Benneg 27
Paltiing a naited ken ni Joseph Smith a Propeta, iti Harmony, Pennsylvania, idi Agosto 1830 (History of the Church, 1:106–108). Iti pannakaisagana ti napammatian a panagserbi a pakaannongan ti tinapay ken arak ti sakramento, rimmuar ni Joseph a nagsapul iti arak. Sinabat ti nailangitan a mensahero ket inawatna daytoy a paltiing, a naisurat ti pasetna iti dayta a kanito ket iti sumaruno a Septiembre ti nabati. Danum itan ti maar-aramat a saan ketdi nga arak iti serbisio ti sakramento iti Simbaan.
1–4, Naisagana dagiti simbolo a maaramat iti pannakiranud iti sakramento; 5–14, Nasken a makiranud iti sakramento ni Cristo ken dagiti katulonganna manipud iti amin a dispensasion; 15–18, Isuotyo ti sangabukel a kabal ti Dios.
1 Denggem ti timek ni Jesucristo, ti Apom, ti Diosmo, ken ti Mannubbotmo, a napartak ken mannakabalin ti balikasna.
2 Ta, adtoy, kunak kenka, a saan a napateg no ania man ti kanem wenno ania man ti inumem no makiranudka iti sakramento, no la ketdi ta aramidem a naitalimudok ti imatangmo iti gloriak—a manglaglagip iti Amak iti bagik a naipaay kadakayo, ken ti nagsayasay a darak a para iti pannakaugas dagiti basolyo.
3 Gapuna, bilinenka, a dika gumatang iti arak wenno naingel a mainum dagiti kabusormo;
4 Gapuna, makiranudka iti awan sabali no di ti baro kenka; wen, iti daytoy ti pakabangonanto ti pagarian ti Amak iti daga.
5 Adtoy, nainsiriban daytoy kaniak; gapuna, dika masdaaw, ta dumteng ti oras a makiinumakto kenka iti bunga ti ubas iti daga, ken ni Moroni, nga imbaonko kenka a mangipalgak iti Libro ni Mormon, a naglaon iti pakabuklan ti agnanayon nga ebangheliok, a nangitalkak kadagiti tulbek ti kasuratan maipanggep iti kasuratan ni Efraim;
6 Ken kasta met ken ni Elias, a nangitalkak kadagiti tulbek ti pannakaipatungpal ti pannakaisubli dagiti amin a banag a nagaon iti ngiwat dagiti amin a nasantuan a propeta manipud idi punganay ti lubong, a maipanggep kadagiti maudi nga aldaw;
7 Ken kasta met ken ni Juan nga anak ni Zacarias, a ni Zacarias sinarungkaran (ni)(ni Elias) ken nangikarianna a maaddaanto iti anak a lalaki, a Juan ti nagannanto, ket mapnonto iti espiritu ni Elias;
8 A ni Juan imbaonko kadakayo, dagiti katulongak, a Joseph Smith, Jun., ken Oliver Cowdery, a mangorden kadakayo iti umuna a kinasaserdote nga inawatyo, tapno matudingan ken maordenankayo a kas ken ni Aaron;
9 Ken kasta met ni Elias a propeta, a nangitalkak kadagiti tulbek ti bileg a mangisubli kadagiti puso dagiti amma kadagiti annak, ken dagiti puso dagiti annak kadagiti amma, tapno saan a masaplit ti sangabukel a lubong iti lunod;
10 Ken kasta met ken ni Jose, ken ni Jacob, ken ni Isaac, ken ni Abraham, dagiti ammayo, a nagtalinaedan dagiti kari;
11 Ken kasta met ken ni Miguel, wenno ni Adan, ti ama ti amin, ti prinsipe ti amin, ti Sibibiag iti Agnanayon.
12 Ken kasta met ken ni Pedro, ken ni Santiago, ken ni Juan, nga imbaonko kadakayo, a nangordenak kadakayo ken namatalgedak kadakayo nga agbalin a kas apostol, ken naisangsangayan a saksi iti naganko, ken nangiggem kadagiti tulbek ti panagserbiyo ken kadagiti banag met laeng nga impalgakko kadakuada;
13 A nangtedak kadagiti tulbek ti pagariak, ken ti dispensasion ti ebanghelio kadagiti maudi a panawen; ken iti pannakatungpal dagiti panawen, a pangummongakto kadagiti amin a banag, dagiti adda iti langit, ken dagiti adda iti daga;
14 Ken kasta met kadagiti amin nga inted kaniak ti Ama iti ruar ti lubong.
15 Gapuna, itag-ayyo ti puspusoyo ket agrag-okayo, ken patibkerenyo dagiti lomoyo, ket alaenyo ti sibubukel a kabalko, tapno madaeranyo ti dakes nga aldaw, iti pannakaaramidyo iti amin, tapno makatakderkayo.
16 Agtakderkayo, ngarud, a napatibker dagiti lomoyo iti kinapudno, nga adda iti kabal ti kinalinteg, ken naitapar iti dapanyo ti pannakaisagana ti ebanghelio ti kappia, a nangibaonak kadagiti anghelko a maipakumit kadakayo;
17 A mangala iti kalasag ti pammati tapno kabaelanyonto a sanggaen amin dagiti nakaam-amak a pana dagiti nadangkes;
18 Ken alaenyo ti bistukol ti pannakaisalakan, ken ti espada ti Espirituk, nga ibukbokkonto kadakayo, ken ti balikasko nga ipalgakko kadakayo, ken nakanunongan a mangsagid kadagiti amin a banag a dawatenyo kaniak, ken agtalinaedkayo a napudno agingga nga umayak, ket maitag-aykayonto, tapno sadino man a yanko addakayonto met. Amen.