ankil li iglees a’in, ut chixk’eeb’al chi k’utmank chaq sa’ aak’ab’ ut sa’ chaq li q’ojyin, li jun ajwi’ chi yaalil ut yo’yookil iglees chiru lix b’een chixjunil li ruchich’och’, li nasaho’ wi’ chi tz’aqal inch’ool laa’in, li Qaawa’, ut nin’aatinak re li iglees sa’ komonil, ut moko re ta li junjunq wan chi sa’—

31 Xb’aan naq laa’in li Qaawa’ ink’a’ naru nawil li maak rik’in yal ta jun miin raqal inkuyum;

32 A’b’anan ani naxjal xk’a’uxl ut naxb’aanu lix taqlahom li Qaawa’ taakuye’q xmaak;

33 Ut ani ink’a’ naxjal xk’a’uxl, rik’in a’an taa’isiiq chaq li saqen ajwi’ li ak kixk’ul; xb’aan naq lin Musiq’ moko junelik ta tixyal xq’e rik’in li winq, chan li Qaawa’ reheb’ li Teepal.

34 Ut jo’kan wi’chik, chi yaal ninye eere, ex li wankex sa’ li ruchich’och’: Laa’in li Qaawa’ wan inch’ool chixk’eeb’al chi nawmank li k’a’aq re ru a’in chiru chixjunil li tz’ejwalej;

35 Xb’aan naq maawa’in aj tihoneleb’ ru li winq, ut nawaj naq chixjunileb’ li winq te’xnaw naq chi seeb’ taachalq li kutan; maji’ nachal li hoonal, a’ut ak haye’k chaq re, naq taa’isiiq chaq li tuqtuukilal sa’ li ruchich’och’, ut laj tza taawanq xwankil sa’ xb’een tz’aqal li awa’b’ejinb’il xb’aan.

36 Ut jo’kan ajwi’ li Qaawa’ taawanq xwankil sa’ xb’eeneb’ lix santil paab’anel, ut taa’awa’b’ejinq sa’ xyiheb’, ut taakub’eeq sa’ raqb’a-aatin sa’ xb’een Idumea, malaj li ruchich’och’.

37 Tz’ilomaqeb’ rix li taqlahom a’in, xb’aan naq yaaleb’ ut paab’ajel, ut li profeetil aatin ut yeechi’ihom li wankeb’ chi sa’ te’tz’aqloq ru chixjunil.

38 Li k’a’ru kinye laa’in li Qaawa’, ak kinye, ut moko ninpatz’ ta inkuyb’al, ut us ta taa’oso’q li choxa ut li ruchich’och’, li waatin ink’a’ taa’oso’q; taatz’aqloq b’an ru chixjunil, ma rik’in tz’aqal xyaab’ inkux malaj rik’in xyaab’ xkuxeb’ inmoos, juntaq’eet na’el.

39 Xb’aan naq k’ehomaq reetal, ut ilomaq, li Qaawa’ a’an li Dios, ut li Musiq’ej naxch’olob’ resil, ut li esil yaal, ut li yaal nakana chi junelik q’e kutan. Amen.